4. Gusto Bala sang Dios nga Mag-antos Kita?

Kon Ngaa Importante ang Sabat sa Sini

Ang sabat sa sini nga pamangkot may epekto sa aton pagtan-aw sa kabuhi.

Pamensara Ini

Insakto bala nga ang Dios nga nagtuga sining matahom nga kalibutan magpaantos sa aton?

Bangod sang pag-antos, ginakuestyon sang mga tawo nga indi relihioso ang motibo sang Dios ukon kon bala may Dios gid man. Nagapati sila nga bangod nagaantos ang tawo, ginapakita sini nga (1) ang Dios wala sing gahom sa pagdula sang pag-antos, (2) indi gusto sang Dios nga pauntaton ang pag-antos, ukon (3) wala sang Dios.

Amo lamang bala ini ang posible nga mga rason kon ngaa nagaantos ang tawo?

Ang Ginasiling sang Biblia

Wala kita gintuga sang Dios para mag-antos.

Gusto niya nga mangin malipayon kita.

“Ang pinakamaayo nga mahimo sang mga tawo samtang nagakabuhi sila amo ang magkalipay kag maghimo sing maayo, kag ang tagsa ka tawo magkaon man kag mag-inom kag magkalipay sa tanan nga ginpangabudlayan niya. Dulot ini sang Dios.”—MANUGWALI 3:12, 13.

Ginhatagan sang Dios ang una nga mag-asawa sang tanan nila nga kinahanglan para mabuhi nga wala nagaantos.

Wala niya gintuyo nga mag-antos sila ukon ang ila mga kaliwat.

“Nagsiling ang Dios sa ila: ‘Magpanganak kamo kag magdamo, pun-a ninyo ang duta kag dumalahan ini.’”—GENESIS 1:28.

Wala nagtuman sa Dios ang una nga mag-asawa.

Bilang resulta, nag-antos sila kag ang tanan nila nga kaliwat.

“Paagi sa isa ka tawo nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.”—ROMA 5:12.a

Wala kita gintuga sang Dios nga may ikasarang nga giyahan ang aton kaugalingon.

Imposible nga gamhan sang tawo ang ila kaugalingon sing madinalag-on pareho nga imposible sa tawo nga magkabuhi sa dalom tubig.

“Wala sing ikasarang ang tawo sa pagtuytoy sang iya tikang.”—JEREMIAS 10:23.

Indi gusto sang Dios nga mag-antos kita.

Gusto niya nga, kon posible, malikawan naton ang mga problema.

“Luyag ko nga magpamati ka sa akon mga sugo! Kon himuon mo ini, ang imo paghidait mangin kaangay sang suba.”—ISAIAS 48:18.