“Wala Kami Ginadingutan!”

Ang mga manunudlo kag ang iban pa nagasiling nga ang mga kabataan sang mga Saksi ni Jehova ginadingutan paagi sa indi pagtugot sa ila nga makigbuylog sa kalipay sang pagsaulog sang eskwelahan sang Krismas, Paskuwa sang Pagkabanhaw (Easter), kag Bisperas sang Tigkalalag (Halloween). Ang masunod amo ang pila ka halimbawa sang mga komento mismo sang kabataan nga mga Saksi ni Jehova, nagapabutyag paagi sa mga sulat kon ngaa sila mismo nagadumili nga makigbahin sa pagsaulog sining mga kapiestahan.

“BISAN ginpaathag ko na sa akon mga kabutho kon ngaa wala ako nagasaulog sini, ginahunahuna nila gihapon nga gindingutan ako. Apang wala ako gindingutan! Ti, kinahanglan nila pirme maghulat tubtob sa ila Krismas ukon sa iban pa nga mga kapiestahan agod makabaton sing mga regalo, samtang ginahatagan ako sing mga regalo kag nagakadto sa mga sinalusalo sa bilog nga tuig. Nahibaluan ko nga ginapalangga ako indi lamang sang akon pamilya kundi sang kongregasyon kag ni Jehova man, kag mas importante ina para sa akon sangsa bisan anong kapiestahan.”​—Becky, 13 anyos.

“Nahibaluan ko nga ang tanan nga kapiestahan may malain nga ginhalinan. Wala matawo si Jesus sa tion sang Krismas. Indi kinahanglan maghimo sing tal-us ang akon mga ginikanan para sa sining mga kapiestahan. Ang akon pamilya pirme alisto sa pagbulig sa akon kon kinahanglan ko sila. Mas hamili ina para sa akon sangsa bisan ano nga regalo nga mahatag nila sa akon.”​—Josh, 15 anyos.

“Krismas. Wala ako gindingutan kay ang matuod indi ini Cristiano. Mas luyag ko mahibaluan nga ginhatagan ako sang akon mga ginikanan sang regalo sangsa misteryuso nga si Santa. Easter. Tuhoy sa Easter makalilibog gid ini bangod ang mga tawo nagasiling nga para ini kay ‘Jesus kag sa pagkabanhaw’ ukon tuhoy lamang ini sa ‘pagpangita sang natago nga mga itlog.’ Apang ano ang labot sang mga itlog kay Jesus? Bisan ang ngalan nga Easter naghalin sa dumaan nga diosa. Halloween. Wala ko naluyagan ang sadsaran nga ideya sang Halloween. Mga murto kag mga aswang, NGEE!”​—Katie, 10 anyos.

“Subong isa ka pamatan-on wala gid ako ginsubuan nga wala ako makatilaw saulog sang kalibutanon nga mga kapiestahan. Wala ako ginsingganan sang akon mga ginikanan nga ‘indi mo himuon ini ukon ina bangod isa ikaw sang mga Saksi ni Jehova,’ apang natun-an ko ang Biblia kag ang mga pagtamod ni Jehova sa sining mga kapiestahan. Tuhoy sa mga regalo, sa amon puluy-an, ang paghatagay sang regalo ginahimo sa bug-os nga tuig.”​—Ryan, 17 anyos.

“Ang tagsa ka kapiestahan nagasaulog sang isa ka kabutigan kag nasentro sa butig nga mga bagay. Ang kalabanan sang kabataan nga kilala ko nagasaulog sang mga kapiestahan bangod lamang sang dulse ukon mga regalo. Ang isa ka butang nga yari sa akon nga labaw sangsa mga kapiestahan amo ang makadalayaw nga organisasyon sang mga Saksi ni Jehova. Sa baylo nga nagalawig sa isa ka adlaw, kaangay sang isa ka kapiestahan, ang Pulong sang Dios nga Jehova may makalilipay nga mensahe nga nagapadayon tubtob sa walay katapusan.”​—Brooke, 14 anyos.

