Ang Pagtamod sang Biblia

Paano Dapat Tamdon sang mga Cristiano ang Misa?

ANG debotado nga mga Katoliko nagaugyon kay Papa Juan Paulo II, nga sining karon lang, suno sa The New York Times, “nagsiling liwat nga ginakabig sang simbahan nga isa ka sala kon ang isa ka Katoliko indi makatambong sa Misa.” Ano ang Misa? Ang simbahan bala kag ang Biblia nagaugyunay sa sini nga topiko?

Sa libro nga Things Catholics Are Asked About, ang Katoliko nga pari nga si Martin J. Scott naghatag sing kahulugan sa Misa subong sang masunod: “Ang Misa amo ang wala sing dugo nga paghalad sang Lawas kag Dugo ni Cristo. Ang Kalbaryo amo ang may dugo nga paghalad kay Cristo. Ang Misa pareho nga paghalad subong sang krus. Indi ini malaragwayon nga hambal, indi pagpaanggid, ukon pagpasobra.” Nagsiling man sia: “Ang Misa nagadala sa aton mga altar sang Anak sang Dios, kag sa paghalad sa Iya sa Dios.”

Makasulatanhon Bala ang Misa?

Ang sinsero nga mga Katoliko nagapati nga ang Misa napasad sa Makasulatanhon nga panudlo. Subong pamatuod, ginatudlo nila ang mga pinamulong ni Jesus sa tion sang ginatawag nga Katapusan nga Panihapon. Samtang ginaapod-apod niya ang tinapay kag alak sa iya mga apostoles, si Jesus nagsiling sang nagapatuhoy sa tinapay: “Ini amo ang akon lawas.” Sang nagapatuhoy sa alak, sia nagsiling: “Ini amo ang akon dugo.” (Mateo 26:26-28)a Ang mga Katoliko nagapati nga sang ginsiling niya ini nga mga pulong, ginhimo ni Jesus ang tinapay kag alak nga iya lawas kag dugo. Apang, ang New Catholic Encyclopedia (1967) nagapaandam: “Indi kita dapat magsalig gid nga literal ang mga pinamulong ‘Ini amo ang akon lawas’ ukon ‘Ini amo ang akon dugo.’ . . . Kay sa mga dinalan subong sang ‘ang tig-alani amo ang katapusan sang kalibutan’ (Mt 13.39) ukon ‘ako amo ang matuod nga puno sang ubas’ (Jn 15.1) ang [berbo nga “mangin”] nagakahulugan lamang sing nagapatuhoy ukon nagarepresentar.” Sa amo, bisan ining may awtoridad nga insiklopedia nagabaton nga ang ginasiling sang Mateo 26:26-28 wala nagapamatuod nga ang tinapay kag ang alak nangin literal nga lawas kag dugo ni Jesus sang Katapusan nga Panihapon.

Mahimo madumduman sang isa nga si Jesus nagsiling anay: “Ako ang buhi nga tinapay nga naghalin sa langit. . . . Ang bisan sin-o nga nagakaon sang akon unod kag nagainom sang akon dugo may kabuhi nga dayon.” (Juan 6:51, 54) Ang pila sadtong nagapamati kay Jesus literal nga naghangop sang iya pinamulong kag nakibot. (Juan 6:60) Apang mahimo kita mamangkot, Ginhimo bala ni Jesus ang iya unod subong tinapay sadto nga okasyon? Pat-od nga wala! Naghambal sia sing malaragwayon. Ginpaanggid niya ang iya kaugalingon sa tinapay bangod paagi sa iya paghalad ipaambit niya ang kabuhi sa katawhan. Ang Juan 6:35, 40 maathag nga nagapakita nga ang pagkaon kag pag-inom sarang mahimo paagi sa pagpakita sing pagtuo kay Jesucristo.

Bangod ang Misa isa ka nagapanguna nga rito sang Katoliko nga Simbahan, mahimo paabuton sang isa nga ginasakdag ini sang Kasulatan. Apang wala. Ang The Catholic Encyclopedia (1913 nga edisyon) nagpaathag kon ngaa: “Ang panguna nga ginhalinan sang amon doktrina . . . amo ang tradisyon, nga halin sang dumaan nga tion nagapahayag sang nagapangabay [nagapakiluoy] nga balor sang Halad sang Misa.” Huo, ang Misa sang Romano Katoliko ginpasad sa tradisyon, indi sa Biblia.

