Pagkaluwas Padulong sa Bag-ong Duta: Kapitulo 14
Kon Paano Magasugod ang “Bag-ong mga Langit kag Bag-ong Duta”
KON GINASAMBIT ang mga langit ang ginahunahuna sang madamo nga tawo amo ang kahawaan, ang bulan kag ang mga bituon. Ginaangot man sang Biblia ang “langit” sa paggahom. (Binuhatan 7:49) Kon kaisa ginagamit sini ang ekspresyon nga “mga langit” sa pagpatuhoy sa Dios mismo subong ang Unibersal nga Soberano. (Daniel 4:26; Mateo 4:17) Bisan ang mga pangulohan sang mga tawo ginapatuhuyan subong “mga langit,” bangod may posisyon ini sa ibabaw sang ila mga sakop. (2 Pedro 3:7) Sing kaanggid, ang “duta” masami nga nagakahulugan sing globo, apang mapatuhoy man ini sa katilingban sang tawo. (Genesis 11:1; Salmo 96:1) Ang paghibalo sini makabulig sa imo sa paghangop sang kahulugan sang makawiwili nga mga saad tuhoy sa “bag-ong mga langit kag bag-ong duta.” Ang iban sining mga saad una nga natuman sang mga adlaw sang dumaan nga Israel.
‘Magkalipay sa Akon Ginatuga’
2 Ang pungsod sang Israel may katipan sa Dios, kag nag-ugyon sa pagtuman sa iya. Apang wala sila magmatutom. Bangod sini, ginpahibalo ni Jehova nga bawion niya ang iya pag-amlig, tugutan ang Jerusalem nga malaglag kag ang katawhan mabihag sa Babilonia. (Isaias 1:2-4; 39:5-7) Apang maluluy-on nga gintagna man niya ang pagpasag-uli sang mahinulsulon nga nagkalabilin.—Isaias 43:14, 15; 48:20.
3 Bangod sang pagkapat-od sini, ginhambal ni Jehova ang palaabuton nga pagpasag-uli nga subong bala nagakatabo na ini, nga nagasiling: “Yari karon ako nagatuga sing bag-ong mga langit kag bag-ong duta; kag ang una nga mga butang indi na pagdumdumon, ukon mag-abot sa tagipusuon. Apang magkasadya kamo kag magkalipay sing dayon sa akon ginatuga. Kay yari karon akon ginatuga ang Jerusalem nga pagkasadya kag ang iya katawhan nga kalipay.” (Isaias 65:17, 18) Nagakahulugan ini sing kaluwasan para sa sadtong mahinulsulon nga mga Israelinhon.
4 Bisan pa daw imposible yadto gikan sa tawhanon nga pagtamod, ang gamhanan nga Babilonia napukan sa mga Medo kag mga Persianhon sang 539 B.C.E. Ang mga Judiyo nangin sa idalom sang bag-ong pangulohan, ang “bag-ong mga langit.” Si Ciro Daku may daku nga katungdanan sa sadtong “bag-ong mga langit.” Bisan pa si Ciro wala mangin Judiyong proselita, ginkilala niya nga gintugutan sia ni Jehova sa paggahom kag nga ginsugo sia ni Jehova sa pagpatindog liwat sang templo sa Jerusalem. (2 Cronica 36:23; tan-awa ang Isaias 44:28.) Didto sa Jerusalem sang 537 B.C.E., si Gobernador Zorobabel kag ang Mataas nga Saserdote nga si Jesua may daku man nga bahin sa sadtong “bag-ong mga langit” nga pangulohan, kag ang napasag-uli nga Judiyong nagkalabilin naghuman sang “bag-ong duta,” isa ka natinloan nga katilingban nga nagtukod liwat sang putli nga pagsimba sa pungsod.—Esdras 5:1, 2.
