Nagasalakay Liwat ang Anos!

KUTOB sang katuigan 1950, ang kadamuon sang may balatian nga anos (TB) nagnubo sa Estados Unidos sa 5 porsiento sa isa ka tuig. Apang, kutob sang 1985, may 18 porsiento nga pagsaka sa ginreport nga pagbalatian sing anos. Ang labi ka makakululba amo ang pagtuhaw sang bag-o nga sahi sang balatian nga nagabato sa bulong. Ang anos ginabulubanta nga nagapatay karon sing tatlo ka milyon ka tawo kada tuig. Ngaa napaslawan ang pagpakig-away batok sa anos?

Ang isa ka rason amo nga wala ginainom sang madamong pasyente ang ila bulong suno sa ginapatuman nga kalawigon sang tion​—⁠masami anom tubtob siam ka bulan. Sa New York City, halimbawa, ginpakita sang isa ka pagtuon nga 89 porsiento sang isa ka grupo sang mga 200 ka pasyente nga may malala nga anos ang wala makatapos sang ila pagpabulong. “Makahaladlok ina,” siling ni Dr. Lee Reich­man, presidente sang Amer­i­can ­Lung As­so­ci­a­tion, “bangod ina nga mga tawo (a) indi mabulong, kag (b) mahimo sila matapikan sing anos nga nagabato sa kinaandan nga mga bulong.” Apang maapektuhan sining mga anuson indi lamang ang ila kaugalingon nga panglawas. “Bangod wala nila ginainom ang ila bulong,” dugang ni Dr. Reich­man, “mahimo nila malatnan ang iban nga tawo.” Walay duhaduha nga isa pa ini ka kabangdanan sa ginabulubanta nga walo ka milyon ka bag-o nga anuson nga nausisa sa bug-os nga kalibutan kada tuig.

Nahibaluan sang mga estudyante sang Biblia nga ang ‘kamatay sa lainlain nga duog’ isa ka bahin sang tanda nga nagakabuhi kita sa “katapusan nga mga adlaw” sining sistema sang mga butang. (Lucas 21:​11; 2 Timoteo 3:1) Ano ang magasunod? Isa ka bag-ong duta, nga “wala sing pumuluyo nga magasiling: ‘Nagamasakit ako.’” (Isaias 33:24) Huo, si Jehova nga Dios nagasaad, indi sing temporaryo nga kaumpawan, kundi sing permanente nga kahilwayan gikan sa balatian kag kamatayon.​—⁠Bugna 21:​1-4.