Kinaandan nga mga Sayop Tuhoy sa mga Man-ug

Sang Koresponsal Sang Magmata! Sa India

Ang madanlog nga kobra nagkamang pakadto sa bata nga babayi, nga naganyat sa kahumot sang jasmine nga mga bulak sa iya buhok. Ang malaba nga lawas sini nagabalodbalod kaangay sang mga balod sa baybayon. Nakita sang bata nga babayi ang igpat sa ulo sang kobra nga daw masilaw nga alahas samtang nagadulot sa iya ang nagapang-udom nga panulok sini. Sa hinali, nagbutyog ini kag ginbuntog ang iya kamot.

MATUOD ukon sayop? Ang paglaragway sa ibabaw sayop, nga ginpasad ini sa kinaandan nga sayop nga mga pagpati. Binagbinaga ang pila sining sayop nga mga pagpati:

1. Ang jasmine, sandalwood, kag ang iban pa nga mga humot ginaamag sang mga man-ug. SAYOP. Ang kahumot ginaamag sang mga sapat-sapat, ang mga sapat-sapat ginaamag sang mga paka, kag ang mga paka, nga lakip sa ginakaon sang mga man-ug, ginaamag sang mga man-ug.

2. Ang mga man-ug nagakamang paagi sa pagpabalodbalod sang ila lawas. SAYOP. Ginahimo ini sang mga man-ug kon mag-agi sa dalagku nga mga bato. Ang kinaandan nga pagkamang sang mga kobra kag sang iban nga mga man-ug sa duta tadlong. Ginahimo nila ini paagi sa pag-unat sang unahan nga bahin sang ila lawas kag ginaguyod ang naulihi nga bahin ukon, sa bulig sang mga kudol-kudol sang duta nagaisiisi paabante, nga kon tan-awon daw letra nga S.

3. Ang pila ka man-ug may trabungko sa ila ulo. SAYOP. Isa ini ka mito, subong man ang pagpati nga ang bantog nga mga tawo sa dumaan nga India ginaamligan sang mga kobra.

4. Ang mga kobra nagaudom sa ila tulukbon. SAYOP. Ang man-ug masami nga nagatulok sing tadlong kon nahadlok, gani ang paghangop sang mga tawo kon makasumalang sila sing man-ug amo nga may nagadulot ini, nagapang-udom nga panulok. Apang, indi amo ini ang paagi nga ginagamit sa pagdakop sang tulukbon.

5. Ang mga kobra nagadamhag sa ila biktima. SAYOP. Ginabutyog sang kobra ang nauna nga bahin sang lawas sini agod atakehon ang biktima, apang ang kalabanan nga bahin sang iya lawas nagapabilin sa duta subong panukod. Sa masami, ikatlo nga bahin sang lawas ang nagatukyahaw kag nagabutyog sa pag-atake.

6. Ang panit sang mga man-ug, lakip ang mga kobra, madanlog kag pirme mayami. SAYOP. Ang panit sang mga man-ug, nga may nagasampawanay nga mga himbis, mamala kag kaangay sang malum-ok nga panit. Ang mga man-ug cold-blooded nga mga tinuga, ang temperatura sang ila lawas nagasunod sa mga pagbag-o sang temperatura sa palibot.

7. Ang mga kobra bungol. SAYOP. Isa ini ka sayop nga pagpati sang madamo. Nagapati sila nga makabati lamang ang mga man-ug paagi sa mga pagtay-og sang duta nga nagapanalaytay sa lawas sini. Ang Biblia, sa Salmo 58:​4, 5, husto sa pagsiling nga ang mga kobra indi bungol. Ang bag-o nga pagpanalawsaw nagapakita nga ang mga kobra makabati sing tunog nga ginadala sang hangin kag nga sila nagakaganyat sa musika sang mga manug-anta sang man-ug.​—⁠Tan-awa man ang Awake! sang Hulyo 22, 1993, pahina 31.

[Credit Line sa pahina 28]

Man-ug sa ibabaw: Mga sapat/Jim Harter/Dover Publications, Inc.