5 Subong pamatuod nga sila nagbalhin na nga katawhan sa hunahuna kag tagipusuon, dapat nila unahon ang mga interes sang putli nga pagsimba sa ila kabuhi, tahuron gid ang pagkasoberano ni Jehova kag pamatian ang iya mga manalagna. Nahisanto sa sini, lakip sa unang mga butang nga ila ginhimo sang mag-abot sila sa Juda amo ang ‘pagpatindog sang halaran sang Dios sang Israel’ kag ang paghalad sing mga halad.—Esdras 3:1-6.
6 Sang ang materyalistiko nga mga huyog kag ang kahadlok sa tawo nag-upang sa pagtapos sang pagtukod sa templo, ginsabdong ni Jehova ang katawhan paagi sa iya mga manalagna, kag namati sila. (Hageo 1:2, 7, 8, 12; 2:4, 5) Sang ulihi, sang ginpatalupangod sa katawhan ang ila daku nga kapaslawan sa pagsunod sa Kasugoan tuhoy sa pag-asawahay, gintadlong nila ang ila mga dalanon. (Esdras 10:10-12) Sa baylo sang mga mata, nga sa malaragwayon, indi makakita kag mga dulunggan nga bungol sa pulong sang Dios, gin-ayo sila sa espirituwal kag gingamit nila ang ila mga ikasarang nahisuno sa kabubut-on ni Jehova. (Ipaanggid ang Isaias 6:9, 10 sa 35:5, 6.) Subong resulta, ginpabugana sila sang Dios nahisuno sa mga saad sa Isaias 65:20-25.
7 Apang amo lamang bala yadto ang katumanan sang tagna tuhoy sa “bag-ong mga langit kag bag-ong duta”? Indi. Ang Cristianong apostol nga si Pedro nagsiling nga ang mga Cristiano sang nahaunang siglo malangkagon nga naghulat sang dugang pa nga katumanan. (2 Pedro 3:13) Makita na naton karon ang ila ginhulat anay. Sa anong paagi? May kaangtanan sa mga hitabo sang paglingkod sa trono sang Daku Pa nga Ciro, ang ginhimaya nga si Jesucristo.
8 Subong nahangpan na naton, ginhatag ni Jehova nga Dios sa iya Anak ang awtoridad sa paggahom sang 1914 sa tunga sang iya mga kaaway. Nian ang madugay na ginhulat nga “bag-ong mga langit” nagluntad. Ang natabo sadto mas daku sa mga natabo sang ginluwas ang dumaan nga Israel. (Salmo 110:2; Daniel 7:13, 14) Ang pangulohan nga ginbun-ag sang 1914 aktuwal nga nagagahom gikan sa langit, kag ginhatagan ini sang Dios sing awtoridad sa ibabaw sang bug-os nga duta. Ang pagsangkad sining pangulohan natabo sang ulihi sang mabanhaw ang hinaplas sang espiritu nga mga sumulunod ni Cristo (nga napatay na) agod mangin mga hari kag mga saserdote sa langit upod sa ila Ginuo. Kon matapos na sang iban pa nga mga katapo sinang Ginharian nga klase ang ila dutan-on nga kabuhi, sila man ginadugang sa nagadamo nga mga katapo sang “bag-ong mga langit.” (1 Tesalonica 4:14-17; Bugna 14:13) Sa karon ang kalabanan sang kaupod nga mga manunubli ni Cristo aktibo na karon sa sinang langitnon nga Ginharian. Sa amo ang ginpanganak sang espiritu nga mga Cristiano nga nagabuylog kay Cristo nagahuman sing Bag-ong Jerusalem, nga tuhoy sa sini si Jehova nagsiling: “Yari karon akon ginatuga ang Jerusalem nga pagkasadya kag ang iya katawhan nga kalipay.”—Isaias 65:18.
9 Nagpatubas si Jehova sing “kalipay” indi lamang sa mga langit kundi sa duta man. Ang nagkalabilin sang mga manunubli sang Ginharian yari pa sa duta. Sa tion sang Inaway Kalibutanon I ginhimuslan sang mga klero sang Cristiandad ang espiritu sang inaway sa pagpasaka sing butig nga mga panumbungon batok sa sining mga Estudyante sang Biblia kag masentensiahan ang mga katapo sang ila Nagadumala nga Hubon sing madugay sa bilanggoan. Apang sang 1919 ginpaguwa sila, sa kamatuoran ginhilway gikan sa pagkabihag nga ginsugyot sang Babilonia nga Daku. Upod ang espiritu ni Jehova nga nagasakdag sa ila, nag-organisar sila liwat subong isa ka katawhan nga nahugod sing pinasahi sa putli nga pagsimba kag sa mga interes sang Ginharian sang Dios.
