Kapitulo 9
Sin-o ang Nagapanguna sa Dalan Padulong sa Kaluwasan?
MALUWAS lamang kita gikan sa sining malauton nga kalibutan kag maamligan nga buhi sa nagapakari nga “dakung kapipit-an” kon batunon naton ang pagpanguna ni Jesucristo kag maghatag sing makapakombinse nga pamatuod nga nagapamati gid kita sa iya kag nagalakat sa iya mga tikang. (Binuhatan 4:12) Gin-ilustrar ini sang mga natabo anay sang ginluwas ang kinaugali nga mga Israelinhon gikan sa Egipto sang 1513 B.C.E. Milagruso nga ginpatabok ni Jehova ang Israel sa Dagat nga Pula kag ginlaglag ang nagalagas nga mga hangaway sang Egipto. Sa sining tanan, gingamit sang Dios si Moises sa pagpanguna sa iya katawhan.—Josue 24:5-7; Exodo 3:10.
2 Sang magguwa ang mga Israelinhon gikan sa Egipto agod magsulod sa Ginsaad nga Duta, may iban nga nagbuylog sa ila. Subong ginsulat sang ulihi ni Moises: “Isa ka nagasalakot nga kadam-an ang nagtaklad man upod sa ila.” (Exodo 12:38) Sin-o ini sila? Amo ini sila ang mga Egiptohanon ukon iban pa nga mga dumuluong nga nagbuylog sa Israel. Nakita nila ang makapulunaw nga mga kalalat-an nga gindala ni Jehova sa mapiguson nga pungsod sang Egipto agod ipakita nga sia lamang ang matuod nga Dios kag nga ang mga diosdios sang Egipto dimatuod kag indi makaluwas sa mga nagasimba sa ila. Wala sing duhaduha nga naluyagan man nila ang ila nabatian gikan sa mga Israelinhon nahanungod sa ginalauman nga kabuhi “sa duta nga nagailig sing gatas kag dugos.” (Exodo 3:7, 8; 12:12) Apang ginkilala man bala nila sing bug-os si Moises subong ang isa nga ginbangon sang Dios agod mangin manuggahom kag manluluwas sang Iya katawhan? Wala madugay gintilawan sila.—Binuhatan 7:34, 35.
3 Samtang ang Israel, upod ang “nagasalakot nga kadam-an,” nagahilapit sa baybayon sang Dagat nga Pula, ginlagas sila sang hari sang Egipto kag sang iya militar nga mga puersa agod ibalik sila sa pagkaulipon. Agod maluwas, dapat sila magpabilin nga natingob kag magsunod sa mga sugo ni Moises, bangod gingamit ni Jehova sa Moises sa pagpanguna sa ila. Paagi sa isa ka labaw sa kinaugali nga panganod ginpunggan ni Jehova ang mga kaaway samtang ginapihak niya ang mga tubig sang dagat kag ginapamala ang letso sang dagat. Baliskad gid sa natabo sa mga Egiptohanon sang ulihi, ang bug-os nga Israel kag ang “nagasalakot nga kadam-an” naluwas upod kay Moises tabok sa nagmala nga letso sang dagat. (Exodo 14:9, 19-31) Samtang nagamartsa sila sa pagtabok, kag ang mga pader sang tubig sa tuo nila kag sa wala nila kag ang panganod sang presensia sang Dios sa ibabaw nila, natabo ang isa ka importante nga butang. Ginahambal ini sang Biblia subong isa ka bawtismo—indi ang literal nga bautismo sa tubig, kundi ang simbuliko nga bawtismo kay Moises subong manalagna ni Jehova, ang isa nga ginpadala sang Dios nga mangin ila Manluluwas. (1 Corinto 10:1, 2) Subong man, ang tanan espirituwal nga Israelinhon nga makalampuwas sa kalaglagan sining malauton nga kalibutan dapat makaagi sing kaanggid man nga bawtismo kay Cristo subong manluluwas kag magahatag sing makapakombinse nga pamatuod nga sila suod nga nagapasakop sa iya pagkapangulo. Ang modernong-adlaw nga “nagasalakot nga kadam-an” dapat mag-upod sa ila.
4 Si Jehova naghatag sing daku nga awtoridad sa iya Anak, si Jesucristo. Paagi sa iya ginhimo sang Dios nga posible kita ‘maluwas gikan sa malaut nga sistema sang mga butang karon,’ agod nga indi kita maulamid sa kapahamakan sini. (Galacia 1:3-5; 1 Tesalonica 1:9, 10) Paagi kay Moises, naghatag si Jehova sa Israel sing kasugoan nga nag-apektar sang ginalauman nga kabuhi sang katawhan. Sang gintuman nila yadtong kasugoan nakabenepisyo sila sing daku. Apang ang iban nga kasugoan nagdala man sing silot nga kamatayon bangod sang pagkamalalison. Sang ulihi, si Jesus nangin isa ka manalagna nga daku pa kay Moises. Ang iya gintudlo “mga pulong sang kabuhi nga walay katapusan,” kag ang hungod nga kapaslawan sa pagtuman sining mga pulong nagadul-ong sa kamatayon nga gikan sa amo wala sing kaluwasan. Busa, daw ano ka importante nga sundon naton ang iya ginasiling!—Juan 6:66-69; 3:36; Binuhatan 3:19-23.
