Wala Na Nagaang-ang!

SA HALOS walo na ka dekada, nabuligan sang Magmata! ang mga bumalasa sini nga malandas ang matag-adlaw nga mga problema. Kon kaisa, ginasugiran sila sini tuhoy sa bag-o nga mga pag-uswag kag mga pagtamod sa patag sang medisina, nga makaapektar sing daku sa ila kabuhi, subong sang ginapakita sang masunod nga istorya.

Si Matthew natawo sang 1989 sa aminhan nga Inglaterra. Tubtob sa edad nga duha ka tuig, normal sia nga bata nga lalaki. Nian, sing hinali, samtang nagabakasyon, nag-ang-ang sia sing tuman.

“Nagkonsulta kami sang akon bana sa lokal nga klinika nga nagabulong sa mga may problema sa paghambal,” paathag ni Margaret, nga iya iloy, “kag ginsilingan sia nga mabulong lamang si Matthew kon mag-edad na sia sing pito ka tuig bangod antes sina nga pangidaron, indi makontrol sang kabataan ang ila mga vocal cord. Apang sang nag-eskwela na si Matthew, indi niya maagwanta ang pagpanunlog sang iban nga kabataan, kag naglala ang iya pag-ang-ang. Indi niya luyag makigsimpon sa kadam-an kag nangin mahuluy-on. Bisan ang pagtambong sa miting sa Kingdom Hall nangin problema.

“Nian natalupangdan namon ang ‘Hope for Stutterers,’ sa ‘Watching the World,’ sa Abril 8, 1995, nga guwa sang Awake! Ginpaathag sini sing malip-ot ang hilikuton sang isa ka grupo sang mga terapista nga nagabulong sang mga balatian sa paghambal sa Sydney, Australia, nga nagmadinalag-on sa pagbulong sa pag-ang-ang sang kabataan.

“Ginsulatan namon ang University of Sydney kag nakabaton kami sing isa ka mainayuhon nga sabat gikan kay Dr. Mark Onslow, nga nagapanugda nga tawgan namon sia sa telepono. Bangod malayo ang amon ginaistaran, ang iya grupo sang mga terapista namat-od nga tilawan ang ‘long-distance therapy.’ Kami, subong mga ginikanan ni Matthew, gintudluan sang mga pamaagi sang grupo paagi sa telepono, fax, kag audiotape. Ang terapiya ginbagay sa personal nga mga kinahanglanon ni Matthew. Nagapungko ako upod sa iya kag sa kalmado, dipormal nga paagi personal ko sia nga ginabuligan nga tadlungon ang iya mga paghambal. Ginadayaw ko sia kag ginahatagan sing diutay nga mga padya sa ‘talunsay’ nga paghambal.

“Anom ka bulan sang ulihi si Matthew indi na mahuluy-on, nga nagalikaw sa mga tawo, kundi isa ka normal, malipayon, kag mainabyanon nga bata. Nagasabat na sia karon sa mga miting sa kongregasyon kag nanamian gid sa pagbasa sing Biblia sa Kingdom Hall. Nagapakigbahin man sia sing malipayon sa pamalaybalay nga ministeryo. Normal na ang iya paghambal!

“Daku gid ang amon pagpasalamat sa sadtong malip-ot nga balita sa Awake!, nga nagpabag-o sa kabuhi sang amon anak!”—Gin-amot.