Ngaa Magbag-o?
PILA lamang sa aton ang magabaton nga may yara kita talalupangdon nga mga kaluyahon. Daw ano ka matuod ang ginsiling sang taga-Scotland nga mamalaybay nga si Robert Burns: “O, kon hatagan lamang kita sang Gahom sing ikasarang nga makita ang aton kaugalingon subong sang pagkakita sang iban sa aton”! Huo, mahapos naton makita ang sayop sang iban kag mahimo nga maabtik kita sa pagtanyag sing laygay sa ila kon paano mag-uswag. Apang mahimo nga masaklaw kita sa panugda nga dapat naton bag-uhon ang aton batasan. Masaklaw ka bala?
Magdulog kita sa makadali kag handurawon ang isa ka himpit nga kalibutan nga sa diin ang tanan matinlo, mapagros, malipayon, kag bunayag; nga sa diin bisan ang mga yara sa awtoridad maluluy-on kag mapatugsilingon, interesado sa paghimo sing maayo para sa iban; nga sa diin wala sing kakagod, kag wala sing bisan sin-o nga nagahingalit sa iya isigkatawo; nga sa diin ang kabataan matinumanon sa mahigugmaon kag matinatapon nga mga ginikanan; nga sa diin wala sing pagsilabo sing kaakig—wala sing kasingki, wala sing krimen, wala sing imoralidad; nga sa diin ang mga tawo kinaugali nga nagasaligay kag malipayon; nga sa diin ang kabuhi may kalig-unan kag maayo.
Makita mo bala ang imo kaugalingon nga may duog sa isa ka kalibutan kaangay sina, kon magluntad man inang ginadamgo nga kalibutan? Ti, ang maayong balita gikan sa Biblia amo nga ina nga kalibutan magaabot sa sining duta sa indi madugay. Gani nian ang importante nga pamangkot amo: May yara ka bala batasan nga magaupang sa imo sa sinang matahom nga komunidad? Daw ano kabudlay, sa banta mo, ang pagtinguha agod makalipikar para sa kabuhi sa sina nga paraiso?—Isaias 65:17-25; 2 Pedro 3:13.
Bisan karon, sa wala pa ina nga bag-ong kalibutan, mapauswag mo bala ang imo kabuhi kon bag-uhon mo ang imo batasan kag panimuot? Kon amo, ngaa indi himuon ina? Posible ini. Dumduma, una sa tanan ang imo batasan gindihon kag ginmolde sang ispisipiko nga mga impluwensia, gani paagi sa kapin pa nga pagkontrol kag interes, posible nga dihunon mo liwat ang imo batasan bisan karon.
Apang, mahimo magaprotesta gihapon ikaw: ‘Apang magabag-o gid bala ako? Gintilawan ko na ini sang una, sa madamo na nga beses, apang napaslawan ako. Amo na lang ako sini, kag wala na ako sing mahimo pa!’
Binagbinaga si Pablo, isa ka apostol ni Jesucristo. (Roma 7:18-21) Si Pablo nagbag-o gikan sa isa ka masingki, nagapakamatarong sa kaugalingon nga manugpamatok sang mga Cristiano kag nangin isa ka Cristiano. Nagbag-o sia bangod luyag gid niya. Wala sia mag-ampo bangod sang mga kapaslawan ukon sang genetiko nga mga impluwensia. Wala sia magpati nga ang iya daan nga personalidad indi na gid mabag-o. Nagpanikasog sia sing daku. Apang nakabaton sia sing daku nga bulig.—Galacia 1:13-16.
Sa diin maghalin ini nga bulig?