5 Para sa iban nga mga tawo, ang ideya nga magpasakop sa isa ka lider daw indi halandumon. Nakakita sila sing sobra nga pag-abuso sa awtoridad. Apang ang mga pulong ni Jesus nagapakita sing espiritu nga makapasalig. Sia mapagsik nga nagaagda sa aton: “Kari sa akon, tanan kamo nga ginabudlayan kag ginabug-atan, kag papahuwayon ko kamo. Itakod ang akon gota sa inyo, kag magtuon kamo sa akon, kay ako mapainubuson kag malolo sa tagipusuon, kag makakita kamo sing kapahuwayan sa inyo mga kalag. Kay ang akon gota mahulas, kag ang akon lulan mamag-an.” (Mateo 11:28-30) Daw ano ka makagalanyat nga paglaum! Ang mga nagapamati sa sinang mapagsik nga pangagda, kag nagasalig sing bug-os sa iya, indi mapaslawan. (Roma 10:11) Makaeksperiensia sila sing kalig-onan subong sang mga karnero sa panong sang isa ka mahigugmaon nga manugbantay.
ANG MATUOD NGA MAAYONG MANUGBANTAY
6 Ang pungsod sang Israel kaangay sang isa ka panong sang mga karnero nga iya ni Jehova. Nag-aman sia sing Kasugoan nga katipan, nangin subong sang nagaamlig nga mga pader sa toril, nga nagalipon sa ila gikan sa dalanon sang kabuhi sang didiosnon Gentil nga mga pungsod. Gindala man sini ang mga matinumanon sa Mesias. (Efeso 2:14-16; Galacia 3:24) Tuhoy sa sinang Mesianikong Manugbantay nga Hari, si Jehova nagtagna: “Magabangon ako sa ibabaw [sang akon mga karnero] sing isa ka manugbantay, ang akon alagad nga si David kag pakaunon niya sila.” (Ezequiel 34:23, 31) Wala ini nagakahulugan nga si David, nga patay na sadto, personal liwat nga magahari sa katawhan sang Dios. Sa baylo, gikan sa harianon nga linya ni David si Jehova magabangon sing isa ka manugbantay nga hari nga paagi sa iya magaaman ang Dios sing kalig-onan. (Jeremias 23:5, 6) Sa nagkalainlain nga tion may mga tawo nga nagpangangkon sing dimatuod subong Mesianikong manluluwas, apang sang tuig 29 C.E., gingamit ni Jehova si Juan Bautista sa pagpakilala kay Jesucristo sa “mga karnero” sang Israel subong amo ang matuod nga ginpadala sang Dios, ang Mesias nga may masaligan nga mga pamatuod. Amo ini ang langitnon nga Anak sang Dios, nga ang iya kabuhi ginsaylo sa tiyan sang isa ka Judiyo nga ulay agod nga matawo sia sa harianon nga linya ni David. Ang ngalan nga David nagakahulugan sing “hinigugma,” gani, sing nagakaigo, sa tapos sang bawtismo ni Jesus sa tubig, si Jehova mabaskog nga nagsiling gikan sa langit: “Ikaw ang akon Anak, nga hinigugma; nahamut-an ko ikaw.”—Marcos 1:11.
7 Kubos sa isa ka bulan sa wala pa sia mapatay, si Jesus nagsiling: “Ako ang maayong manugbantay; ang maayong manugbantay nagahatag sang iya kalag tungod sa mga karnero.” (Juan 10:11) Ginpatuhay niya ang iya papel sa papel sang dimatuod nga mga mesias nga nauna sa iya, nga nagasiling: “Ang wala nagasulod sa ganhaan sang toril sang mga karnero kundi nagataklas sa iban nga alagyan, inang tawo makawat kag buyong. Apang ang nagasulod sa ganhaan amo ang manugbantay sang mga karnero. Sa iya nagabukas ang manugbantay sang gawang, kag ang mga karnero nagapamati sang iya tingog, kag ginatawag niya ang iya kaugalingon nga mga karnero sa ngalan kag ginapaguwa niya sila. Sang napaguwa niya ang tanan nga iya kaugalingon, nagauna sia sa ila, kag ang mga karnero nagasunod sa iya, kay nakilala nila ang iya tingog. Sa dumuluong indi sila magsunod, kundi magapalagyo sa iya, kay wala sila makakilala sang tingog sang mga dumuluong.”—Juan 10:1-5, 8.
