12 Tulumuron

ANO ANG BUOT SILINGON SINI?

Ang tulumuron indi lang damgo nga gusto mo matabo. Ang matuod nga tulumuron nagalakip sang pagplano, pagpasibu, kag pagpangabudlay.

May mga tulumuron nga malab-ot sa sulod sang pila ka adlaw ukon semana, sing binulan, ukon sing tinuig pa gani. Ang madugay lab-uton nga mga tulumuron mahimo malab-ot paagi sa amat-amat nga paglab-ot sang mas mahapos nga mga tulumuron.

NGAA IMPORTANTE INI?

Kon malab-ot mo ang imo mga tulumuron, magadugang ang imo kompiansa, magabakod ang inyo pag-abyanay, kag mangin mas malipayon ka.

Kompiansa: Kon malab-ot mo ang gamay nga mga tulumuron, may kompiansa ka nga malab-ot ang daku nga mga tulumuron. Mas may kompiansa ka man sa pag-atubang sa mga problema kada adlaw—pareho sang pagpamilit sang imo mga kaedad.

Pag-abyanay: Madamo ang nanamian makig-upod sa mga may tulumuron—ang mga nakahibalo kon ano ang ila gusto kag nagatinguha nga lab-uton ini. Dugang pa, mangin mabakod man ang pag-abyanay kon nagapakig-upod ka sa mga pareho sa imo ang tulumuron.

Kalipay: Kon maghimo ka sing tulumuron kag malab-ot mo ini, malipay ka sa imo hinimuan.

“Nanamian ako kon may mga tulumuron ako. Kay pirme lang ako may ginahimo kag nasadyahan ako sa pagtinguha nga malab-ot ini. Kag kon malab-ot mo ang isa ka tulumuron, kanami gid magsiling, ‘Wow, nahimo ko to? Nalab-ot ko ang akon tulumuron suno gid sa akon plano.’”—Christopher.

PRINSIPIO SA BIBLIA: “Kon maghulat ka tubtob mag-ayo ang panahon kag indi gid mabaskog ang hangin, indi ka gid makatanom, kag wala ka gid sing may mapatubas.”—Manugwali 11:4, Maayong Balita nga Biblia.

ANO ANG MAHIMO MO?

Sunda ang masunod para makahimo ka sing mga tulumuron kag malab-ot ini.

Hibalua. Ilista ang puede mo himuon nga tulumuron, kag pasunura ini sa kon ano ang gusto mo nga unahon.

Magplano. Sa kada tulumuron, himua ang masunod:

• Ibutang ang rasonable nga petsa kon san-o mo ini malab-ot.

• Planuha ang mga tikang nga dapat mo himuon.

• Pamensara kon ano ang posible nga mga problema, kag kon paano mo ini maatubang.

Himua ini. Indi na paghulata nga makompleto ang tanan nga detalye antes mo ini sugdan. Pamangkuta ang imo kaugalingon, ‘Ano ang una ko nga himuon para malab-ot ko ang akon tulumuron?’ Dayon himua ini. Irekord ang mga tikang nga nahimo mo na.

PRINSIPIO SA BIBLIA: “Ang mga plano sang mapisan pat-od nga magamadinalag-on.”—Hulubaton 21:5.