Bug-os Kalibutan nga Kalig-onan sa Idalom sang “Prinsipe sang Paghidait”: Kapitulo 12
Malapit Na Matapos sang Bag-ong Katipan sang Dios ang Katuyuan Sini
ANO ang himuon naton kon wala pagtumana sang Dios ang iya katipan nahanungod sa adlaw kag sa gab-i? Sa baylo sang nagabulosbulos nga adlaw kag gab-i, ang aton duta iwagan sang dalayon nga kapawa ukon takpan sang dalayon nga kadudulman. (Genesis 1:1, 2, 14-19) Apang ang Dios matutom nga nagaunong sa iya mga katipan. Gani mapat-od gid naton nga ang bulan, adlaw, kag ang mga galaksiya sang langit indi gid malaglag; indi bisan ang aton planeta nga Duta.
2 Nagahambal sang iya katipan nahanungod sa adlaw kag sa gab-i, ang Dios nagsiling sa mga Judiyo sa idalom sang ginharian sang harianon nga panimalay ni David: “Kon mabungkag ninyo ang akon katipan upod sa adlaw kag ang akon katipan upod sa gab-i, sa bagay nga wala na sing adlaw kag gab-i sa ila panag-on, nian mabungkag man ninyo ang akon katipan kay David nga akon alagad agod nga wala na sia sing anak nga lalaki nga magahari sa iya trono.”—Jeremias 33:20, 21.
3 Sa sina nga mga pulong may yara kita ditalangkod nga pamatuod nga ang aton duta, upod ang adlaw kag ang bulan, magapabilin tubtob sa walay katubtuban. (Manugwali 1:4) Ang aton duta puy-an sing dayon sang mga tawo, agod nga kalipayan nila ang katahom sang adlaw kag sang gab-i sa idalom sang Dios nga nagatuman sang katipan, ang Manunuga sang tawo. Kag subong nga nagpabilin nga malig-on si Jehova sa iya katipan sa adlaw kag sa gab-i, nagmatutom man sia sa iya katipan kay Hari David sang una para sa isa ka walay katapusan nga Ginharian sa linya sang pamilya ni David. Matuod ini bisan pa ang lingkuranan sang Ginharian ginsaylo gikan sa duta padulong sa dikitaon nga kalangitan.—Salmo 110:1-3.
4 Ang katipan sang Dios para sa walay katapusan nga Ginharian sa kaliwat ni David ginaangot sa isa pa ka katipan, “ang bag-ong katipan.” Ining katipan nga nagbulos sa daan nga katipan ginsambit ni Jesus. Ginsambit niya ini sa tapos niya ginsaulog ang Judiyong Paskuwa upod sa iya matutom nga mga disipulo sang gab-i sang Nisan 14 sang 33 C.E. Ginpatok niya ang gintawag nga “panihapon sang Ginuo.” Nahibaluan niya nga, sadto gihapon nga adlaw sang Paskuwa, patuluon niya ang iya dugo subong halad. Bangod sadto, nagkuha sia sing tagayan sang mapula nga alak, apang antes ipasa ini sa iya matutom nga mga apostoles, sia nagsiling: “Ining tagayan nagakahulugan sing bag-ong katipan bangod sang akon dugo.”—Lucas 22:20; 1 Corinto 11:20, 23-26.
5 Kaangay sang daan nga katipan, ang bag-ong katipan ginhimo upod sa isa ka pungsod apang indi sa bisan ano nga pungsod sang Cristiandad. Bisan pa ang ginsaad nga bag-ong katipan ginhimo paagi kay manalagna Jeremias upod sa pungsod sang Israel kapin sa 2,500 ka tuig sang una, ang Republika sang Israel karon wala nagapangangkon nga nalakip sa bag-ong katipan. Sa baylo, ang Republika sang Israel nangin katapo sang NU.
