Himpit nga Panglawas Para sa Tanan

SUBONG sang pamatasan, palibot, kag pag-atipan sa panglawas, ang aton biolohiko nga kinaugali nagaapektar man sang aton panglawas. Ina nga kinaugali ginaimpluwensiahan sang pagpanubli kag sang mga balatian nga mahimo nag-abot sa aton bangod sang aton genetiko nga huyog sa sini.

“Ang imo biolohiko nga pagkahuman sa imo pagkabun-ag sa kalibutan,” siling sang isa ka propesyonal sa panglawas, “amo ang nagapat-od kon bala mabuhi ka sing maayo, mabuhi sing malawig, ukon mabuhi gid.”

Ano man ang paagi nga natigayon naton ini, ang nagasakit nga ulo, ang nagapalanig-a nga kaunuran, ang pagpalangluya, ang nagatapok nga mga tul-an, ang nagaluya nga mga tagipusuon, kag ang iban pa nga mga balatian nagapahanumdom sa aton sa kada adlaw nga ang aton panglawas malain nga naapektuhan sang isa ka maluya nga lawas kag hunahuna. Ano ang gamot nga kabangdanan sining lapnag nga mga problema sa panglawas?

Ang Gamot nga Kabangdanan

Ang isa ka medikal nga doktor nga si Lucas nga nagkabuhi sang unang siglo C.E. nagasabat sining pamangkot sa isa ka inspirado nga biograpiya nga ginsulat niya tuhoy kay Jesucristo. Isa ka adlaw, sulat ni Lucas, gindala ang isa ka paralisado nga tawo kay Jesus nga nagalaum nga mapaayo sia. Ginsilingan ni Jesus ang paralitiko: “Pinatawad sa imo ang imo mga sala.” Nian, agod ipakita nga sia sa pagkamatuod may gahom sa pagpatawad sing mga sala, ginsugo ni Jesus ang tawo: “Tindog ka kag dalha ang imo higdaan kag magpauli sa imo balay.” Nagtindog matuod ang tawo! Subong resulta, “ang tanan naurungan” nga nakasaksi sang pag-ayo, kag ‘ginhimaya nila ang Dios.’​—Lucas 5:​17-26.

Ano nga sala ang ginpatuhuyan ni Jesus? Ang sabat magabulig sa aton sa paghangop kon ngaa nagamasakit kita, nagatigulang, kag nagakapatay. Bangod ginapasalig kita nga ang “bug-os nga Kasulatan gin-inspirar sang Dios,” makita naton ang sabat sa Biblia. (2 Timoteo 3:​16; 2 Pedro 1:21) Ginasugiran kita sini nga ang una nga tawo, nga si Adan, gintuga nga may himpit nga panglawas. Mapagsik ang iya panglawas samtang nagatuman sia sa iya Manunuga.

Apang, ginpili ni Adan nga lapason ang sugo sang Dios. Paagi sa pagkamalalison kag hungod nga pagrebelde sa iya Manunuga, nakasala sia. Subong resulta, sia nangin dihimpit, nadutlan sang balatian, kag sang ulihi napatay sia. Busa, ang sala amo ang kabangdanan sang balatian kag kamatayon ni Adan.

Subong nga ang pila ka balatian ginapaliton halin sa mga ginikanan padulong sa mga anak suno sa kasuguan sang genetiko, gani man ang dikahimpitan kag ang resulta nga mga balatian ginpaliton halin kay Adan padulong sa iya anak, ang tawhanon nga rasa. Sa amo, ang tanan nga balatian amo ang resulta sang una nga sala ni Adan. (Genesis 2:17; 3:​1-19; Roma 5:12) May solusyon bala ini?

