Masaligan Mo Bala ang mga Saad sang Dios?

SI Jehova nga Dios, ang aton Manunuga, nangin matutom sa iya pulong sa tanan nga tion. “Ginpamulong ko ini,” siling niya. “Himuon ko man ini.” (Isaias 46:11) Sa tapos matuytuyan ang mga Israelinhon pasulod sa Ginsaad nga Duta, ang alagad sang Dios nga si Josue nagsulat: “Wala sing bisan isa ka saad ang napaslawan gikan sa tanan nga maayong saad nga ginpamulong ni Jehova sa panimalay sang Israel; nagmatuod ini tanan.”​—Josue 21:45; 23:14.

Halin sang adlaw ni Josue tubtob sang pag-abot sang Mesias, ginatos ka tagna nga gin-inspirar sang Dios ang natuman. Ang isa ka halimbawa amo sang ang mga manunukod sang Jerico nag-antos sing kadulaan nga gintagna mga siglo sa wala pa. (Josue 6:26; 1 Hari 16:34) Ang isa pa gid ka halimbawa nga daw imposible matuman, amo ang saad nga ang nagutman nga mga pumuluyo sang Samaria makabaton sing bugana nga pagkaon pagligad sang isa ka adlaw nga gintagna ini. Sa 2 Hari kapitulo 7, mabasa mo kon paano gintuman sang Dios ina nga saad.

Ang Pagtindog kag Pagkapukan sang mga Kagamhanan sa Kalibutan

Gin-inspirar sang Dios ang mga manunulat sang Biblia agod irekord ang mga detalye nahanungod sa pagtindog kag pagkapukan sang mga kagamhanan sa kalibutan. Halimbawa, gingamit sang Dios ang iya manalagna nga si Isaias sa pagtagna sang pagkapukan sang gamhanan nga Babilonia halos 200 ka tuig antes ini matabo. Sa katunayan, ang mga Mediahanon, nga nagbuylog sa mga Persiahanon, ginhingadlan mismo subong amo ang mga manugbihag. (Isaias 13:​17-19) Apang kapin pa ka talalupangdon, ginhingadlan gid sang manalagna sang Dios ang Persiahanon nga hari nga si Ciro subong amo ang isa nga magapanguna sa pagbihag, bisan pa si Ciro wala pa matawo sang ginrekord ang tagna! (Isaias 45:1) Apang madamo pa sing subong sini nga mga halimbawa.

Gintagna man ni manalagna Isaias kon paano himuon ang pagbihag sa Babilonia. Nagsulat sia nga ang nagaamlig nga mga tubig sang siudad, ang suba sang Eufrates, ‘pamalhon’ kag “ang mga gawang [sang Babilonia] indi pagtakpan.” (Isaias 44:27–45:1) Natuman ining espisipiko nga mga detalye, subong sang ginreport sang istoryador nga si Herodotus.

Sang ang Babilonia amo pa ang nagagahom, gingamit man sang Dios ang iya manalagna nga si Daniel sa pagsugid sang mga kagamhanan sa kalibutan nga magasunod sa iya. Nakatigayon si Daniel sang isa ka palanan-awon tuhoy sa isa ka simbuliko nga karnero nga lalaki nga may duha ka sungay nga nagmadinalag-on sa pagbihag sa tanan iban pa nga “mapintas nga sapat.” Wala nagabilin sing duhaduha sa kon sin-o ang ginalaragway sang karnero nga lalaki nga may duha ka sungay, si Daniel nagsulat nga ini “amo ang mga hari sang Media kag Persia.” (Daniel 8:​1-4, 20) Sa pagkamatuod, subong gintagna, ang Medo-Persia amo ang nagsunod nga kagamhanan sa kalibutan sang ginbihag sini ang Babilonia sang 539 B.C.E.

Sa sining palanan-awon gikan sa Dios, masunod nga nakita ni Daniel ang “kanding nga lalaki nga may daku nga sungay sa ulot sang iya mga mata.” Ginpadayon ni Daniel ang iya paglaragway: ‘Nakita ko sia nga nagpalapit sa karnero nga lalaki, kag ginsungay sini ang karnero nga lalaki kag ginpungal ang duha ka sungay sini, kag wala sing nagluwas sa karnero nga lalaki. Kag ang kanding nga lalaki nagpakadaku sang iya kaugalingon sing lakas; apang sang magbakod ini, ang dakung sungay napukan, kag sa baylo sini nag-ulhot ang apat ka sungay.’​—Daniel 8:​5-8.

Ang Pulong sang Dios wala nagabilin sing duhaduha sa kon ano ang kahulugan sining tanan. Talupangda ang paathag: “Ang kanding nga lalaki nga bulbulan amo ang hari sang Gresya; kag tuhoy sa sungay nga daku nga yara sa ulot sang iya mga mata, amo ini ang una nga hari. Kag bangod napungal inang isa, apat sang ulihi ang nag-ulhot sa baylo sini, apat ka ginharian ang magatindog gikan sa iya pungsod, apang indi sa kusog niya.”​—Daniel 8:​21, 22.

