Gahom sa Pag-amlig—“Ang Dios Aton Dalangpan”

1, 2. Ano nga katalagman ang gin-atubang sang mga Israelinhon sang magsulod sila sa rehiyon sang Sinai sang 1513 B.C.E., kag ano ang pasalig ni Jehova sa ila?

ANG mga Israelinhon ara sa katalagman sang magsulod sila sa rehiyon sang Sinai sang 1513 B.C.E. Himuon nila ang makakululba nga pagpanglakaton sa “malapad kag makahaladlok nga kamingawan nga may dalitan nga mga man-og kag mga iwi-iwi.” (Deuteronomio 8:15, Ang Pulong sang Dios, APD) Mahimo man sila salakayon sang kaaway nga mga pungsod. Gindala ni Jehova ang iya katawhan sa sini nga sitwasyon. Bilang Dios nila, maamligan ayhan niya sila?

² Makapasalig gid ang ginsiling ni Jehova: “Nakita gid ninyo ang ginhimo ko sa mga Egiptohanon. Ginhimo ko ini agod madala ko kamo paagi sa mga pakpak sang mga agila kag madala kamo sa akon.” (Exodo 19:4) Ginpahanumdom ni Jehova ang iya katawhan nga ginluwas niya sila sa mga Egiptohanon, nga daw pareho lang nga ginagamit ang mga agila para dalhon sila sa wala sing peligro nga lugar. Pero may iban pa nga mga rason kon ngaa ang “mga pakpak sang mga agila” nagakaigo nga nagailustrar sang pag-amlig sang Dios.

3. Ngaa ang “mga pakpak sang mga agila” nagakaigo nga nagailustrar sang pag-amlig sang Dios?

³ Ginagamit sang agila ang iya malapad kag makusog nga mga pakpak indi lang sa paglupad. Kon ihumlad ang mga pakpak sang agila nagalapad ini sing sobra sa duha ka metro. Kon nagatagiti ang silak sang adlaw, ginahumlad sang iloy nga agila ang iya mga pakpak pareho sang payong, para amligan ang iya maluya nga mga boto sa makapalaso nga silak. Kon kaisa, ginakupkupan sang iya mga pakpak ang iya mga boto para amligan sila sa matugnaw nga hangin. Pareho sa agila nga nagaamlig sa iya mga boto, ginaamligan man ni Jehova ang bag-o pa lang matukod nga pungsod sang Israel. Bisan ara sila sa kamingawan, padayon nga makadangop ang iya katawhan sa landong sang iya gamhanan nga simbuliko nga mga pakpak basta magpabilin sila nga matutom. (Deuteronomio 32:9-11; Salmo 36:7) Pero mapaabot man bala naton nga amligan kita sang Dios subong?

Ang Ginapromisa sang Dios nga Pag-amlig

4, 5. Ngaa makasalig gid kita sa pag-amlig nga ginapromisa sang Dios?

⁴ May ikasarang gid si Jehova nga amligan ang iya mga alagad. Sia ang “Dios nga Labing Gamhanan.” Isa ini ka titulo nga nagapakita nga may ara sia indi madaug nga gahom. (Genesis 17:1) Pareho sang pagtaub nga indi mapunggan, indi man mabalabagan ang gahom ni Jehova. Bangod puede niya mahimo ang bisan ano nga gusto niya, posible mamangkot kita, ‘Kabubut-on bala ni Jehova nga gamiton ang iya gahom sa pag-amlig sa iya katawhan?’

⁵ Huo! Ginapasalig kita ni Jehova nga amligan niya ang iya katawhan. “Ang Dios aton dalangpan kag kusog, handa gid sia nga magbulig sa tion sang kalisdanan,” siling sang Salmo 46:1. Bangod “indi makabutig” ang Dios, makasalig gid kita sa pag-amlig nga ginapromisa niya. (Tito 1:2) Tan-awon naton kon paano ginapakita ni Jehova nga amligan niya ang iya katawhan.

