Kapagsik

ANG kapagsik nagabulig agod mangin buhi ang isa ka pamulongpulong. Bisan pa importante nga may impormatibo nga materyal, ang buhi kag mapagsik nga paghambal amo ang nagabulig nga makuha ang igtalupangod sang tagpalamati. Bisan ano man ang imo ginhalinan nga kultura ukon personalidad, mapalambo mo ang kapagsik.

Maghambal Upod ang Balatyagon. Sang nakighambal sa isa ka Samaritana, si Jesus nagsiling nga yadtong nagasimba kay Jehova dapat maghimo sini “sa espiritu kag kamatuoran.” (Juan 4:24) Ang ila pagsimba dapat ginapahulag sang mainapresyahon nga tagipusuon kag dapat suno sa kamatuoran nga masapwan sa Pulong sang Dios. Kon amo sini kadalom ang apresasyon sang isa ka tawo, makita ini sa iya panghambal. Malangkag sia sa pagpakighambal sa iban tuhoy sa mahigugmaon nga mga aman ni Jehova. Ang iya pangguyahon, ang iya mga kumpas, kag ang iya tingog magapabanaag sa kon ano gid ang iya ginabatyag.

Kon amo, ngaa nga ang isa ka humalambal nga nagahigugma kay Jehova kag nagatuo sa iya ginasiling mahimo makulangan sing kapagsik kon nagahambal? Indi pa tuman nga ihanda lamang niya ang iya inughambal. Dapat interesado gid sia sa iya topiko kag nadalahig ang iya emosyon sa sini. Pananglitan gin-asayn sia sa pagpaathag tuhoy sa halad gawad ni Jesucristo. Kon ihatag sang humalambal ang iya pamulongpulong, dapat mapuno ang iya mga hunahuna, indi lamang sang mga detalye, kundi sang apresasyon sa kon ano ang nahimo sang halad ni Jesus sa iya kag sa iya mga tagpalamati. Dapat batyagon niya ang pagpasalamat kay Jehova nga Dios kag kay Cristo Jesus tungod sining dalayawon nga aman. Kinahanglan hunahunaon niya ang makalilipay nga paglaum nga kabuhi nga bukas para sa katawhan​—dayon nga kalipay nga may himpit nga panglawas sa ginpasag-uli nga dutan-on nga paraiso! Sa amo, kinahanglan nga dalahigon niya ang iya tagipusuon.

Tuhoy sa escriba nga si Esdras, nga isa ka manunudlo sa Israel, ang Biblia nagasiling nga ‘ginhanda niya ang iya tagipusuon sa pag-usisa sang kasuguan ni Jehova kag sa paghimo sini kag sa pagtudlo sa Israel.’ (Esd. 7:10) Kon amo man sini ang aton himuon​—nagahanda indi lamang sang impormasyon kundi sang aton man tagipusuon​—​magapamulong kita gikan sa tagipusuon. Ining tinagipusuon nga pagpabutyag sang kamatuoran makabulig gid sa mga tawo nga aton masugilanon nga makapalambo sing matuod nga gugma sa kamatuoran.

Hunahunaa ang Imo mga Tagpalamati. Ang isa pa ka importante nga rason sa pagpakita sing kapagsik amo ang kombiksion nga kinahanglan gid nga mabatian sang imo mga tagpalamati ang imo isiling. Nagakahulugan ini nga kon nagahanda sang imo presentasyon, indi ka lamang dapat magtipon sing mapuslanon nga materyal kundi mangamuyo man ikaw kay Jehova para sa iya panuytoy agod magamit mo ini para sa kaayuhan sadtong imo masugilanon. (Sal. 32:8; Mat. 7:​7, 8) Analisaha kon ngaa kinahanglan mabatian sang imo tagpalamati ang impormasyon, kon paano sila makabenepisyo sa sini, kag kon paano mo ini ipresentar sa paagi nga mahangpan nila ang balor sini.

Ihanda ang imo materyal tubtob may yara na pila ka butang nga ginakalangkagan mo sa sini. Indi kinahanglan nga bag-o ini, apang mahimo mo bag-uhon ang paagi sang pagpresentar mo sang topiko. Kon nagahanda ka sing butang nga magabulig gid sa imo mga tagpalamati agod mapalig-on ang ila kaangtanan kay Jehova, maapresyar ang iya mga aman, malandas sing madinalag-on ang mga pag-ipit sa kabuhi sa sining daan nga sistema, ukon mangin epektibo sa ila ministeryo, nian may rason gid ikaw nga mangin mapagsik sa imo pamulongpulong.

