10 Pagkamasaligan

ANO ANG BUOT SILINGON SINI?

Ang masaligan nga mga tawo ginasaligan sang ila mga ginikanan, abyan, kag amo. Ginatuman nila ang mga kasuguan kag ang ila mga promisa, kag pirme sila nagahambal sing matuod.

NGAA IMPORTANTE INI?

Sa masami, ang imo kahilwayan nabase sa kon daw ano ikaw ka masaligan sa pagligad sang panahon.

“Ang pinakamaayo nga paagi para saligan ka sang imo mga ginikanan amo ang pagpakita sa ila nga hamtong ka kag responsable, ara man sila ukon wala.”—Sarahi.

PRINSIPIO SA BIBLIA: “Padayon nga pamatud-i kon ano kamo.”—2 Corinto 13:5.

ANO ANG MAHIMO MO?

Gusto mo bala nga saligan ka, ukon gusto mo nga ibalik ang pagsalig nila sa imo? Makabulig sa imo ang masunod.

Mangin tampad. Indi ka pagsaligan sang mga tawo kon nagabutig ka. Pero kon tampad ka, ilabi na kon makasala ka, saligan ka gid sang iban.

“Mahapos lang mangin tampad kon OK ang tanan. Pero kon mangin tampad ka bisan pa may malain ini nga epekto sa imo, mas saligan ka pa gid sang mga tawo.”—Caiman.

PRINSIPIO SA BIBLIA: “Luyag namon magkabuhi sing bunayag [ukon, tampad] sa tanan nga butang.”—Hebreo 13:18.

Mangin responsable. Sa isa ka surbe sa U.S., 78 porsiento sang mga kompanya ang nagasiling nga ang pagkaresponsable amo ang “isa sa tatlo ka pinakaimportante nga kinaiya para mabaton sa obra.” Gani, ang pagtinguha nga mangin responsable subong makabulig sa imo sa ulihi.

“Makita sang akon mga ginikanan kon responsable ako kag nagamatumato sa mga ulubrahon sa balay. Pirme ko ini ginahimo, gani mas ginasaligan nila ako.”—Sarah.

PRINSIPIO SA BIBLIA: “Nagasalig ako sa imo pagtuman, . . . kay nakahibalo ako nga himuon mo ang labaw pa sa ginasiling ko.”—Filemon 21.

Mangin mapinasensiahon. Indi pareho sa pisikal nga pagdaku nga makita dayon sang iban, kinahanglan ang panahon para makita sang iban ang paghamtong mo sa emosyon kag hunahuna.

“Indi ka pagsaligan sang imo mga ginikanan kag sang iban base lang sa isa ka butang nga ginhimo mo. Pero amat-amat ka nila nga saligan kon pirme mo ipakita nga responsable ka.”—Brandon.

PRINSIPIO SA BIBLIA: “Isuksok ninyo ang . . . pagkamapinasensiahon.”—Colosas 3:12.