6, 7. (a) Sang panahon sang Biblia, paano ginaamligan sang manugbantay ang iya mga karnero? (b) Paano ginailustrar sang Biblia nga gusto gid ni Jehova nga amligan kag atipanon ang iya mga karnero?

⁶ Si Jehova ang aton Manugbantay, kag “kita ang iya katawhan kag ang karnero sang iya halalban.” (Salmo 23:1; 100:3) Ang pila ka sapat pareho sang hinuptanan nga mga karnero, indi makapangapin sang ila kaugalingon. Ang manugbantay sang mga karnero sang panahon sang Biblia dapat mangin maisog para maamligan ang iya mga karnero sa mga leon, lobo, oso, kag sa mga kawatan. (1 Samuel 17:34, 35; Juan 10:12, 13) Pero kon kaisa, ang pag-amlig sa mga karnero nagakinahanglan sing pagpalangga. Kon ang isa ka karnero nagbata malayo sa toril, ginabantayan sang mapinalanggaon nga manugbantay ang iloy sa mga tion nga nagakinahanglan ini sing bulig. Dayon ginakuha niya ang wala pa sing mahimo nga kordero para dal-on sa toril.

⁷ Paagi sa pagkumparar sang iya kaugalingon sa isa ka manugbantay sang karnero, ginapasalig kita ni Jehova nga gusto gid niya nga amligan kita. (Ezequiel 34:11-16) Dumduma ang ginsiling parte kay Jehova sa Isaias 40:11, nga ginbinagbinag sa Kapitulo 2 sini nga libro: “Kaangay sang manugbantay sang karnero atipanon niya ang iya panong. Paagi sa iya butkon tipunon niya ang mga kordero, kag dalhon niya sila sa iya dughan.” Paano ang gamay nga kordero makalab-ot sa “dughan” sang manugbantay, ukon ang pilo sa iya naibabaw nga bayo? Mahimo magpalapit ang kordero sa manugbantay, kag magsag-idsag-id pa gani sa iya tiil. Pero ang manugbantay amo ang dapat magduko, maghakwat sa kordero, kag hinayhinay nga ibutang ini sa pilo sa iya dughan para maamligan ini. Mapinalanggaon gid ini nga pagpakita sang kahanda sang aton Daku nga Manugbantay para bantayan kag amligan kita!

8. (a) Sin-o ang ginpromisahan sang Dios nga amligan niya, kag paano ini ginapakita sa Hulubaton 18:10? (b) Paano makadangop sa ngalan sang Dios?

⁸ May kondisyon ang ginapromisa sang Dios nga pag-amlig, kag mabaton lang ini sang mga nagapalapit sa iya. Ang Hulubaton 18:10 nagasiling: “Ang ngalan ni Jehova isa ka torre nga mabakod. Ang matarong nagadalagan sa sini kag ginaamligan.” Sang panahon sang Biblia, ang mga torre ginpatindog kon kaisa sa kamingawan para mangin dalangpan kon may katalagman. Pero responsibilidad sang isa nga ara sa katalagman nga magdangop sa sini nga torre para maamligan sia. Pareho man sina ang pagdangop sa ngalan sang Dios. Indi lang ini pagsulit sa ngalan sang Dios, kay ang ngalan sang Dios indi anting-anting. Kundi, dapat naton makilala kag saligan ang Tag-iya sini nga ngalan kag magkabuhi base sa iya matarong nga mga talaksan. Mainayuhon gid si Jehova kay nagpromisa sia sa aton nga kon magsalig kita sa iya amligan niya kita, nga daw pareho nga ara kita sa isa ka mabakod nga torre!

