Isa ka Bag-o nga Eskwelahan sa Aprika

Sang koresponsal sang Magmata! sa Nigeria

SANG Hulyo 1990 isa ka sulat ang ginbasa nga ginbangdan sang daku nga kasadya sang kapin sa 400 ka boluntaryo, mga Saksi ni Jehova, nga nagapuyo kag nagapangabudlay sa sanga talatapan sang Watch Tower Society sa Igieduma, Nigeria. Ang Ministerial Training School, nga ginpatok sa Estados Unidos sang 1987, manug-abot na sa Aprika, kag ang una nga mga klase pagahiwaton sa Igieduma!

Sa mga binulan nga nagsunod, naghanda ang pamilya Bethel para sa una nga klase.a Ang mga estudyante kag mga instruktor magakinahanglan sing mga dalayunan. Kulang ang mga hulot para sa mga bisita; 15 ka dugang pa nga hulot ang kinahanglanon. Gani ginsugdan nga himuon sang mga Saksi ang bodega nga mga hulot nga mangin matahom nga mga hulot puluy-an. Nagdalahig ini sang pagbutang sing mga tayl sa mga salog, pagpintura sa mga dingding, kag pagpakabit sing mga kurtina. Ang carpenter shop naghimo kag nagplastar sing mga katre, mga kabinet, kag mga lamesa. Bilang katapusan, ginpasulod ang mga bangko, mga suga para sa pagbasa, kag ang mga istante nga bulutangan sing libro. Ang mga istante ginpuno sing teokratiko nga mga publikasyon.

Dugang pa, ang hulot para sa pamilya ginhimo nga hulot-klasehan kag librarya para sa mga estudyante. Ang isa sang mga hulot sang infirmary nangin isa ka temporaryo nga opisina para sa mga instruktor kag ginbutangan sing mga lamesa, mga latok, kag iban pa nga kasangkapan pang-opisina. Samtang, sang ang balita tuhoy sa nagapakari nga eskwelahan ginapahibalo sa bug-os nga pungsod sa mga kombension kag sa mga asambleya sang mga Saksi ni Jehova, ginatos ka aplikasyon ang nagsugod sa pag-inabot gikan sa palaabuton nga mga estudyante.

Sang una nga semana sang Pebrero 1992, handa na ang tanan. Duha ka instruktor, si Michael Purbrick kag si Peter Nicholls, ang nag-abot gikan sa Britanya agod magtudlo sa una nga klase. Dugang sa 22 ka estudyante, tatlo ka palaabuton nga mga manunudlo ang nag-abot man, si Isaiah Mnwe, si Isaiah Olabode, kag si Pius Oparaocha. Mga taga-Nigeria ini nga mga Saksi nga hanason sa pagtudlo sa masunod nga mga klase.

Ang Katuyuan sang Eskwelahan

Ang bug-os nga Bethel malangkagon kag ginakunyag. Ngaa? Bangod sang mapuslanon nga epekto sang eskwelahan sa paghimo sing disipulo nga hilikuton sa Nigeria. Madugay na gintagna ni Jehova nga magaaman sia sing “mga dulot sa porma sang mga tawo.” (Salmo 68:18) Ginhimo niya ini sang panahon sang mga apostoles, subong sang ginsulat ni apostol Pablo sa Efeso 4:​8-11. Sa karon, si Jehova nagaaman man sing dulot nga mga tawo. Ang Ministerial Training School isa ka mahigugmaon nga aman sa pagsangkap sa pila sining mga lalaki sa pagpas-an sing dugang pa nga mga salabton sa sulod sang organisasyon.

Sa pungsod, may yara kapin sa 160,000 ka Saksi sa kapin sa 3,000 ka kongregasyon. Ang pila sining mga kongregasyon may isa lamang ukon duha ka gulang kag pila ka ministeryal nga alagad. Ang iban nga mga kongregasyon may malapad nga mga teritoryo nga wala pa mabantalaan sing maid-id. Busa, kinahanglanon sing daku ang kalipikado nga mga lalaki indi lamang sa pagpanguna sa hilikuton sa pag-ebanghelyo kundi sa pagbantay man sa panong kag sa pagtudlo sa mga kongregasyon.

