“Agod nga Walay Mausik”
Sang koresponsal sang Magmata! sa Ghana
NAKILALA ko sia sa iya diutay nga talyer sa Labadi, sa distrito sang Accra, nga nagalagari kag nagasapiyo sa kinamot nga paagi upod ang makatilingala nga kusog. Ang iya ngalan amo si Adams Akuetteh. Sitenta anyos na sia kag nagapamanday sa nagligad nga 50 ka tuig.
Sang ginpamangkot ko sia kon ano ang iya ginkabig nga pinakadaku nga punto sa iya karera subong panday, nagsabat sia sa gilayon nga amo ang apat ka tuig nga ginhinguyang niya sa pagpatindog sang bag-o nga mga pasilidad sang sanga para sa Watch Tower Society sa Nungua, Ghana. Halin ini sang 1984 tubtob 1988.
“Ano ang ginhimo mo sa sadto nga konstruksion?” pamangkot ko.
“Nagtrabaho ako sa kongkreto kag nagbulig sa mga nagatakud sing atop.”
“Daw ikaw ang kapin nga nadumduman,” siling ko, “kon tuhoy sa mga lansang nga gingamit sa konstruksion.”
“A, huo, sa mga lansang. Ang mga lansang mahal katama sa Ghana, abi mo. Sadto, ang tunga sa kilo nga lansang nagabili sing duha pa tatlo ka dolyar [U.S.]. Gani nagsiling ako sa akon kaugalingon, ‘Mahimo bala naton gamiton liwat ang iban sang mga lansang? Tilawan ko ini.’
“Gani nagsugod ako sa akon kaugalingon nga ideya kag sa akon kaugalingon nga tion. Sang makita ako sang manugtatap sang proyekto, nalipay sia. Gintangdo niya ako sing permanente sa paghimo sini nga hilikuton. Gani sa sulod sang apat ka tuig, ginsuroy ko kada aga ang palibot sang konstruksion kag ginpanipon ang nahulog nga mga lansang. Mahalungon ko man nga gingabut ang lansang nga makit-an ko sa mga kahoy nga nagamit na.”
“Ginhaboy mo bala ang mga dupol na kag tiko?”
“Wala. Ang mga dupol gingamit liwat sa mahumok nga mga kahoy, ukon ginabarinahan anay ang matig-a nga kahoy agod magamit sa sini ang dupol nga mga lansang. Ang mga tiko mahalungon nga gintadlong ko sang martilyo.”
“Wala ka bala matak-i sa sini?”
“Mahimo nga matak-an ang isa nga batan-on pa, apang ako indi. Ginsugiran ako sang manugtatap nga bangod sang akon ginhimo ang Sosiedad nakakinot sing kuwarta, kuwarta ni Jehova, gani nalipay ako. Nalipay gid ako labi na kon makita ko ang mga tumpok sang nanuhaytuhay nga kadakuon sang natipon nga mga lansang nga nagataas. Kag nagasiling ako sa akon kaugalingon, ‘Aha! Karon una na ako sa mga nagatakud sing atop!’ Apang indi madugay maubos ang mga tinumpok. Nian gikan sa atop nagasinggit sila nga nagapangayo sing dugang pa! Gani gindasig ko pa ang pagpanadlong sang mga lansang.”
“Ano ang ginahimo mo karon nga natapos na ang konstruksion?”
“Nagbalik ako liwat sa bug-os tion nga pagministeryo, nga nagahulat tubtob mag-abot kamo sa pagpatindog sing ekstension sa sanga sang Ghana. Nian mangin didto ako, nga nagatadlong sang nagamit na nga mga lansang kag nagakinot sing kuwarta—nga may kalipay.”
Sa sulod sang apat ka tuig ginhimo niya ang isa ka trabaho nga kabigon sang iban nga manubo. Apang wala gid ini ginkabig nga manubo ni Adams Akuetteh, “ang manugtadlong sang lansang sa sanga sang Ghana.” Upod ang kalipay gintadlong niya ang mga lansang agod makakinot sing kuwarta para kay Jehova!
Amo man sina ang panghunahuna ni Jesus. Bisan pa wala sing latid ang iya milagruso nga gahom sa pagpamuad sang mga tinapay, nagsiling sia sa tapos sang pagkaon: “Tipuna ninyo ang mga tinipik nga nabilin, agod nga walay mausik.”—Juan 6:12.
[Piktyur sa pahina 31]
Si Adams Akuetteh, “ang manugtadlong sang lansang sa sanga sang Ghana”