Kapitulo 109

Ginpakamalaut ni Jesus ang mga Nagpamatok sa Iya

GINKIBOT gid ni Jesus ang relihioso nga mga nagpamatok sa iya sa bagay nga nahadlok sila sa pagpamangkot sa iya sing dugang. Gani sia ang namangkot agod ibuyagyag ang ila pagkaignorante. “Ano bala sa hunahuna ninyo ang Cristo?” pamangkot niya. “Kay sin-o bala sia anak?”

“Anak ni David,” sabat sang mga Fariseo.

Bisan pa wala ginpanghiwala ni Jesus nga si David amo ang pisikal nga katigulangan sang Cristo, ukon sang Mesias, namangkot sia: “Paano bala, nian, nga si David nga nadaldal sang espiritu [sa Salmo 110] nagatawag sa iya nga ‘Ginuo,’ nga nagasiling, ‘Si Jehova nagsiling sa akon Ginuo: “Lingkod ka sa akon tuo tubtob nga mapahamtang ko ang imo mga kaaway sa idalom sang imo mga tiil” ’? Kon si David, nian, nagatawag sa iya nga ‘Ginuo,’ paano bala nga sia anak niya?”

Ang mga Fariseo naghipos, bangod wala nila mahibalui ang matuod nga identidad ni Cristo, ukon hinaplas. Ang Mesias indi lamang ang tawhanon nga kaliwat ni David, subong sang maathag nga ginapatihan sang mga Fariseo, kundi sia nagkabuhi sa langit kag superyor, ukon Ginuo, ni David.

Nagbalikid karon sa mga kadam-an kag sa iya mga disipulo, si Jesus nagpaandam nahanungod sa mga escriba kag mga Fariseo. Bangod nagatudlo sila sang Kasuguan sang Dios, ‘subong nga sila nagalingkod sa lingkuran ni Moises,’ si Jesus naglaygay: “Ang bisan ano nga ila ginasiling sa inyo, buhata kag bantayi.” Apang sia nagadugang: “Dili ang ila ginabuhat, kay sila nagawali apang wala nagahimo.”

Mga salimpapaw sila, kag ginpakamalaut sila ni Jesus subong sang pagpakamalaut niya sang nagligad nga mga binulan samtang nagakaon sia sa balay sang isa ka Fariseo. “Sila nagahimo sang tanan nila nga buluhaton,” siling niya, “agod tan-awon sang mga tawo.” Kag nagahatag sia sing mga halimbawa, nga nagasiling:

“Nagapalapad sila sang ila mga filacteria.” Ining diutay katama nga mga suludlan, nga ginabutang sa agtang ukon sa butkon, nagaunod sang apat ka bahin sang Kasuguan: Exodo 13:​1-10, 11-16; kag Deuteronomio 6:​4-9; 11:​13-21. Apang ginpadakuan pa gid sang mga Fariseo ining mga suludlan agod ipakita nga makugi sila sa Kasu­guan.

Si Jesus nagpadayon nga sila “nagapalaba sang ila mga plekos.” Sa Numeros 15:​38-40 ang mga Israelinhon ginsugo sa paghimo sing mga plekos sa ila mga panapton, apang ginpalabaan pa gid sang mga Fariseo ang ila sang sa iban. Ang tanan ginhimo agod magpakitakita! “Sila nagahingamo sang pinasulabi nga duog,” siling ni Jesus.

Sing masubo, ang iya mismo mga disipulo naapektuhan sining handum nga mangin bantog. Gani sia naglaygay: “Apang dili kamo magpatawag nga Rabbi, kay isa lamang ang inyo manunudlo, kag kamo tanan mag-ulutod. Dili kamo magtawag nga amay bisan kay sin-ong tawo sa duta, kay isa lamang ang inyo Amay, ang yara sa langit. Dili kamo magpatawag nga mga ‘lider,’ kay isa lamang ang inyo Lider, ang Cristo.” Dapat dulaon sang mga disipulo sa ila kaugalingon ang ­handum nga mangin numero uno! “Ang labing daku sa inyo mangin alagad ninyo,” laygay ni Jesus.

Masunod nga ginhambal niya ang mga kailo sa mga escriba kag mga Fariseo, sulitsulit nga nagatawag sa ila nga mga salimpapaw. “Ginatakpan [nila] ang ginharian sang langit sa mga tawo,” siling niya, kag “ginahalunhon [nila] ang mga balay sang mga babaying balo kag nga sa pamalibad nagahimo [sila] sing malawig nga mga pangamuyo.”

“Kailo kamo, mga tuytoy nga bulag,” siling ni Jesus. Ginkondenar niya ang kakulang sing espirituwal nga prinsipio sang mga Fariseo, subong ginapamatud-an sang ila paghimo sing wala sing sadsaran nga mga talaksan. Halimbawa, nagasiling sila, ‘Walay ano man kon ang isa magsumpa sa halaran, apang may obligasyon sia kon magsumpa sia sa bulawan sang templo.’ Paagi sa paghatag sing labi nga pagpadaku sa bulawan sang templo sang sa espirituwal nga kabilihanan sina nga duog sang pagsimba, ginapakita nila ang ila pagkabulag sa moral.

Nian, subong sang ginhimo niya sang una, ginkondenar ni Jesus ang mga Fariseo bangod sang pagpatumbaya sa “mga pagsulundan sang kasuguan nga dalagku pa, ang katarungan kag ang kaluoy kag ang pagtuo” samtang nagahatag sing daku nga igtalupangod sa pagbayad sa ikapulo sang hierba­buena.

Gintawag ni Jesus ang mga Fariseo nga “mga tuytoy nga bulag, nga nagasala sang hamlok kag nagahalunhon sang kamelyo!” Ginasala nila ang hamlok gikan sa ila alak indi bangod isa lamang ini ka insekto kundi bangod ini dimatinlo sa seremonya. Apang, ang pagpabaya nila sa mga pagsulundan sang ­Kasuguan nga dalagku pa ginapaanggid sa paghalunhon sa kamelyo, nga isa man ka dimatinlo nga sapat sa seremonya. Mateo 22:41⁠–⁠23:24; Marcos 12:​35-40; Lucas 20:​41-47; Levitico 11:​4, 21-24.

▪ Ngaa ang mga Fariseo naghipos sang ginpamangkot sila ni Jesus nahanungod sa kon ano ang ginasiling ni David sa Salmo 110?

▪ Ngaa ginpadakuan sang mga Fariseo ang ila mga filacteria kag mga plekos sang ila panapton?

▪ Ano nga laygay ang ginhatag ni Jesus sa iya mga disipulo?

▪ Anong wala sing sadsaran nga mga talaksan ang ginhimo sang mga Fariseo, kag paano sila ginkondenar ni Jesus bangod sang pagpatumbaya sa mga pagsulundan nga dalagku pa?