Kon Mag-abot ang Bag-ong Kalibutan

ANG bag-ong kalibutan sang Dios magaabot kon ang karon nga kalibutan magataliwan. Apang mahimo mamangkot ka, ‘Makapati gid bala kita nga matapos ining kalibutan?’ Ti, binagbinaga, may isa bala ka kalibutan nga natapos sang una?

Huo, suno sa mabakod nga pamatuod, may isa anay ka kalibutan nga natapos. “Paagi sini ang kalibutan nga sadto anay [sang adlaw ni Noe] ginlapawan sang tubig kag nawala,” siling sang Biblia. Ang Dios “wala magpaiway sang daan nga kalibutan, apang gintipigan si Noe, nga manugbantala sang pagkamatarong, kaupod sang iban pa nga pito, sang gin-anaw niya ang kalibutan sang mga didiosnon.”​—2 Pedro 2:5; 3:6.

Talupangda nga isa ka “kalibutan sang mga didiosnon,” ukon isa ka malauton nga sistema sang mga butang, ang nagtaliwan sadto. Dili ang planeta nga Duta, ang mabituunon nga kalangitan, ukon ang tawhanon nga pamilya ang natapos. Sang nagdamo ang kaanakan sang mga nakalampuwas sa Anaw, isa naman ka kalibutan (ang aton karon nga kalibutan) ang nagluntad. Ano ang matabo sa sini?

Sa tapos magsiling nga ang kalibutan ni Noe nalaglag, ang Biblia nagpadayon: “Apang sa amo man nga pulong ang mga langit kag ang duta nga amo karon ginatigana sa kalayo.” (2 Pedro 3:7) Ang kalayo nagakahulugan sang kalaglagan para sa kalibutan. Sa pagkamatuod, “ang kalibutan [ang isa nga nagaluntad karon] magataliwan.” (1 Juan 2:17) Apang san-o?

Luyag mahibaluan sang mga apostoles ni Jesus, gani namangkot sila: “Isugid sa amon, san-o bala mahanabo ini kag ano bala ang tanda sang imo pagkari, kag sang katapusan sang kalibutan?” (Mateo 24:3, King James Version) Sa pagsabat si Jesus naghatag sing tanda agod mahibaluan sang mga tawo nga nagapuyo sa tion sang katumanan sini nga may isa ka kalibutan ang malapit na magtaliwan; magabulos ang isa ka bag-ong kalibutan. Ano ina nga tanda?

Ang Tanda

Ang tanda naglakip sing madamo nga mga bahin, huo, madamo nga mga hitabo ang gintagna. Agod matuman ang tanda, tanan ini dapat mahanabo sa isa ka talalupangdon nga paagi sa halos palareho nga tion, sa sulod sang isa ka kaliwatan. (Mateo 24:34) Ano ining mga hitabo?

Ang pila nga ginhinambitan ni Jesus amo: “Ang pungsod magatindog batok sa pungsod, kag ang ginharian batok sa ginharian; kag may mabaskog nga mga linog, kag sa nagakalainlain nga mga duog mga kagutom kag mga kamatay.” “Nian itugyan kamo nila sa kangitngitan kag pamatyon kamo, kag dumtan kamo sang tanan nga kapungsuran bangod sa akon ngalan. . . . Bangod nga ang kalautan magabuad ang gugma sang kalabanan magabugnaw.”​—Lucas 21:​10, 11; Mateo 24:​7-9, 12.

Si apostol Pablo naghatag sing iban pa nga mga kahimtangan nga magatanda “sang katapusan nga mga adlaw” sining kalibutan. Sia nagsulat: “Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo magamahigugmaon sang kaugalingon, mahigugmaon sang kuwarta, . . . malalison sa ginikanan, dimapinasalamaton, maluib, walay pasunaid, . . . dimalugpayan, bugalon, mahigugmaon sa kinasadya sa baylo sangsa Dios, nga may dagway sang diosnon nga debosyon apang nagapanghiwala sang gahom sini.”​—2 Timoteo 3:​1-5.

Sing pat-od, nakakita ukon nakabati na kamo tuhoy sining tanan nga mga butang​—internasyonal nga mga kinagamo nga nagatabon sang daan nga mga inaway, mabaskog nga mga linog, lapnag nga kamatay kag tiggulutom, dumot kag paghingabot sa mga sumulunod ni Cristo, pagmuad sang kalautan, kag ang indi matupungan nga makahalanguyos nga mga tion. Luwas sa sining mga butang, ang Biblia nagtagna nga ang Dios “magalaglag sa nagalaglag sang duta.” (Bugna 11:18) Kag ang katawhan nagalaglag karon sang duta!

Sang Nobiembre, 1992, amo sini ang ulong dinalan sang mga pamantalaan: “Ang Pangunang mga Sientipiko Nagapaandam Tuhoy sa Kalaglagan sang Duta.” Si Dr. Henry Kendall, napadunggan sang Nobel kag tsirman sang Union of Concerned Scientists, nagsiling: “Ini nga paandam dili pagpasobra kag indi ini pamahog.” Ang isa ka artikulo sang pamantalaan nagreport: “Mga 1,575 ka bansagon sa internasyonal nga kumunidad sang mga sientipiko ang nagsulat sining paandam.” Ang ila paandam tuhoy sa bug-os nga paglaglag sa aton duta indi dapat pasapayanan!

Wala sing pangduhaduha tuhoy sa sini. Ang tanan nga bahin sang tagna nagakatuman, lakip ang panguna nga tagna ni Jesus: “Kag iwali ining maayong balita sang ginharian sa bug-os napuy-an nga duta, subong panaksi sa tanan nga kapungsuran; kag ugaling magaabot ang katapusan,” huo, ang katapusan sining kalibutan. (Mateo 24:14) Magaabot ini, siling ni Jesus, kon ang maayong balita sang Ginharian sang Dios mabantala sa bug-os nga kalibutan. Kag inang pagbantala nahimo na karon sang mga Saksi ni Jehova sa gintagna nga kasangkaron!

Kon Ano ang Dapat Mo nga Himuon

Busa, ang tanan nga pamatuod nagatudlo sa kamatuoran nga ang bag-ong kalibutan sang Dios tuman na kalapit. Apang, kon luyag mo maluwas sa katapusan sining kalibutan kag makaagom sing kalipay sa bag-ong kalibutan, may butang nga dapat mo himuon. Sa tapos magsiling nga “ang kalibutan magataliwan,” ginapakita sang Biblia kon ano ang kinahanglanon mo nga himuon, nga nagapaathag: “Ang nagahimo sang kabubut-on sang Dios nagapadayon sa gihapon.”​—1 Juan 2:17.

Gani dapat mo mahibaluan ang kabubut-on sang Dios kag himuon ini. Ang mga Saksi ni Jehova malipay sa pagbulig sa imo sa sini. Nian makalampuwas ka sa katapusan sining kalibutan agod maagom sa walay katapusan ang mga pagpakamayo sa bag-ong kalibutan sang Dios.

[Picture Credit Line sa pahina 10]

Retrato sang NASA

[Retrato sa Pahina 10]

Ang tion sang dakung kagamo dayon pagabuslan sang bag-ong kalibutan