Ginapakita sang maragtas nga ining “hari sang Gresya” amo si Alejandro nga Daku. Sa tapos sang iya kamatayon sang 323 B.C.E., ang iya emperyo natunga sang ulihi sa iya apat ka heneral​—sanday Seleucus I Nicator, Cassander, Ptolemy I, kag Lysimachus. Subong sang gintagna sang Biblia, “apat sang ulihi ang nag-ulhot sa baylo sini.” Subong gintagna man, wala sing isa sini ang nakatigayon sing gahom nga kasubong sang kay Alejandro. Sa pagkamatuod, talalupangdon gid ang mga katumanan amo kon ngaa ang subong sina nga mga tagna sa Biblia gintawag nga “maragtas nga ginsulat sing abanse.”

Ginsaad ang Mesias

Ang Dios wala lamang magsaad sing isa ka Mesias sa pagluwas sa mga tawo gikan sa mga epekto sang sala kag kamatayon kundi naghatag man sia sing madamo nga tagna sa pagkilala sinang Ginsaad nga Isa. Binagbinaga ang pila sini, mga tagna nga indi mahimo planuhon ni Jesus agod matuman.

Gintagna ginatos ka tuig sa wala pa nga ang Ginsaad nga Isa matawo sa Betlehem kag matawo sia gikan sa isa ka ulay. (Ipaanggid ang Miqueas 5:2 kag Mateo 2:​3-9; Isaias 7:14 kag Mateo 1:​22, 23.) Gintagna nga pagaluiban sia sa baylo sang 30 ka bilog nga pilak. (Zacarias 11:​12, 13; Mateo 27:​3-5) Gintagna man nga wala sing bisan isa ka tul-an sang iya lawas ang mabuong kag nga ang iya mga panapton papalaran.​—Ipaanggid ang Salmo 34:20 kag Juan 19:​36, Salmo 22:18 kag Mateo 27:35.

Ang labi na nga talalupangdon amo ang katunayan nga gintagna sang Biblia kon san-o magaabot ang Mesias. Ang Pulong sang Dios nagtagna: “Kutob sa pagguwa sang sugo sa pagpahauli kag sa pagpatindog liwat sang Jerusalem tubtob sa pagkari sang Mesias nga Pangulo, mangin pito ka semana, subong man kan-uman kag duha ka semana.” (Daniel 9:25) Suno sa Biblia, ang sugo sa pagpahauli kag sa pagpatindog liwat sang mga pader sang Jerusalem ginhatag sang ika-20 nga tuig sang paggahom ni Hari Artaxerxes, nga suno sa sekular nga maragtas amo ang tuig 455 B.C.E. (Nehemias 2:​1-8) Ining 69 ka semana sang mga tuig natapos sang 483 ka tuig sang ulihi (7 x 69 = 483), sang 29 C.E. Amo gid sadto ang tuig sang si Jesus ginbawtismuhan kag ginhaplasan sing balaan nga espiritu, nga nangin ang Mesias, ukon Cristo!

Sing talalupangdon, ang katawhan sang adlaw ni Jesus nagpaabot sang pagkari sang Mesias sadtong tion, subong ginapakita sang Cristianong istoryador nga si Lucas. (Lucas 3:15) Ang Romanong mga istoryador nga sanday Tacitus kag Suetonius, ang Judiyong istoryador nga si Josephus, kag ang Judiyong pilosopo nga si Philo Judaeus nagpamatuod man sa sining pagpaabot. Bisan gani si Abba Hillel Silver, sa iya libro nga A History of Messianic Speculation in Israel, nagakilala nga “ang Mesias ginpaabot sang mga dos-kuwarto sang unang siglo C.E.” Bangod ini, siling niya, sang “popular nga kronolohiya sadtong adlaw,” nga sa bahin ginkuha gikan sa tulun-an ni Daniel.

Bangod sina nga impormasyon, indi dapat makapakibot nga ginapakita man sang Biblia kon san-o magabalik ang Mesias sa pagsugod sang iya harianon nga paggahom. Ang kronolohiko nga ebidensia sa tagna ni Daniel nagatudlo sang tion gid nga “ang Labing Mataas” magahatag sang paggahom sa duta sa “labing kubos sa katawhan,” si Jesucristo. (Daniel 4:​17-25; Mateo 11:29) Ginasambit ang panahon sang “pito ka tion,” ukon pito ka matagnaon nga tuig, kag ining panahon ginabulubanta nga natapos sang tuig 1914.a

Wala sing Petsa nga Ginhatag Para sa Katapusan

Apang, ang tuig 1914, amo ang petsa para lamang sa pagsugod sang paggahom ni Cristo “sa tunga sang [iya] mga kaaway.” (Salmo 110:​1, 2; Hebreo 10:​12, 13) Ginapahayag sang tulun-an nga Bugna sang Biblia nga sa tion sang pagsugod ni Cristo sa paggahom sa langit, itagbong niya si Satanas nga Yawa kag ang iya mga anghel sa duta. Antes niya laglagon sing bug-os ining malaut nga mga espiritu, siling sang Biblia, magatuga sila sing daku nga kagamo sa duta sa “malip-ot nga tion.”​—Bugna 12:​7-12.

