Mga Milagro kag mga Aparisyon—Kon Ngaa Indi Kinahanglanon

SANG yari sa duta, naghimo si Jesus sing madamo nga milagro. Ginhimo niya ang tubig nga alak, ginpakaon ang madamo nga tawo, gin-ayo ang masakiton, kag gintabog ang mga demonyo. Ang panudlo ni Jesus kag ang kamatuoran nga natuman niya ang mga tagna sa Biblia tuhoy sa Mesias nagkombinse sa madamo sang iya mga katubotubo. Ang iban nangatarungan sang subong sang masunod: “Kon mag-abot si Cristo, indi sia magahimo sing mga tanda nga kapin sa nahimo sining tawo [Jesus], magahimo bala sia?”—Juan 7:31.

Ang Katuyuan sang mga Milagro

Ano ang katuyuan sang mga milagro nga ginhimo ni Jesus? Ginapaathag sang Biblia nga si Jesus mangin ‘manalagna kaangay ni Moises.’ (Deuteronomio 18:15, 18) Ginhatagan ni Jehova nga Dios si Moises sing gahom sa paghimo sing pila ka milagro agod magpamatuod nga sia ang pangulo nga napilian sa paghilway sa mga Israelinhon gikan sa pagkaulipon sa Egipto. (Exodo 4:1-9, 30, 31) ‘Kaangay ni Moises,’ si Jesus naghimo sing mga milagro agod ipakilala ang iya kaugalingon subong ang Mesias, subong ang ginsaad nga Manughilway sang mga Judiyo.—Binuhatan 3:22.

Apang ang mga milagro ni Jesus nagpamatuod man nga nakabaton sia sing pinasahi nga gahom gikan sa Dios. Kon ang Ginharian sang Dios maggahom sa duta nga wala sing mga kasumpong, gamiton ni Jesus sing bug-os ang gahom nga iya ginpasundayag sa diutay nga kasangkaron sang yari sia sa duta. Sa pag-ilustrar, binagbinagon naton ang milagro tuhoy sa pila ka bilog nga tinapay kag mga isda. (Lucas 9:12-17) Sa bag-ong kalibutan sang Dios, pat-uron ni Jesus nga ang tanan nga katawhan may bastante nga makaon. (Salmo 72:16) Bulngon man niya ang tanan nga masakit kag balatian, sa amo ang matinumanon nga katawhan mabuhi sing dayon. (Bugna 21:4) Paagi sa paghimo sing tatlo ka narekord nga pagkabanhaw, ginpamatud-an niya ang iya ikasarang sa pagbanhaw sa minilyon gikan sa minatay.—Lucas 7:11-17; 8:40-56; Juan 5:28, 29; 11:11-44.

Isa ka Paagi sa Pagpakilala

Ang isa pa ka rason kon ngaa naghimo si Jehova sing mga milagro para sa Israel amo ang pagpamatuod nga indi maduhaduhaan nga sila ang iya pinili nga katawhan. (Deuteronomio 4:32-34) Ang benepisyaryo amo ang bug-os nga katawhan, indi ang pila lamang.

Sing kaanggid man, ang mga milagro sang nahaunang siglo isa sang mga pamatuod nga ginsaylo ni Jehova ang iya kahamuot gikan sa undanon nga Israel padulong sa nahaunang Cristianong kongregasyon. (Mateo 21:43; 27:51; Roma 9:6; 11:7) Ang madamo nga milagro nga ginhimo sang mga apostoles pamatuod nga nahamut-an sang Dios ang kongregasyon nga ginapangulohan sang Anak sang Dios, nga si Jesucristo.—Binuhatan 2:22, 43; 4:29, 30; Hebreo 2:3, 4.

Dugang pa, sadtong mga adlaw, ginabutang lamang sang mga tawo ang ila masakiton sa mga duog nga mahimo matup-an sang landong lamang ni Pedro, kag ang Biblia nagasiling nga ang mga gindala sa iya ‘nag-ayo ang tagsatagsa.’ (Binuhatan 5:15, 16) Ngaa, nian, wala nagaayo ang tanan nga nagakadto karon nga may pagtuo sa mga altar?