Apang ano abi kon ang imo asaynment amo ang pagbasa sing dayag? Agod mahimo ini nga may kapagsik, indi lamang ang husto nga pagmitlang sang mga tinaga kag ang nagakaigo nga pagprase sini ang kinahanglanon. Tun-i ang materyal. Kon ang basahon mo isa ka bahin sang Biblia, magpanalawsaw sa sini. Pat-ura nga nahangpan mo ang sadsaran nga kahulugan sini. Binagbinaga kon daw ano ini ka mapuslanon sa imo kag sa imo mga tagpalamati, kag basaha ini upod ang handum nga mapaalinton ini sa mga nagapamati sa imo.

Nagahanda ka bala para sa ministeryo sa latagon? Repasuha ang imo topiko nga pagahambalan kag ang mga kasulatan nga ginaplano mo nga gamiton. Binagbinaga man kon ano ang ginahunahuna sang mga tawo. Ano bala ang yara sa mga balita? Ano nga mga problema ang ila ginaatubang? Kon nasangkapan ikaw nga mapakita sa mga tawo nga ang Pulong sang Dios may mga solusyon sa mga problema nga ila ginakabalak-an, malangkag ka nga himuon ini, kag ang kapagsik kinaugali nga nagasunod.

Ipakita ang Kapagsik Paagi sa Buhi nga Paghambal. Ang kapagsik mapakita sing maathag paagi sa imo buhi nga paghambal. Dapat makita ini sa imo pangguyahon. Dapat ikaw kumbinsido kon pamatian, indi dogmatiko.

Kinahanglanon ang pagkabalanse. Ang iban mahimo mahuyog nga magmalangkagon sa bisan ano nga butang. Mahimo kinahanglan nila ang bulig agod mahibaluan nga kon ang isa bombastiko ukon sobra ka emosyonal, mahimo nga sia ang hunahunaon sang iya mga tagpalamati sa baylo sang mensahe. Sa pihak nga bahin, ang mga mahuluy-on nagakinahanglan sang pagpalig-on nga mapabutyag pa ang ila kaugalingon.

Ang kapagsik makalalaton. Kon maayo ang pagpakig-angot mo sa mga tagpalamati kag mapagsik ang imo pamulongpulong, magabatyag man sing kapagsik ang imo mga tagpalamati. Nagpakita sing kapagsik si Apolos sa iya paghambal, kag ginlaragway sia subong maayo nga humalambal. Kon mainit ikaw sa espiritu sang Dios, ang imo mapagsik nga paghambal makapahulag sa mga nagapamati sa imo nga manghikot.​—Binu. 18:​24, 25; Roma 12:11.

Kapagsik nga Nagakaigo sa Materyal. Maghalong nga indi pagpasobrahan ang imo kapagsik sa bug-os mo nga pamulongpulong amo nga mahimo kapuyon ang imo mga tagpalamati. Ang imo pagpalig-on nga iaplikar ang ginabinagbinag pabungulbungulan lamang. Nagapadaku ini sang kinahanglanon nga ihanda ang materyal nga magahatag sing bariedad sa imo paghambal. Tinguhai nga indi maghambal sa paagi nga nagapakita sang pagpasapayan. Kon pilion mo sing maayo ang imo materyal, mangin interesado gid ikaw sa sini. Apang ang pila ka punto kinaugali nga nagakinahanglan sing dugang nga kapagsik sa paghambal sangsa iban, kag dapat ini himuon sing malantipon sa imo pamulongpulong.

Ang panguna nga mga punto ilabi na nga dapat ipresentar sing mapagsik. Ang imo pamulongpulong dapat may talalupangdon gid nga mga bahin nga mangin imo sadsaran. Bangod amo ini ang importante nga mga punto sa imo pamulongpulong, sa masami amo ini ang mga punto nga gindesinyo agod pahulagon ang imo mga tagpalamati. Kon makumbinsi mo na ang imo mga tagpalamati, dapat pahulagon mo sila, ipakita sa ila ang mga benepisyo sang pag-aplikar sa ginhinun-anunan. Ang imo kapagsik magabulig sa imo agod malab-ot ang tagipusuon sang imo mga tagpalamati. Indi gid dapat ipilit ang mapagsik nga pamulongpulong. Dapat may rason sa sini, kag ang imo materyal amo ang magahatag sa imo sina nga rason.