Ang Solusyon

Ang kabangdanan sang pagbag-o halin sa himpit nga panglawas padulong sa mapigaw nga panglawas amo ang sala​—ang pagrebelde ni Adan sa sugo sang Dios. Ang pagbag-o halin sa mapigaw nga panglawas padulong sa himpit nga panglawas posible lamang paagi sa pagdula sa sala. (Roma 5:​18, 19) Paano? Ang isa pa ka himpit nga tawo, ang eksakto nga katumbas ni Adan sang himpit sia, dapat magsakripisyo sang iya kabuhi subong isa ka gawad. Ang kasuguan sang Dios amo ang “kalag sa kalag,” kon sayuron, kabuhi sa kabuhi.​—Deuteronomio 19:21.

Apang, wala sing isa sa makasasala nga mga kaliwat ni Adan ang makaaman sina nga gawad. Sa amo, mahigugmaon nga gin-aman mismo ni Jehova ang iya Anak, nga si Jesus, subong isa ka himpit nga tawo sa paghatag sang iya kabuhi subong “gawad sang madamo” agod nga “magkabuhi kita paagi sa iya.”​—Mateo 20:28; 1 Juan 4:9; Salmo 49:7.

Sang yari sa duta, ginpakita ni Jesus nga ang iya Amay, nga si Jehova, naghatag sa iya sing gahom sa pagdula sang mga sala sang ginsilingan niya ang paralitiko, “pinatawad sa imo ang imo mga sala,” kag ang ginpaayo nga lalaki nagpauli nga nagalakat. Makapila nga gingamit ni Jesus ining gahom halin sa Dios paagi sa gilayon nga pagpaayo sa mga bulag, mga bungol, kag sa madamo pa nga may lainlain nga balatian.

Tuhoy sining milagruso nga mga pagpang-ayo ni Jesus, ang Biblia nagaasoy: “Kag nagpalapit sa iya ang dakung kadam-an, nga nagadala sing mga piang, mga pingkaw, mga bulag, mga apa, kag madamong iban pa, kag ginpahamtang nila sila sa iya tiilan, kag gin-ayo niya sila; sa bagay nga natingala ang kadam-an sang nakita nila nga naghambal ang mga apa kag naglakat ang mga piang kag nakakita ang mga bulag.” (Mateo 15:​30, 31) Kapin pa gani ka talalupangdon, ginbanhaw ni Jesus ang mga patay. Ginasugid sang Biblia ang pila sining mga pagkabanhaw.​—Lucas 7:​11-16; 8:​49-56; Juan 11:​14, 38-44.

Ining milagruso nga mga pagpang-ayo nagapasalig sa aton nga wala sing balatian ang indi masarangan ayuhon sang gahom ni Jesus. Gamiton niya ayhan liwat ining hinatag-sang-Dios nga gahom? Makabenepisyo bala kita?

Ang Himpit nga Panglawas Isa ka Kapat-uran

Ginapakita sang mga tagna sa Biblia nga si Jesus nagagahom na sa langit subong ang Hari sa langitnon nga panguluhan sang Dios. Ginhatagan sia sang Dios sing awtoridad nga dulaon ang tanan nga panguluhan sang tawo nga nagaluntad karon kag maggahom sa bug-os nga duta. (Salmo 110:​1, 2; Daniel 2:44) Matuman ang pangamuyo nga gintudlo ni Jesus sa iya mga sumulunod: “Magkari ang imo ginharian. Paghimuon ang imo kabubut-on, subong sang sa langit, amo man sa duta.” (Mateo 6:10) Sa idalom sang paggahom sinang langitnon nga Ginharian, ang bahin sang kabubut-on sang Dios para sa sining duta amo ang talalupangdon nga pagpauswag sang panglawas para sa tawhanon nga pamilya.

Nian, sa literal kag sa espirituwal nga kahulugan, “ang mga mata sang mga bulag pamuklaton, kag ang mga igdulungog sang mga bungol mabuksan. Sa sadtong tion ang piang magalumpat subong sang usa, kag ang dila sang apa magaamba sa kalipay.” “Kag wala sing pumuluyo ang magasiling: ‘Nagamasakit ako.’ ”​—Isaias 33:24; 35:​5, 6.

