Epektibo nga Pagpakilala sa Kasulatan

ANG instruksion nga ginahatag sa aton mga miting sa kongregasyon ginapasad sa Kasulatan. Ginasentro man naton ang igtalupangod sa mga teksto sa Biblia sa kon ano ang ginasiling naton sa ministeryo sa latagon. Apang, kon daw ano ka daku ang mabulig sini sa aton paghambalanay nagadepende sa pila ka kasangkaron kon daw ano ka epektibo ang pagpakilala sa sini.

Indi lamang ang pagsambit sa kasulatan kag pag-agda sa iban nga basahon ini upod sa imo ang kinahanglan. Kon nagapakilala sang isa ka kasulatan, panikasugi nga himuon ang duha ka tulumuron: (1) Pagpukaw sing kalangkag, kag (2) pagsentro sang igtalupangod sa rason sang paggamit sa teksto. Ini nga mga tulumuron sarang matigayon sa nagkalainlain nga mga paagi.

Mamangkot. Epektibo gid ini kon ang sabat indi pa maathag sa imo mga tagpalamati. Panikasugi nga mamangkot sa paagi nga makapahunahuna sa mga tawo. Ginhimo ini ni Jesus. Sang ginpalapitan sia sang mga Fariseo sa templo kag dayag nga gintilawan ang iya paghangop sa Kasulatan, ginpamangkot sila ni Jesus: “Ano ang ginahunahuna ninyo tuhoy sa Cristo? Kay sin-o sia anak?” Sila nagsabat: “Kay David.” Nian si Jesus namangkot: “Paano, nian, nga si David paagi sa pag-inspirar nagatawag sa iya nga ‘Ginuo’?” Kag sa sini ginkutlo niya ang Salmo 110:1. Naghipos ang mga Fariseo. Apang, ang kadam-an nahamuot sa pagpamati kay Jesus.​—Mat. 22:41-46.

Sa ministeryo sa latagon, mahimo mo gamiton ang mga pamangkot nga nagapakilala sa kasulatan subong sang masunod: “Ikaw kag ako may ngalan. May ngalan man bala ang Dios? Masapwan naton ang sabat sa Salmo 83:18.” “Mahanabo ayhan nga mangin isa ang panguluhan para sa tanan nga tawo? Talupangda kon paano ini ginasabat sa Daniel 2:44.” “Ginabinagbinag gid bala sa Biblia ang mga kahimtangan nga nagaluntad sa aton adlaw? Ipaanggid ang ginasiling sa 2 Timoteo 3:​1-5 sa mga kahimtangan nga pamilyar sa imo.” “Madula pa ayhan ang pag-antos kag kamatayon? Ang sabat sang Biblia masapwan sa Bugna 21:​4, 5.”

Sa isa ka diskurso, ang mahalungon nga paggamit sang mga pamangkot sa pagpakilala sa kasulatan makapahulag sa imo mga tagpalamati nga tan-awon liwat ang mga teksto upod ang interes, bisan ang mga teksto nga pamilyar sa ila. Apang himuon ayhan nila ini? Depende ini sa kon bala ang mga pamangkot nga imo ginapautwas nagadalahig gid sa ila ukon wala. Bisan pa ang topiko makawiwili sa mga tagpalamati, ang ila mga hunahuna mahimo maglagaw kon nagabasa ikaw sang mga teksto nga pirme nila mabatian. Agod indi ini matabo, kinahanglan tun-an mo sing maayo ang topiko agod mangin makagalanyat ang imo presentasyon.

Magpresentar Sang Isa ka Problema. Mahimo ka magpresentar sing isa ka problema kag nian ipatalupangod ang isa ka kasulatan nga may kaangtanan sa solusyon. Indi pagpasaliga ang mga tagpalamati nga magpaabot sing kapin pa sangsa ila makuha. Masunson nga bahin lamang sang solusyon ang ginahatag sang isa ka kasulatan. Apang, mahimo mo pangabayon ang mga tagpalamati nga binagbinagon, samtang ginabasa mo ang teksto, kon ano nga panuytoy ang ginahatag sini sa pag-atubang sang problema.

Sa amo man nga paagi, mahimo mo sambiton ang isa ka prinsipio sang diosnon nga paggawi kag nian gamiton ang isa ka hitabo sa Biblia sa pag-ilustrar sang kaalam sa pagsunod sini. Kon ang kasulatan may yara duha (ukon ayhan kapin pa) ka espesipiko nga mga punto nga may kaangtanan sa ginahambalan, ang pila ka humalambal nagapangabay sa mga tagpalamati nga bantayan ini. Kon ang problema daw tuman kabudlay para sa isa ka grupo sang tagpalamati, sarang mo sila mapahunahuna paagi sa pagpresentar sing pila ka posibilidad kag nian tugutan ang teksto kag ang aplikasyon sini nga maghatag sing sabat.