Indi Kinahanglan ang mga Aparisyon

Ang nahauna nga rason amo nga ang mga tanda kag mga milagro indi na kinahanglan agod pamatud-an nga ginsaylo sang Dios ang iya pabor gikan sa undanon nga Israel padulong sa matuod nga Cristianong kongregasyon. Sa isa ka sulat sa iya Cristianong mga kaupod, ginpaathag ni apostol Pablo nga ang milagruso nga mga dulot madula sa ulihi. Magaabot ang tion nga indi na ini mangin paagi sa pagpakilala sa matuod nga mga Cristiano.—1 Corinto 13:8-13.

Bisan ang pagtawag sa ngalan ni Jesus indi magpamatuod nga ang tawo isa ka matuod nga Cristiano. Sa iya Sermon sa Bukid, gintagna ni Jesus nga sikwayon niya ang mga nagatawag: “Ginuo, Ginuo, wala bala kami . . . maghimo sing madamo nga milagro sa imo ngalan?” Ano ang rason nga sikwayon ni Jesus ining mga nagahimo sing milagro? Sia nagasabat: “Wala gid ako makakilala sa inyo; palayo sa akon, kamo nga mga manugbuhat sing kalautan!” Maathag nga ang iban magahimo sing mga milagro sa ngalan ni Cristo, apang ang matuod mga impostor sila.—Mateo 7:22, 23, The Jerusalem Bible.

Ang Matuod nga Talaksan

Bangod sang nabinagbinag na, paano makilala ang matuod nga mga Cristiano karon? Naghatag si Jesus sing talaksan sang magsiling sia: “Ang maayo nga kahoy indi makapamunga sing malain nga bunga . . . Sa pagkamatuod, paagi sa ila mga bunga makilala ninyo sila nga mga tawo.” Sang adlaw antes sia mapatay, ginpahanumdom ni Jesus ang iya mga apostoles: “Paagi sa sini makilala sang tanan nga kamo mga disipulo ko, kon maghigugmaanay kamo.” Nagakahulugan ini nga ang paghimo sing mga milagro indi mangin talaksan sing dayon. Kundi dapat pamatud-an sang tanan ang ila kaugalingon nga mga disipulo sila ni Cristo paagi sa ila matuod nga gugma.—Mateo 7:18-20; Juan 13:34, 35.

Gani dapat bala ipasad ang imo pagtuo, bisan sa bahin lamang, sa “mga milagro” nga ginahimo karon sa ngalan ni Cristo? Ukon dapat bala ini ipasad sing bug-os sa kamatuoran nga masapwan sa Pulong sang Dios, ang Biblia? Importante gid nga usisaon sa kapawa sang Pulong sang Dios ang paggawi sang mga nagapangangkon nga mga alagad sang Dios.

Sa bug-os nga kalibutan karon, sin-o ang nagapabantala sang Pulong sang Dios kag nagatinguha sa pagkabuhi nahisanto sa sini? Sin-o ang kilala sa bug-os nga kalibutan sa ila paghiusa? Sin-o ang wala sing sablag sa pungsod, sa politika, sa rasa, ukon sa relihion sa tunga nila? Sin-o ang makugi nga nagabantala sing maayong balita sang Ginharian sang Dios? Kon subong isa ka sinsero nga tawo may dugang ka nga mga pamangkot, ang mga Saksi ni Jehova malipay sa paghatag sa inyo sing mga kamatuoran nga kinahanglan mo sa paghukom para sa imo kaugalingon. Indi magpangalag-ag palihog sa pagpakigkita sa mga Saksi sa inyo kaingod ukon sa ila lokal nga Kingdom Hall. Buligan nila kamo sa pagpahamtang sang imo pagsalig kay Jehova kag kay Jesucristo, nga iya Anak, kay “wala sing kaluwasan kay bisan sin-o nga iban.”—Binuhatan 4:12.

[Laragway sa pahina 10]

Ang pagpang-ayo nga mga milagro indi na kinahanglanon sa pagpakilala sa matuod nga Cristianong kongregasyon