Sing importante, wala nagahatag ang Biblia sing petsa sa kon san-o matapos ining “malip-ot nga tion” kag kon san-o si Cristo magahikot subong Manuglaglag sang mga kaaway sang Dios sa Armagedon. (Bugna 16:16; 19:​11-21) Sa katunayan, subong napatalupangod sa nauna nga artikulo, nagsiling si Jesus nga dapat mangin handa bangod wala sing bisan sin-o nga tawo ang nakahibalo sang petsa sina nga hitabo. (Marcos 13:​32, 33) Kon ang isa magalabang sa ginsiling ni Jesus, subong sang ginhimo sang unang mga Cristiano sa Tesalonica kag sang iban pa sa tapos nila, ang mangin resulta amo ang butig, ukon indi sibu, nga mga panagnaon.​—2 Tesalonica 2:​1, 2.

Kinahanglanon ang Pagtadlong sa Pagtamod

Antes sang ulihi nga bahin sang tuig 1914, madamong Cristiano ang nagpaabot nga magabalik si Cristo sadtong tion kag dalhon sila sa langit. Sa amo, sa isa ka diskurso nga ginhatag sang Septiembre 30, 1914, si A. H. Macmillan, isa ka Estudyante sang Biblia, nagsiling: “Ayhan amo ini ang katapusan nga pamulongpulong publiko nga ihatag ko bangod mapauli na kita [sa langit] sa indi madugay.” Maathag nga nagsayop si Macmillan, apang indi lamang yadto ang wala matuman nga pagpaabot niya ukon sang iya kaupod nga mga Estudyante sang Biblia.

Ang mga Estudyante sang Biblia, nga nakilal-an sang 1931 subong mga Saksi ni Jehova, nagpaabot man nga ang tuig 1925 mangin katumanan sang dalayawon nga mga tagna sa Biblia. Ginahaumhaum nila nga sadtong tion ang dutan-on nga pagkabanhaw magasugod, kag buhion liwat ang matutom nga mga tawo sang una, subong nanday Abraham, David, kag Daniel. Sang ulihi pa, madamong Saksi ang naghaumhaum nga ang mga hitabo may kaangtanan sa pagsugod sang Milenyo nga Paghari ni Cristo mahimo magsugod sang 1975. Ang ila pagpaabot ginpasad sa paghangop nga ang ikapito nga milenyo sang maragtas sang tawo magasugod sadto.

Ining sayop nga mga pagtamod wala nagakahulugan nga ang mga saad sang Dios sayop, nga nagsala sia. Wala gid! Ang kabangdanan sang mga sayop ukon sala nga mga paghangop, subong sang natabo sa mga Cristiano sang unang siglo, amo ang kapaslawan sa pagpamati sa paandam ni Jesus, ‘Wala ninyo mahibalui ang tion.’ Indi ang malaut nga katuyuan ukon pagkadimatutom kay Cristo ang kabangdanan sang sayop nga mga konklusion kundi amo ang mabaskog nga handum nga matuman ang katumanan sang mga saad sang Dios sa nagakaigo nga tion sini.

Subong resulta, si A. H. Macmillan nagpaathag sang ulihi: “Natun-an ko nga dapat naton batunon ang aton mga sayop kag magpadayon sa pagpanalawsaw sa Pulong sang Dios para sa dugang pa nga kasanagan. Bisan ano man nga mga pagpasibu ang dapat naton himuon sa tion kag tion sa aton mga pagtamod, indi ina magabag-o sa mainayuhon nga pag-aman sing gawad kag sa saad sang Dios nga dayon nga kabuhi.”

Sa pagkamatuod, ang mga saad sang Dios masaligan! Ang mga tawo ang may huyog sa pagsayop. Busa, ang matuod nga mga Cristiano magahupot sing nagahulat nga panimuot bilang pagtuman sa sugo ni Jesus. Magapabilin sila nga nagamata kag handa para sa dimalikawan nga pagkari ni Cristo subong Manuglaglag sang Dios. Indi nila pagtugutan ang sayop nga mga panagnaon nga magpakunol sang ila mga igbalatyag kag indi magsapak sa matuod nga paandam tuhoy sa katapusan sang kalibutan.

Ano, nian, ang masiling sa pagpati nga ining kalibutan matapos? May ebidensia gid bala nga matabo ini sa indi madugay, sa sulod sang imo pagkabuhi?

[Mga footnote]

[Retrato sa Pahina 7]

Gintagna ang espisipiko nga mga detalye nahanungod sa pagkapukan sang Babilonia

[Retrato sa Pahina 9]

Indi mahimo nga ginplano ni Jesus ang katumanan sang madamo sang mga tagna nahanungod sa iya kaugalingon