8 Ang mga sa Judiyong toril nga nagsunod sa tuytoy sang Kasugoan nga katipan nagbaton kay Jesus subong ang Mesias sang ginpakilala sia ni Juan Bautista subong “manugbantay sang gawang.” Sila nangin “kaugalingon nga mga karnero” ni Jesus, kag gindala niya sila sa isa ka bag-ong malaragwayon nga toril nga iya ni Jehova. Ining toril naglaragway sang isa ka nahamut-an nga kaangtanan kay Jehova pasad sa bag-ong katipan, nga ginhimo upod sa espirituwal nga Israel kag ginpalig-on sa dugo ni Jesus. Paagi sa sining katipan nangin posible para sa ila nga makatigayon sing langitnon nga kabuhi upod kay Cristo subong ang “binhi” ni Abraham nga paagi sa iya ang mga pagpakamaayo magaabot sa katawhan sang tanan nga pungsod. (Hebreo 8:6; 9:24; 10:19-22; Genesis 22:18) Si Jesucristo, nga ginbanhaw sang Dios gikan sa minatay kag ginpasag-uli sa langitnon nga kabuhi, amo ang “ganhaan” sining toril sang bag-ong katipan. Nahisanto sa katuyoan sang iya Amay, gindala niya sa sining toril ang limitado lamang nga kadamuon—144,000 lamang—una gikan sa mga Judiyo, kag sang ulihi gikan sa mga Samariahanon kag mga Gentil. Subong Maayong Manugbantala, kilala ni Jesus ang tagsatagsa sa iya mga karnero sa ngalan kag ginahatagan sila sing mahigugmaon nga personal nga pag-atipan kag igtalupangod.—Juan 10:7, 9; Bugna 14:1-3.
9 Apang wala ginalimitehan ni Jesus ang iya pagbantay sa sining “diutay nga panong” nga makatigayon sing langitnon nga Ginharian. (Lucas 12:32) Sia man nagsiling: “May iban ako nga mga karnero, nga indi sa sining toril; sila man dapat ko dalhon, kag magapamati sila sa akon tingog, kag mangin isa sila ka panong, isa ang manugbantay.” (Juan 10:16) Sin-o ini sila? Mga tawo sila nga wala sa bag-ong katipan; indi sila espirituwal nga mga Israelinhon. Sila mga tawo nga ginatipon sa sulod sang aman ni Jehova para sa dayon nga kabuhi sa duta pasad sa ila pagtuo sa mahalaron nga bili sang dugo ni Jesus. Madamo sa ila suod nga nagapakig-upod sa mga katapo sang espirituwal nga Israel karon samtang yari pa ini sila sa duta, kag upod sa ila, nagasandig sila kay Cristo subong ang Maayong Manugbantay. Ang mga bahin sang “iban nga mga karnero” nga buhi pa karon sa duta kag karon nagapakita sang ila kaugalingon nagahuman sang “dakung kadam-an” sang Bugna 7:9, 10, 14, nga may paglaum nga maluwas sa nagapakari nga dakung kapipit-an.
10 Agod mangin takus sa paglaragway sang Biblia sa sinang “iban nga mga karnero” nga ginaamligan kag ginatipigan sang Maayong Manugbantay, ang isa ka tawo dapat “mamati” sa Iya tingog kag maghatag sing pamatuod nga bahin sia sang “isa ka panong” nga nagalakip sa matuod nga mga manunubli sang langitnon nga Ginharian. Ginahimo mo bala ina? Daw ano ka mahalungon nga nagapamati ikaw sa iya tingog?
11 Wala sing duhaduha nga nakahibalo ikaw nga si Jesus nagsiling: “Ini amo ang akon sugo, nga maghigugmaanay kamo subong nga ako naghigugma sa inyo.” (Juan 15:12) Paano ina nga sugo nagaapektar sang imo kabuhi? Ang gugma nga imo ginapakita amo ang sahi nga ginpakita ni Jesus? Matuod gid bala ini nga nagasakripisyo sang kaugalingon? Ang imo bala mga buhat kag mga balatyagon nagahatag sing pamatuod sina nga gugma sa tanan sa Cristianong kongregasyon kag sa mga katapo sang imo kaugalingon nga panimalay?
