Ang Pagtamod sang Biblia

Dapat Bala Naton Tumanon ang Aton mga Panaad?

ANG isa ka malipayon kuntani nga mag-asawa nagaatubang sing isa ka mabudlay nga problema. Sang nagligad nga mga tinuig, sang may daku sila nga problema sa pamilya, nanaad sila nga idonar ang ikapulo sang ila kita sa Dios kon lubaron niya ang ila problema. Karon, nga tigulang na sila kag nagapas-an sing wala ginapaabot nga problema sa kuwarta, nagapalibog sila, “Obligado bala kami nga tumanon ining panaad?”

Ang ila kahimtangan nagapadaku sang laygay sang maalam nga tawo batok sa padasodaso nga paghambal: “Maayo pa nga indi ka magsaad sangsa magsaad ka kag indi magbayad. Dili pagtuguti ang imo baba sa pagpapakasala sang imo unod, kag indi ka magsiling sa atubangan sang anghel nga sayop ini.”​—Manugwali 5:​5, 6.

Wala sing Maluya nga mga Balibad

Bisan pa ang indi serioso nga mga panumpa kag wala ginatuman nga mga saad kinaandan sa matinuguton nga katilingban karon, indi naton mapaabot nga patihan sang Dios ang ginahimohimo nga mga balibad; bisan gani ang mga negosyante nakahibalo sina. Ang isa ka artikulo nga “Integridad sa Negosyo: Wala bala Nagasinanto?” sa magasin sang negosyo nga Industry Week nanganduhoy: “Wala na namon ginasaligan ang mga tawo nga magsugid sing kamatuoran, nga maghimo sing husto sa baylo sang mapuslanon, nga magtuman sang ila mga pangako.” Samtang ang kombinyente nga mga kabutigan, subong sang “ginpadala ko na ang tseke,” mahimo nga patihan sang inutangan nga mga tawo, ang mga anghel indi gid malimbungan.

Indi buot silingon nga ginagamit sang Dios ang mga anghel agod ipatuman ang mga panaad suno sa paagi nga ang isa ka indi makatarunganon nga manugpahulam mahimo maggamit sing mga kriminal agod manukot sing dalagku sing interes nga mga bayad gikan sa makaluluoy nga mga biktima. Sa baylo, mahigugmaon nga ginagamit sang Dios ang iya anghel nga “mga espiritu para sa [makapalig-on] nga pag-alagad sa publiko, ginpadala sa pag-alagad para sa mga magapanubli sing kaluwasan.” (Hebreo 1:14) Subong amo sina, ang mga anghel sarang makahimo kag nagahimo sing bahin sa pagsabat sang aton sinsero nga mga pangamuyo.

Apang, kon padayon kita nga maghimo sing wala ginatuman nga mga saad sa aton mga pangamuyo, makapaabot bala kita sing mga pagpakamaayo sa Dios? Ang maalam nga tawo nagsiling: “Ngaa bala magkaakig ang matuod nga Dios sa imo tingog kag maglaglag [sa pila ka kasangkaron, sa dimagkubos] sang binuhatan sang imo mga kamot?”​—Manugwali 5:6b.

Sa amo, indi ang kahadlok sa isa ka manugtimalos nga anghel ang dapat magpahulag sa aton sa pagtuman sang aton mga panaad sa baylo nga maghimo sing mga balibad. Sa baylo, dapat naton pabilihan ang isa ka maayong kaangtanan sa Dios kag bunayag nga maghandum sang kahamuot sang Dios sa aton hilikuton. Subong sang matahom nga ginpabutyag sang ginsambit kaina nga mag-asawa: “Luyag namon makatigayon sing isa ka matinlo nga konsiensia sa atubangan sang Dios kag nagahandum sa paghikot suno sa iya kabubut-on.”

Maghupot sing Isa ka Matinlo nga Konsiensia

Agod makatigayon sing matinlo nga konsiensia nahanungod sa pagtuman sa isa ka panaad, dapat kita mangin bunayag sa aton kaugalingon. Sa pag-ilustrar: Ibutang ta nga may nakautang sa imo sing daku nga kantidad sang kuwarta apang bangod sang malain nga hitabo nasapwan niya ang iya kaugalingon nga indi makabayad sa imo. Ano ang kapin nga magapahamuot sa imo​—kon kalimtan niya ang bug-os nga utang subong imposible nga bayaran ukon kon sia sa dimagkubos maghimo sing kahimusan nga hulughulugan ikaw sing regular nga kantidad kon masarangan niya?

Sa amo man nga pangatarungan, ibutang ta nga ang isa ka padasodaso nga panaad nga ihugod ang imo bug-os nga tion ukon iban pa nga manggad sa nagakaigo nga Cristianong mga hilikuton indi matuman. Indi bala kita dapat magbatyag nga may obligasyon kita sa pagtuman sini suno sa ginatugot sang karon nga mga kahimtangan? “Kon ang pagkahanda yara,” sulat ni Pablo, “labi ini nga ginakahamut-an” bisan pa kon daku ukon diutay ang aton mahatag. (2 Corinto 8:12) Apang ano ang masiling sa mga panaad nga nahimo antes ang isa nakatigayon sing sibu nga ihibalo sa kamatuoran sang Biblia?