6 Ngaa luyag sang Dios ang isa ka bag-ong katipan? Ang Jeremias 31:31-34 nagapaathag: “‘Yari karon! Magaabot ang mga adlaw,’ siling ni Jehova, ‘kag magahimo ako sing bag-ong katipan upod sa panimalay sang Israel kag upod sa panimalay sang Juda; indi subong sang katipan nga ginhimo ko upod sa ila mga ginikanan sang adlaw nga gintuytuyan ko sila sa kamot sa pagpaguwa sa ila gikan sa duta sang Egipto, “ang akon katipan nga ginlalis nila, bisan ako bana nila,” siling ni Jehova.’ ‘Kay amo ini ang katipan nga himuon ko upod sa panimalay sang Israel sa tapos sadtong mga adlaw,’ siling ni Jehova. ‘Ibutang ko ang akon kasuguan sa sulod nila, kag isulat ko ini sa ila tagipusuon. Kag ako mangin ila Dios, kag sila mangin akon katawhan. Kag indi na sila magtudlo ang tagsatagsa sa iya isigkatawo kag ang tagsa ka tawo sa iya utod, nga nagasiling, “Kilalaha si Jehova!” kay sila tanan makakilala sa akon, kutob sa labing magamay sa ila tubtob sa labing daku,’ siling ni Jehova. ‘Kay patawaron ko ang kalautan nila, kag indi na pagdumdumon ang ila sala.’”
Maayo Pa nga Katipan nga May Maayo pa nga Manugpatunga
7 Ang bag-o nga katipan indi pagbag-o lamang sa nauna nga katipan nga ginlalis sang mga Israelinhon. Indi, sa pagkamatuod! Kay si apostol Pablo nagsulat sa mga Cristiano sa Roma, nga nagasiling: “Indi kamo sa idalom sang kasuguan kundi sa idalom sang dibagay nga kaluoy.” (Roma 6:14) Isa gid ini ka bag-ong katipan, kag ginpaabot ini nga maayo pa, kay may ikasarang ang Labing Gamhanan nga Dios nga si Jehova sa pagpauswag sang mga butang tuhoy sa ila nga iya ginabaton sa bag-ong katipan. Una, nagbangon sia sing maayo nga manugpatunga, sa pagtukod sing bag-ong katipan. Ining Manugpatunga indi ang dihimpit, makasasala nga tawo kaangay ni manalagna Moises.
8 Ang Kasuguan nga katipan nga ginpatung-an ni manalagna Moises maayo sa iya kaugalingon. Apang, yadtong katipan naghimos sing aman nga maghalad sing mga sapat nga ang dugo sini indi gid makahugas sang mga sala sang tawo. Gani agod makatukod si Jehova nga Dios sing maayo pa nga katipan, kinahanglan ang maayo pa nga manugpatunga nga may maayo pa nga halad. Ining kinahanglanon gid nga Manugpatunga nangin amo si Jesucristo. Nagapakita sang pagkasuperyor sining Manugpatunga kon ipaanggid kay manalagna Moises, ang Biblia nagahatag sa aton sang masunod nga paathag: “Apang karon nakaagom si Jesus sing isa ka pag-alagdan nga labing maayo pa sang sa daan, amo kon ngaa sia man ang manugpatunga sang isa ka maayo pa nga katipan, nga ginhimo sa maayo pa nga mga saad. . . . Sa iya pagbungat sing ‘bag-ong katipan’ ginpakadaan niya ang nahauna.”—Hebreo 8:6, 13.
Ginbuslan ang “Daan” nga Katipan
9 Yadtong “daan” ukon lipas na, nga katipan nagtaliwan pagligad sang 50 ka adlaw sa tapos mabanhaw ang Manugpatunga sang bag-ong katipan. Natabo ini sang adlaw sang Pentecostes. Sang aga sadto nga adlaw, ang antitipo sang Judiyong Piesta sang Pagtipon natabo. Paano? Bueno, 120 ka matutom nga mga disipulo sang Manugpatunga sang bag-ong katipan ang nagtipon sa isa ka naibabaw nga hulot sa Jerusalem kag nakabaton sing ginsaad nga balaan nga espiritu, bilang katumanan sang tagna sang Joel 2:28-32. Ginpalig-on sini ang pagsugod sang bag-ong katipan paagi sa paghatag sing mabatian kag kitaon nga pamatuod sa tanan nga tumalan-aw.
