‘Hatagi sing Igtalupangod Kon Paano Ka Nagapamati’

ANG pagpamati isa ka importante nga bahin sa pagtuon. Makaimpluwensia man ini sa paglaum sang isa ka tawo nga maluwas. Sang naghanda si Jehova nga luwason ang iya katawhan gikan sa pagkaulipon sa Egipto, naghatag sia sing mga instruksion kay Moises, nga nagsugid sa tigulang nga mga lalaki sang Israel kon ano ang ila himuon agod maluwas ang ila mga panganay gikan sa anghel sang kamatayon. (Ex. 12:21-23) Ginpaalinton dayon sang tigulang nga mga lalaki ini nga impormasyon sa tagsa ka panimalay. Ginhimo ini paagi sa hambal. Dapat mamati sing maayo ang mga tawo. Ano ang ila reaksion? Ang Biblia nagasiling: “Ang tanan nga anak sang Israel naghimo suno sa ginsugo ni Jehova kay Moises kag kay Aaron. Amo gid ang ginhimo nila.” (Ex. 12:​28, 50, 51) Subong resulta, naeksperiensiahan sang Israel ang makadalayaw nga kaluwasan.

Sa karon, si Jehova nagahanda sa aton para sa mas daku pa nga kaluwasan. Sa pagkamatuod, ang ginahatag niya nga instruksion nagakinahanglan sang aton daku nga igtalupangod. Ini nga instruksion ginahatag sa mga miting sa kongregasyon. Nagabenepisyo ka bala sing bug-os gikan sa sini nga mga pagtinipon? Nagadepende ini sing daku sa imo pagpamati.

Madumduman mo bala ang dalagku nga mga punto sang instruksion nga ginhatag sa mga miting? Batasan mo bala, kada semana, nga mangita sing mga paagi nga maaplikar sa imo kabuhi ukon mapaambit sa iban ang ginhatag nga instruksion?

Ihanda ang Imo Tagipusuon

Agod makabenepisyo sing bug-os gikan sa pagpanudlo nga ginaaman sa Cristianong mga miting, kinahanglan nga ihanda naton ang aton tagipusuon. Ang importansia sang paghimo sini ginpadaku sang natabo anay sang paggahom ni Hari Josafat sang Juda. Si Josafat maisog nga nanindugan sa matuod nga pagsimba. ‘Ginkuha niya ang mataas nga mga duog kag ang sagrado nga mga poste gikan sa Juda’ kag ginsugo ang mga prinsipe, Levinhon, kag saserdote nga magtudlo sang Kasuguan ni Jehova sa mga tawo sa tanan nga siudad sang Juda. Apang, “ang mataas nga mga duog wala madula.” (2 Cron. 17:6-9; 20:33) Bangod nakapanggamot na gid ang pagsimba sa butig nga mga dios kag ang ginadumilian nga porma sang pagsimba kay Jehova nga ginahimo sa paganong mataas nga mga duog amo nga wala ini madula.

Ngaa ang instruksion nga ginpahamtang ni Josafat wala magdugay? Ang rekord nagpadayon: “Wala pa mahanda sang katawhan ang ila tagipusuon para sa Dios sang ila mga katigulangan.” Nakabati sila apang wala manghikot sing nahisuno. Ayhan nagbatyag sila nga ang pagkadto sa templo sa Jerusalem agod maghalad indi mahapos. Ano man ang kahimtangan, ang ila tagipusuon wala mapahulag sang pagtuo.

Agod malikawan ang pagbalik sa mga dalanon sang kalibutan ni Satanas, dapat ihanda naton ang aton tagipusuon sa pagbaton sing instruksion nga ginahatag ni Jehova karon. Paano? Ang isa ka importante nga paagi amo ang pangamuyo. Dapat kita mangamuyo nga mabaton naton ang panuytoy sang Dios sing mapinasalamaton. (Sal. 27:4; 95:2) Magabulig ini sa aton nga apresyahon ang mga panikasog sang aton mga kauturan nga, bisan dili himpit, nagpagamit sang ila kaugalingon kay Jehova sa pagtudlo sa iya katawhan. Magapahulag ini sa aton nga pasalamatan si Jehova indi lamang tungod sa bag-o nga mga butang nga aton ginatun-an kundi sa kahigayunan man nga magtudok pa ang aton apresasyon sa mga butang nga natun-an naton anay. Bangod sang handum nga himuon sing bug-os ang kabubut-on sang Dios, kita nagapangamuyo: “Tudlui ako, O Jehova, sang imo dalanon. . . . Bug-usa ang akon tagipusuon sa pagkahadlok sa imo ngalan.”​—Sal. 86:11.

