Kapitulo 12
Ang Kahulugan sang Imo Bawtismo
1, 2. (a) Ngaa dapat gid ang tagsatagsa sa aton magpakita sing personal nga interes sa bawtismo sa tubig? (b) Sa malip-ot, paano mo sabton ang mga pamangkot sa parapo 2?
SANG tuig 29 C.E., gintugmawan si Jesus sa Suba sang Jordan. Si Jehova mismo nagatan-aw sadto kag nagpabutyag sing kahamuot. (Mat. 3:16, 17) Pagligad sang tatlo ka tuig kag tunga, pagkatapos sang iya pagkabanhaw, ginsugo ni Jesus ang iya mga disipulo, nga nagasiling: “Ang bug-os nga pagbulut-an sa langit kag duta natugyan sa akon. Busa lakat kamo kag himuon nga mga disipulo ang katawhan sang tanan nga kapungsuran, nga nagabawtismo sa ila.” (Mat. 28:18, 19) Ginbawtismuhan ka bala nahisuno sa ginsugo didto ni Jesus? Ukon nagahanda ka bala sa pagpabawtismo?
2 Diin man sa sining duha, ang maathag nga paghangop sa bawtismo importante. Ang mga pamangkot nga takus binagbinagon nagalakip sini: Ang bawtismo bala sang mga Cristiano karon may pareho nga kahulugan sa bawtismo ni Jesus? Ang tanan bala nga butang nga ginasiling sang Biblia nahanungod sa bawtismo naaplikar sa imo? Ano ang nadalahig sa pagkabuhi nahisuno sa kahulugan sang Cristianong pagpabawtismo sa tubig?
Ang mga Bawtismo nga Ginhimo ni Juan
3. Para lamang kay sin-o ang bawtismo ni Juan?
3 Mga anom ka bulan sa wala pa mabawtismuhan si Jesus, si Juan Bautista nagkadto sa kahanayakan sang Judea nga nagabantala: “Hinulsol kamo, kay ang ginharian sang langit malapit na.” (Mat. 3:1, 2) Ang mga tawo gikan sa bug-os nga rehiyon nakabati sang ginsiling ni Juan, nagtu-ad sang ila mga sala kag nagpabawtismo sa iya sa Jordan. Yadto nga bawtismo para sa mga Judiyo.—Binu. 13:23, 24; Luc. 1:13-16.
4. (a) Ngaa dapat maghinulsol sing madagmit ang mga Judiyo? (b) Ano ang ginkinahanglan agod malikawan nila ang ‘bawtismo sa kalayo’?
4 Yadtong mga Judiyo madagmit nga nagkinahanglan sa paghinulsol. Sang tuig 1513 B.C.E. sa Bukid sang Sinai ang ila mga ginikanan nagsulod sa isa ka pungsudnon nga katipan upod kay Jehova nga Dios. Apang wala nila pagtumana ang ila mga salabton sa idalom sadtong katipan kag gani ginpakamalaut sila subong mga makasasala. Ang ila kahimtangan makatalagam. “Ang daku kag makahaladlok nga adlaw ni Jehova” nga gintagna ni Malaquias malapit na, kag sang 70 C.E. nag-abot ini sa Jerusalem subong isa ka madasig nga kalaglagan. Si Juan Bautista, nga may kakugi sa matuod nga pagsimba subong ni Elias, ginpadala sa wala pa yadtong kalaglagan “agod ihanda para kay Jehova ang isa ka nahanda nga katawhan.” Dapat sila maghinulsol sang ila mga sala batok sa Kasuguan nga katipan kag maghanda sa tagipusuon kag hunahuna sa pagbaton sa Anak sang Dios, nga ipadala ni Jehova sa ila. (Mal. 4:4-6; Luc. 1:17; Binu. 19:4) Subong ginpaathag ni Juan, ang Anak sang Dios magabawtismo paagi sa balaan nga espiritu (ang bawtismo nga una nga naeksperiensiahan sang matutom nga mga disipulo sang Pentecostes sang 33 C.E.) kag paagi sa kalayo (nga nag-abot sa dimahinulsulon subong kalaglagan sang 70 C.E.). (Luc. 3:16) Agod malikawan ang ‘bawtismo paagi sa kalayo’ yadtong mga Judiyo sang nahaunang siglo dapat nagpabawtismo sa tubig bilang simbulo sang ila paghinulsol kag nangin mga disipulo ni Jesucristo sang nagbukas yadto nga kahigayunan.
5. (a) Sang magpabawtismo si Jesus, ngaa namatok si Juan? (b) Ano ang ginsimbulo sang bawtismo ni Jesus sa tubig? (c) Daw ano ka serioso si Jesus sa pagtuman sang kabubut-on sang Dios para sa iya?