10 Sang magbutwa si Jesus sa tubig sang bawtismo kag ang balaan nga espiritu nagkunsad sa iya, ang espiritu milagruso nga ginsimbuluhan sang larawan sang isa ka salampati nga nagtungtong sa iya ulo. Apang sa bahin sang 120 ka Hebreong disipulo sang adlaw sang Pentecostes, paano ginpakita ang paghaplas sa ila sing balaan nga espiritu? Paagi sa paglutaw sang mga dila nga daw subong sang kalayo sa ibabaw sang ila mga ulo kag paagi sa pagdulot sa ila sing ikasarang sa pagwali sang Pulong sang Dios sa iban nga mga hambal nga wala gid nila maton-i.—Mateo 3:16; Binuhatan 2:1-36.
11 Dapat mangin maathag sa mga Judiyo kag sa ila mga rabbi nga ang Mosaikong Kasuguan nga katipan natapos na. Kutob sang ginlaglag ang Jerusalem sang Romanong mga soldado sang 70 C.E., wala na sila sing templo. Sadto nga tion, ang mga rekord sang ila mga kaliwatan nadula ukon nalaglag. Sa amo indi karon mahibaluan kon sin-o ang sa tribo ni Levi kag kon sin-o ang kaliwat ni Aaron agod makaalagad subong mataas nga saserdote para sa Judiyong pungsod. Sa baylo nga magsiling sa isa kag isa, “Kilalaha si Jehova!” ginakabig nila ang pagsambit sang balaan nga ngalan nga isa ka pagtamay. Gani wala sila nagaambit sa kalipay sang mga Saksi ni Jehova bangod sa kamatuoran nga ang “daan” nga katipan ginbuslan na sang bag-ong katipan.
“Dayon nga Katipan”
12 Tuhay sing daku sa kahimtangan sang mga Judiyo karon, ang mga Saksi ni Jehova may yara aktibo, nagaalagad nga Mataas nga Saserdote sa tuohan sang Dios sa kalangitan. Sia ang Manugpatunga sang bag-ong katipan, isa ka manugpatunga nga daku pa kay Moises. Gikan sa tagipusuon, ining mga saksi ni Jehova makabuylog sa pangamuyo sang manunulat sa Hebreo 13:20, 21: “Karon kabay nga ang Dios sang paghidait, nga nagbanhaw sang aton Ginuong Jesus, ang daku nga manugbantay sang mga karnero nga may dugo sang dayon nga katipan, magsangkap sa inyo sing tagsa ka maayong buhat sa paghimo sang iya kabubut-on.” Sanglit ginhalad sadtong “daku nga manugbantay” ang iya tawhanon nga kabuhi tungod sa “mga karnero,” ginbanhaw sia subong isa ka dimamalatyon, wala sing dugo nga espiritu apang dala niya ang bili sang dugo sang bag-ong katipan nga ginatuman sing matutom kag dayon ang maayong mga epekto sini.
13 Ang mahalaron nga kamatayon sang Manugpatunga sang bag-ong katipan, si Jesucristo, ginadumdom kada tuig sang mga Saksi ni Jehova sa anibersaryo sang “panihapon sang Ginuo.” Ang tinapay nga wala sing lebadura nga ginaambitan sang mga sa bag-ong katipan sa tion sang “panihapon” nagasimbulo sa himpit nga unod sang Manugpatunga, kag ang alak nagasimbulo sa putli, wala sing mantsa nga dugo nga, suno sa Kasulatan, nag-unod sang bili gid sang kabuhi sang Manugpatunga.—1 Corinto 11:20-26; Levitico 17:11.
14 Kon ang mga sa bag-ong katipan mag-ambit sa Memoryal nga tagayan sang alak sa “panihapon sang Ginuo,” sila nagainom sa malaragwayon lamang nga paagi sang dugo sang Manugpatunga sang bag-ong katipan. Simbuliko man ang ila pagkaon sa iya unod kon nagaambit sila sa Memoryal nga tinapay nga walay lebadura. Paagi sa paghimo sini, sa simbuliko nga paghambal, ginapakita nila ang ila pagtuo sa halad nga gawad sang Anak sang Dios, ang Manunubos sang tanan nga katawhan.