“Maluwas Kami sang Amon Dios”

9. Ngaa masiling naton nga wala lang nagapromisa si Jehova sing pag-amlig?

⁹ Wala lang nagapromisa si Jehova sing pag-amlig. Sang panahon sang Biblia, ginpakita niya paagi sa mga milagro nga may ikasarang sia sa pag-amlig sa iya katawhan. Sa tion sang kasaysayan sang Israel, ang gamhanan nga “kamot” ni Jehova masami nga nagpugong sa gamhanan nga mga kaaway. (Exodo 7:4) Pero, gingamit man ni Jehova sa mga indibiduwal ang iya gahom sa pag-amlig.

10, 11. Ano nga mga halimbawa sa Biblia ang nagapakita kon paano gingamit ni Jehova ang iya gahom sa pag-amlig sa mga indibiduwal?

¹⁰ Sang ang tatlo ka pamatan-on nga Hebreo, nga kilala man nga sanday Sadrac, Mesac, kag Abednego, wala magyaub sa bulawan nga estatwa ni Hari Nabocodonosor, ginpahog sila sang akig nga hari nga ihaboy sila sa ginpainit gid nga hurno. “Sin-o nga dios ang makaluwas sa inyo sa akon kamot?” pagpangyaguta ni Nabocodonosor, ang pinakagamhanan nga hari sa duta sadto. (Daniel 3:15) Ang tatlo ka pamatan-on nga lalaki nagsalig gid sa gahom sang ila Dios sa pag-amlig sa ila, bisan wala sila kabalo kon himuon gid niya ini. Gani, nagsabat sila: “Kon ihaboy kami sa hurno, maluwas kami sang amon Dios nga amon ginaalagad.” (Daniel 3:17) Ang matuod, ang nagadabadaba nga hurno, bisan pa painiton sing pito ka beses sangsa normal nga kainiton sini, indi problema sa ila labing gamhanan nga Dios. Gin-amligan gid man sila, kag napilitan ang hari sa pagkilala: “Wala sing iban nga dios nga makaluwas pareho sini.”—Daniel 3:29.

¹¹ Talalupangdon man nga ginpakita ni Jehova ang iya gahom sa pag-amlig sang ginsaylo niya ang kabuhi sang iya bugtong nga Anak sa taguangkan sang Judiyo nga birhen nga si Maria. Ginsugiran sang isa ka anghel si Maria nga ‘magabusong sia kag magabun-ag sing isa ka anak nga lalaki.’ Nagsiling ang anghel: “Ang balaan nga espiritu magaabot sa imo, kag ang gahom sang Labing Mataas magalikop sa imo.” (Lucas 1:31, 35) Sa sina nga tion kinahanglan gid sang Anak sang Dios ang pag-amlig. Mahalitan bala ining wala pa matawo nga bata kay ang iya iloy makasasala kag indi perpekto? Mahalitan bala ukon mapatay ni Satanas ini nga Anak antes ini matawo? Indi gid ina matabo! Daw pareho lang nga naghimo si Jehova sing isa ka nagaamlig nga pader sa palibot ni Maria. Ginhimo ini ni Jehova para halin sang ginpanamkon ining wala pa matawo nga bata indi ini mahalitan bisan pa indi perpekto ang iloy, ukon bisan pa may makahalalit nga puersa, ukon may manugpatay nga tawo, ukon mga demonyo. Padayon nga gin-amligan ni Jehova si Jesus sang pamatan-on pa sia. (Mateo 2:1-15) Samtang wala pa ang tion nga gintalana sang Dios, wala sing makatandog sa iya pinalangga nga Anak.

12. Ngaa gin-amligan ni Jehova paagi sa milagro ang pila ka indibiduwal sang panahon sang Biblia?

¹² Ngaa gin-amligan ni Jehova ang pila ka indibiduwal paagi sa milagro? Sa madamo nga beses, gin-amligan ni Jehova ang mga indibiduwal para amligan ang butang nga mas importante: ang katumanan sang iya katuyuan. Halimbawa, kinahanglan gid nga maluwas ang lapsag nga si Jesus para matuman ang katuyuan sang Dios, nga sa ulihi magahatag sing benepisyo sa tanan nga tawo. Ang rekord parte sa madamo nga pagpakita sang gahom sa pag-amlig bahin sang inspirado nga Kasulatan nga “ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.” (Roma 15:4) Huo, ining mga halimbawa nagapalig-on sang aton pagtuo sa labing gamhanan nga Dios. Pero ano nga pag-amlig ang mapaabot naton subong halin sa Dios?

