Kapitulo 5
Kasanagan Para sa “Katapusan sang Sistema sang mga Butang”
NAHANUNGOD sa “katapusan sang sistema sang mga butang,” ang “Prinsipe sang Paghidait” nagsiling sa Mateo 24:38 nga ang mga tawo “nagapangasawa kag nagapamana.” Apang sa sini man nga tion, nagsugod sa langit ang labing daku nga kasal sa tanan. Amo ini ang kasal nga ginpatuhuyan sa paanggid ni Jesus tuhoy sa napulo ka manugdala sing suga, ang napulo ka ulay.—Mateo 24:3; 25:1-12.
2 Ang danyag sining kasal amo ang Natung-an nga Sidlangan. Natabo ini sa mahinagob nga kagab-ihon, halos tungang-gab-i na. Una nga hiwaton ang kasal sang nobyo kag sang iya nobya kag sundan sang prosesyon padulong sa balay sang sinalusalo. Ang alagyan wala sing suga. Ang mga nagpakigbahin sa prosesyon amo ang magaiwag sa dalanon, kag ang mga tumalan-aw makatan-aw sa prosesyon, sa pagpanginbulahan sa bag-o nga kinasal.
3 Subong kinaugali gid sa mga babayi, ang mga ulay interesado sa kasal. Gani, samtang nagamartsa, ang napulo ka ulay naghulat tubtob ang prosesyon sang kasal makalab-ot sa kaladtuan. Luyag nila nga pasanagon ang okasyon, kag bangod sini sila tanan nagdala sing suga, apang lima lamang sa ila ang nagdala sing dugang nga lana para sa emerhensya. Ining lima amo ang mainandamon nga mga ulay. Dapat kita karon mangin interesado sa katumanan sining parabola, kay suno kay Jesucristo, ginapamatud-an sini sing dugang pa nga kita yari na sa katapusan sining daan nga sistema.—Mateo 25:13.
4 Malipayon kita kon kita mainandamon kag nakahantop sang pagkahanabo sining kasal sang tanan nga kasal kag sang mga kaupod sini! Sin-o sa karon ang ginpaboran nga makasulod sa sinalusalo? May yara bala sa aton? Tan-awon naton!
5 Ang paanggid nga ginhatag ni Jesus tuhoy sa napulo ka ulay may kaangtanan sa “ginharian sang mga langit,” ang bug-os kalibutan nga pangulohan para sa pagpakamaayo sa tanan nga katawhan. Gani si Jesucristo nagpadayon sa pagsiling: “Ang ginharian sang langit mapaangay sa napulo ka dalaga nga nagdala sang ila mga suga kag nagkadto sa pagsugat sa nobyo. Lima sa ila mga buangbuang, kag lima mga mainandamon. Kay sang nagdala ang mga buangbuang sang ila mga suga, wala sila magdala sing lana, apang ang mga mainandamon nagdala sing lana sa ila mga tibudtibod pati sang ila mga suga. Karon sang naglantang ang nobyo, tanan sila gintuyo kag nagtulog.”—Mateo 25:1-5.
6 Sin-o ang ginalaragway sadtong napulo ka ulay? Ginalaragway nila ang palaabuton nga mga katapo sang nobya sang espirituwal nga Nobyo, nga si Jesucristo. Wala sing duhaduha nga bangod sining rason ang nobya wala ginsambit sa paanggid ni Jesus; ang nobyo lamang ang nag-abot. Sa amo, wala sing pagkagumon tuhoy sa paathag, nga subong bala ang mga ulay nagalaragway sa isa pa ka klase.
7 Ang paghiusa sang palaabuton nga mga katapo sang nobya nga klase sa ila langitnon nga Nobyo sa kasal wala matabo, subong ginpaabot, sa pagtakop sang “gintangdo nga panag-on sang mga pungsod” sang 1914. (Lucas 21:24) Sing lohiko, para sa ila daw subong bala nga ang Nobyo nagpalantang sang iya pag-abot, bisan pa ang iya presensia sa iya langitnon nga Ginharian natabo sang 1914. Yadtong makapasubo nga mga tinuig sang Inaway Kalibutanon I daw nangin subong sang mangitongito nga kagab-ihon sa eksperiensia sang mga ulay nga klase.