Ang katuyuan sang Ministerial Training School amo ang paghanas sa kauturan nga lalaki sa pag-atipan sining mga salabton. Sa tapos sang paggradwar, ang iban sang mga estudyante magabaton sing espesyal payunir nga hilikuton ukon paglakbay nga hilikuton, mga sahi sang pag-alagad nga kinahanglanon gid sing daku sa Nigeria. Ang iban mabalik sa ila mga kongregasyon agod maghatag sing bulig kag pagpalig-on sa lokal nga kauturan. Daw ano nga pagpakamaayo inang sangkol gid nga mga lalaki sa mga kongregasyon nga ila ginaalagdan!

Tumalagsahon nga Paghanas

Bisan pa ang Ministerial Training School isa ka ekstension sang Watchtower Bible School of Gilead, nga nagahanas sing mga misyonero para sa pag-alagad sa luwas, ang kurikulum sini tumaglasahon. Sa sulod sang walo ka semana nga pag-eskwela, maid-id nga ginatun-an sang mga estudyante ang Biblia. Mahalungon nga ginabinagbinag nila ang masangkad nga kasangkaron sang mga panudlo sang Biblia, lakip ang laygay tuhoy sa pagbantay nga mga salabton kag mga panuytoy para sa pag-atubang sang mga problema sa Cristianong pagkabuhi. Ginatun-an man nila kon ano ang ginatudlo sang Kasulatan tuhoy sa administratibo, hudisyal, kag organisasyonal nga mga butang. Nagabaton sila sing pinasahi nga paghanas sa paghambal sa publiko. Kag nagabaton sila sing personal nga igtalupangod gikan sa nagaatipan nga mga instruktor, nga nagabulig sa ila espirituwal nga pag-uswag.

Sa kabilugan, ang kinaandan nga estudyante nagabaton sing 45 ka asaynment sa sulod sang klase, kag nagabenepisyo sia gikan sa 256 ka oras nga pagtudlo sa klase. Dugang pa, nagahinguyang sia sing 140 ka oras sa paghimo sing homework kag 14 ka oras sa pagkuha sing eksaminasyon.

Samtang ang panguna nga libro amo ang Biblia, ang mga estudyante ginapangabay nga dalhon sa eskwelahan ang ila personal nga mga kopya sang 16 ka iban pa nga libro, mga bulig sa pagtuon sang Biblia nga ginbalhag sang Watch Tower Society. Sa tion sang pag-eskwela, ang mga estudyante maid-id man nga nagapanalawsaw sa iban pa nga mga publikasyon nga matigayon sa nasangkapan sing maayo nga librarya sang Bethel. Sing maathag, dapat sila mangin maayong mga bumalasa.

Luwas sa mga hilikuton sa sulod sang klase, ang mga estudyante nagapangabudlay sing 45 minutos kada adlaw sa isa sang walo ka departamento sang Bethel: pagpaninlo, hulot-kalan-an, pagmentinar sa palibot, pagpanglimpio sang mga kuwarto, kusina, lalabhan, shipping, kag traking. Nagabayluhanay sila sing trabaho agod nga sa katapusan sang walo ka semana nga kurso, ang kada isa nakaeksperiensia sa sining tanan nga departamento. Ang isa ka estudyante nagkomento: “Ang akon pagtrabaho sa nanuhaytuhay nga mga departamento nagpahangop sa akon nga si Jehova amo ang superbisor sang hilikuton.” Ang isa pa nagsiling: “Ang mga manugtatap handa sa pagtudlo kag sa pagtadlong nga may gugma.” Ang isa pa gid nagkomento: “Ang pagtrabaho sa Bethel isa ka butang nga dapat matilawan sang tanan kag makita nga maayo ini.”

Ano ang ginsiling sang kauturan sa paghanas nga nabaton nila? Ang isa nagsiling: “[Amo] yadto ang pinakamaayo nga eskwelahan.” Ang isa pa makunyagon nga nagtuaw: “Daw ano ka superlatibo nga kahimusan!” Upod ang mga tagipusuon nga puno sing kalipay kag apresasyon, ang mga estudyante sang una nga klase nagsulat sing isa ka sulat: “Ang amon pamat-od amo . . . nga isentro ang amon kabuhi sa mensahe sang maayong balita.”