Amligan Bala Kita sang Dios sa Tanan nga Tion?

13. Obligado bala si Jehova nga maghimo sing mga milagro para sa aton? Ipaathag.

¹³ Ang ginpromisa nga pag-amlig sang Dios wala nagakahulugan nga obligado si Jehova sa paghimo sing mga milagro para sa aton. Ang Dios wala nagagarantiya sang kabuhi nga wala sing problema sa sining daan nga sistema. Madamo nga matutom nga alagad ni Jehova ang nagaatubang sing grabe nga mga kabudlayan, lakip ang kapigaduhon, inaway, balatian, kag kamatayon. Maathag nga ginsugiran ni Jesus ang iya mga disipulo nga ang iban sa ila posible nga patyon bangod sang ila pagtuo. Gani nagsiling si Jesus nga kinahanglan sila magbatas asta sa katapusan. (Mateo 24:9, 13) Kon gamiton ni Jehova ang iya gahom sa pagluwas paagi sa milagro sa tanan nga tion, sigurado nga yagutaon ni Satanas si Jehova kag duhaduhaan kon bala matuod ang aton debosyon sa aton Dios.—Job 1:9, 10.

14. Ano nga mga halimbawa ang nagapakita nga indi sa tanan nga tion ginaamligan ni Jehova ang tanan niya nga alagad sa pareho nga paagi?

¹⁴ Bisan sang panahon sang Biblia, wala gingamit ni Jehova ang iya gahom sa pag-amlig para proteksionan ang kada isa sa iya mga alagad sa kamatayon. Halimbawa, si apostol Santiago ginpatay ni Herodes sang mga 44 C.E. Pero, wala madugay pagkatapos sini, ginluwas si Pedro “sa kamot ni Herodes.” (Binuhatan 12:1-11) Kag nangin mas malawig pa ang kabuhi ni Juan nga utod ni Santiago sangsa kay Pedro kag kay Santiago. Maathag nga indi naton mapaabot nga amligan sang aton Dios ang tanan niya nga alagad sa pareho nga paagi. Isa pa, “ang tion kag ang wala ginapaabot nga hitabo” nagakatabo sa aton tanan. (Manugwali 9:11) Gani, paano kita ginaamligan ni Jehova subong?

Si Jehova Nagaamlig sa Aton sa Pisikal

15, 16. (a) Ano ang ebidensia nga ginaamligan ni Jehova sa pisikal ang iya mga sumilimba bilang isa ka grupo? (b) Ngaa sigurado kita nga amligan ni Jehova ang iya mga alagad subong kag sa tion sang “dakung kapipit-an”?

¹⁵ Binagbinaga anay ang parte sa pag-amlig sa pisikal. Bilang mga sumilimba ni Jehova, mapaabot naton ini nga pag-amlig bilang isa ka grupo. Kay kon wala ini, madali kita mabiktima ni Satanas. Hunahunaa ini: Gusto gid ni Satanas nga “manuggahom sini nga kalibutan,” nga dulaon ang matuod nga pagsimba. (Juan 12:31; Bugna 12:17) Gindumilian sang pila ka gamhanan gid nga mga gobierno sa duta ang aton pagbantala nga hilikuton kag nagtinguha nga dulaon ang tanan nga nagasimba kay Jehova. Pero, ang mga alagad ni Jehova nagapabilin nga malig-on kag wala nagauntat sa pagbantala! Ngaa wala mapauntat sang gamhanan nga mga pungsod ang hilikuton sining diutay lang kag daw wala sing mahimo nga grupo sang mga Cristiano? Bangod ginaamligan sila ni Jehova sang iya gamhanan nga mga pakpak!—Salmo 17:7, 8.

