Kapitulo 54

“Ang Matuod nga Tinapay Gikan sa Langit”

PUNO gid sing hitabo ang nagligad nga adlaw. Milagruso nga ginpakaon ni Jesus ang linibolibo kag dayon nalikawan niya ang plano sang mga tawo nga himuon sia nga hari. Sadto nga gab-i naglakat sia sa maunos nga dagat sang Galilea; ginluwas si Pedro, nga nagsugod sa paglugdang sang maglakat sia sa ginabaluskay sang unos nga tubig; kag ginpakalma niya ang mga balod agod luwason ang iya mga disipulo gikan sa pagkaguba sang sakayan.

Karon ang mga tawo nga ginpakaon ni Jesus sing milagruso sa aminhan-sidlangan sang Dagat sang Galilea nakakita sa iya malapit sa Capernaum kag namangkot: “San-o ka nag-abot diri?” Sa pagsabdong sa ila, nagsiling si Jesus nga ginapangita nila sia, bangod lamang nagapaabot sila nga makakaon naman liwat nga wala sing bayad. Ginlaygayan niya sila nga magpangabudlay, indi tungod sang kalan-on nga nagakawala, kundi tungod sang kalan-on nga nagapadayon sa kabuhi nga walay katapusan. Gani namangkot ang mga tawo: “Ano ang himuon namon agod mahimo ang mga buhat sang Dios?”

Ginsambit ni Jesus ang isa ka hilikuton nga may pinakamataas nga bili. “Amo ini ang buluhaton sang Dios,” paathag niya, “nga magtuo kamo sa iya nga ginpadala sinang Isa.”

Apang, ang mga tawo wala magtuo kay Jesus, walay sapayan sang tanan nga milagro nga iya ginhimo. Daw indi mapatihan nga sa tapos sang tanan nga makatilingala nga mga butang nga nahimo niya, namangkot pa sila: “Ano ang himuon mo nga tanda, agod nga makita namon, kag magtuo sa imo? Ano ang ginabuhat mo? Ang amon mga ginikanan nagkaon sing mana sa kamingawan, subong sang nasulat na, ‘Ginhatagan niya sila sing tinapay nga kaunon gikan sa langit.’ ”

Bilang sabat sa ila ginapangayo nga tanda, maathag nga ginpakita ni Jesus ang Ginahalinan sang milagruso nga mga aman, nga nagasiling: “Indi si Moises ang naghatag sa inyo sing tinapay gikan sa langit, kundi ang akon Amay nagahatag sa inyo sing matuod nga tinapay gikan sa langit. Kay ang tinapay sang Dios amo ang nagagikan sa langit kag nagahatag sing kabuhi sa kalibutan.”

“Ginuo,” siling sang katawhan, “hatagi kami sing dayon sining tinapay.”

“Ako amo ang tinapay sang kabuhi,” paathag ni Jesus. “Ang nagakari sa akon indi paggutumon, kag ang nagatuo sa akon indi na gid pag-uhawon. Apang nagsiling ako sa inyo, Nakita ninyo ako apang wala kamo magtuo. Ang tanan nga ginahatag sa akon sang Amay magakari sa akon, kag ang nagakari sa akon indi ko gid pagsubulon; kay nagkari ako gikan sa langit, indi sa paghimo sang akon kabubut-on, kundi sang kabubut-on sang nagpadala sa akon. Ini amo ang kabubut-on sang nagpadala sa akon, nga wala ako sing madula sang tanan nga ginhatag niya sa akon kundi nga banhawon ini sa katapusan nga adlaw. Kay ini amo ang kabubut-on sang akon Amay, nga ang tagsatagsa nga nakakita sa Anak kag nagatuo sa iya may kabuhi nga walay katapusan.”

Sa sini ang mga Judiyo nagsugod sa pagkumod kay Jesus bangod nga nagsiling sia, “Ako ang tinapay nga naggikan sa langit.” Gintamod nila sia nga isa lamang ka anak sang tawhanon nga mga ginikanan kag gani subong sang ginhimo sang mga taga-Nasaret, nagpamatok sila: “Indi bala ini si Jesus, ang anak ni Jose, nga ang iya amay kag iloy nakilala naton? Paano bala nga nagasiling sia karon, ‘Nagkari ako gikan sa langit’?”

“Mag-untat kamo sa pagkumod sa inyo kaugalingon,” sabat ni Jesus. “Wala sing tawo nga makakari sa akon kon indi sia pagbuyukon sang Amay nga nagpadala sa akon; kag banhawon ko sia sa katapusan nga adlaw. Nasulat na sa mga Manalagna, ‘Kag tudluan sila tanan ni Jehova.’ Ang tagsatagsa nga nakapamati kag nakatuon sa Amay nagakari sa akon. Indi kay may tawo nga nakakita sa Amay luwas sia nga nagikan sa Dios; sia nakakita sa Amay. Sa pagkamatuod nagasiling ako sa inyo, Sia nga nagatuo may kabuhi nga walay katapusan.”

Sa pagpadayon, ginsulit ni Jesus: “Ako ang tinapay sang kabuhi. Ang inyo mga ginikanan nagkaon sang mana sa kamingawan, walay sapayan nagkalapatay sila. Ini amo ang tinapay nga nagagikan sa langit, agod nga ang tawo makakaon sini kag indi mapatay. Ako ang buhi nga tinapay nga nagkari gikan sa langit; kon bisan sin-o nga magkaon sining tinapay, magakabuhi sia sing dayon.” Huo, paagi sa pagpakita sing pagtuo kay Jesus, ang isa nga ginpadala sang Dios, ang mga tawo makatigayon sing kabuhi nga walay katapusan. Wala sing mana, ukon iban pa nga tinapay, ang makahatag sina!

Ang paghambalanay nahanungod sa tinapay gikan sa langit mahimo nga nagsugod sa tapos makita sang mga tawo si Jesus malapit sa Capernaum. Apang nagpadayon ini, kag nakalab-ot sa putukputukan sang ulihi samtang nagapanudlo si Jesus sa isa ka sinagoga sa Capernaum. Juan 6:25-51, 59; Salmo 78:24; Isaias 54:13; Mateo 13:55-57.

▪ Ano ang mga hitabo antes sang pagpaathag ni Jesus nahanungod sa tinapay gikan sa langit?

▪ Bangod sang nahimuan ni Jesus, ngaa indi gid nagakaigo ang pagpangayo sing tanda?

▪ Ngaa nagkumod ang mga Judiyo sa ginsiling ni Jesus nga sia ang matuod nga tinapay gikan sa langit?

▪ Sa diin natabo ang paghambalanay nahanungod sa tinapay gikan sa langit?