Sayop Ukon Dimakasulatanhon nga mga Panaad

Kon matun-an naton nga ang isa ka panaad mahigko ukon imoral, dapat naton ini buy-an kaangay sang mainit nga baga! (2 Corinto 6:​16-18) Mga halimbawa sang mahigko nga mga panaad:

◻ Mga panaad nga ginhimo sa butig nga mga dios ukon mga diosa, subong sang Babilonianhon nga “hara sang mga langit.”​—Jeremias 44:​23, 25.

◻ Batok sa kasuguan nga mga panaad, subong sang sumpa sang 40 ka lalaki nga indi magtilaw sang bisan anong pagkaon tubtob nga mapatay nila si apostol Pablo.​—Binuhatan 23:​13, 14.

◻ Mga panaad sang apostata nga nagasunod sa “mga panudlo sang mga demonyo, sang . . . mga tawo nga nagahambal sing kabutigan . . . , nagadumili sang pagpangasawa, nagasugo sa paglihi sa mga kalan-on nga ginatuga sang Dios nga pagbatunon nga may pagpasalamat sang mga nagatuo kag sibu nga nakakilala sang kamatuoran.”​—1 Timoteo 4:​1-3.

Gani, sing maathag, mahimo nga dapat naton sikwayon ang pila ka panaad nga nahimo sang una. Apang tuhoy sa mga panaad nga wala nagadalahig sing dimakasulatanhon, ngaa mangita sing balibad? Indi bala ang aton sibu nga ihibalo karon magahimo sa aton nga magpakita sing daku pa nga pagtahod sa nagligad nga mga panaad?

Binagbinaga ang Imo Nagligad kag Palaabuton nga mga Panaad

Nagakahulugan man ini nga dapat kita maghunahuna sing serioso antes magdugang sing bisan anong palaabuton nga mga panaad sa aton pagsimba. Ang mga panaad indi dapat gamiton sa pagpahulag lamang sa isa ka tawo nga maghimo ukon indi maghimo sing isa ka butang, subong sang pagpauswag sang tion nga ginahinguyang sang isa sa Cristianong pagsimba ukon maglikaw sa sobra nga pagkaon. Apang, wala mamatok si Jesus sa tanan nga mga sumpa, subong, halimbawa, kon ginakinahanglan sa isa ka korte sang kasuguan. Apang mahimo gid nga nagbutang sia sing limite tuhoy sa padasodaso nga mga pagpanumpa, kay nagpaandam sia: “Ginsiling tuhoy sa dumaan nga mga tion, ‘Dili kamo magsumpa kon indi ninyo pagtumanon, apang dapat ninyo tumanon ang inyo mga panumpa kay Jehova.’ Apang, nagasiling ako sa inyo: Dili gid kamo magsumpa.” (Mateo 5:​33, 34) Ngaa amo sini ang iya tindog? Indi na bala nagakaigo karon ang mga panaad?

Ang mga panumpa sang mga matutom sang dumaan nga mga tion masami nga may kondisyon. Sa hanuot nga pangamuyo nagapanaad sila kay Jehova, ‘Kon buligan mo ako sa sining problema, himuon ko ini kag ina para sa imo.’ Apang si Jesus nagsiling: “Kon magpangayo kamo sing bisan anong butang sa Amay, ihatag niya ini sa inyo sa akon ngalan.” Malayo sa pagrekomendar sing may kondisyon nga mga panaad sa mga matutom sang iya tion, ginpasalig sila ni Jesus: “Tubtob karon wala pa kamo makapangayo sing bisan ano sa akon ngalan. Pangayo kag magabaton kamo.”​—Juan 16:​23, 24.

Ining pagsalig sa ngalan, ukon palangakuan, ni Jesus dapat man magpaumpaw sa bisan kay sin-o nga nagabatyag gihapon sing sala bangod​—bisan pa magtinguha sia​—indi niya matuman ang iya saad sa Dios nga ‘natabinas niya.’ (Levitico 5:​4-6) Gani bisan pa wala naton ginapasapayanan ang aton mga panaad anay, indi lamang kita makapangamuyo sa ngalan ni Jesus kundi makaapelar kita sa Dios nga iaplikar ang halad nga gawad ni Jesus sa aton mga sala, kag makapakiluoy kita para sa kapatawaran sa ngalan ni Jesus. Sa amo mabaton naton “ang bug-os nga kalig-unan sang pagtuo, kay ang aton tagipusuon [natinluan] gikan sa isa ka malaut nga konsiensia.”​—Hebreo 10:​21, 22.

[Picture Credit Line sa pahina 28]

Mga pari nga nagapanaad sa Montmartre