Ginaagda ka nga Magtambong sa “Makugi nga mga Manugbantala sang Ginharian” Distrito nga Kombension

SA PILIPINAS lamang, 63 ka kombension ang naiskedyul. Ang una hiwaton sa Nobiembre 22-24, 2002, kag ang katapusan sa Enero 10-12, 2003. Ang isa sining tatlo-ka-adlaw nga pagtilipon​—⁠nga sa masami halin sa Biernes tubtob Domingo​—⁠mahimo nga hiwaton sa isa ka siudad malapit sa inyo.

Ang mga sesyon pagasugdan paagi sa musika sa alas 8:30 s.a. Sa nahauna nga adlaw, ang nagaabiabi nga pamulongpulong pagasundan sing isa ka bahin nga magainterbyu sa mga manugbantala sang Ginharian. Nian, pagkatapos sang mga pamulongpulong, “Magkalipay Sing Daku kay Jehova” kag “Ipakita ang Pagkamapinasalamaton,” ang sesyon sa aga magatakop paagi sa keynote address, “Ang mga Manugbantala Sang Ginharian Ginapahulag Sang Kakugi.”

Ang sesyon sa Biernes sang hapon magalakip sang tatlo-ka-bahin nga simposium, “Ang Tagna ni Miqueas Nagapalig-on sa Aton nga Maglakat sa Ngalan ni Jehova,” subong man sang mga pamulongpulong, “Hupti ang Katinlo sa Moral Paagi sa Pag-amlig sa Inyo Tagipusuon” kag “Magbantay Batok sa Paglimbong.” Nian, ang labing maayo nga bulig may kaangtanan sa Cristianong ministeryo matigayon sa katapusan nga diskurso sa sini nga adlaw, “Simbaha ang Lamang Matuod nga Dios.”

Ang sesyon sa Sabado sang aga magalakip sang tatlo-ka-bahin nga simposium, “Ang mga Manugbantala Sang Ginharian nga Nagahimaya sa Ila Ministeryo.” Sundan ini sang makapalig-on nga mga pamulongpulong, “Kon Ngaa ‘Indi Mag-untat sa Pagpangamuyo’ ” kag “Nagapalig-on ang Paghambalanay Tuhoy sa Espirituwal nga mga Butang.” Ang programa sa aga magatakop paagi sa pamulongpulong tuhoy sa dedikasyon kag bawtismo, nga pagasundan sang pagbawtismo sa kalipikado nga mga indibiduwal.

Ang programa sa Sabado sang hapon magalakip sang katapusan nga tatlo-ka-bahin nga simposium sang kombension, “Ang Kalidad Sang Aton Pagtuo nga Natilawan Sang Nanuhaytuhay nga mga Pagtilaw.” Ang mga bahin magabulig sa mga Cristiano nga maatubang ang mga hangkat sa paghupot sing neutralidad. Ang programa sa Sabado magatakop paagi sa talalupangdon nga bahin sang kombension, ang makapalig-on nga pamulongpulong nga “Mangin Suod kay Jehova.”

Ang programa sa Domingo sang aga ilabi na nga magahatag sing igtalupangod sa mga pamatan-on, nga ginabuksan sang mga pamulongpulong, “Kay Jehova Ka Bala Nagasalig?” kag “Mga Pamatan-on​—⁠Magplano Kamo Para sa Palaabuton Upod sa Organisasyon ni Jehova.” Ang naulihi nga bahin magalakip sang 20 ka minuto nga mga interbyu. Sundan ini sang may kostyum nga drama tuhoy kay Jeremias, nga sang gintangdo subong manalagna nagpamatok, “Bata pa ako.” (Jeremias 1:6) Sundan ini sang isa ka pamulongpulong nga magahatag sang talalupangdon nga mensahe nga ginapaalinton sang drama. Ang pinasahi nga bahin sang programa sa hapon amo ang pamulongpulong publiko, “Ang Danyag Sining Kalibutan Nagabag-o.”

Pat-od gid nga mapalig-on ang imo kabuhi sa espirituwal paagi sa pagtambong sa bug-os nga tatlo ka adlaw. Para sa lokasyon sang kombension nga pinakamalapit sa inyo puluy-an, kontaka ang Kingdom Hall of Jehovah’s Witnesses sa inyo lugar ukon sulati ang mga manugbalhag sining magasin.