8 Sa malaragwayon nga paghambal, ang pagkatuyo kag pagtulog sang mga ulay natabo. Ang pagbantala sa publiko sing maayong balita sang nagapakari nga paghari ni Cristo sa isa ka libo ka tuig para sa pagpakamaayo sa tanan nga katawhan nag-untat. Kutob sa katapusan nga tuig sang Inaway Kalibutanon I, ang importante nga panahon sang paghukom nagsugod para sa malaragwayon nga mga ulay. Amo sini bangod ang naghari nga Hari Jesucristo nag-abot sa espirituwal nga templo. Sang iya pag-abot didto, nagsugod sia sa paghukom agod tinluan ang mga gintangdo sa pag-alagad sa templo kay Jehova nga Dios. (Malaquias 3:1-3) Amo ini ang tion sang iya pagpadayag nga, subong langitnon nga Nobyo, batunon niya sa iya kaugalingon sa langit ang nahamut-an nga mga katapo sang nobya nga klase nga patay na sadto.
9 Sang 1919, sa tapos mapaguwa ang walo ka kilala nga katapo sang Watch Tower Bible and Tract Society gikan sa dimakatarunganon nga pagkabilanggo, amo sadto ang nagakaigo nga tion nga ang mga ulay nga klase nga buhi pa sa duta magbugtaw gikan sa ila pagtulog nga wala sing pagpanghikot. Ang hilikuton sa pagpasanag sa bug-os nga kalibutan yara sa unhan. Tion sadto para sa ila, nga dala ang mga suga, sa pagsugat sa Nobyo, nga nag-abot sa espirituwal nga templo. Amo sini agod nga ang katawhan gikan sa tanan nga pungsod magadugok sa “balay ni Jehova” nga daw subong nga ginbayaw sa ibabaw sang kabukiran.—Isaias 2:1-4.
Pag-aman sang Ila mga Suga
10 Ang mga mainandamon sa mga ulay nga klase nagdala sing dugang nga lana sa ila tibudtibod para sa ila suga sa tion sang emerhensya. Wala sila maatrasar sa pagbutang liwat sing lana sa ila suga. Ang likido nga gatong para sa pagpasanag naglaragway sa nagapasanag nga Pulong ni Jehova kag sa iya balaan nga espiritu. Gani, ano ang ginlaragway sang lana nga ginkuha sa mga tibudtibod sang mainandamon nga mga ulay? Amo ang reserba nga espiritu ni Jehova nga nagahatag sing kasanagan sa iya nasulat nga Pulong kag yara sa hinaplas nga nagkalabilin sang ginpanganak sang espiritu nga mga disipulo sang Nobyo sang ang hilikuton sa tapos sang inaway sa pagpasanag sa bug-os nga kalibutan tuhoy sa “ginharian sang mga langit” gintalana nga magasugod.
11 Ang mga tibudtibod naglaragway sa malaragwayon nga mainandamon nga mga ulay subong amo ang tag-iya sang simbuliko nga lana sang kasanagan. Wala ini nagakahulugan nga ang mga ulay nga klase ginhaplasan sadto sing espiritu ni Jehova. Wala, ang mga ulay wala nagahaplas sang ila kaugalingon sang espiritu ni Jehova. Si Jehova ang nagahimo sini!—Isaias 61:1, 2; Lucas 4:16-21.
12 Bilang pagsakdag sa ginpatuman sa ila nga dakung hilikuton sa pagpasanag sa kalibutan tuhoy sa “ginharian sang langit,” nahamut-an ang mainandamon nga mga ulay nga matuman sa ila ang Joel 2:28, 29. Amo sini ang pagbalikwat ni apostol Pedro sadtong mga bersikulo: “‘Kag mahanabo sa katapusan nga mga adlaw,’ siling ang Dios, ‘nga ipasagahay ko ang akon espiritu sa tanan nga unod, kag ang inyo mga anak nga lalaki kag ang inyo mga anak nga babayi magapanagna kag ang inyo mga pamatan-on nga lalaki makakita sing mga palanan-awon kag ang inyo katigulangan magadamgo sing mga damgo.’” (Binuhatan 2:17) Gani kutob sang 1919 gindala sang mga mainandamon sa malaragwayon nga mga ulay nga klase ang ila kasangkapan sa pag-iwag, ang ila simbuliko nga mga suga—sila mismo. Ginhimo nila ini agod magpaambit sing kasanagan sa tanan nga yara pa sa espirituwal nga kadudulman. Bangod sang ila sahi sang pagkabuhi sa idalom sang impluwensia sang Pulong kag espiritu sang Dios, sila nangin mga “sulo sa kalibutan.” (Filipos 2:15) Sa amo ginsunod nila ang mga tikang sang Nobyo samtang nagahanda sia sa pagdala sa tanan nga katapo sang nobya nga klase sa iya langitnon nga Ginharian sa tapos sila mapatay sa duta.—Mateo 5:14-16.
