Ang Pagtamod sang Biblia

Malaglag Bala ang Duta Paagi sa Kalayo?

MAUPOS sa isa ka nuklear nga sunog, mangin uling bangod sang nagadaku nga adlaw, ukon sunugon sang isa ka akig nga dios—mahimo nga lainlain ang paagi sang kalaglagan, apang madamo nga tawo ang kumbinsido nga ang planeta nga Duta, ang puluy-an sang katawhan, pagalaglagon, sa nagadabadaba nga kalayo, isa ka daku nga kalaglagan.

Ginatudlo sang iban ang mga teksto sa Biblia nga nagatagna tuhoy sa pagpahanugot sang Dios nga pagsunog subong silot sa mga kasal-anan sang tawo sa duta. Ang iban nagaugyon sa opinyon ni Paul Davies, isa ka propesor sa University of Adelaide, Australia, nga nagsulat tuhoy sa iya ginakabig nga indi malikawan nga kalaglagan sang duta paagi sa kalayo. Sa iya libro nga The Last Three Minutes sia nagasiling: “Samtang labi nga nagadaku ang adlaw, lamumon sini . . . ang Duta sang iya kalayo. Ang aton planeta mangin abo.” Ano ang kamatuoran tuhoy sa palaabuton sang duta? Paano naton hangpon ang mga teksto sa Biblia nga daw nagatagna tuhoy sa kalaglagan paagi sa kalayo?

Nagaulikid Bala ang Dios?

Sa Jeremias 10:10-12, ginsilingan kita: “Sa pagkamatuod si Jehova Dios. . . . Sia ang Magbubuhat sang duta paagi sa iya gahom, ang Isa nga nagpasad sing mabungahon nga duta paagi sa iya kaalam, kag ang Isa nga paagi sa iya paghangop nagpasangkad sang kalangitan.” Gintuga sang Dios ang duta kag ginpalig-on ini. Gani paagi sa kaalam, gugma, kag paghangop, mahalungon nga ginhanda niya ang duta nga magpabilin sing dayon subong isa ka matahom nga puluy-an para sa mga tawo.

Tuhoy sa pagtuga sang Dios sa tawo, ang Biblia nagareport: “Lalaki kag babayi gintuga niya sila. Dugang pa, ginpakamaayo sila sang Dios kag ang Dios nagsiling sa ila: ‘Magmabungahon kag magbuad kag tugbon ang duta kag magpakaagalon sa iya.’ ” (Genesis 1:27, 28) Sang natapos niya ang iya hilikuton sang pagpanuga, maathag sia nga nagsiling “maayo gid.” (Genesis 1:31) Luyag niya nga magpabilin ini nga matahom. Subong nga ang pila ka nagapaabot nga mangin mga ginikanan nagadesinyo kag nagahimo sing hulot para sa ila ginapaabot nga lapsag, ang Dios nagtanom sing isa ka matahom nga hardin kag ginbutang didto ang lalaki nga si Adan agod palambuon ini kag atipanon ini.—Genesis 2:15.

Gintalikdan ni Adan ang kahimpitan kag ang iya obligasyon nga atipanon ang duta. Apang ginkalimtan bala sang Manunuga ang Iya katuyuan? Ginapakita sang Isaias 45:18 nga indi amo sini: “Amo sini ang ginsiling ni Jehova, ang Manunuga sang mga langit, . . . ang Manughuman sang duta . . . , ang Isa nga nagpalig-on sini, nga wala magtuga sini nga wala sing pulos, nga naghuman sini agod puy-an.” (Tan-awa man ang Isaias 55:10, 11.) Walay sapayan nga ginpabayaan sang tawo ang iya katungdanan subong manugbantay, gintuman sang Dios ang iya katuyuan sa duta kag sa mga pumuluyo sini. Ang Kasuguan nga ginhatag sa dumaan nga pungsod sang Israel nagpatuman sing “isa ka bug-os nga kapahuwayan para sa duta” sa kada ikapito nga tuig. Naglakip ini sing mahigugmaon nga mga sugo nga nagaamlig sa kasapatan. (Levitico 25:4; Exodo 23:4, 5; Deuteronomio 22:1, 2, 6, 7, 10; 25:4; Lucas 14:5) Pila lamang ini ka halimbawa sa Biblia nga maathag nga nagapakita nga nagaulikid gid ang Dios sa katawhan kag sa tanan nga iya gintugyan nga atipanon sang tawo.

“Ang Nahauna nga Duta”

Kon amo paano naton ipaathag ang mga teksto sa Biblia nga daw nagasumpakilay? Ang isa sini amo ang 2 Pedro 3:7, nga suno sa King James Version, nagasiling: “Ang mga langit kag duta, nga amo karon, sa amo nga pulong gintigana sa kalayo, nga ginatipigan nga sa adlaw sang paghukom kag kalaglagan sang mga tawo nga didiosnon.” Ang isa pa amo ang Bugna 21:1, nga nagasiling: “Nakita ko ang bag-ong langit kag ang bag-ong duta; kay ang nahauna nga langit kag ang nahauna nga duta nagtaliwan.”