10 Apang ang ila paglaum kag mga pagpaabot tuhay sa ila sang mga Judiyo nga nagpauli sa ila dutang natawhan sang 537 B.C.E. Ang mga katapo sang espirituwal nga Israel nagpaabot sing panublion nga “natigana sa mga langit” para sa ila. (1 Pedro 1:3-5) Apang antes nila mabaton ina nga padya, may ginapahimo sa ila si Jehova. Nahanungod sini, sia matagnaon nga nagsiling: “Ibutang ko ang akon mga pulong sa imo baba, kag tabonan ko ikaw sa landong sang akon kamut, agod matanum ko ang kalangitan kag mapasad ang mga sadsaran sang duta kag magasiling sa Sion, ‘Ikaw ang akon katawhan.’” (Isaias 51:16) Ginbutang niya ang iya “mga pulong,” ang iya mensahe, sa baba sang iya mga alagad agod ibantala nila sa bug-os nga duta. Upod ang pagsalig ginpahibalo nila nga ang Dios nagtanum sing “bag-ong mga langit” sing tuman kalig-on nga wala sing tawo ukon demonyo nga makagabot sini. Ang paagi sang pagpakig-angot ni Jehova sa mga tiglawas sang langitnon nga Sion maathag nga nagpakilala sa ila subong iya katawhan. Tuhay sa nahapay nga kahimtangan sang kalibutan sa espirituwal kag sa moral, ang “duta” sang espirituwal nga Israel, ang ila latagon sang hilikuton, nangin isa ka duog nga sa diin ang espirituwal nga mga kinaiya kag mga hilikuton nagauswag. Isa ini ka espirituwal nga paraiso! (Isaias 32:1-4; 35:1-7; 65:13, 14; Salmo 85:1, 8-13) Apang ano ang nahanungod sa “bag-ong duta” nga gintagna sa Isaias 65:17?
Paghanda Para sa “Bag-ong Duta”
11 Sugod labi na sang 1935, ginpahangop ni Jehova sa mga katapo sang espirituwal nga Israel nga nag-abot na ang tion sa pagtipon sa dakung kadam-an sang mga tawo nga may paglaum sa dayon nga kabuhi sa Paraiso nga duta. Ipaanggid sa “diutay nga panong” sang mga manunubli sang Ginharian, sila sa pagkamatuod nangin isa ka dakung kadam-an. (Bugna 7:9, 10) Ini man sila ginpasulod sa espirituwal nga paraiso. Ginlandong sila sang mga di-Israelinhon nga nagbiya sa Babilonia upod sa mga Judiyo sang 537 B.C.E. subong man sang iban pa nga naghimo sini sang ulihi. (Esdras 2:58, 64, 65; 8:17, 20) Ining tanan nga dakung kadam-an sang modernong-adlaw nga mga saksi ni Jehova nga may dutan-on nga paglaum palaabuton nga mga katapo sang “bag-ong duta.”