Mga Resulta sang Espirituwal nga Kabuangan
13 Ano ang natabo sa mga buangbuang sang mga ulay nga klase? Si Jesus nagpadayon sa pagsiling: “Ang mga buangbuang nagsiling sa mainandamon, ‘Hatagi kami sang inyo lana, kay nagakapalong ang amon mga suga.’ Ang mainandamon nagsabat sa sining mga pulong, ‘Basi indi ini mag-igo sa amon kag sa inyo. Maayo pa magkadto kamo sa mga nagabaligya kag magbakal para sa inyo kaugalingon.’”—Mateo 25:8, 9.
14 Ang mga nagpangindi sa pagpaambit sa mga buangbuang indi makagud, kundi mainandamon. Nagpabilin sila sa ila una gid kag maayo nga katuyuan nga iwagan ang madulom nga mga palibot para sa Nobyo. Indi sila obligado nga magkompromiso, nga buhinan ang kadamuon sang balaan nga espiritu ni Jehova agod hatagan ang espirituwal nga mga buangbuang. Ina nga mga buangbuang wala maghanda sang ila kaugalingon sa pagsulod sa gilayon sa pribilehiyo sang pag-alagad nga bukas sa ila sang 1919.
15 Sang magbukas ang panahon sang paghidait, ang iban sadtong nagapangangkon nga dedikado kag bawtismado nga mga kaupod nagsugod sa pagpakita sing espirituwal nga kabuangan. Sang mapatay ang una nga presidente sang Watch Tower Society, nga si Charles Taze Russell, wala sila sing bug-os magsulod sa espiritu sang mga pag-uswag upod sa kitaon nga instrumento ni Jehova nga Dios sa idalom sang bag-o nga presidente sini, nga si J. F. Rutherford. Ang ila tagipusuon wala gid nahisanto sa mga butang nga ginahimo sadto. Kulang sila sing apresasyon sa paagi sang pagpakig-angot ni Jehova sa iya katawhan. Sa amo, indi mapasulod sang mga kaangay sa mainandamon nga mga ulay ang matuod nga espiritu sang tinagipusuon nga pagkooperar sa sining mga buangbuang nga nagpain sang ila kaugalingon sing dugang pa.
16 Sa amo, ginpakita ang espirituwal nga kabuangan. Paano? Paagi sa kapaslawan sa pagpanag-iya sing simbuliko nga lana sa importante nga tion sang kinahanglan gid ang espirituwal nga kasanagan samtang ang bag-o nga mga butang sang pag-uswag ginahimo, nga nagapakita nag-abot na ang Nobyo. Gani tion sadto nga magkadto agod sugaton sia nga nagasiga sing masanag ang suga sang isa, sa malaragwayon nga paghambal. Apang sa baylo, ang mga kasubong sang buangbuang nga mga ulay, nga ang ila suga nagakapalong, nagbulag sa mga mainandamon.
17 Daw ano ka indi na mabawi nga kadulaan kon mawasi sang isa nga nagapangangkon nga nalakip sia sa mga ulay nga klase ang indi na masulit nga pribilehiyo kag kahigayunan sa pag-abiabi sa espirituwal nga Nobyo, si Jesucristo! Amo sina nga kadulaan ang ginaantos sang modernong-adlaw nga mga ulay, subong ginapakita sa dugang pa nga mga pulong sang paanggid ni Jesus: “Sang nagpakadto sila sa pagbakal, nag-abot ang nobyo, kag ang mga handa nagsulod upod sa iya sa sinalusalo sang kasal; kag gintakop ang ganhaan.”—Mateo 25:10.