15 Ang bag-ong katipan, nga karon kapin na sa 1,950 ka tuig ang edad, malapit na makatuman sang iya katuyuan. Nagdugay ini sing mga siglo sang sa Mosaikong Kasuguan nga katipan. Bangod napasad sa maayo nga mga saad kag maayo nga halad nga may maayo pa nga Manugpatunga, napamatud-an gid ini nga isa ka maayo pa nga katipan. Bangod wala nagakinahanglan nga buslan sang isa ka bag-o kag maayo pa nga katipan, ang madinalag-on nga bag-ong katipan ginapatuhuyan subong “dayon nga katipan.”—Hebreo 13:20.
16 Salamat gid sa Labing Gamhanan nga Dios, nga si Jehova, nga nagbangon sia sing Manugpatunga nga maayo pa kay Moises, nga paagi sa iya, legal nga gindula niya ang Mosaikong Kasuguan nga katipan paagi sa paglansang sini sa usok sang pag-antos kag nag-aman sang dugo sang dayon nga bag-ong katipan!
[Mga Pamangkot sa Pagtinuon]
1. (a) Ano ang natabo sa aton duta kon wala pagtumana sang Dios ang iya katipan nahanungod sa adlaw kag sa gab-i? (b) Sanglit ang Dios matutom nga nagaunong sa iya mga katipan, sa ano kita makapat-od?
2. Ano ang ginsiling ni Jehova sa mga Judiyo tuhoy sa iya katipan upod sa adlaw kag upod sa gab-i?
3. Ano ang ginapakita sining mga pulong tuhoy sa iya katipan kay David para sa isa ka dayon nga Ginharian?
4. (a) Ang katipan sang Dios kay David para sa dayon nga Ginharian naangot sa anong isa pa ka katipan? (b) Ano ang ginsiling ni Jesucristo nahanungod sini, kag sa idalom sang anong mga kahimtangan?
5. Upod kay sin-o ginhimo ang ginsaad nga bag-ong katipan sang Dios, kag nagapangangkon bala ang Republika sang Israel nga nalakip sa sining katipan?
6. Suno sa Jeremias kapitulo 31, ngaa nakita sang Dios ang kinahanglanon nga maghimo sing bag-ong katipan, kag magaresulta ini sa ano?
7. Isa bala ka pagbag-o ang bag-ong katipan sang katipan nga ginlalis sang mga Israelinhon, kag ngaa maayo pa ini sang sa Kasuguan nga katipan?
8. (a) Ano ang yara sa bag-ong katipan nga nagahimo sini nga maayo pa sa Kasuguan nga katipan? (b) Sin-o ang Manugpatunga sang maayo pa nga bag-ong katipan? (c) Ano ang ginasiling sang Hebreo 8:6, 13 nahanungod sa bag-ong katipan kag sa pagkasuperyor sang Manugpatunga sini, kag ano ang epekto sini sa daan nga katipan?
9. (a) Sa ano nga adlaw nagtaliwan ang daan nga katipan? (b) Ano ang natabo sadto nga aga, kag sa pagpalig-on sang ano?
10. Sang adlaw sang Pentecostes, paano ginpakita nga ang mga disipulo ni Jesus ginhaplasan sing balaan nga espiritu?
11. (a) Ano ang dapat mangin maathag sa mga Judiyo, kag ngaa? (b) Paano naton mahibaluan nga ang mga Judiyo wala nagasiling sa isa kag isa, “Kilalaha si Jehova!” kag ano nga kalipay ang wala sa ila?
12. (a) Sa ano nga pangamuyo ang mga Saksi ni Jehova makabuylog karon sing tinagipusuon? (b) Upod ang ano ginbanhaw si Jesus?
13. (a) Paano ang kamatayon sang Manugpatunga sang bag-ong katipan ginadumdom kada tuig sang mga Saksi ni Jehova? (b) Ano ang ginasimbulo sang mga emblema?
14. Kon ang mga sa bag-ong katipan nagaambit sa mga emblema sang Memoryal, ano ang ila ginahimo, sa simbuliko nga paghambal?
15. (a) Daw ano kadugay na ang bag-ong katipan, kag paano ini napamatud-an nga isa gid ka maayo pa nga katipan? (b) Ngaa ang bag-ong katipan sarang mapatuhuyan nga “dayon nga katipan”?
16. Bangod sa ano dapat kita magpasalamat kay Jehova nga Dios?