5 Lakip sa mga tawo nga nagpalapit kay Juan agod magpabawtismo amo si Jesus mismo. Apang ngaa? Nahibaluan ni Juan nga si Jesus wala sing mga sala nga itu-ad, kag gani sia nagsiling: “Ako ang may kinahanglan nga bawtismuhan mo, kag ikaw nagakari sa akon?” Apang ang pagpabawtismo ni Jesus amo ang pagsimbulo sang butang nga tuhay. Gani sia nagsabat: “Pabayai ini karon, kay amo ini ang nagakaigo sa akon sa pagtuman sang bug-os nga pagkamatarong.” (Mat. 3:13-15) Ang bawtismo ni Jesus wala magsimbulo sing paghinulsol sa sala; indi man niya kinahanglan nga idedikar ang iya kaugalingon sa Dios bangod katapo na sia sang isa ka pungsod nga nakadedikar na kay Jehova. Sa baylo, ang iya bawtismo, sang malab-ot ang Judiyo nga pagkahamtong sa edad nga 30 anyos nagsimbulo sang pagpresentar sang iya kaugalingon sa iya langitnon nga Amay sa paghimo sang Iya dugang pa nga kabubut-on. Ang kabubut-on sang Dios para sa “tawo, si Cristo Jesus,” nagdalahig sing hilikuton may kaangtanan sa Ginharian, subong man sing paghalad sang iya himpit tawhanon nga kabuhi subong gawad kag subong sadsaran sang isa ka bag-ong katipan. (Luc. 8:1; 17:20, 21; Heb. 10:5-10; Mat. 20:28; 26:28; 1 Tim. 2:5, 6) Serioso nga ginbaton ni Jesus ang ginsimbulo sang iya bawtismo sa tubig. Wala niya gintugutan ang iya kaugalingon nga malingaw sang iban nga mga interes. Tubtob sa katapusan sang iya dutan-on nga kabuhi nagpadayon sia sa paghimo sang kabubut-on sang Dios.—Juan 4:34.
Bawtismo sa Kamatayon
6. Ano pa nga bawtismo ang naagihan ni Jesus kag sa ano nga hut-ong sang tion?
6 Nahisuno sa ginsimbulo sang bawtismo ni Jesus sa tubig, nakaagi man sia sing isa pa ka bawtismo. Nahibaluan niya nga ang tulumanon nga ginhatag sa iya sang Dios magadul-ong sa iya paghalad sang iya tawhanon nga kabuhi apang banhawon sia sa espiritu sa ikatlo nga adlaw. Ginpatuhuyan niya ini subong isa ka bawtismo. Ining “bawtismo” nagsugod sang 29 C.E. apang wala matapos tubtob sia aktuwal nga napatay kag ginbanhaw. Gani mga tatlo ka tuig sa tapos sia gintugmawan sa tubig sia nakasiling: “May bawtismo ako nga ibawtismo sa akon, kag daw ano ang akon kasakit tubtob nga matuman ini!”—Luc. 12:50.
7. (a) Sin-o pa ang ginabawtismuhan sa kamatayon? (b) Sin-o ang nagahimo sining bawtismo?
7 Ang mga magahari upod kay Cristo sa langitnon nga Ginharian dapat man bawtismuhan sa kamatayon. (Mar. 10:37-40; Col. 2:12) Sa ila pagkapatay ginabilin nila ang ila tawhanon nga kabuhi, subong sang ginhimo ni Jesus. Kag sa ila pagkabanhaw sila magabuylog sa iya langitnon nga paggahom. Isa ini ka bawtismo nga ginahimo, indi sang bisan sin-o nga tawo, kundi sang Dios paagi sa iya langitnon nga Anak.
8. Ano ang buot silingon sang ila man ‘pagpabawtismo kay Cristo Jesus’?
8 Ang mga ginabawtismuhan sa kamatayon ni Jesus ginasiling man nga “ginbawtismuhan kay Cristo Jesus.” Paagi sa balaan nga espiritu nga ginapasagahay paagi kay Cristo sila nahiusa sa iya, ang ila ulo, subong mga katapo sang iya hinaplas sing espiritu nga kongregasyon, ang iya “lawas.” Bangod inang espiritu nagabulig sa ila nga ipakita ang superyor nga personalidad ni Cristo, sarang masiling nga sila tanan nangin “isa ka persona sa paghiusa kay Cristo Jesus.”—Roma 6:3-5; 1 Cor. 12:13; Gal. 3:27, 28; Binu. 2:32, 33.
