Napaligban Mo Na Bala?

Nagapati ka bala nga ang tawo may dimamalatyon nga kalag nga padayon nga nagakabuhi pagkapatay sang lawas? Minilyon, ayhan binilyon, ang nagapati nga ang tawo may kalag nga nagakadto sa pihak nga kalibutan ukon planeta agod padayon nga magkabuhi pagkapatay ukon liwat nga nagakabuhi subong iban nga tinuga (reinkarnasyon). Ano ang ginasiling sang Biblia tuhoy sa kalag? Masapwan mo ang masunod nga mga pamangkot nga makawiwili kag makapahangop. Para sa mga sabat, ginapanugda namon nga tan-awon ninyo ang mga kasulatan nga ginasambit ukon tan-awon ang pahina 28.

1. Gintuga bala si Adan sa langit, ukon sa duta?​—Genesis 1:​26-28.

2. Gintuga bala si Adan nga mamalatyon, ukon dimamalatyon?​—Genesis 2:​15-17.

3. Kon wala maglapas ukon magpakasala si Adan, mahimo bala nga napatay sia?​—Roma 6:23.

4. Ang dalanon sang paggawi ni Adan nagpamatuod bala nga mamalatyon, ukon dimamalatyon sia?​—Genesis 3:19; 5:5.

5. Bangod sang iya sala, nadula bala ni Adan ang dutan-on nga puluy-an, ukon ang isa nga langitnon?​—Genesis 1:​26-28.

6. Kon nagkari si Jesus agod ipasag-uli ang nadula sang pagpakasala ni Adan, ano ang ipasag-uli?​—Salmo 37:29; Roma 5:​18, 19; Bugna 21:​1-4.

7. Ginahuman bala si Adan sang duha ka magkatuhay nga bahin, ang kalag kag ang lawas?​—Genesis 2:7; 1 Corinto 15:45.

8. Kon nagapati ka nga si Adan isa ka kalag kag isa ka lawas, diin nga bahin ang nagpakasala, ang kalag ukon ang lawas?​—Salmo 51:​1-4.

9. Kon ang sabat mo, “Ang kalag,” ngaa dapat mag-antos ang lawas?

10. Kon ang sabat mo, “Ang lawas,” ngaa dapat makalampuwas ang kalag?

11. Kon ang tawo nagakadto sa langit kon mapatay, indi bala nagapamatuod ina nga ang sala kag kamatayon pagpakamaayo sa baylo nga, subong sang ginasiling sang Biblia, pagpakamalaut?​—Roma 5:12; 6:​21-23.

12. Ano nga silot ang ginhatag kay Adan tungod sang iya sala​—kamatayon, ukon dalayon nga pagkabuhi sa iban nga lugar?​—Genesis 2:​16, 17; 3:19.

13. May isa bala ka silot para sa lawas kag lain nga silot para sa kalag?​—Manugwali 9:​5, 10; Ezequiel 18:4.

14. Nahunahuna bala sang Dios ang walay katapusan nga pag-antos sa kalayuhon nga impierno?​—Jeremias 7:31.

15. Suno kay Pablo, ano ang bayad sang sala?​—Roma 6:23.

16. Ginsambit bala ni Pablo ang walay katapusan nga pag-antos sa kalayuhon nga impierno?​—Roma 6:7.

17. Kon ang kalayuhon nga impierno tunay nga nagaluntad, ngaa ang tawo nagaantos sing dayon sa pagbayad sang malip-ot lamang nga pagkabuhi sa sala? Ang katarungan bala sang Dios mas kubos sangsa iya sang tawo?​—Roma 9:14.

18. Ang matutom nga mga tawo sang una nagpati bala nga may kalag sila nga nagkadto sa langit ukon sa kalayuhon nga impierno?​—Genesis 37:35; Salmo 89:48; Binuhatan 2:34?

19. Ano ang matuod nga paglaum para sa mga patay?​—Juan 5:​28, 29; 11:​23-26; Binuhatan 24:15?

20. Kon wala sing dimamalatyon nga kalag, paano ang pila (144,000) naghari upod kay Cristo sa mga langit?​—1 Corinto 15:​42-49, 53, 54; Bugna 14:​1, 4; 20:4.a

Napaligban Mo Na Bala? Ang mga Sabat sang Biblia

Ang masunod amo ang pila ka mga teksto nga ginsambit sa mga pamangkot sa pahina 18:

1. “Ang Dios nagtuga sang tawo sa iya kaugalingon nga dagway, . . . lalaki kag babayi gintuga niya sila. Ang Dios nagsiling sa ila: ‘Magmabungahon kag magbuad kag magtugob sang duta kag magpakaagalon sa iya.’ ”​—Genesis 1:​27, 28.

