Ang Biblia—Libro sang Sibu nga Tagna, Bahin 7

NAUGOT ka bala kon makita mo ang korap nga gobierno nga nagapigos kag nagaabuso sa mga pumuluyo? Nagabatyag ka bala sing inhustisya kon ang dalagku nga negosyo nagauswag bangod sa paghingalit sa mga imol? Naakig ka bala kon ginakuartahan sang lider sang mga relihion ang ila mga miembro ukon kon nagatudlo sila sang kabutigan? Kon amo, mahimo malipay ka nga mahibaluan nga ginakondenar man sang Biblia ining malain nga mga buhat. Binagbinagon sa sini nga artikulo (1) ang mga tagna sang Biblia parte sa katapusan sang kalautan kag sang malaut nga mga tawo kag (2) kon ngaa masaligan gid naton ini nga mga tagna.

Ang Katapusan sang Kalautan

Ginbinagbinag sang nagligad nga artikulo sa sini nga serye ang kabilugan nga tanda nga ginhatag ni Jesus nga nagapakita nga malapit na gid ang katapusan sining kalibutan subong. Nalakip sa tanda ang pagwali sa bilog nga kalibutan sang maayong balita sang Ginharian sang Dios—gobierno sang Dios nga malapit na lang maggahom sa duta. (Daniel 2:44; Mateo 24:3, 14) Kon matapos na ini nga pagwali, “magaabot ang katapusan,” siling ni Jesus. Mahimo nga wala mo ginapaabot nga ang una nga dulaon sang Dios amo ang butig nga relihion, nga nagatudlo sing kabutigan parte sa iya. Sa Biblia, ang butig nga relihion ginasimbuluhan sang babayi nga makihilawason nga ginatawag “Babilonia nga Daku.”—Bugna 17:1, 5; tan-awa ang kahon nga “Pagkilala sa Babilonia nga Daku,” sa pahina 13.

Tagna 1:

‘Magaabot ang mga kalalat-an [sang Babilonia nga Daku], kamatayon kag paglalaw kag gutom, kag sunugon sia sing bug-os sa kalayo, bangod si Jehova nga Dios, nga nagahukom sa iya, makusog.’—Bugna 18:2, 8.

Katumanan: Ginapakita sang Biblia nga sa gintalana nga tion sang Dios, palisuon niya ang pulitikal nga kagamhanan sang kalibutan batok sa Babilonia nga Daku kag laglagon ini. Sila ang “magahapay kag magapahubo sa iya” kag “magakaon sang iya unod.” (Bugna 17:16) Buot silingon, ibuyagyag nila ang iya makahuluya nga mga buhat kag kuhaon ang iya tuman kadamo nga manggad. Mangin madasig kag bug-os ang pagkalaglag sini amo nga indi na gid ini makita liwat.—Bugna 18:21.

Hunahunaon sang pulitikal nga mga gumalahom nga sila ang naghimo sini. Pero, ang katumanan sining tumalagsahon nga tagna magapamatuod nga ang pagkalaglag sang Babilonia kahimuan sang Dios. “Ginbutang sang Dios sa ila tagipusuon ang paghimo sang iya hunahuna.”—Bugna 17:17.

Tagna 2:

“Sa mga adlaw sadto nga mga hari magapatindug ang Dios sang langit sing ginharian. . . . Dugmokon sini kag papason ini tanan nga ginharian [nga ginhimo sang tawo] kag ini magapadayon sa gihapon.”—Daniel 2:44.

Katumanan: Pagkatapos malaglag ang butig nga relihion, iliso sang Dios ang iya atension sa iban pa nga organisasyon—pulitika kag komersio—subong man sa malaut nga mga tawo. (Hulubaton 2:22; Bugna 19:17, 18) Pareho sang tag-iya nga nagapahalin sa mga abusador nga nagaistar sa iya duta, ang Dios ‘magalaglag sa mga nagalaglag sang duta.’ Laglagon niya ang nagahigko sini bangod sang ila masingki kag imoral nga mga buhat.—Bugna 11:18; Roma 1:18, 26-29.

Sin-o ang makaluwas? Ang Biblia nagsabat: “Ang mapainubuson magapanubli sang duta, kag magakalipay sila sa kabuganaan sang paghidait.”—Salmo 37:11; 72:7.

Masaligan bala naton ang mga tagna sa Biblia? Makasalig bala kita nga dulaon sang Dios ang kalautan kag pag-antos, kag luwason niya ang matarong? Huo!

Masaligan Gid ang mga Tagna sang Biblia

Ang mga Saksi ni Jehova nagapati nga si Jehova ang Awtor sang Biblia kag tumanon niya ang iya mga ginpromisa. (2 Timoteo 3:16) May basehan bala ini nga pagpati?

Kon may dugay ka na nga abyan nga nagapalangga kag wala gid nagabutig sa imo, mapati ka bala kon may ginpromisa sia kag nahibaluan mo nga masarangan niya ini himuon? Wala sing duhaduha nga mapati ka gid sa iya. Mas maayo ang Dios sangsa kay bisan sin-o nga abyan. “Ang Dios wala nagabutig.”—Tito 1:2, APD.

Indi gusto sang Dios ang pagtuo nga wala sing basehan ukon nagasunodsunod lang. Gani, gingiyahan niya ang mga manunulat sang Biblia nga isulat ang mga tagna nga sia lamang, ang Labing Gamhanan, ang makatuman. Ang madamo nga tagna kag mga katumanan sini ginbinagbinag sa nauna nga anom ka bahin sini nga serye. Gani, makasalig kita nga tumanon sang Dios ang mga tagna parte sa aton palaabuton, lakip ang mga ginsambit sa sini nga artikulo.

Huo, dulaon sang Manunuga ang butig nga relihion, mapiguson nga paggahom, kag sakon nga komersio. Gusto mo bala mahibaluan kon ano ang matabo pagkatapos sini? Binagbinagon ini sa masunod nga isyu sang Magmata! nga amo ang katapusan nga bahin sini nga serye.