Bawtismo sa Tubig sang Cristianong mga Disipulo
9. (a) San-o ang bawtismo sa paagi nga ginsambit sa Mateo 28:19 una nga natabo? (b) Ginagamit ang mga pamangkot kag mga kasulatan nga naaman sa sini nga parapo, analisaha kon ano ang ginapakita ni Jesus nga dapat kilalahon sang mga kandidato sa bawtismo.
9 Ang unang mga disipulo ni Jesus ginbawtismuhan sa tubig ni Juan kag dayon gintuytuyan padulong kay Jesus subong palaabuton nga mga katapo sang iya espirituwal nga nobya. (Juan 3:25-30) Sa idalom sang pagtuytoy ni Jesus sila man nagbawtismo, nga may pareho nga kahulugan sa bawtismo ni Juan. (Juan 4:1-3) Apang sugod sang Pentecostes sang 33 C.E., ginsugdan nila ang pagtuman sa sugo nga magbawtismo “sa ngalan sang Amay kag sang Anak kag sang balaan nga espiritu.” (Mat. 28:19) Masapwan ninyo nga mapuslanon gid ang pagrepaso kon ano ang kahulugan sadto, sa kapawa sang mga kasulatan nga nasambit upod ang masunod nga mga pamangkot:
Agod mabawtismuhan “sa ngalan sang Amay,” ano ang dapat kilalahon sang isa ka tawo tuhoy sa Amay? (2 Hari 19:15; Sal. 3:8; 73:28; Isa. 6:3; Roma 15:6; Heb. 12:9; Sant. 1:17)
Ang bawtismo sa ngalan “sang Anak” nagakinahanglan sing pagkilala sa ano? (Mat. 16:16, 24; Filip. 2:9-11; Heb. 5:9, 10)
Ano ang dapat tuohan sang isa ka tawo agod mabawtismuhan sa ngalan “sang balaan nga espiritu”? (Luc. 11:13; Juan 14:16, 17; Binu. 1:8; 10:38; Gal. 5:22, 23; 2 Ped. 1:21)
10. (a) Ano ang ginasimbulo sang Cristianong bawtismo sa tubig? (b) Paano ini tuhay sa bawtismo ni Jesus? (c) Kon ang kalipikado sing Makasulatanhon nga mga tawo bawtismuhan, mangin ano sila?
10 Ang una nga mga tawo nga ginbawtismuhan nahisuno sa mga sugo ni Jesus amo ang mga Judiyo (kag Judiyo nga mga proselita), nga subong isa ka pungsod nakadedikar na sa Dios kag ginpakitaan sing pinasahi nga konsiderasyon tubtob sang 36 C.E. Apang, sang ang pribilehiyo sang Cristianong pagkadisipulo ginbuksan man sa mga Samaritano kag mga Gentil, antes sila mabawtismuhan personal nga dapat sila maghimo sing walay hawid nga dedikasyon kay Jehova sa pag-alagad sa iya subong mga disipulo sang iya Anak. Para sa tanan, lakip ang mga Judiyo, ini nagpadayon nga amo ang kahulugan sang Cristianong bawtismo sa tubig tubtob sa aton adlaw. Ining “isa ka bawtismo” naaplikar sa tanan nga mangin matuod nga mga Cristiano. Sa amo sila mangin Cristianong mga saksi ni Jehova, ordenado nga mga ministro sang Dios.—Efe. 4:5; 2 Cor. 6:3, 4.
11. (a) Ano ang kaangay sang Cristianong bawtismo sa tubig, kag paano? (b) Gikan sa ano ang isa ka Cristiano ginaluwas?
11 Ina nga bawtismo may daku nga bili sa mga mata sang Dios. Sa tapos ginsambit ang pagtukod ni Noe sing arka nga sa diin sia kag ang iya pamilya natipigan sa Anaw, ginpatalupangod ini ni apostol Pedro. Sia nagsulat: “Ang bawtismo nga kaangay sini, karon nagaluwas sa inyo, (indi subong nga pagkuha sang higko gikan sa lawas, kundi pagpangabay sa Dios sing isa ka maayong konsiensia,) paagi sa pagkabanhaw ni Jesucristo.” (1 Ped. 3:21) Ang arka amo ang makita nga pamatuod nga gindedikar ni Noe ang iya kaugalingon sa paghimo sang kabubut-on sang Dios kag matutom nga naghimo sang hilikuton nga ginhatag sa iya sang Dios. Nagdul-ong ini sa iya kaluwasan. Sa kaangay nga paagi, sila nga nagadedikar sang ila kaugalingon kay Jehova pasad sa pagtuo sa nabanhaw nga si Cristo, nga nagapabawtismo bilang simbulo sina kag dayon nagahimo sang kabubut-on sang Dios para sa iya mga alagad sa aton adlaw, ginaluwas gikan sa malauton nga kalibutan karon. (Gal. 1:3, 4) Wala na sila nagapadulong sa kalaglagan upod sa nabilin nga bahin sang kalibutan. Ginluwas na sila gikan sa sini kag nahatagan na sang Dios sing maayong konsiensia.