Bisan daw ano ka sinsero nga ginapatihan, ang isa ka tradisyon nga nagasumpakil sa Biblia indi kalahamut-an sa Dios. Ginsabdong ni Jesus ang relihioso nga mga lider sang iya adlaw: “Ginhimo ninyo nga wala sing pulos ang pulong sang Dios paagi sa inyo tradisyon.” (Mateo 15:6) Bangod ginpabaloran ni Jesus ang Pulong sang Dios, usisaon naton ang panudlo tuhoy sa Misa sa kapawa sang Balaan nga Kasulatan.

Ang Paghalad ni Cristo—Daw Ano Kasunson?

Ginatudlo sang Katoliko nga Simbahan nga sa kada paghiwat sing Misa, ginahalad si Cristo, bisan pa nga ginabaton nila nga wala sia aktuwal nga nagakapatay kag ang halad wala sing dugo. Nagaugyon bala ang Biblia sa sini nga pagtamod? Talupangda ang Hebreo 10:12, 14: “Ginhalad [ni Jesus] ang nagaisahanon nga halad para sa mga sala, kag nian nagpungko sing dayon, sa tuo nga kamot sang Dios. Paagi sa balor sinang nagaisahanon nga halad, natigayon niya ang dayon nga kahimpitan sang tanan nga ginpakabalaan.”

Apang, mahimo nga ang isa ka sinsero nga Katoliko mamatok: ‘Indi bala nga dapat maghalad pirme si Jesus sang iya kaugalingon? Nagapakasala kita sa madamo nga beses.’ Ang sabat sang Biblia ginrekord sa Hebreo 9:25, 26: “Indi kinahanglan maghalad [si Cristo] sang iya kaugalingon sing sulitsulit. . . . Ginhimo niya ang iya pagpahayag sing makaisa gid lang, sa katapusan nga panag-on, sa pagdula sang sala paagi sa paghalad sang iya kaugalingon.” Talupangda ini sing maayo: Si Cristo “indi kinahanglan maghalad sang iya kaugalingon sing sulitsulit.” Sa Roma 5:19, si apostol Pablo nagpaathag kon ngaa: “Paagi sa pagkadimatinumanon sang isa ka tawo [ni Adan] ang madamo ginkabig nga mga makasasala, gani paagi sa buhat sang pagkamatarong sang isa ka tawo [ni Jesus] ang madamo pakamatarungon.” Ang isa ka buhat sang pagkadimatinumanon ni Adan nagpaidalom sa aton sa kamatayon; ang isa ka nagagawad nga buhat ni Jesus nagpasad sing sadsaran para sa aton tanan nga nagatuo sa sina nga halad agod ang aton mga sala mapatawad karon kag makatigayon sing kabuhi nga wala sing katapusan sa palaabuton.

Ano ang kinatuhayan kon bala si Jesus ginhalad sing makaisa ukon pirme? May kaangtanan ini sa pag-apresyar sa balor sang halad ni Jesus. Amo yadto ang pinakadaku nga dulot nga nahatag—isa ka dulot nga tuman ka malahalon, tuman ka himpit, nga indi na gid ini kinahanglan nga suliton.

Nagakabagay gid nga dumdumon ang halad ni Jesus. Apang may kinatuhayan ang pagdumdom sa hitabo kag ang pagsulit sa sini. Halimbawa, ang mag-asawa nga nagaselebrar sang anibersaryo sang ila kasal mahimo makadumdom sang adlaw nga sila ginkasal, nga wala na nagasulit sing aktuwal sang seremonya. Kada tuig, ginasaulog sang mga Saksi ni Jehova ang anibersaryo sang kamatayon ni Jesus, nagahimo sini sa paagi nga ginsugo ni Jesus—“sa pagdumdom,” indi sa paghalad, sa iya. (Lucas 22:19) Dugang pa, ginapanikasugan sining mga Cristiano nga palambuon ang isa ka suod nga relasyon upod kay Jehova nga Dios paagi kay Jesucristo paagi sa pagpahisuno sang ila kabuhi, sang ila mga buhat, kag sang ila mga pagpati sa Balaan nga Kasulatan sa bug-os nga tuig.

Sa masami, nagakahulugan ang paghimo sini nga magbag-o sila sing panghunahuna. Apang, nalipay ang mga Saksi sa ihibalo nga kon sakdagon nila sing matutom ang Pulong sang Dios sa baylo sang tawhanon nga tradisyon, pakamaayuhon sila. Kag kon magtuo sila sa ginhalad nga dugo ni Jesus, nga ginpatulo sing makaisa gid lang mga duha kag libo ka tuig sang una, magatinlo ini sa ila gikan sa tanan nga sala.—1 Juan 1:8, 9.

[Footnote]

[Laragway sa pahina 20]

Ang Misa ni St. Giles (detalye)

[Kapsion]

Erich Lessing/Art Resource, NY