2. “Makakaon ka sing hilway sa tagsa ka kahoy sang katamnan. Apang gikan sa kahoy sang pagkilala sang maayo kag malaut dili ka magkaon sa iya, kay sa adlaw nga magkaon ka sa iya mapatay ka nga totoo.”​—Genesis 2:​16, 17.

3. “Ang bayad sang sala kamatayon, apang ang dulot nga ginahatag sang Dios amo ang kabuhi nga walay katapusan kay Cristo Jesus nga aton Ginuo.”​—Roma 6:23.

4. “Sa balhas sang imo nawong magakaon ka sing tinapay tubtob nga magabalik ka sa duta, kay ginkuha ka sa iya. Yab-ok ka kag sa yab-ok magabalik ka.”​—Genesis 3:19.

5. Tan-awa ang Num. 1.

6. “Yari karon! Ang kayangkayang sang Dios yara sa mga tawo . . . Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—Bugna 21:3, 4.

7. “Nian si Jehova nga Dios naghimo sang tawo gikan sa yab-ok sang duta kag naghuyop sa iya ilong sang ginhawa sang kabuhi, kag ang tawo nangin buhi nga kalag.” (Genesis 2:7) Ang tinaga nga “kalag” ginbadbad halin sa Hebreo nga neʹphesh, “nga nagaginhawa.” “Ang unang tawo, nga si Adan, subong sang ginasiling sang kasulatan, nangin buhi nga kalag.” Talupangda, “nangin,” indi “ginhatagan.”​—1 Corinto 15: 45, The Jerusalem Bible.

8. “Ang akon sala yara gihapon sa atubangan nakon. Batok sa imo, sa imo lamang, nakasala ako, kag nakahimo sang malaut sa imo itululok.”​—Salmo 51:​3, 4.

9, 10. Wala nagakinahanglan sing teksto.

11. “Paagi sa isa ka tawo nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala.”​—Roma 5:12.

12. Tan-awa ang Num. 4.

13. “Ang buhi nakahibalo nga mapatay sila; apang tuhoy sa patay, wala sila makahibalo sang bisan ano . . . Sa Sheol, nga imo ginakadtuan, walay buluhaton ukon pahito ukon ihibalo ukon kaalam.” (Manugwali 9:​5, 10) “Subong sang kalag sang amay amo man ang kalag sang anak​—sila akon. Ang kalag nga nagapakasala​—ini mismo mapatay.”​—Ezequiel 18:4.

14. “Ginpatindog nila ang mataas nga duog sang Tofet . . . sa pagsunog sang ila mga anak nga lalaki kag sang ila mga anak nga babayi sa kalayo, nga wala ko pag-isugo ukon nag-abot sa akon painoino.”​—Jeremias 7:31.

15. Tan-awa ang Num. 3.

16. “Kay ang napatay nahilway sa sala.”​—Roma 6:7.

17. “Nian, ano bala ang ginasiling ta? May pagkadimatarong bala sa Dios? Malayo ina!”​—Roma 9:14.

18. “Kay si David wala magkayab sa mga langit.”​—Binuhatan 2:34.

19. “May paglaum ako sa Dios, ang paglaum nga ginabaton man sining nga tao, nga may pagkabanhaw sang mga matarong kag mga dimatarong.”​—Binuhatan 24:15.

20. “Kay ining madinulunton kinahanglan magsuklob sang pagkadimadinulunton, kag ining mamalatyon kinahanglan magsuklob sang pagkadimamalatyon.” Kon ang pagkadimamalatyon ‘ginasuklob,’ nian indi ini duna. (1 Corinto 15:53) “Nian nagtulok ako, kag, yari karon! ang Cordero nagatindog sa Bukid nga Sion, kag kaupod niya ang isa ka gatos kag kap-atan kag apat ka libo . . . Ini mga tinubos gikan sa mga tawo subong nga nahaunang mga bunga nga sa Dios kag sa Cordero.”​—Bugna 14:​1, 4

[Mga footnote]