Isentro ang Imo Igtalupangod

Madamo sing sablag sa pagpamati naton sing maayo. Mahimo nga ang aton mga hunahuna puno sing mga kabalaka. Ang kagahod kag paghulag sang tumalambong sa sulod ukon sa guwa sang duog tilipunan mahimo makatublag sa aton. Bangod indi komportable, mahimo mabudlay para sa aton nga magkonsentrar. Masami nga nasapwan sang mga may magagmay nga kabataan nga natunga ang ila igtalupangod. Ano ang makabulig sa aton nga masentro gid ang aton igtalupangod sa programa?

Ang mga mata may daku nga bahin sa kon diin naton ginasentro ang aton igtalupangod. Gamita ang imo mga mata agod buligan ka sa pagkonsentrar paagi sa pagtulok sa humalambal. Kon magsambit sia sing isa ka teksto sa Biblia​—bisan pa pamilyar ini—​pangitaa ini, kag sundi ang pagbasa niya sini. Pamatuki ang pagsulay nga magbalikid sa kon diin ang tagsa ka gahod ukon hulag. Kon ang imo mga mata nagapasulod sa imo hunahuna sing nagatublag nga impormasyon, mawasi mo ang daku nga bahin sang ginapresentar sa plataporma.

Kon ginabudlayan ka sa pagkonsentrar sa programa bangod sang bisan ano nga “makatulublag nga mga panghunahuna,” mangamuyo kay Jehova para sa kalmado nga hunahuna kag tagipusuon nga kinahanglan sa pagpamati. (Sal. 94:19; Fil. 4:​6, 7) Sulitsulita ini kon kinahanglan. (Mat. 7:​7, 8) Ang mga miting sa kongregasyon mga aman ni Jehova. Makasalig ikaw nga luyag niya nga makabenepisyo ka sa sini.​—1 Juan 5:​14, 15.

Pagpamati sa mga Pamulongpulong

Mahimo nga madumduman mo ang naluyagan mo gid nga mga punto nga nabatian mo sa mga pamulongpulong. Apang, ang pagpamati sa isa ka pamulongpulong wala lamang nagalakip sang pagtipon sing talalupangdon nga mga punto. Ang isa ka pamulongpulong mapaanggid sa paglakbay. Bisan pa may makawiwili nga mga butang nga makita sa alagyan, ang panguna nga butang amo ang kaladtuan, ang tulumuron. Mahimo ginatinguhaan sang humalambal nga tuytuyan ang tagpalamati sa isa ka konklusion ukon pahulagon sila.

Binagbinaga ang ginpamulongpulong ni Josue sa pungsod sang Israel, nga nasulat sa Josue 24:1-15. Ang iya tulumuron amo nga pahulagon ang mga tawo nga manindugan sing malig-on sa matuod nga pagsimba paagi sa pagpain sing bug-os sang ila kaugalingon gikan sa idolatriya sang mga pungsod sa palibot. Ngaa importante gid yadto? Ang paglapnag sang butig nga pagsimba isa ka daku nga katalagman sa maayo nga tindog sang pungsod kay Jehova. Ang mga tawo nagsabat sa pangabay ni Josue paagi sa pagsiling: “Malayo, sa amon bahin, nga biyaan si Jehova agod mag-alagad sa iban nga mga dios. . . . Alagdon namon si Jehova.” Kag amo gid ang ginhimo nila!​—Jos. 24:​16, 18, 31.

Samtang nagapamati ka sa isa ka pamulongpulong, tilawi nga hantupa ang tulumuron sini. Binagbinaga kon paano ang mga punto nga ginapaguwa sang humalambal nagabulig sa paglab-ot sina nga tulumuron. Pamangkuta ang imo kaugalingon kon ano ang ginapahimo sa imo sang impormasyon.

Pagpamati sa Tion Sang mga Pagbinagbinag

Ang Pagtinuon sa Lalantawan, Pagtinuon sang Kongregasyon sa Libro, kag pila ka bahin sang Miting sa Serbisyo ginadumalahan subong pamangkot-kag-sabat nga pagbinagbinag sang naimprinta nga materyal pasad sa Biblia.

