Leksion 5
Ano ang Katuyuan sang Dios Para sa Duta?
Ngaa gintuga ni Jehova ang duta? (1, 2)
Ngaa ang duta indi na karon isa ka paraiso? (3)
Ano ang matabo sa mga tawo nga malauton? (4)
Sa palaabuton, ano ang pagahimuon ni Jesus sa mga masakiton? sa mga tigulang? sa mga patay? (5, 6)
Agod makaambit sa palaabuton nga mga pagpakamaayo, ano ang dapat mo himuon? (7)
1. Gintuga ni Jehova ining duta agod magakabuhi sa sini sing dayon ang mga tawo. Luyag niya nga ang duta pirme pagapuy-an sang matarong, malipayon nga katawhan. (Salmo 115:16; Isaias 45:18) Ang duta indi gid malaglag; magapabilin ini sing dayon.—Salmo 104:5; Manugwali 1:4.
2. Antes ginhimo sang Dios ang tawo, nagpili Sia sing isa ka magamay nga bahin sang duta kag ginhimo ini nga isa ka matahom nga paraiso. Gintawag niya ini nga katamnan sang Eden. Ginbutang niya diri ang nahaunang lalaki kag babayi, si Adan kag si Eva. Gintuyo sang Dios nga manganak sila kag pun-on ang bug-os nga duta. Sing amat-amat nahimo nila kuntani ang bug-os nga duta nga isa ka paraiso.—Genesis 1:28; 2:8, 15.
3. Si Adan kag si Eva nakasala paagi sa hungod nga paglapas sa kasuguan sang Dios. Gani gintabog sila ni Jehova sa katamnan sang Eden. Ang Paraiso nadula. (Genesis 3:1-6, 23) Apang wala ginkalimtan ni Jehova ang iya katuyuan para sa sining duta. Nanaad sia nga himuon ini nga isa ka paraiso, diin magapuyo sa sini sing dayon ang mga tawo. Paano niya ini himuon?—Salmo 37:29.
4. Antes ining duta mangin isa ka paraiso, ang mga tawo nga malauton dapat kuhaon. (Salmo 37:38) Mahanabo ini sa Armagedon, nga amo ang inaway sang Dios agod dulaon ang kalautan. Masunod, si Satanas bilangguon sa 1,000 ka tuig. Nagakahulugan ini nga wala na sing mga malauton nga magadagta sa duta. Ang katawhan lamang sang Dios ang makalampuwas.—Bugna 16:14, 16; 20:1-3.
5. Nian magagahom si Jesucristo subong Hari sa sining duta sa 1,000 ka tuig. (Bugna 20:6) Amat-amat nga dulaon niya ang sala sa aton hunahuna kag lawas. Mangin himpit kita nga mga tawo kaangay ni Adan kag ni Eva antes sila nagpakasala. Nian wala na sing balatian, katigulangon, kag kamatayon. Ang mga masakiton pagaayuhon, kag ang mga tigulang magabata liwat.—Job 33:25; Isaias 33:24; Bugna 21:3, 4.
6. Sa Isa ka Libo ka Tuig nga Paggahom ni Jesus, himuon sang matutom nga mga tawo ang bug-os nga duta nga isa ka paraiso. (Lucas 23:43) Subong man, ang minilyon ka patay pagabanhawon sa duta. (Binuhatan 24:15) Kon himuon nila ang ginapatuman sang Dios sa ila, padayon sila nga magakabuhi sa duta sing dayon. Kon indi, malaglag sila sing dayon.—Juan 5:28, 29; Bugna 20:11-15.
7. Sa amo ang orihinal nga katuyuan sang Dios para sa duta matuman. Luyag mo bala makaambit sa sining palaabuton nga mga pagpakamaayo? Kon amo, dapat mo tun-an sing padayon ang nahanungod kay Jehova kag tumanon ang iya mga ginapatuman. Ang pagtambong sa lokal nga Kingdom Hall sang mga Saksi ni Jehova magabulig sa imo.—Isaias 11:9; Hebreo 10:24, 25.
[Retrato sa pahina 10]
Paraiso nga nadula
[Retrato sa pahina 11]
Pagkatapos sang Armagedon, ang duta pagahimuon nga isa ka paraiso