Nagalakbay nga mga Manugtatap—Masigkamanugpangabudlay sa Kamatuoran
Sa Cristianong kongregasyon sang nahaunang siglo, may yara nagalakbay nga mga manugtatap nga nagaduaw sa mga kongregasyon agod palig-unon sila. Ginagamit nila ang ila kaugalingon, wala nagatinguha sang personal nga daug, agod nga mabuligan nila ang mga sa kongregasyon nga magpadayon sa paglakat sing takus sa Dios.—Binuhatan 11:23, 24; 14:21, 22; 15:32; 20:2, 31-35; Filipos 2:20-22, 29; 1 Tesalonica 2:5-12.
Ang mga kongregasyon karon sang mga Saksi ni Jehova nagabaton man sang mga benepisyo sang nagalakbay nga mga manugtatap. Ining mga tawo may madamong tinuig sang eksperiensia sa pagbantala nga hilikuton sang mga Saksi ni Jehova kag subong mga manugtatap. Wala sila sing sekular nga trabaho kag mga salabton sa panimalay agod nga mahatag nila ang ila kaugalingon sa bug-os tion nga ministeryo. Para sa mga minyo, ang asawa masami nga nagapakigbahin man sa ministeryo sing bug-os tion upod sa ila bana.
Ang manugtatap sang sirkito ginatangdo sa pag-atipan sang sirkito nga may mga 18 pa 25 ka kongregasyon. Ginaduaw niya ang tagsa ka kongregasyon sa sirkito mga makaduha kada tuig kag pagligad sang duha ukon tatlo ka tuig ginaasayn sia sa lain naman nga sirkito. Sa sining paagi ang mga kongregasyon makabenepisyo gikan sa nanuhaytuhay nga eksperiensia kag mga ikasarang sang nanuhaytuhay nga manugtatap sang sirkito.
Ginausisa sang manugtatap sang sirkito ang espirituwal nga kahimtangan sang kongregasyon kag ang hilikuton sini. Nagahatag sia sing pila ka pamulongpulong sa kongregasyon kag nagamiting upod sa mga gulang kag ministeryal nga mga alagad agod binagbinagon kon paano nila mapauswag ang ila pag-alagad sa kongregasyon.
Sa sulod sang semana sia kag ang iya asawa, kon minyo sia, nagaupod sa lokal nga mga Saksi, nagabulig sa ila sa pag-uswag sa ila pamalaybalay nga ministeryo. Sia kag ang iya asawa magaduaw man sa bag-ohan nga mga interesado agod palig-unon sila sa pagtuo. Makapangabay kamo sina nga pagduaw.
Ang manugtatap sang distrito may kaanggid man nga espirituwal nga mga kalipikasyon kag eksperiensia. Nagalakbay sia sa lainlain nga mga sirkito kag nagahatag sang iya serbisyo kada semana may kaangtanan sa sirkito nga mga asambleya. Sia kag ang iya asawa nagaguwa man sa latagon upod sa mga Saksi sa isa sang mga kongregasyon sang sirkito nga iya ginaduaw. Ginadumalahan niya ang katapusan nga paghanda sang programa sang sirkito nga asambleya kag nagahatag sing pila ka pamulongpulong sa tion sang asambleya, lakip ang pamulongpulong publiko.
Kon matapos na sang nagalakbay nga mga manugtatap ang ila pagduaw sa isa ka kongregasyon ukon sirkito, nagapadayon sila sa pagduaw sa masunod, nga ginasunod ang amo gihapon nga iskedyul, tubtob maduaw ang tanan nga kongregasyon ukon mga sirkito sa sulod sang mga anum ka bulan; nian magasugod naman sila liwat sa umpisa.
Sa madamo nga pungsod ang nagalakbay nga mga manugtatap nagalakbay paagi sa awto ukon nagagamit sing publiko nga salakyan. Sa iban nga pungsod mahimo sila magbisikleta ukon maglakat. Ginabayaran sang Sosiedad ang plete sang nagalakbay nga manugtatap kag subong man nagaaman sa iya kag sa iya asawa sing diutay nga reimbursement para sa ila personal nga mga kinahanglanon. Sa masami ang nagalakbay nga manugtatap kag ang iya asawa ginaamanan sing dalayonan kag pagkaon sang mga katapo sang tagsa ka kongregasyon.
Ining pag-alagad nagakinahanglan sing espiritu sang pagsakripisyo sang kaugalingon. Ang nagalakbay nga mga manugtatap kag ang ila asawa determinado sa paghatag sang ila serbisyo sa mga kongregasyon nga wala nagapabug-at sa ila.—1 Tesalonica 2:9.
● Ano ang katuyoan sang nagalakbay nga mga manugtatap sa Cristianong kongregasyon sang nahaunang siglo?
● Paano ang nagalakbay nga mga manugtatap karon mangin kalipikado kag magamit para sa sining ministeryo?
● Ilaragway ang serbisyo sang mga manugtatap sang sirkito kag distrito kag kon paano sila nagakabuhi.
[Piktyur sa pahina 20]
Ang manugtatap sang distrito nagapamulongpulong sa isa ka sirkito nga asambleya
[Mga piktyur sa pahina 21]
Ang mga manugtatap sang sirkito nagahatag sing instruksion sa pagbantala sa balay kag balay, nagapakighambal sa mga gulang sang kongregasyon, nagaduaw sa mga pagtuon sa Biblia upod sa bag-ohan nga mga interesado, nagapamulongpulong sa kongregasyon