Gintagu ni Rahab ang mga Espiya

SA KATALAGMAN ining mga tao. Dapat makapalagyo sila, ukon mapatay sila. Mga espiya sila nga Israelinhon, kag ang babae nga nagabulig sa ila amo si Rahab. Hibaluon ta kon ngaa sa katalagman ining mga tao.

Ang mga Israelinhon handa na sa pagtabok sa Suba sang Jordan pasulod sa duta sang Canaan. Gani nagpadala si Josue sing duha ka espiya agod tan-awon ang duta kag ang siudad sang Jerico.

Sang mag-abot ang mga espiya sa Jerico, nagkadto sila sa balay ni Rahab. Apang may nanugid sa hari sang Jerico. Ang hari nagpadala sing tinao kay Rahab, kag ginmandoan sia: ‘Paguaa ang mga lalaki nga yara sa imo balay!’ Gintagu ni Rahab ang mga espiya sa atop. Gani nagsiling sia: ‘May nagkadto diri sa balay. Apang nakahalin na sila antes magsira ang gawang sang siudad. Kon magdali kamo, madakpan ninyo sila!’ Gani naglagas sila.

Sang makahalin na sila si Rahab nagsiling sa mga espiya: ‘Nahibaloan ko nga ihatag ni Jehova sa inyo ining duta. Nabatian namon ang makatilingala nga butang nga ginhimu niya sa inyo. Ginkaluy-an ko kamo, gani palihug kaluoyi man ako. Luasa ang akon amay kag iloy, kag ang akon mga utod nga lalaki kag babae.’

Nanaad ang mga espiya, apang dapat may himuon si Rahab. ‘Kuhaa ining pula nga lubid,’ siling nila, ‘kag ihigot sa imo bintana. Tipona ang tanan mo nga himata sa imo balay. Kon magbalik kami sa pagkuha sing Jerico, makita namon ining lubid sa imo bintana kag wala kami sing patyon sa imo balay.’ Nian nagbalik ang mga espiya kay Josue, kag ginsugid ang natabu.