Sa idalom sang langitnon nga Ginharian sang Dios, ang himpit nga panglawas magakahulugan nga ang katawhan indi na mapatay subong sang nagakatabo sa aton karon. Ang Pulong sang Dios nagasaad: “Ang bisan sin-o nga nagapakita sing pagtuo sa iya may kabuhi nga walay katapusan.” “Ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.” (Juan 3:16; Roma 6:23) Huo, sang madugay na ang inspirado nga salmo nanaad: “Ang mga matarong magapanag-iya sang duta, kag magapuyo sila diri sing dayon.” (Salmo 37:29) Subong sang ginhimo niya sang yari sia sa duta, sa amo nga tion banhawon ni Jesus ang mga patay kag hatagan sila sing kahigayunan nga makabenepisyo gikan sa himpit nga panglawas. Ang Biblia nagasaad: “May pagkabanhaw sang mga matarong kag mga dimatarong.”​—Binuhatan 24:15.

Ang duta gid magabugana sa idalom sang paggahom sang Ginharian agod nga ang kagutom, nga ginabangdan man sang malain nga panglawas, indi na liwat magluntad. Ang mga tagna sa Biblia nagasugid sa aton: “Ang kahoy sang latagon magapamunga, kag ang duta magapatubas, kag sila mangin sa ila duta nga may kalig-unan.” (Ezequiel 34:27) “Ang duta gid pat-od nga magahatag sang iya patubas; ang Dios, ang aton Dios, magapakamaayo sa aton.” (Salmo 67:6) “May bugana nga uyas sa duta.” (Salmo 72:16) “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa.”​—Isaias 35:1.

Nagasumaryo sang kahimtangan nga magaluntad sa bag-ong kalibutan sang Dios, ang matagnaon nga katapusan nga tulun-an sang Biblia nagapahayag: “Pahiran [sang Dios] ang tagsa ka luha sang mga mata nila, kag wala na sing kamatayon, ukon kalisod ukon paghibi ukon kasakit pa.”​—Bugna 21:4.

Nagasiling ka bala, ‘Mabudlay ina patihan’? Nian, hunahunaa ini. Antes si Adan nangin isa ka makasasala, may himpit sia nga panglawas. Handurawa nga kuno abi posible sadto nga may isa nga makighambal sa iya kag sugiran sia nga sa pila ka adlaw ang duta mapuno sing nagaantos, nagamasakit, kag nagatigulang nga katawhan. Wala ka bala nagahunahuna nga si Adan mabudlayan sa pagpati sa sina? Apang, amo sini ang matuod nga nagakatabo karon.

Sa kabaliskaran, ang himpit nga panglawas matuod gid nga matabo sa idalom sang Ginharian sang Dios. Ang Pulong ni Jehova nagapasalig sa aton: “Ining mga pulong masaligan kag matuod.” (Bugna 21:5) Ang ginasiling sang Dios nga mahanabo pat-od nga mahanabo bangod “indi mahimo nga ang Dios magbutig.”​—Hebreo 6:18.

Ano ang imo mahimo karon agod masigurado mo ang pagbaton sining nagapakari nga mga pagpakamaayo? Ang dalan padulong sa himpit nga panglawas kag dayon nga kabuhi maathag nga ginpakita sang ginsiling ni Jesus sa pangamuyo sa iya Amay: “Ini nagakahulugan sing kabuhi nga walay katapusan, ang ila pagkuha sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, nga si Jesucristo.”​—Juan 17:3.

Mangabay sa mga Saksi ni Jehova sing walay bayad nga pagtuon sa Biblia sa inyo puluy-an. Malipay sila sa pagbulig sa imo nga makatuon sing dugang pa nahanungod sa matahom nga mga saad sang Dios. Amo ini ang imo mangin una nga tikang sa dalanon padulong sa himpit nga panglawas!

[Retrato sa Pahina 14]

Sa bag-ong kalibutan sang Dios, ang tanan nga tawo magaagom sing himpit nga panglawas