Bahin 1
Nagaulikid Gid Bala ang Dios sa Aton?
1, 2. Ano ang ginapamangkot sang katawhan nahanungod sa Dios, kag ngaa?
SA ISA ka tion sa imo kabuhi, mahimo nga namangkot ka: ‘Kon may Dios nga nagaulikid gid sa aton, ngaa ginatugutan niya ang daku gid nga pag-antos?’ Kita tanan nakaagi na sing pag-antos ukon may kilala kita nga nakaagi sini.
2 Sa pagkamatuod, sa bug-os nga maragtas ang katawhan nag-antos sing kasakit kag kasubo bangod sang inaway, kapintas, krimen, inhustisya, kaimulon, balatian, kag pagkapatay sang mga hinigugma. Sa aton ika-20 nga siglo lamang, kapin sa 100 milyones ka tawo ang napatay sa mga inaway. Ginatos milyones nga iban pa ang nasamad ukon nadulaan sing mga puluy-an kag mga pagkabutang. Madamo gid sing makahaladlok nga mga butang ang natabo sa aton tion, nga nagresulta sa daku nga kasubo, madamo nga mga luha, kag pagbatyag sing pagkawalaypaglaum sa bahin sang dimaisip nga katawhan.
3, 4. Ano ang pagpati sang madamo nahanungod sa pagtugot sang Dios sa pag-antos?
3 Ang iban nagahinakit kag nagapati nga kon may Dios, wala gid sia nagaulikid sa aton. Ukon mahimo nga nagapati pa gani sila nga wala sing Dios. Halimbawa, ang isa ka tawo nga ginhingabot sang iban nga rasa nga ginbangdan sang kamatayon sang iya mga abyan kag pamilya sa Inaway Kalibutanon I namangkot: “Diin ang Dios sang kinahanglan namon sia?” Ang isa pa, nga nakalampuwas sa minilyon nga ginpatay sang mga Nazi sang Inaway Kalibutanon II, ginsubuan gid sa pag-antos nga iya nakita nga sia nagsiling: “Kon madilapan mo ang akon tagipusuon, mahiluan ka sini.”
4 Sa amo, madamo nga tawo ang indi makahangop kon ngaa ginatugutan sang isa ka maayong Dios nga matabo ang malain nga mga butang. Nagaduhaduha sila kon bala nagaulikid gid sia sa aton ukon nagaluntad gid bala sia. Kag madamo sa ila ang nagapati nga ang pag-antos indi madula tubtob nagakabuhi ang tawo.
[Retrato sa pahina 2, 3]
Malapit na bala ang isa ka bag-ong kalibutan nga wala sing pag-antos?