Pagkabuhi nga Nagatuman sang Aton mga Salabton
12. Ngaa ang bawtismo sang isa indi isa ka garantiya sang kaluwasan?
12 Sayop ang maghinakop nga ang bawtismo isa ka garantiya sang kaluwasan. May bili lamang ini kon matuod gid nga gindedikar sang isa ka tawo ang iya kaugalingon kay Jehova paagi kay Jesucristo kag sa tapos sini nagatuman sang kabubut-on sang Dios, sing matutom tubtob sa katapusan.—Mat. 24:13.
13. (a) Ano ang kabubut-on sang Dios tuhoy sa paagi nga ginagamit sang bawtismado nga mga Cristiano ang ila kabuhi? (b) Daw ano ka importante ang Cristianong pagkadisipulo sa aton kabuhi?
13 Ang kabubut-on sang Dios para kay Jesus naglakip kon paano niya gingamit ang iya kabuhi subong isa ka tawo. Dapat ini ihalad sa kamatayon. Sa aton bahin ang aton lawas dapat ipresentar sa Dios, sa pagtuman sing isa ka nagasakripisyo sang kaugalingon nga kabuhi. Dapat ini gamiton sing pinasahi sa paghimo sang kabubut-on sang Dios. (Roma 12:1, 2) Sa pagkamatuod wala naton ginahimo ina bisan pa, kon kaisa lamang, hungod nga nagagawi kita subong sang kalibutan sa palibot naton ukon ginatukod naton ang aton kabuhi sa palibot sang makagod nga mga paghimud-os samtang nagahatag sing pakulahaw lamang nga pag-alagad sa Dios. (1 Ped. 4:1-3; 1 Juan 2:15-17) Sang ang isa ka Judiyo namangkot kon ano ang dapat niya himuon agod makatigayon sing kabuhi nga walay katapusan, ginpahanumdom sia ni Jesus sang pagkaimportante sang matinlo sa moral nga pagkabuhi, kag dayon ginpakita niya ang pagkakinahanglanon sang paghimo sa Cristianong pagkadisipulo, pagkasumulunod ni Jesus, subong ang una nga butang sa kabuhi. Indi ini dapat mangin ikaduha sa materyal nga mga paghimud-os.—Mat. 19:16-21.
14. (a) Ano ang salabton sang tanan nga Cristiano may kaangtanan sa Ginharian? (b) Subong gin-ilustrar sa pahina 101, ano ang pila sang epektibo nga mga paagi sa paghimo sining hilikuton? (c) Kon nagapakigbahin gid kita sing bug-os tagipusuon sa sining hilikuton, ano nga pamatuod ang ginahatag sini?
14 Dapat man dumdumon nga ang kabubut-on sang Dios para kay Jesus naglakip sing importante nga hilikuton may kaangtanan sa Ginharian. Si Jesus ginhaplas nga mangin Hari. Apang samtang yari sa duta sia man nangin makugi nga saksi tuhoy sa Ginharian. May yara man kita kaanggid nga hilikuton sa pagpanaksi. Kag may rason gid kita nga magpakigbahin sa sini sing bug-os tagipusuon. Paagi sa paghimo sini ginapakita naton ang aton apresasyon sa pagkasoberano ni Jehova kag ang aton gugma sa mga isigkatawo. Subong man ginapakita naton nga kita nahiusa sa kaupod nga mga sumilimba sa bug-os nga kalibutan, tanan sila mga saksi sang Ginharian, sa pagpadayon padulong sa tulumuron nga kabuhi nga walay katapusan sa idalom sina nga Ginharian.
Repaso nga Paghinun-anon
● Ano ang mga pagkaanggid kag mga kinatuhayan sa ulot sang bawtismo ni Jesus kag sang bawtismo sa tubig karon?
● Para kay sin-o ang bawtismo ni Juan? Sin-o ang ginbawtismuhan sa kamatayon? Kag sin-o ang “ginbawtismuhan kay Cristo Jesus”?
● Ano ang nadalahig sa pagkabuhi nga nagatuman sang mga salabton sang Cristianong bawtismo sa tubig?
[Kahon/Mga piktyur sa pahina 101]
Sa Anong mga Paagi Ginawali Mo ang Ginharian?
Sa balay kag balay
Sa pagduaw liwat sa mga interesado
Sa mga pagtuon sa Biblia sa mga puluy-an
Sa mga kalye
Sa mga kaeskwela
Sa mga kaupod sa trabaho