Ngaa Importante nga Mabal-an Kon Bala May Manunuga?

Kon base sa ginbinagbinag nga mga ebidensia nakumbinsi ka nga magpati nga may ara labing gamhanan nga Dios, mahimo nga gusto mo man usisaon ang mga ebidensia nga ang Biblia naghalin sa Dios. Kag kon patihan mo ang ginasiling sang Biblia, makabenepisyo ka gid. Ari ang pila sa sini.

Mangin mas malipayon ang imo kabuhi

ANG GINASILING SANG BIBLIA: ‘Naghimo ang Dios sing maayo, nga nagahatag sa inyo sing ulan halin sa langit kag sing bugana nga patubas sa nagakaigo nga tion, nga nagahatag sing bugana nga kalan-on kag nagapuno sang inyo tagipusuon sing kasadya.’—Binuhatan 14:17.

ANG BUOT SILINGON: Ang tanan nga matahom nga butang sa palibot nga nanamian mo regalo sang Manunuga. Mas magapasalamat ka pa gid sa sini kon mabal-an mo nga nagaulikid gid sa imo ang naghatag sa imo sini nga regalo.

Makakita ka sing masaligan nga mga laygay para sa imo adlaw-adlaw nga pagkabuhi

ANG GINASILING SANG BIBLIA: “Mahangpan mo kon ano ang husto kag matarong kag bunayag, ang bug-os nga dalanon sang kaayo.”—Hulubaton 2:9.

ANG BUOT SILINGON: Bilang Manunuga, kabalo ang Dios kon ano ang kinahanglan mo para mangin malipayon ka. Kon basahon mo ang Biblia, madamo ka sing matun-an nga makabulig sa imo kabuhi.

Masabat ang imo mga pamangkot

ANG GINASILING SANG BIBLIA: “Makita mo ang ihibalo tuhoy sa Dios.”—Hulubaton 2:5.

ANG BUOT SILINGON: Kon mabal-an mo nga may ara Manunuga, makabulig ini sa imo nga masabat ang importante nga mga pamangkot, pareho sang: Ngaa nagakabuhi kita? Ngaa madamo sing pag-antos? Ano ang matabo sa aton kon mapatay kita? Makita mo ang sabat sa Biblia kag sigurado nga malipay ka gid.

May paglaum ka sa palaabuton

ANG GINASILING SANG BIBLIA: “‘Nahibaluan ko kon ano ang himuon ko sa inyo,’ siling ni Jehova, ‘hatagan ko kamo sing paghidait kag indi sing kalaglagan, agod may maayo kamo nga palaabuton kag paglaum.’”—Jeremias 29:11.

ANG BUOT SILINGON: Nagpromisa ang Dios nga sa palaabuton dulaon niya ang mga nagahimo sing malain, ang pag-antos, kag bisan ang kamatayon. Kon nagasalig ka sa mga promisa sang Dios, may paglaum ka sa palaabuton. Kag makabulig ini sa imo nga mangin maisog sa pag-atubang sang mga problema kada adlaw.

Kon paano nakabenepisyo ang iban sang nagpati sila nga may Manunuga

“Nabatyagan ko gid kon paano kita ginabuligan sang Dios sa aton kabuhi. Kag nagadayaw gid ako sa sini. Gintudluan niya kita kon ano ang dapat unahon, kon paano husayon ang problema sa iban, kag kon paano mangin abyan sang Dios.”—Cyndi, U.S.A.

“Nangin malipayon gid kag makawiwili ang akon kabuhi sang nagpati ako nga may Manunuga. Wala na ako naboringan kay madamo na ako sing matahom nga butang nga puede tun-an parte sa iya, sa iya mga tinuga, kag sa iya Pulong.”—Elise, France.

“Ang pag-aplikar sang mga ginatudlo sang aton Manunuga sa Biblia nakabulig sa akon nga mangin mas malipayon. Nakabulig man ini sa akon nga indi magpokus sa sala sang iban, mangin mas mabuot, kag mangin kontento. Daku man ang nabulig sini sa akon para mangin mas maayo ako nga amay.”—Peter, Netherlands.

“Sang wala ko pa natun-an ang parte sa Dios, ang ginahimo ko lang puro kaon, tulog, kag pag-obra. Stressed gid ako katama! Subong, naintiendihan ko na nga ang kabuhi isa ka matahom nga regalo. Gani dapat ko ini halungan kag i-enjoy.”—Liz, Estonia.

“Kadamo sang akon ginakabalak-an. Pero nagmag-an ang akon pamatyag sang nabal-an ko nga dulaon gali ang kalainan, inhustisya, kag pag-antos.”—Adrien, France.