Patuhuyi ang Biblia Subong Awtoridad. Kon napukaw mo na ang interes sa imo topiko kag nasambit ang isa ukon kapin pa nga pagtamod sa pila ka bahin sini, mahimo mo ipakilala ang kasulatan paagi sa pagsiling lamang: “Talupangda kon ano ang ginasiling sang Pulong sang Dios sa sini nga punto.” Ginapakita sini kon ngaa may awtoridad ang materyal nga imo pagabasahon.

Gingamit ni Jehova ang mga tawo subong nanday Juan, Lucas, Pablo, kag Pedro sa pagsulat sang mga bahin sang Biblia. Apang manunulat lamang sila; si Jehova amo ang Awtor. Ilabi na kon nagapakighambal sa mga tawo nga wala nagatuon sang Balaan nga Kasulatan, ang pagpakilala sa isa ka teksto paagi sa pagsiling nga “si Pedro nagsulat” ukon “si Pablo nagsiling” mahimo nga wala sing puwersa kasubong sang introduksion nga nagapakilala sang teksto subong pulong sang Dios. Talalupangdon nga sa pila ka hitabo, ginsugo ni Jehova si Jeremias nga ipakilala ang proklamasyon paagi sa pagsiling: “Pamatii ang pulong ni Jehova.” (Jer. 7:2; 17:20; 19:3; 22:2) Ginagamit man naton ang ngalan ni Jehova sa pagpakilala sa kasulatan ukon wala, antes naton tapuson ang paghambalanay, dapat panikasugan naton nga ipatalupangod nga ang yara sa Biblia amo ang iya pulong.

Binagbinaga ang Konteksto. Dapat nahibaluan mo ang konteksto kon nagapamat-od sa pagpakilala sang isa ka kasulatan. Sa pila ka hitabo mahimo mo sambiton sing direkta ang konteksto; apang, ang konteksto mahimo mag-apektar sa iban nga mga paagi sa kon ano ang imo ginasiling. Halimbawa, ipakilala mo bala ang pinamulong sang mahinadlukon sa Dios nga si Job sa paagi nga himuon mo sa ginpamulong sang isa sang iya butig nga mga manuglugpay? Ang tulun-an nga Binuhatan ginsulat ni Lucas, apang ginkutlo niya, lakip sa iban, sanday Santiago, Pedro, Pablo, Felipe, Esteban, kag mga anghel, subong man si Gamaliel kag ang iban pa nga mga Judiyo nga indi mga Cristiano. Kay sin-o mo ipatungod ang teksto nga imo ginakutlo? Dumduma, halimbawa, nga indi tanan nga salmo ginkomposo ni David kag indi tanan nga tulun-an sang Hulubaton ginsulat ni Solomon. Mapuslanon man nga mahibaluan kon sin-o ang ginapatuhuyan sang manunulat sang Biblia kag kon ano ang kabilugan nga topiko nga ginabinagbinag.

Gamita ang Impormasyon Tuhoy sa mga Kahimtangan nga Nagdul-ong sa Hitabo. Ilabi na nga epektibo ini kon mapakita mo nga ang mga sirkumstansia nga nagaluntad sa tion sang kasaysayan sa Biblia kaanggid sa mga ginabinagbinag mo. Sa iban nga mga higayon ang impormasyon tuhoy sa mga kahimtangan nga nagdul-ong sa hitabo kinahanglanon agod mahangpan ang isa ka partikular nga teksto. Halimbawa, kon gamiton mo ang Hebreo 9:​12, 24 sa isa ka pamulongpulong tuhoy sa gawad, mahimo kinahanglan nga antes mo basahon ang teksto ipaathag mo anay sing malip-ot ang pinakasulod nga hulot sang tabernakulo, nga, subong sang ginapakita sang kasulatan, nagalaragway sang duog nga ginsudlan ni Jesus sang nagkayab sia sa langit. Apang indi pag-ilakip ang tuman kadamo nga impormasyon amo nga matabunan sini ang teksto nga imo ginapakilala.

Agod mapauswag mo ang pagpakilala sa kasulatan, analisaha ang ginahimo sang eksperiensiado nga mga humalambal. Talupangda ang nagkalainlain nga mga metodo nga ginagamit nila. Analisaha ang pagkaepektibo sini nga mga metodo. Sa paghanda sang imo mga pamulongpulong, kilalaha ang yabi nga mga kasulatan, kag hunahunaa sing maayo kon ano ang tulumuron sang tagsa ka teksto. Planuha sing maayo ang pagpakilala sa tagsa ka kasulatan agod magamit ini sing epektibo gid. Sa ulihi, pasangkara ini paagi sa paglakip sang tanan nga teksto nga imo ginagamit. Samtang nagauswag ang imo presentasyon sa sini nga bahin, mahatagan mo sing daku pa nga igtalupangod ang Pulong sang Dios.