¹⁶ Amligan bala kita ni Jehova sa pisikal sa tion sang nagapakari nga “dakung kapipit-an”? Indi naton dapat kahadlukan ang paghukom sang Dios. Kay man, “nakahibalo si Jehova kon paano luwason sa pagtilaw ang mga tawo nga may diosnon nga debosyon, kag nakahibalo man sia kon paano itigana sa kalaglagan ang indi matarong nga mga tawo sa adlaw sang paghukom.” (Bugna 7:14; 2 Pedro 2:9) Samtang wala pa ini, duha ka butang ang pirme naton masigurado. Una, indi gid magtugot si Jehova nga maubos sa duta ang iya matutom nga mga alagad. Ikaduha, ang mga nagapabilin nga matutom padyaan niya sing kabuhi nga wala sing katapusan sa iya matarong nga bag-ong kalibutan. Kon mapatay gid man ang iya alagad, amligan niya sia paagi sa pagkabanhaw. Gani bisan ang mga napatay, sigurado nga maamligan kay dumdumon sila sang Dios.—Juan 5:28, 29.

17. Paano si Jehova nagaamlig sa aton paagi sa iya Pulong?

¹⁷ Bisan subong, ginaamligan kita ni Jehova paagi sa iya buhi nga “pulong.” Makabulig ini sa aton nga maghimo sang daku nga pagbag-o sa aton kabuhi kag mangin malipayon. (Hebreo 4:12) Paagi sa pag-aplikar sang mga prinsipio sini, maamligan kita sa mga butang nga makahalit sa aton kabuhi. “Ako si Jehova . . . nagatudlo sa imo para sa imo kaayuhan,” siling sang Isaias 48:17. Indi maduhaduhaan nga ang pagkabuhi nahisanto sa Pulong sang Dios makapanami sang aton panglawas kag makapalawig sang aton kabuhi. Halimbawa, ginaaplikar naton ang laygay sang Biblia nga likawan ang seksuwal nga imoralidad kag tinluan ang aton kaugalingon sa kahigkuan. Gani ginalikawan naton ang indi matinlo nga mga buhat kag makahalalit nga mga bisyo nga nagaguba sang kabuhi sang madamo nga indi diosnon nga mga tawo. (Binuhatan 15:29; 2 Corinto 7:1) Nagapasalamat gid kita sa pag-amlig sang Pulong sang Dios!

Si Jehova Nagaamlig sa Aton sa Espirituwal

18. Ano nga espirituwal nga pag-amlig ang ginahatag ni Jehova sa aton?

¹⁸ Ang pinakaimportante, si Jehova nagahatag sing espirituwal nga pag-amlig. Ang aton mahigugmaon nga Dios nagaamlig sa aton sa espirituwal nga halit paagi sa paghatag sang aton kinahanglanon para mabatas ang mga pagtilaw kag para indi maguba ang aton kaangtanan sa iya. Sa sini nga paagi, ginabuligan kita ni Jehova para maamligan ang aton kabuhi, indi lang sing pila ka tinuig kundi sing wala katapusan. Binagbinaga ang pila sa mga ginahatag sang Dios nga makaamlig sa aton sa espirituwal.

19. Paano ang espiritu ni Jehova makabulig sa aton sa pag-atubang sang bisan ano nga pagtilaw?

¹⁹ Si Jehova amo ang “Manugpamati sang pangamuyo.” (Salmo 65:2) Kon ang mga kabudlayan sa kabuhi daw indi na masarangan, ang pagsugid kay Jehova sang aton ginabatyag makapaumpaw gid sa aton. (Filipos 4:6, 7) Posible nga indi niya pagdulaon ang mga pagtilaw paagi sa milagro. Pero bilang sabat sa aton tinagipusuon nga mga pangamuyo, makahatag sia sa aton sing kaalam kon paano ini atubangon. (Santiago 1:5, 6) Dugang pa, si Jehova nagahatag sing balaan nga espiritu sa mga nagapangayo sa iya sini. (Lucas 11:13) Ining gamhanan nga espiritu makabulig sa aton nga maatubang ang bisan ano nga pagtilaw ukon problema. Makahatag ini sa aton sing “gahom nga labaw sa kinaandan” para makabatas asta nga dulaon na ni Jehova ang tanan nga problema sa bag-o nga kalibutan nga malapit na gid.—2 Corinto 4:7.