“Mga rason nga wala ko ginakahidlawan ang mga kapiestahan: 1. Ang Biblia nagasiling nga malain ini. 2. Indi ako interesado sa sini. 3. Ginaregaluhan ako nanday Mommy kag Daddy.”​—Brandi, 6 anyos.

“Wala ako nagabatyag nga gindingutan. Wala ini sing kaso sa akon. Ginaregaluhan ako, kag nagahampang kami kag nagatililipon. Ginahatagan ako sing madamo nga butang nga indi na kinahanglan nga magsaulog pa sang mga kapiestahan. Luyag ko magpabilin nga isa ka Saksi sa tanan nga ginahimo ko kag wala sing may makapatalikod sa akon.”​—Brianne, 9 anyos.

Manug-grade five na ako kag wala ako nahuya nga batunon nga isa ako sang mga Saksi ni Jehova. Isa ka bes ginsilingan ako sang isa ka bata nga lalaki nga mahimo nga nasubuan gid ako bangod wala ako sing nabaton nga regalo sang Krismas, apang nagsiling ako nga nagabaton ako sini sa bilog nga tuig. Nian nagsiling sia nga mapalad ako. Pamatyag ko wala gid dapat sang isa ka Saksi ni Jehova ang magbatyag sing kasubo subong nga isa ka Saksi ni Jehova.”​—Jeff, 10 anyos.

“Ginahimo namon sang akon utod nga babayi subong kapiestahan sang amon pamilya ang pagsaulog sing anibersaryo sing kasal sang amon mga ginikanan. Daku ang akon kalipay sa pagplano sing mga regalo kag mga kard kag iban pa nga mga bagay kag sa pagbulig sa akon mga ginikanan sa pagplano agod surpresahon ang isa kag isa sangsa pagbaton sang mga regalo halin sa iban. Ang paghatag mas maayo sangsa pagbaton.”​—Rachel, 16 anyos.

“Sang bata pa ako, indi ko mahangpan ang pila ka kapiestahan. Apang narealisar ko sang ulihi nga ang mga kapiestahan sarang magresulta sa kakagod, binaisay, kag kalisod. Kon may gintangdo nga mga tion sa paghatag, indi gid ikaw masorpresa sa isa ka regalo. Mas luyag ko pa makabaton sing pinasahi nga regalo sa iban nga tion sang tuig. Ang pagsaulog ukon indi pagsaulog diutay lamang nga bahin sang mas daku nga desisyon: idedikar mo bala ukon indi ang imo kaugalingon sa pag-alagad kay Jehova. Kon maghunahuna ako sa amo nga paagi, maathag ang husto nga pagpili.”​—Ben, 13 anyos.

“Sang bata pa ako may mga tion nga nagbatyag ako nga may nawasi ako apang sang ulihi naham-ot ako kon mahunahuna ko kon paano ang mga itlog, si Jesus, kag ang Easter bunny gin-ulupod. Sang dakudaku na ako kag ginpaathag sa akon sang akon mga ginikanan ang ginhalinan sang tanan nga simbulo, naugot ako sa sini. Nasaklaw ako kon mahunahuna ko kon ano ayhan ang ginabatyag ni Jehova kag ni Jesus nga maangot sa sining pagano nga mga ideya.”​—Alexa, 18 anyos.

“Sa panahon sang Krismas, ang pag-eskwela mahimo gid makapulung-aw kag makapabatyag sa imo nga napain. Nian narealisar ko nga ang pagsaulog sang Krismas indi makalubad sang imo mga problema, indi makapasuod sang imo pamilya, kag indi makapahalipay. Ang pagkabuhi lamang suno sa mga talaksan sang Biblia ang makahimo sini.”​—Joe, 15 anyos.

“Sa baylo sang Krismas ukon sang bisan iban pa nga kapiestahan, nagahiwat kami sang Big Toys Day. Ginaregaluhan kami sang kuwarta agod mabakal sang amon mga naluyagan. Sang isa ka tuig naghatag ako sing pamulongpulong sa klase tuhoy sa relihion. Sa baylo nga sundon ang paagi sang kalibutan, naghimo ako sang kaugalingon nga paagi agod makatambong sa mga miting, makaguwa sa pag-alagad sa latagon, kag ginhimo ang pagpangamuyo nga bahin sang akon kabuhi. Magapabawtismo ako sa masunod nga asambleya”.​—George, 11 anyos.

