Kon Ano ang Ginaunod sang Libro
Ang isa ka tawo nga nagasulod sa librarya sa una nga tion mahimo nga magamuhan sa nagainidas nga mga libro. Apang paagi sa diutay nga paathag kon paano naareglar ang mga libro, matun-an niya sa madali kon paano pangitaon ang espesipiko nga mga libro. Sing kaanggid, mas madali makita ang ginapangita mo sa Biblia kon nahangpan mo kon paano naareglar ang kaundan sini.
ANG tinaga nga “Biblia” ginkuha sa Griegong tinaga nga bi·bliʹa, nga nagakahulugan “papiro nga mga rolyo” ukon “mga libro.” Ang Biblia aktuwal nga isa ka koleksion—isa ka librarya—sang 66 ka indibiduwal nga mga libro, nga ginsulat sa sulod sang 1,600 ka tuig, kutob sang 1513 B.C.E. tubtob sang mga 98 C.E.
Ang una nga 39 ka libro, mga tres kuarto sang kaundan sang Biblia, ginatawag nga Hebreong Kasulatan, kay ang kalabanan sini ginsulat sa amo nga lenguahe. Ining mga libro mahimo nga bahinon sa tatlo ka grupo: (1) Maragtason, Genesis tubtob sa Ester, 17 ka libro; (2) Mabinalaybayon, Job tubtob sa Ang Ambahanon ni Solomon, 5 ka libro; kag (3) Matagnaon, Isaias tubtob sa Malaquias, 17 ka libro. Ang Hebreong Kasulatan nagakobre sang maaga nga bahin sang maragtas sang duta kag sang katawhan subong man sang maragtas sang dumaan nga pungsod sang Israel sugod sang matukod ini tubtob sang ikalima nga siglo B.C.E.
Ang nabilin nga 27 ka libro ginatawag nga Cristianong Griegong Kasulatan, kay ginsulat ini sa Griego, ang internasyonal nga lenguahe sadtong adlaw. Naareglar ini suno sa tema: (1) ang 5 ka maragtason nga libro—ang Mga Ebanghelyo kag Mga Binuhatan, (2) ang 21 ka sulat, kag (3) ang Bugna. Ang Cristianong Griegong Kasulatan bug-os nga nagapatuhoy sa mga panudlo kag mga hilikuton ni Jesucristo kag sang iya mga disipulo sang unang siglo C.E.