Mga Miting sa Pagpukaw sa Gugma kag Maayong mga Buhat

Ang unang mga Cristiano nagtipon anay, sa masami sa pribado nga mga puluy-an, agod magbaton sing instruksion kag makapalig-onay. Sa karon, ang mga kongregasyon sang mga Saksi ni Jehova nagatipon makatlo kada semana. Ginaagda kamo sa pagtambong sa bisan diin sining mga miting. Ang ila mga miting indi subong sang rito, kundi ginapadaku nila ang balaan nga edukasyon. Ang mga miting sang kongregasyon ginabuksan kag ginatakpan paagi sa ambahanon kag pangamuyo. Wala sing bayad ang pagtambong, kag wala sing koleksion nga ginahimo.—⁠Binuhatan 4:​23-31; 14:22; 15:​32, 35; Roma 16:​5; Colosas 4:​15.

Ayhan ang una nga miting nga imo matambongan amo ang 45-minutos nga pamulongpulong publiko, tuhoy sa mga panudlo sang Biblia, tagna, ukon laygay sa Cristianong pagkabuhi. Pagkatapos sining pamulongpulong, may yara pagtuon sa Biblia, nga ginagamit ang isa ka artikulo sa Ang Lalantawan nga gindesinyo para sa pagtinuon sang kongregasyon. Amo sini ang paagi sang pagtinuon: Ginabasa anay ang isa ka parapo sang Ang Lalantawan, kag dayon ginapamangkot sang nagadumala ang pamangkot, agod nga ang bisan sin-o sa tumalambong magboluntaryo sa pagsabat paagi sa pagbayaw sang ila kamut. Sa masami mga pila ka komento ang ginahatag sa kada parapo. Isa ka oras ang pagtinuon.

Sa ulihi nga bahin sang semana, duha pa ka tag-45 minutos nga miting ang ginahiwat. Ang isa amo ang Teokratikong Eskwelahan sa Ministeryo. Nagaaman ini sing paghanas kon paano magtipon sing materyal tuhoy sa mga topiko sang Biblia kag itudlo ini sing epektibo. Pagkatapos sang 21-minutos sang pinasahi nga pagtudlo, ang mga estudyante nga naasayn sing abanse nagahatag sing malip-ot nga presentasyon. Sa tapos sang tagsa ka presentasyon, ang instruktor sang eskwelahan nagahatag sing laygay kon paano mag-uswag ang estudyante. May pila ka libro nga ginhanda agod gamiton sa sining eskwelahan. Ang tanan nga nagatambong sing regular sa mga miting mahimo makapalista, basta nagakabuhi sila nahisuno sa Cristianong mga prinsipio.

Ang miting nga magasunod ginatawag nga Miting sa Serbisyo. Nahuman ini sing tatlo ukon apat ka bahin tuhoy sa pagtanyag sing maayong balita sa balay kag balay subong man sang iban nga bahin sang ministeryo. Ining mga bahin ginapresentar subong mga pamulongpulong, paghinun-anon, ukon mga pasundayag, nga may pagpakigbahin sang tumalambong. Ang daku nga bahin sang programa ginapasad sa materyal nga makita sa Ang Aton Ministeryo sa Ginharian, apat sing pahina nga instruksion nga ginabalhag kada bulan sang Watch Tower Society.

Ang isa pa ka miting amo ang semanal nga pagtuon nga ginahiwat sa diutay nga mga grupo, sa masami sa pribado nga mga puluy-an sa bug-os nga teritoryo sang kongregasyon. Ang pagtuon ginapasad sa Biblia kag sa bag-o nga libro nga ginbalhag sang Sosiedad. Sanglit diutay ang grupo, may yara maayo nga kahigayunan para sa tanan nga magpakigbahin sa paghinun-anon, kag may yara maayo nga kahigayunan para sa mga nagatambong nga magkilalahay sing suod.

Ang kalabanan nga kongregasyon nagahiwat sang ila mga miting sa Kingdom Hall nga gintukod sang mga Saksi ni Jehova. Ang gasto ginakobrehan sang boluntaryo nga mga amot sang mga Saksi ni Jehova, kag sa masami ang trabaho ginahimo nga wala sing bayad sang boluntaryo nga mga manugpangabudlay. May yara mga kahon alamutan sa tanan nga miting agod magamit sang luyag mag-amot.

Ang mga miting sa kongregasyon nagabulig sa mga Saksi ni Jehova sa pagsunod sang laygay sa Hebreo 10:​24, 25: “Magpatugsilingay kita kon paano ang pagpukaw sa gugma kag maayong mga buhat, nga wala nagabiya sang aton pagtilipon sing tingob, subong sang kinabatasan sang iban, kundi nagalinaygayay ang isa kag isa kag labi pa gid sa ginatan-aw [naton] nga nagapalapit ang adlaw.”

● Ano nga mga bahin sang mga miting sang unang mga Cristiano ang makita sa mga miting sang mga Saksi ni Jehova?

● Balaya kon ano ang ginapresentar sa lima ka miting nga ginahiwat sing tayuyon sang mga Saksi.

● Paano natigayon ang mga tinukod nga ginatiponan?

[Mga piktyur sa pahina 14]

Gulang nga nagadumala sang Pagtinuon sa Lalantawan, Estados Unidos

Danyag gikan sa Teokratikong Eskwelahan sa Ministeryo, Faeroe Islands

Pagtuon sang grupo sa pribado nga puluy-an, Yap

Kingdom Hall, New Braunfels, Texas, E.⁠U.⁠A., gintukod sa duha ka adlaw sang mga Saksi ni Jehova

[Mga piktyur sa pahina 15]

Mga Kingdom Hall sa nanuhaytuhay nga mga pungsod

Hapon

Australia

Austria

Espanya