12 Ang mga makalampuwas sa dakung kapipit-an kag may paglaum nga makatigayon sing himpit nga kabuhi amo ang aktuwal nga magahuman sang sadsaran sang “bag-ong duta,” subong amo ang una nga mga katapo sini. Importante nga ang sadsaran malig-on. Gani, sa karon gid ginatudloan sila sing maid-id sang mga dalanon ni Jehova. Ginabuligan sila sa pagtigayon sing tinagipusuon nga paghangop sa hulusayon sang unibersal nga pagkasoberano. Ginaton-an nila kon daw ano ka importante nga ‘magsalig kay Jehova sa bug-os nila nga tagipusuon kag indi magsandig sa ila kaugalingon nga paghangop.’ (Hulubaton 3:5, 6) May kahigayunan sila sa pagpamatuod sang ila kaugalingon nga makugi kag matutom nga mga sumalakdag sang Ginharian sang Dios paagi sa bug-os nga pagpakigbahin sa pagbantala “sining maayong balita sang ginharian” karon. (Mateo 24:14) Ginaeksperiensiahan nila kon ano ang buot silingon sang mangin bahin sang tugub-globo nga katilingban nga sa diin ang katawhan sang tanan nga pungsod kag hambal kag rasa nagapangabudlay nga may mahigugmaon nga pag-ululutod. (Juan 13:35; Binuhatan 10:34, 35) Ginahugod mo bala ang imo kaugalingon agod nga makabenepisyo sing bug-os gikan sa sining programa sang pagtudlo? Para sa tanan nga nagahimo sini, dalayawon nga mga paglaum ang nagahulat sa ila.
Ang “Bag-ong Duta” Nangin Katunayan
13 Ang katapusan, kompleto nga katumanan sang saad ni Jehova sa pagpaluntad sing “bag-ong duta” mas daku sa natabo sang 537 B.C.E. Ang katawhan nga magahuman sa “bag-ong duta” indi lamang mahilway sa Babilonia nga Daku, kundi laglagon sing dayon ining bug-os pangkalibutan nga emperyo sang dimatuod nga relihion. (Bugna 18:21) Ining matarong nga katilingban sang tawo—ang “bag-ong duta”—indi paglibotan sang mga pungsod nga nagapakahuya kay Jehova kag nagahingabot sa iya mga alagad, subong sang natabo sa una nga katumanan sang tagna ni Isaias. Ang tanan nga pangulohan sang tawo, bangod sang ila pagdumili sa pagpasakop sa pagkasoberano ni Jehova, madugmok kag ang malaut nga katilingban sang tawo karon bug-os nga madula sa duta. (Daniel 2:44; Hulubaton 2:21, 22) Sa pagsugod sang matarong nga Bag-ong Kahimusan sang Dios, ang lamang nga katawhan nga magapuyo sa planeta nga Duta amo sila nga nagapadungog kay Jehova, kag nagakalipay sing bug-os sa iya mga dalanon.—Salmo 37:4, 9.
14 Ginpatuhuyan ni apostol Pedro inang mahimayaon nga tion sa iya ikaduhang inspirado nga sulat. (2 Pedro 3:13) Nagatudlo sa amo gihapon nga palaabuton nga makakulunyag, ginreport ni apostol Juan ang mga detalye sang bugna nga ginhatag sa iya, nga nagasiling: “Nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat.” (Bugna 21:1) Kon magligad na ang dakung kapipit-an kag natagbong na sa kadadalman si Satanas kag ang iya mga demonyo, magasugod ang bag-ong dag-on. Ang malaut nga impluwensia ni Satanas kag sang iya demonyo madula na. Nalaglag na ang iya bug-os nga sistema sang mga butang. Nian tumanon sang “bag-ong langit” ang mahigugmaon nga katuyoan ni Jehova para sa iya mga tinuga nga wala sing balagbag gikan sa mga pangulohan nga nagasikway sa pagkasoberano ni Jehova. Sa idalom sinang “bag-ong langit” amo gid ang “bag-ong duta,” nga nahuman sang “dakung kadam-an” nga hatagan sang Dios sing hamili nga paglaum sang kabuhi nga walay katapusan sa isa ka tugob-globo nga Paraiso sang katahom, kabuganaan, kalipay kag paghidait. Kon mag-abot na ang gintalana nga tion sang Dios sa pagbanhaw sa mga patay, ini man sila makatigayon sing kahigayunan nga mangin bahin sinang “bag-ong duta” nga sa diin magapuyo ang pagkamatarong.—Bugna 20:12, 13.
15 Tuhoy sa ginatigana sang Dios para sa katawhan, nabatian ni apostol Juan ining pahibalo gikan sa langit: “Yari Karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:3, 4) Daw mangin ano ka makalilipay ang kabuhi!