12 Si apostol Pablo nagsiling nga kon matuod gid nga kita ‘nagapamati’ kag “ginatudloan paagi sa iya,” ang aton bug-os nga personalidad magabalhin. Sikwayon naton ang personalidad nga nahisuno sa aton anay dalanon sang kabuhi kag isuklob “ang bag-ong personalidad,” nga nagapakita sang maayong mga kinaiya ni Jehova. (Efeso 4:17-24; Colosas 3:8-14) Samtang ginaton-an mo ang Biblia, ginahunahuna mo bala sing serioso ang mga bahin nga ikaw sing personal dapat maghimo sing mga pagbag-o agod mapahamut-an ang Dios? Mahunahunaon ka bala sa paghimo sina nga mga pagbalhin? Ginatalupangod mo bala ang importante nga hilikuton nga ginsugo ni Jesus para sa aton adlaw—ang pagbantala sing maayong balita sang natukod nga Ginharian sang Dios—kag nagapangita ka bala sing mga paagi sa pagpaambit sini? Ang apresasyon bala sa dibagay nga kaluoy sang Dios sa imo nagapukaw sa imo sing tinagipusuon nga handum sa paghimo sang amo?—Mateo 24:14.
13 Dapat kita maghalong nga indi pagtugutan ang aton tagipusuon nga limbongan kita. Minilyon ka tawo ang nagapangangkon nga nagatuo kay Jesucristo, kag ayhan mabalikwat nila ang pila ka butang nga iya gintudlo, apang ginaaplikar lamang nila ang mahapos para sa ila. Ang iban mahimo nagalikaw sa pagpatuyang sa paggawi nga ila ginakabig malain gid. Ang kabuhi nga ginalauman sa isa ka Paraiso nga duta sa idalom sang Ginharian sang Dios mahimo nga daw maayo sa ila, kag mahimo nga nalipay sila sa pagpakig-upod karon sa mga sinsero nga nagatinguha sa pag-aplikar sang Cristianong mga prinsipio sa ila kabuhi. Apang kon luyag naton nga malakip sa mga makalampuwas padulong sa “bag-ong duta,” dapat kita mamati sing maayo sa tanan nga butang nga ginasiling ni Jesus. Importante ang pag-apresyar nga indi kita magmadinalag-on sa pagtuytoy sang kaugalingon nga mga tikang. Dapat kita mamati sa Anak sang Dios, ang isa nga ginsugo ni Jehova subong Manluluwas sang Iya katawhan, kag maglakat sing mahalungon sa iya mga tikang.—Jeremias 10:23; Mateo 7:21-27; 1 Pedro 2:21.
[Mga Pamangkot sa Pagtinuon]
1. (a) Sa ano kita dapat magpasakop agod maluwas sa “dakung kapipit-an”? (b) Paano ini gin-ilustrar sang paagi sang paggamit sang Dios kay Moises?
2. (a) Sin-o ang “nagasalakot nga kadam-an” nga nagbiya sa Egipto upod sa Israel? (b) Ano sa wala sing duhaduha ang nagganyat sa ila? (c) Sa ano nga butang gintilawan sila sa wala madugay?
3. (a) Ngaa importante nga sundon ang mga sugo ni Moises? (b) Ano ang kahulugan sang ‘bautismo kay Moises’? (c) Ngaa importante ina sa espirituwal nga mga Israelinhon?
4. Daw ano ka daku ang awtoridad nga ginhatag ni Jehova kay Cristo?
5. Ano ang nagahimo sang pagpasakop kay Jesus nga tuman ka makagalanyat?
6. (a) Paano ang pungsod sang Israel nangin subong sang mga karnero sa isa ka toril? (b) Ano ang ginsaad ni Jehova tuhoy sa isa ka manugbantay para sa sining “mga karnero,” kag paano ini natuman?
7. (a) Subong “ang maayong manugbantay,” paano ginpakita ni Jesus ang kadalom sang iya mahigugmaon nga kabalaka para sa “mga karnero”? (b) Paano ina kon ipaanggid sa paggawi sang nauna nga dimatuod nga mga mesias?
8. (a) Sa anong bag-ong “toril” gindala ni Jesus ang mga Judiyo nga nagsunod sa iya? (b) Pila ang iya gindala sa sining toril?
9. Sin-o ang “iban nga mga karnero” nga ginapatuhuyan ni Jesus, kag san-o sila gintipon?
10. Agod mangin isa sa “iban nga mga karnero,” ano ang kinahanglanon?
11. Ano ang magahatag sing pamatuod nga ‘nagapamati’ gid kita sa ginsiling ni Jesus sa Juan 15:12?
12. (a) Kon kita gid ‘gintudloan paagi kay Jesus,’ daw ano ka daku nga pagbalhin ang himuon sini sa aton? (b) Gani, ano dapat ang ginahimo naton sa mga butang nga aton ginaton-an gikan sa Biblia?
13. (a) Kon indi kita maghalong, paano ang aton tagipusuon mahimo nga maglimbong sa aton? (b) Sa anong kasangkaron, nian, dapat naton sundon ang mga tikang ni Cristo?