20. Paano ginagamit ni Jehova ang aton mga kauturan para amligan kita?

²⁰ Kon kaisa, ginagamit ni Jehova ang aton mga kauturan para amligan kita. Gintipon ni Jehova ang iya mga alagad bilang mag-ulutod sa bilog nga kalibutan. (1 Pedro 2:17; Juan 6:44) Nagapalanggaanay ang mga kauturan, gani nakita naton ang buhi nga ebidensia sang gahom sang balaan nga espiritu sang Dios. Ginaimpluwensiahan sini ang mga tawo nga maghimo sang maayo. Ini nga espiritu nagabulig sa aton nga mapakita ang matahom kag manami nga mga kinaiya lakip ang gugma, maayo nga kabubut-on, kag kaayo. (Galacia 5:22, 23) Gani, kon ginabudlayan kita kag may isa ka utod nga naglaygay ukon nagpalig-on sa aton, pasalamatan naton si Jehova kay ginapabatyag niya sa aton nga ginaamligan niya kita.

21. (a) Ano nga sibu sa tion nga espirituwal nga pagkaon ang ginahatag ni Jehova paagi sa “matutom kag mainandamon nga ulipon”? (b) Paano ka nakabenepisyo sing personal sa mga ginhatag ni Jehova para amligan kita sa espirituwal?

²¹ May ginahatag pa si Jehova para amligan kita: ang sibu sa tion nga espirituwal nga pagkaon. Para buligan kita nga makabaton sing kusog halin sa iya Pulong, ginsugo ni Jehova “ang matutom kag mainandamon nga ulipon” sa paghanda sing espirituwal nga pagkaon. Ining matutom nga ulipon nagagamit sing naimprinta nga mga publikasyon, lakip ang mga magasin nga Ang Lalantawan kag Magmata! Ginagamit man sini nga ulipon ang aton jw.org nga website, mga miting, mga asembleya, kag mga kombension sa paghatag sa aton sing “pagkaon sa nagakaigo nga tion.” Ginahatag nila kon ano ang aton kinahanglan, kag kon san-o naton ini kinahanglan. (Mateo 24:45) May nabatian ka na bala sa isa ka Cristianong miting, sa komento, sa pamulongpulong, ukon sa pangamuyo pa gani nga nagpabakod kag nagpalig-on sa imo? Nangin mas maayo bala ang imo kabuhi bangod sa isa ka artikulo nga nabasahan mo sa aton mga magasin? Dumduma, ginahatag ini tanan ni Jehova para amligan kita sa espirituwal.

22. Sa ano nga paagi ginagamit pirme ni Jehova ang iya gahom, kag ngaa ang paghimo niya sini para gid sa aton kaayuhan?

²² Si Jehova isa gid ka taming “sa tanan nga nagadangop sa iya.” (Salmo 18:30) Nabal-an naton nga wala niya ginagamit ang iya gahom para amligan kita sa tanan nga kalamidad subong. Pero, ginagamit niya pirme ang iya gahom sa pag-amlig para sigurado nga matuman ang iya katuyuan. Bangod sini, mangin maayo gid ang palaabuton sang iya mga alagad. Kon magpalapit kita sa iya kag magpabilin sa iya gugma, hatagan kita ni Jehova sing perpekto kag wala sing katapusan nga kabuhi. Bangod may amo kita sini nga paglaum, kabay nga kabigon naton nga “umalagi kag mamag-an” ang bisan ano nga pag-antos sa sini nga sistema.—2 Corinto 4:17.