Mga Kongregasyon sa Pagpalig-on sa Gugma kag Paghiusa
Mahimo nga nakatambong na ikaw sa pila ka miting sa kongregasyon sang mga Saksi ni Jehova nga malapit sa inyo ginapuy-an. Ang mga tawo gikan sa tanan nga sahi sang pagkabuhi—mga pamilya, mga tawo nga diminyo, tigulang kag bata—nagatambong dira. Nahiusa sila tanan sa ila pagsimba kag interesado sa pagbuligay sa isa kag isa.
Sa bisan anong kahimusan nga sa diin ang madamo nga tawo nagahandum sa pagpangabudlay nga may paghiusa, kinahanglan nga may magdumala. Ang Dios isa ka Dios sang kahim-ong; busa, ina nga kahim-ong dapat makita sa kongregasyon sang iya katawhan. Subong sang nahaunang siglo, sa karon man, ang sangkol, hamtong, kag eksperiensiado nga Cristianong mga lalaki ginatangdo subong mga gulang, ukon mga manugtatap. Ginadumalahan nila ang kongregasyon kag ginatatap ang espirituwal nga mga kinahanglanon sini. Ginabuligan sila sang iban pa nga matutom nga mga lalaki nga ginatawag nga ministeryal nga mga alagad. Wala ini sila sing suweldo ukon pinansial nga kaayohan kundi boluntaryo sila nga nagaalagad, kag nagatrabaho agod may igasto para sa ila kaugalingon.—1 Corinto 14:33, 40; Filipos 1:1; 1 Timoteo 3:8, 9.
Paano ini sila ginapili? Dapat sila mangin matutom nga mga alagad sang Dios nga nagapakita sing pila ka Makasulatanhon nga mga kalipikasyon. Ang iban sini amo: ‘mahaganhaganon, maligdong sing hunahuna, mahim-ong, masinapopohon, sangkol sa pagtudlo, kag makatarunganon; dimahigugmaon sang kuwarta; maayo magdumala sa iya panimalay; indi bag-o nga pinaliso; ginatahod sang iban’; ‘malig-on nga nagapabilin sa matutom nga pulong kon tuhoy sa arte sang pagpanudlo.’—1 Timoteo 3:1-15; Tito 1:7-9.
Ining mga lalaki wala ginabotar sang kongregasyon para sa palangakoan, nga sa masami ang kalabanan nga mga katapo bag-ohan nga mga Cristiano. Sa baylo, ginarekomendar sila sang hamtong kag eksperiensiado nga mga lalaki nga mga gulang kag may paghantop kon bala nalab-ot nila ang Makasulatanhon nga mga kinahanglanon. Nian ang pagtangdo sa mga gulang kag ministeryal nga mga alagad ginahimo sa idalom sang pagdumala sang Nagadumala nga Hubon sang mga Saksi ni Jehova, bilang pag-ilog sa Cristianong kongregasyon sang nahaunang siglo.
Ining mga gulang, ukon mga manugtatap, indi isa ka klero nga klase; indi sila mga agalon sang iban. Subong ginsiling ni Jesus, ang bisan sin-o nga nagadumala dapat mangin ulipon sang tanan. Sa kongregasyon sang mga Saksi ni Jehova, ang mga gulang matuod gid nga mga masigkamanugpangabudlay para sa Ginharian sang Dios.—Mateo 20:26, 27; 23:8-11; Roma 12:8; 1 Corinto 3:5; 4:1, 2; Colosas 4:11; 1 Tesalonica 5:12-14.
Subong mga manugtatap, ginadumalahan nila ang mga instruksion nga ginahatag sa mga miting kag nagapanguna sa pagbantala nga hilikuton. Ang pagbantala sing maayong balita sang Ginharian sa bug-os nga teritoryo nga naasayn amo ang una nga tulumuron sang kongregasyon. Ang mga manugtatap nagaalagad man subong mga manugbantay, nga nagaduaw sa mga katapo sang kongregasyon agod palig-unon sila kon kinahanglanon.—Mateo 24:14; Binuhatan 1:8; 1 Tesalonica 2:11, 12; 5:14, 15; 2 Timoteo 2:24-26; Hebreo 13:17; Santiago 5:13-16; 1 Pedro 5:1-4.
May salabton ang mga gulang sa pagsabdong kag sa pagpadapat sing disiplina sa bisan sin-o nga may sayop nga dalanon kag mahimo katalagman sa espirituwal kag moral nga katinlo kag sa paghiusa sang kongregasyon.—1 Corinto 5:4, 5, 7, 11-13; Tito 1:9; 2:15; 3:10, 11.
Ang tayuyon nga pagpakig-upod sa kongregasyon magahatag sa imo sing maayo nga pagpakig-upod kag madamong espirituwal nga kaayohan.—Salmo 35:18; 84:10.
● Sin-o ang nagadumala sang mga hilikuton sang indibiduwal nga mga kongregasyon?
● Sa anong mga sadsaran ginapili ang mga gulang?
● Ano ang ila mga salabton?
[Mga piktyur sa pahina 13]
Ang mga manugtatap nagatudlo sa kongregasyon, nagapanguna sa pagbantala sa balay kag balay, nagapalig-on paagi sa mga pagduaw subong mga manugbantay, nagahatag sing laygay kag sabdong kon kinahanglanon