Bahin 4

Ginapahibalo Kita sang Dios sang Iya mga Katuyuan

1, 2. Paano naton mahibaluan nga ginasabat sang Dios ang sinsero nga mga pamangkot sang mga tawo?

GINAPAHAYAG gid sang isa ka mahigugmaon nga Dios sa sinsero nga mga tawo nga nagapangita sa iya ang iya mga katuyuan. Ginasabat niya ang mga pamangkot sang mga tawo subong sang kon ngaa ginatugutan niya ang pag-antos.

² Ang Biblia nagasiling: “Kon pangitaon mo [ang Dios], magapakita sia sa imo.” “May isa ka Dios sa mga langit nga isa ka Manugpahayag sang mga tinago.” “Ang Soberano nga Ginuong Jehova indi maghimo sing bisan ano nga butang kon indi niya anay mapahayag ang iya tinago sa iya mga alagad nga mga manalagna.”​—⁠1 Cronica 28:​9; Daniel 2:​28; Amos 3:⁠7.

Diin ang mga Sabat?

3. Diin naton mahibal-an kon ngaa ginatugutan sang Dios ang pag-antos?

³ Ang mga sabat sa mga pamangkot subong sang kon ngaa ginatugutan sang Dios ang pag-antos kag kon ano ang iya himuon sa sini masapwan sa rekord nga iya ginbugna para sa aton kaayuhan. Ang rekord amo ang iya Pulong, ang Balaan nga Biblia. “Ang bug-os nga Kasulatan ginbugna sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong, agod nga ang tawo sang Dios mangin sangkol sing lubos, nasangkapan sing bug-os para sa tagsa ka maayong buhat.”​—⁠2 Timoteo 3:​16, 17.

4, 5. Ano ang nagahimo sa Biblia nga isa ka tumalagsahon nga libro?

⁴ Ang Biblia isa matuod ka tumalagsahon nga libro. Nagaunod ini sing labing sibu nga rekord sang maragtas sang tawo kag nagasaysay pa gani sang pagtuga sa mga tawo. Indi man ini ulihi, kay nagatagna ini sang mga nagakatabo sa aton tion kag sa malapit nga palaabuton man.

⁵ Wala na sing iban pa nga libro ang may daku nga pamatuod sa maragtason nga pagkasibu sini. Halimbawa, pila na lamang ka manuskrito sang dumaan nga klasikal nga mga manunulat ang nabilin. Apang madamo nga manuskrito sang Biblia ang nagaluntad pa, ang iban bahin lamang kag ang iban kompleto: mga 6,000 sang Hebreong Kasulatan (ang 39 ka libro sang “Daan nga Testamento”) kag mga 13,000 sang Cristianong Griegong Kasulatan (ang 27 ka libro sang “Bag-o nga Testamento”).

6. Ngaa makapat-od kita nga ang Biblia karon pareho lang sang ginbugna ini sang Dios?

⁶ Ginpat-od sang Labing Gamhanan nga Dios, nga nagbugna sang Biblia, nga ang pagkasibu sang kaundan sini natipigan sa sining mga kopya sang manuskrito. Gani ang aton Biblia sa karon pareho lang sa orihinal nga mga sinulatan nga ginbugna. Ang isa pa ka butang nga nagabulig sa aton sa pag-apresyar sini amo nga ang pila ka kopya sang manuskrito sang Cristianong Griegong Kasulatan ginsulat sa sulod sang isa ka gatos ka tuig sugod sang orihinal nga sinulatan. Ang pila ka kopya sang manuskrito sang dumaan nga sekular nga mga manunulat nga nabilin karon talagsa lang may petsa nga ginsulat sa sulod sang pila ka siglo sugod sang orihinal nga mga awtor.

Dulot sang Dios

7. Daw ano ka daku ang sirkulasyon sang Biblia?

⁷ Ang Biblia amo ang libro nga may pinakadaku nga sirkulasyon sa maragtas. Mga tatlo ka bilyon ka kopya sini ang naimprinta na. Wala sing iban nga libro ang malapit sa sini nga kadamuon. Kag ang Biblia ukon ang mga bahin sini nabadbad na sa mga 2,000 ka hambal. Sa amo, ginabanta nga 98 porsiento sang populasyon sang aton planeta ang makabasa sang Biblia.

8-10. Ano ang pila ka rason kon ngaa ang Biblia takus nga usisaon

⁸ Sa pagkamatuod takus nga usisaon naton ang isa ka libro nga nagapangangkon nga naghalin sa Dios kag may yara sang tanan nga pamatuod sa guwa kag sa sulod tuhoy sa pagkamasaligan sini.⁠a Ginapaathag sini ang katuyuan sang kabuhi, ang kahulugan sang mga kahimtangan sa kalibutan, kag kon ano ang nagahulat sa palaabuton. Wala sing iban nga libro ang makahimo sina.

⁹ Huo, ang Biblia amo ang komunikasyon sang Dios sa pamilya sang tawo. Gintuytuyan niya ang pagsulat sini paagi sa iya aktibo nga kusog, ukon espiritu, kag mga 40 ka tawo ang ginpasulat sini. Sa amo ang Dios nagapakighambal sa aton paagi sa iya Pulong, ang Balaan nga Biblia. Si apostol Pablo nagsulat: “Sang pagbaton ninyo sang pulong sang Dios, nga inyo nabatian sa amon, ginbaton ninyo ini, indi subong pulong sang mga tawo, kundi, subong sa kamatuoran, ang pulong sang Dios.”​—⁠1 Tesalonica 2:⁠13.

¹⁰ Si Abraham Lincoln, ang ika-16 nga presidente sang Estados Unidos, nagtawag sa Biblia “ang labing matahom nga dulot nga nahatag sang Dios sa tawo . . . Kon wala ini indi naton mapatuhay ang husto kag sayop.” Busa karon, ano ang ginasugid sa aton sining superlatibo nga dulot kon paano nagsugod ang pag-antos, kon ngaa gintugutan ini sang Dios, kag kon ano ang himuon niya sa sini?

[Nota]

[Retrato sa pahina 10]

Ang Biblia, nga ginbugna sang Dios, amo ang iya komunikasyon sa pamilya sang tawo