Mga Komento Gikan sa Latagon

Sa tion sang una nga bahin sang 1992 kag sang 1993, ang una nga apat ka klase sang Ministerial Training School sa Nigeria ginhimo. Sa isa ka sulat sang apresasyon nga ginpadala sa Nagadumala nga Hubon, ang mga estudyante sang ikaduha nga klase nagsulat: “Sa pagkamatuod, wala pa gid kami sing naeskwelahan nga eskwelahan nga maayo pa sangsa sini. Ang kurso mas maayo pa sangsa programa sa unibersidad. Sa amo mahapos kami makaugyon kay William Phelps nga ang ‘ihibalo sa Biblia nga wala sing kurso sa kolehiyo mas mapuslanon sangsa kurso sa kolehiyo nga wala sing Biblia.’ Sa sini tanan, maathag gid ang inyo matuod nga interes sa amon. Gani determinado kami nga himuon ang bug-os tion nga hilikuton nga amon karera.”

Paano ginbaton ang mga gradwado sa ila bag-o nga mga asaynment? Ang isa ka nagalakbay nga manugtatap nagpadala sing sulat tuhoy sa duha ka gradwado sang una nga klase nga nagaalagad subong mga espesyal payunir: “Ang mga miting karon makagalanyat, makapalig-on, makalilipay, kag mapuslanon. Ang mga pagpanghikot sa pag-alagad sa latagon nagauswag . . . Ang kongregasyon nagaudyak sa kalipay . . . Sang gin-interbyu ko ang pila ka utod tuhoy sining mga espesyal payunir, ang nagadumala nga manugtatap nagsabat nga may mga luha sang kalipay, nga nagasiling: ‘Ginapasalamatan namon si Jehova kag ang iya organisasyon sa pagpadala sing maligdong kag epektibo nga mga kabulig sa amon kongregasyon.’ ”

Sin-o ang Kalipikado?

Ang pag-eskwela sa Ministerial Training School sa bisan ano nga pungsod isa ka dalayawon nga pribilehiyo sang pag-alagad, isa ka makatilingala nga pagpakamaayo gikan kay Jehova. Sing dimaduhaduhaan, ining paghanas nagabulig sa mga estudyante nga pauswagon ang ila kahimtangan subong espirituwal nga mga lalaki kag nagasangkap sa ila agod magamit sila ni Jehova sing kapin ka bug-os.

Sing halangpunon, ang mga ginapatuman mataas. Agod makalipikar, ang mga aplikante dapat nga nakaalagad subong mga gulang ukon mga ministeryal nga alagad sa Cristianong kongregasyon sa dimagkubos duha ka tuig. Mas ginapasulabi ang mga regular payunir. Ang tanan dapat diminyo kag sa ulot sang 23 kag 50 anyos ang edad. Dapat nga wala sila mapaidalom sa hudisyal nga pagsabdong ukon madisfellowship sa sulod sang nagligad nga lima ka tuig. Ang mga aplikante dapat nga makahibalo magbasa, magsulat, kag maghambal sing Ingles sing talunsay, kag dapat nga may maayo sila nga panglawason, wala nagakinahanglan sing pinasahi nga pag-atipan ukon pagkaon.

Labi na, ang mga nagaboluntaryo dapat mangin handa, kinabubut-on, kag sarang makaalagad sa bisan diin nga mahimo kinahanglanon sila. Nagakinahanglan ini indi lamang sing mabaskog nga handum sa paghimo sang kabubut-on sang Dios kundi sing espiritu man ni Isaias, nga malangkagon nga nagtanyag sang iya kaugalingon sa paghimo sing isa ka pinasahi nga hilikuton, nga nagasiling: “Yari ako! Ipadala ako.”​—Isaias 6:8.

May amo man bala ikaw nga espiritu? Yara ka bala sa kahimtangan sa paglab-ot sining pribilehiyo sang pag-alagad? Ang mga nakahimo na sini wala maghinulsol. Ang isa ka gradwado sang eskwelahan nga nagaalagad na karon subong manugtatap sang sirkito nagsulat: “Para sa akon, ang Ministerial Training School isa ka regalo nga wala sing kaanggid. Amo ini ang nangin pinakadaku nga bahin sang akon espirituwal nga kabuhi. Kon may kahigayunan ako nga suliton liwat ang akon kabuhi, indi ko pagpilion ang tuhay nga dalanon.”

[Footnote]

[Retrato sa Pahina 16, 17]

Ang mga instruktor nga sanday Isaiah Mnwe kag Pius Oparaocha

Ang pagtudlo sa sulod sang hulot-klasehan

Grupo nga paghinun-anon sa sulod sang hulot-klasehan

Pagpanalawsaw sa librarya

[Retrato sa Pahina 18]

Pagtrabaho sa Lalabhan kag sa Shipping Department