18 Daw ano ka makahalanusbo nga eksperiensia para sa buangbuang nga mga ulay sang modernong adlaw! Sa sining pinakamadulom nga tion sa bug-os nga maragtas sang tawo, napaslawan sila sa pagpakigbahin sa hilikuton sang pagpasanag sa mga nagalingkod sa espirituwal nga kadudulman kag sa landong sang kamatayon sa “inaway sang dakung adlaw sang Dios nga Labing Gamhanan”! (Bugna 16:14) Bangod wala sila sing lana sa ila malaragwayon nga mga suga sa pagpasanag sang ila banas, naglakat sila kag nangita sang ila banas sa kadulom sang tungang-gabi. Bangod sini wala sila makaabot sa pagsunod sa mga tikang sang Nobyo sa makalilipay nga prosesyon pasulod sa ganhaan kag sa sinalusalo sang kasal nga may daku nga kasanag. Nadula nila ang ila pagkanakilala subong iya mga sumulunod nga nakalinya nga kalaslon sa iya sa langitnon nga Ginharian. Wala sila masapwan nga “handa” sa gintalana nga tion. Daw ano sila ka makapaandam nga halimbawa!
19 Ining masakit nga kamatuoran maathag nga ginlaragway sa hingapusan nga bahin sang paanggid nga ginhatag ni Jesucristo, ang Nobyo, labi na para sa aton nga nagakabuhi sa “katapusan sang sistema sang mga butang.” Gani sundan naton ini nga butang sing dugang pa! Makalilipay nga kasanagan ang nagahulat sa aton sa paghimo sini, subong makita naton sa masunod nga kapitulo.
[Mga Pamangkot sa Pagtinuon]
1. Para sa sining “katapusan sang sistema sang mga butang,” anong talalupangdon nga kasal ang gintagna sang “Prinsipe sang Paghidait,” kag sa anong parabola?
2. (a) Sa ano nga oras sang adlaw natabo ining kasal sa parabola? (b) Ano ang nagsunod sa kasal, kag paano gin-aman ang kapawa?
3, 4. (a) Sin-o ang nangin interesado sa prosesyon nga nagasunod, kag upod ang ano nga mga paghanda? (b) Ang katumanan sining parabola nagadugang sing pamatuod sa ano nga kamatuoran? (c) Mangin malipayon kita kon himuon naton ang ano?
5. Ano ang kinatuhayan sa mga nagahuman sa napulo ka ulay, kag ano ang natabo sa tion nga nalantang ang nobyo?
6. (a) Sin-o ang ginlaragway sang napulo ka ulay? (b) Ngaa wala ginsambit ang nobya sa parabola?
7. Sa sulod sang anong tion nga ang Nobyo daw nalantang sa iya pag-abot para sa nobya, kag ngaa?
8. (a) Paano, sa malaragwayon nga paghambal, natabo ang pagkatuyo kag pagtulog sang mga ulay? (b) Sa anong katuyuan nga ang Nobyo nagkadto sa templo, kag ngaa nabalaka sa sini ang nobya nga klase?
9. San-o nag-abot ang tion nga ang mga ulay nga klase nagbugtaw gikan sa indi paghikot, kag ngaa?
10. Ano ang ginlaragway sang lana nga ginkuha sa mga tibudtibod sang mainandamon nga mga ulay?
11. Ano ang simbuliko nga mga tibudtibod nga ginsudlan sing lana?
12. (a) Ano nga tagna ni Joel ang natuman sa mainandamon nga mga ulay? (b) San-o nag-abot ang tion nga ipaiwag nila ang kasanagan paagi sa ila mga suga?
13. Ano ang ginsabat sang mainandamon nga mga ulay sa pangabay sang buangbuang nga mga ulay?
14. Ngaa ang mga ulay nga nagdumili sa pagpaambit sang ila lana mainandamon sa baylo nga makagod?
15. (a) Sang magbukas ang tion sang paghidait, sin-o sa mga ulay nga klase ang nagpakita sing huyog sa espirituwal nga kabuangan? (b) Ngaa wala mabuligan sang mainandamon nga mga ulay ang espirituwal nga buangbuang nga mga ulay?
16. Paano ginpakita ang espirituwal nga kabuangan sa bahin sang buangbuang nga mga ulay?
17. Anong indi na mabawi nga kadulaan ang gin-antos sang mga ginlaragway sang buangbuang nga mga ulay, subong ginpakita sa Mateo 25:10?
18. (a) Ano nga pribilehiyo ang nawasi sang buangbuang nga mga ulay sini nga siglo? (b) Ngaa naulihi ang mga buangbuang sa pagpakigbahin sa prosesyon sang kasal kag sa pagsulod sa sinalusalo?
19. Ano nga eksperiensia ang nagahulat sa aton sa pagsunod sa sini nga butang tubtob sa katapusan sini?