16 Ang mga kahimtangan anay sa Eden kag ang mga milagro nga ginhimo ni Jesus nagahatag sing makalilipay nga laragway kon mangin ano ang kabuhi sa “bag-ong duta.” Dugang pa, ang mga bahin sang mga tagna sa Isaias 11:6-9 kag 35:1-7 kag 65:20-25 makasapo sing pisikal nga katumanan sa amo nga tion, sa dakung pagpakamaayo sang matinumanon nga katawhan. Daw ano ka makapasulhay kon ang kinahanglanon nga mga kahimtangan sang espirituwal nga kapagros kag kabuganaan matigayon upod ang kahimpitan sa lawas kag sa hunahuna sa isa ka duta nga sa tanan nga paagi nangin Paraiso! Bangod sinang makadalayaw nga palaabuton naton, ano pa ang himuon naton kundi ibayaw ang aton tingog sa pagpasalamat kay Jehova, ang Dakung Manunuga sining tanan!
[Mga Pamangkot sa Pagtinuon]
1. (a) Sa Biblia, ano sa masami ang ginapatuhuyan subong “mga langit”? (b) Sa iban nga dinalan, ano ang kahulugan sang “duta”?
2. Ngaa gintugutan ni Jehova ang Israel nga mabihag, apang ano ang iya gintagna?
3. Ano ang kahulugan sang saad sa Isaias 65:17?
4. (a) San-o nag-abot ang gintagna nga kaluwasan? (b) Ano sadto ang “bag-ong mga langit” kag “bag-ong duta”?
5, 6. (a) Ano ang naghatag sing pamatuod nga sila sa pagkamatuod nagbalhin na nga katawhan? (b) Sang ginsabdong sila ni Jehova, paano ang ila reaksion tuhay sa ila reaksion anay antes sang pagkabihag?
7. Paano naton nahibaloan nga may yara dugang pa nga katumanan ang tagna ni Isaias?
8. (a) San-o ginpaluntad ni Jehova ining “bag-ong mga langit,” kag ano ini kon ipaanggid sa una nga katumanan sang tagna? (b) Paano ang mga katapo sang “bag-ong mga langit” amat-amat nga nagdamo?
9. Ano nga “pagkalipay” ang ginpahanabo ni Jehova diri gid sa duta sang 1919?
10. (a) Paano ang mga pagpaabot sining espirituwal nga mga Israelinhon tuhay sa mga pagpaabot sang ginhilway nga mga Judiyo sang 537 B.C.E.? (b) Ano ang ginpahimo sa ila ni Jehova? (c) Paano niya ginpakamaayo sila sing bugana samtang sa duta pa sila, kag paano ginalaragway sang ginsambit nga mga kasulatan ang ila mga kahimtangan?
11. (a) Sugod san-o labi na nga ginahanda ni Jehova ang palaabuton nga mga katapo sang “bag-ong duta”? (b) Ginlandong sila sang ano nga katawhan nga nagbiya sa dumaan nga Babilonia?
12. Paano karon ginahanda ang katawhan agod mangin nagakaigo sila nga sadsaran sang “bag-ong duta”?
13. Paano ang nagapakari nga “bag-ong duta” mangin daku pa nga katumanan sang saad ni Jehova sang sa natabo anay sang 537 B.C.E.?
14. (a) San-o matuman ang 2 Pedro 3:13 kag Bugna 21:1? (b) Ano ang mangin tuhay nahanungod sa mga kahimtangan kon magpanghikot na ang “bag-ong langit”? (c) Sin-o ang malakip sa “bag-ong duta”?
15. Ngaa importante sa imo ang saad sa Bugna 21:3, 4?
16. Anong mga paglaum sa palaabuton ang ginapukaw sa aton tagipusuon sang mga saad sa (a) Isaias 11:6-9? (b) Isaias 35:1-7? (c) Isaias 65:20-25? (d) Sin-o ang nagahimo nga mangin posible sa aton ining makalilipay nga mga palaabuton?