“Nanamian akon makabaton sing mga regalo, kag nagabaton ako sini sa bug-os nga tuig. Wala gid man ako sing nawasi kon tuhoy sa mga tinipontipon. Ginapahalipay ko si Jehova kon nagatindog ako para sa kamatuoran. Natingala ako nga makita ang pila sang akon mga kabutho nga indi mga Cristiano, nga mga Hindu, Judiyo, kag iban pa, nga nagasaulog sang Krismas kag nagabaton sang mga regalo apang walay hinalung-ong kon para sa ano ang kapiestahan.”​—Julia, 12 anyos.

“Wala ako maghinulsol nga wala ako makasaulog sang mga kapiestahan sa eskwelahan. Ang mga bata nagahimo sang madamo nga kabuangan, kaangay sang pagsuksok sing maskara sa tion sang Bisperas sang Tigkalalag. Wala gid ako nanugunan sa sini. Ginasugiran ko sila kon paano ako ginabaklan sang akon mga ginikanan sa bug-os nga tuig. Ginasugiran nila ako tuhoy sa ila simbahan kag kon daw ano ka makatalaka ini, kag ginasugiran ko man sila tuhoy sa aton mga miting publiko nga ginahiwat kon kaisa sa mga parke, kag nahisa sila kon kaisa. Apang wala ako nahisa sa ila. Sa kabilugan, masiling ko nga makig-abyan lamang sa nagatahod sa imo mga pagtuluuhan kag indi pagtuguti ang isa ka estudyante ukon manunudlo nga magpilit sa imo nga himuon ang isa ka butang nga supak sa kabubut-on ni Jehova.”​—Justin, 12 anyos.

“Nagabatyag bala ako nga gindingutan? Wala, bangod may iban kami nga mga pagtililipon, kag kon ang mga tawo nagasaulog sang Krismas, si Santa Claus lamang ang ginahunahuna sang mga kabataan, ukon ang Easter bunny sa tion sang Easter, apang nahibaluan ko nga halin ini sa paganong mga relihion. Luyag ko ang pag-alagad sa latagon bangod nagabulig ini sa akon nga isentro ang akon hunahuna sa kamatuoran.”​—Sharon, 8 anyos.

“Bunayag ako nga makasiling nga wala gid ako magbatyag nga indi kontento subong isa sang mga Saksi ni Jehova. Malipayon ako kag ang akon pamilya. Sa tagsa ka tion nga may tinipontipon sa eskwelahan ginadala ako ni nanay agod manyaga sa guwa. Ang akon mga ginikanan nagadala sing mga pamahaw sa eskwelahan bisan wala sing pinasahi nga kabangdanan kag sa amo nahibaluan sang tanan nga kabataan nga malipayon kami. Suod gid ako sa akon mga ginikanan kag kon pamangkuton ako sang kabataan kon ngaa wala ako nagasaulog sang mga kapiestahan ginasugiran ko sila nga nagasaulog ako sini adlaw-adlaw. Paano magbatyag nga napain ang isa ka Saksi?”​—Megan, 13 anyos.

“Bisperas sang Tigkalalag. Ang mga kabataan nagapanapot subong mga demonyo, mga karakter sa komiks​—para sa ano? Ang mga kabataan nagalibot sa mga kalye nga nagapamalaybalay agod makakuha sang pinutos sang dulse. Ukon nagapanghaboy sang mga itlog sa mga kabalayan, nagapamurambod sang toilet paper sa mga kahoy, kag ang pinakamalain nga bahin amo nga ginatugutan ini sang kalabanan nga mga ginikanan.”​—Zachary, 10 anyos.

“Indi ko kinahanglan maghulat sa isa ka pinasahi nga adlaw agod makabaton sang mga regalo. Pirme ako ginahatagan ni Mom kag ni Dad sing madamo nga hampanganan. Ang Bisperas sang Tigkalalag amo ang pagsimba sa patay nga mga espiritu. Sayop ini. Ang lamang nga Dios nga dapat naton simbahon amo si Jehova.”​—Nicholas, 6 anyos.