Kon hangpon sing literal ang pinamulong ni Pedro kag ang planeta nga Duta lamunon sang literal nga kalayo, nian ang literal nga mga langit—ang mga bituon kag ang iban pa nga mga butang sa kalangitan—malaglag man paagi sa kalayo. Apang ining pagpaathag, nagasumpakil sa pasalig nga masapwan sa mga kasulatan kaangay sang Mateo 6:10: “Matuman ang imo kabubut-on, subong sang sa langit, amo man sa duta,” kag ang Salmo 37:29: “Ang mga matarong magapanubli sang duta, kag magapuyo diri tubtob sa walay katubtuban.” Dugang pa, paano malaglag sang kalayo ang mismo mainit nga adlaw kag mga bituon, nga padayon nga nagapatubas sing nuklear nga mga paglupok?

Sa pihak nga bahin, ang Biblia masami nagagamit sing tinaga nga “duta” sa malaragwayon nga kahulugan. Halimbawa, ang Genesis 11:1 nagasiling: “Ang duta nagahambal sing isa ka lenguahe.” Diri, ang tinaga nga “duta” nagapatuhoy sa katawhan sa kabilugan, ukon sa tawhanon nga katilingban. (Tan-awa man ang 1 Hari 2:1, 2; 1 Cronica 16:31.) Ang konteksto sang 2 Pedro 3:5, 6 nagapahangop sing pareho malaragwayon nga paggamit sang “duta.” Nagapatuhoy ini sa mga adlaw ni Noe sang ang malauton nga katilingban sang tawo ginlaglag sa Anaw apang si Noe kag ang iya panimalay subong man ang duta wala malaglag. (Genesis 9:11) Subong man, ang 2 Pedro 3:7, nagasiling nga ang pagalaglagon amo ang “didiosnon nga mga tawo.” Ini nga pagtamod nagaugyon sa kabug-usan nga bahin sang Biblia. Ang malauton nga sistema nga natalana nga pagalaglagon amo ang “nahauna nga duta” nga ginapatuhuyan sa Bugna 21:1, nga ginkutlo kaina.

Sa pagkamatuod, subong sang mainulikdon dutan-on nga amay nga magahimo sang tanan nga paagi agod pat-uron nga indi mahalitan ang iya puluy-an, si Jehova nga Dios nagaulikid gid sa iya tinuga. Iya anay gintabog ang imoral kag malauton nga mga tawo gikan sa mabungahon nga Nalupyakan sang Jordan kag ginpasalig ang bag-ong mga pumuluyo sang duta, nga nakigkatipan sa iya, nga kon sundon nila ang iya mga kasuguan, ‘ang duta indi magasuka sa ila bangod sang paghigko nila sa sini subong sang pagsuka sini anay sa pungsod antes nila.’—Levitico 18:24-28.

“Isa ka Bag-o nga Duta”

Sa karon, ang duta ginhigkuan sang tiko sa sekso nga katilingban, mapintas, garok sa politika. Ang Dios lamang ang makaluwas sini. Amo gid sina ang himuon niya. Sa Bugna 11:18, nagasaad sia nga “laglagon yadtong nagalaglag sang duta.” Ang napasag-uli kag bag-o nga duta pagapuy-an sang mga tawo nga nagakahadlok sa Dios kag hanuot nga nagahigugma sang ila isigkatawo. (Hebreo 2:5; ipaanggid ang Lucas 10:25-28.) Ang mga pagbag-o nga matabo sa idalom sang langitnon nga Ginharian sang Dios mangin daku gid amo kon ngaa ang Biblia nagahambal tuhoy sa “isa ka bag-ong duta”​—⁠isa ka bag-o nga katilingban sang tawo.

Kon ginabasa naton ang mga kasulatan kaangay sang Salmo 37:29 kag nahangpan naton ang ginsiling ni Cristo sa Mateo 6:10, kumbinsido kita nga wala sing kinaugali nga puwersa ukon tawo walay sapayan sang tanan malaglagon nga kusog sini ang makalaglag sang aton planeta. Indi sini mabag-o ang katuyuan sang Dios. (Salmo 119:90; Isaias 40:15, 26) Ang matutom nga mga tawo magapuyo sa duta sa tunga sang walay tupong katahom kag malipayon nga mga kahimtangan. Amo sina ang kamatuoran tuhoy sa palaabuton sang duta, kay amo sini anay kag amo gihapon ang katuyuan sang mahigugmaon nga Manunuga sang tawo.—Genesis 2:7-9, 15; Bugna 21:1-5.