Ang pagpamati sa tion sang pagbinagbinag, sa pila ka kahimtangan, kaanggid sa paghambalanay. Agod makabenepisyo sing bug-os, mamati sing maayo. Talupangda kon diin nagapadulong ang paghambalanay. Talupangda kon paano ginapadaku sang konduktor ang tema kag ang panguna nga mga punto. Sabta sa hunahuna ang iya mga pamangkot. Mamati samtang ginapaathag kag ginaaplikar sang iban ang materyal. Ang pag-usisa sa impormasyon gikan sa pagtamod sang iban mahimo magabulig sa imo nga mahangpan ang isa ka pamilyar nga tema sa tuhay nga anggulo. Makigbahin sa pagbayluhanay sing mga pagtamod paagi sa pagpabutyag sang imo pagtuo.​—Roma 1:12.

Ang abanse nga pagtuon sa gintangdo nga materyal magabulig sa imo nga mangin atentibo sa pagbinagbinag kag masundan ang mga komento sang iban. Kon bangod sa mga sirkumstansia mabudlay para sa imo nga tun-an sing maayo ang materyal, maghinguyang sing bisan pila lang ka minuto agod makuha ang kabilugan nga impormasyon antes sang miting. Ang paghimo sini magabulig sa imo nga makabenepisyo sing daku sa tion sang pagbinagbinag.

Pagpamati sa mga Asambleya kag mga Kombension

Mahimo nga madamo ang tublag sa mga asambleya kag mga kombension sangsa mga miting sa kongregasyon. Bangod sini mas makahalangkat ang pagpamati. Ano ang makabulig sa aton?

Ang isa ka importante nga butang amo ang pagpahuway sing maayo sa gab-i. Antes magsugod ang programa kada adlaw, hupti sa imo hunahuna ang tema. Tan-awa ang tig-ulo sang tagsa ka pamulongpulong, kag hunahunaa kon ano ang mahimo nga ipresentar. Gamita sing maayo ang imo Biblia. Nasapwan sang madamo nga ang pagkuha sing malip-ot nga mga nota sang pangunang mga punto nagabulig sa ila nga magkonsentrar sa programa. Isulat ang mga instruksion nga ginaplano mo nga iaplikar sa imo kabuhi kag ministeryo. Binagbinaga ang pila ka punto samtang nagalakbay ka pakadto kag pauli gikan sa asambleya kada adlaw. Makabulig ini sa imo nga madumduman ang impormasyon.

Hanasa ang Kabataan sa Pagpamati

Ang Cristianong mga ginikanan makabulig sa ila kabataan​—bisan sa mga lapsag​—nga mangin ‘maalam para sa kaluwasan’ paagi sa pagdala sa ila sa mga miting sa kongregasyon, sa mga asambleya, kag sa mga kombension. (2 Tim. 3:15) Bangod nagakalainlain ang panimuot kag kalawigon sang pagkonsentrar sang kabataan, kinahanglan ang paghantop agod mabuligan sila nga makatuon sa pagpamati sing maayo. Mahimo masapwan mo nga makabulig ang masunod nga mga panugda.

Sa puluy-an, magtalana sing tion para sa imo magagmay nga kabataan nga magpungko sing hipos kag magbasa ukon magtan-aw sang mga laragway sa aton Cristianong mga publikasyon. Sa mga miting, indi paghatagi sing mga hampanganan ang magagmay nga kabataan. Subong sang sa dumaan nga Israel, ang magagmay nga mga bata sa karon nagatambong “agod mamati sila kag agod magtuon sila.” (Deut. 31:12) Kon praktikal, ginahatagan sang pila ka ginikanan ang bisan magagmay pa kaayo nga kabataan sang ila kopya sang mga publikasyon nga ginabinagbinag. Samtang nagadaku ang kabataan, buligi sila nga maghanda agod makapakigbahin sa mga programa nga kinahanglan ang pagpakigbahin sang tumalambong.

Ginapakita sang Kasulatan nga may suod nga kaangtanan ang pagpamati kay Jehova kag ang pagtuman sa iya. Makita ini sa mga pulong ni Moises sa pungsod sang Israel: “Ginbutang ko ang kabuhi kag kamatayon sa atubangan mo, ang pagpakamaayo kag pagpakamalaut; kag dapat pilion mo ang kabuhi . . . paagi sa paghigugma kay Jehova nga imo Dios, paagi sa pagpamati sa iya tingog kag paagi sa pag-unong sa iya.” (Deut. 30:​19, 20) Sa karon, ang pagpamati sa instruksion nga ginaaman ni Jehova kag ang pag-aplikar sini sing matinumanon sa aton kabuhi kinahanglanon agod matigayon ang kahamuot sang Dios kag ang pagpakamaayo nga kabuhi nga walay katapusan. Busa, daw ano ka importante nga pamatian naton ang laygay ni Jesus: “Hatagi ninyo sing igtalupangod kon paano kamo nagapamati”!​—Lucas 8:18.