Padayon nga Nagapanguyapot sa Tuo nga Kamot sang Dios

◼ Si Jezreel sa Mexico natawo nga may indi kinaandan nga balatian sa panit nga ginatawag congenital lamellar ichthyosis. Bangod sini, nagapamanitpanit kag nagapalangdamol ang iya panit sa kalabanan nga parte sang iya lawas. “Kalain tan-awon sang akon hitsura,” siling ni Jezreel, “pero indi man ini makalalaton.”

Halin sang bata pa si Jezreel, ginapabulong na sia sa lainlain nga ospital. Sang duha pa lang sia ka tuig, ginbutang sia sa isa ka kuarto nga separado sa iban agod indi sia maimpeksion. Pero, wala gihapon sia mag-ayo. Gindala man sia sa psychiatrist agod buligan sia kon paano atubangon ang iya pamatyag nga ginasikway sia sang iban.

Ginalikawan sia sang iban kay abi nila makalalaton ang iya balatian. Mabudlay gid ini sang bata pa sia kay gusto man niya nga maghampang upod sa iban nga kabataan. Nagsiling sia, “Ginayaguta nila ako kag ginasunlog nga Mummy kag Alien.”

Sa pihak nga bahin, bangod sang iya balatian, may kahigayunan pirme si Jezreel nga isugid sa iban ang iya base sa Biblia nga paglaum. Pirme sia ginapamangkot sang mga tawo kon bala napaso sia. Kon magsiling sia nga wala, ginapamangkot nila sia kon ngaa amo sina ang iya hitsura. Ginapaathag niya kon ano ang iya balatian kag ginasilingan sila nga wala pa ini sing bulong.

Dayon nagasiling sia, “May maayo gid ako nga paglaum bangod si Jehova nga Dios nagpromisa nga ang mga matinumanon sa iya mga sugo magakabuhi sa bag-ong kalibutan nga wala na sing balatian kag kasakit.” (Bugna 21:3, 4) Sa sini nga paagi, nakasugod si Jezreel sing pagtuon sa Biblia sa mga tawo, kag nalipay sia nga madamo sa ila ang nangin Saksi ni Jehova.

“Nagapasalamat gid ako kay Cristiano ang akon mga ginikanan,” siling ni Jezreel, “kag subong isa ka Saksi ni Jehova, may suod ako nga mga abyan. Wala nila ako ginasikway bisan amo sini ang akon hitsura. Nabawtismuhan ako sa edad nga 17, kag sa sulod na sang 14 ka tuig, madamo ako sang pribilehiyo sa pag-alagad sa aton Manunuga.”

Ginadumdom pirme ni Jezreel ang pagpalig-on ni Jehova nga mabasa sa Isaias 41:10, 13: “Dili ka mahadluk, kay ako nagaupud sa imo, . . . alay-ayon ko ikaw sang too nga kamut sang akon pagkamatarung. Kay ako ang GINOO nga imo Dios, magauyat sang imo kamut nga too; nagasiling sa imo, ‘Dili magkahadluk, magatabang ako sa imo.’”

Ang pagpanguyapot sa tuo nga kamot ni Jehova nakabulig kay Jezreel nga malikawan ang sobra nga kabalaka parte sa reaksion sang mga tawo sa iya balatian. Nakabulig man ini para mabatas niya ang mga kabudlayan bangod sini nga balatian. Upod sa minilyon ka tawo, ginapaabot man niya ang katumanan sang dalayawon nga mga promisa sang Dios.