“Sia ang Una nga Naghigugma sa Aton”

1-3. Ano ang pila ka rason kon ngaa ang kamatayon ni Jesus indi pareho sa kamatayon sang bisan sin-o sa kasaysayan?

HALOS 2,000 ka tuig na ang nagligad, may isa ka tawo nga wala sing sala nga ginbista, ginsentensiahan sa mga krimen nga wala gid niya mahimo, kag dayon ginpaantos asta mapatay. Indi ini ang una nga mapintas kag indi makatarunganon nga pagpatay nga natabo sa kasaysayan, kag makapasubo, nga indi ini ang katapusan. Pero, ini nga kamatayon indi pareho sa iban nga kamatayon.

² Samtang nagatagumatayon ini nga tawo, may indi kinaandan nga natabo sa langit. Gani narealisar sang mga tawo nga importante gid ini nga adlaw. Bisan pa udtong-adlaw sadto, gulpi lang nagdulom nga daw gab-i na. Base sa isa ka historian, “ang adlaw wala nagsilak.” (Lucas 23:44, 45) Dayon, antes mabugtuan sang ginhawa ang tawo, ginhambal niya ining indi malipatan nga mga tinaga: “Natuman na!” Dalayawon gid ang nahimo sini nga tawo paagi sa paghalad sang iya kabuhi. Kay man, ang iya halad amo ang pinakadaku nga pagpakita sang gugma nga nahimo sang isa ka tawo.—Juan 15:13; 19:30.

³ Kabalo kita nga ato nga tawo amo si Jesucristo. Madamo nga tawo sa bilog nga kalibutan ang nakahibalo parte sa pag-antos kag kamatayon ni Jesus sa sinang masubo nga adlaw, Nisan 14, 33 C.E. Pero, may isa ka importante nga kamatuoran nga wala nila napensaran. Bisan pa grabe ang pag-antos ni Jesus, may isa nga nag-antos sing sobra pa. Ang matuod, may isa nga naghimo sing mas daku nga halad sadto nga adlaw, ang pinakadaku nga pagpakita sang gugma nga nahimo sang isa sa uniberso. Ano ang ginhimo niya? Ang sabat sa sini nga pamangkot nagatudlo sa aton sang pinakaimportante nga kinaiya ni Jehova, ang iya gugma.

Ang Pinakadaku nga Pagpakita sang Gugma

4. Paano nabal-an sang isa ka Romano nga soldado nga si Jesus indi isa ka ordinaryo nga tawo, kag ano ang narealisar sadto nga soldado?

⁴ Ang Romano nga senturion nga nagdumala sang pagpatay kay Jesus natingala gid sa pagdulom sang palibot antes mapatay si Jesus kag sa mabaskog nga linog nga natabo pagkatapos sia mapatay. “Matuod gid nga sia amo ang Anak sang Dios,” siling niya. (Mateo 27:54) Maathag nga si Jesus indi ordinaryo nga tawo. Ato nga soldado nakabulig sa pagpatay sa bugtong nga Anak sang Labing Mataas nga Dios! Daw ano gid bala ka palangga sang Amay ang iya Anak?

5. Paano mailustrar ang malawig nga tion nga pag-updanay ni Jehova kag sang iya Anak sa langit?

⁵ Ginatawag sang Biblia si Jesus nga “ang panganay sa tanan nga tinuga.” (Colosas 1:15) Pensara ini, ang Anak ni Jehova nagakabuhi na sa wala pa ang pisikal nga uniberso. Kon amo, daw ano ka dugay nga nag-updanay ang Amay kag ang Anak? Ginabulubanta sang iban nga scientist nga ang uniberso nagaedad sing 13 ka bilyon ka tuig. Maimadyin mo bala kon daw ano kalawig ina nga tion? Para buligan ang mga tawo nga maintiendihan ang edad sang uniberso base sa pagbulubanta sang mga scientist, naghimo ang isa ka planetarium sing time line nga 110 ka metro ang kalabaon. Samtang nagaagi ang mga bisita sa sini nga time line, ang kada tikang nagarepresentar sing mga 75 ka milyon ka tuig sa kabuhi sang uniberso. Sa punta sang time line, ang bilog nga kasaysayan sang tawo ginarepresentar sang marka nga pareho lang kanipis sa isa ka nahot sang buhok sang tawo! Pero, bisan pa insakto ini nga pagbulubanta, indi gihapon matakus sining bilog nga time line ang kalawigon sang kabuhi sang Anak ni Jehova! Ano ang iya ginhimo sa sulod sadtong malawig gid nga tion?

6. (a) Ano ang ginhimo sang Anak ni Jehova sang tion nga wala pa sia mangin tawo? (b) Ano nga klase sang relasyon ang ara kay Jehova kag sa iya Anak?

⁶ Ang Anak malipayon nga nag-alagad bilang “batid nga manugpangabudlay” sang iya Amay. (Hulubaton 8:30) Ang Biblia nagasiling: “Wala sing bisan isa ka butang nga nagluntad nga indi paagi sa [Anak].” (Juan 1:3) Gani nagbuligay si Jehova kag ang iya Anak sa pagtuga sang tanan nga iban pa nga butang. Malipayon gid sila sa pag-updanay sa pag-obra! Subong, madamo ang magaugyon nga ang gugma sang ginikanan kag sang iya anak mabakod gid. Kag ang gugma amo “ang himpit nga higot sang paghiusa.” (Colosas 3:14) Gani, sin-o sa aton ang makahangop sa mabakod nga relasyon nga nagdugay sa malawig gid nga tion? Maathag nga si Jehova nga Dios kag ang iya Anak ginahiusa sang pinakamabakod nga higot sang gugma.

7. Sang magpabawtismo si Jesus, paano ginpakita ni Jehova ang iya ginabatyag sa iya Anak?

⁷ Bisan pa sini, ginpadala sang Amay ang iya Anak sa duta para matawo bilang isa ka bata. Nagakahulugan ini nga sa sulod sang pila ka dekada, indi makaupod sing suod ni Jehova ang iya hinigugma nga Anak sa langit. Pero nalipay gid sia magtan-aw halin sa langit samtang nagadaku si Jesus nga isa ka perpekto nga tawo. Sa edad nga mga 30 anyos, nagpabawtismo si Jesus. Ano ang ginbatyag ni Jehova para sa iya Anak? Ang Amay mismo naghambal halin sa langit: “Ini ang akon Anak, ang hinigugma, nga ginakahamut-an ko.” (Mateo 3:17) Bangod matutom nga ginhimo ni Jesus ang tanan nga gintagna, kag ang tanan nga ginpahimo sa iya, sigurado nga nalipay gid ang iya Amay!—Juan 5:36; 17:4.

8, 9. (a) Ano ang ginhimo kay Jesus sang Nisan 14, 33 C.E., kag paano naapektuhan ang iya Amay sa langit? (b) Ngaa gintugutan ni Jehova ang iya Anak nga mag-antos kag mapatay?

⁸ Pero, ano ang ginbatyag ni Jehova sang Nisan 14, 33 C.E.? Ano ang ginbatyag niya sang ginluiban si Jesus kag dayon gindakop sang akig nga grupo sang mga tawo sadto nga gab-i? Sang si Jesus ginbiyaan sang iya mga abyan kag ginbista sing indi makatarunganon? Sang ginpakalain sia, ginduplaan, kag ginsumbag? Sang ginlatigo sia asta magkalapilas kag magdulugo ang iya likod? Sang ginlansang ang iya mga kamot kag mga tiil sa isa ka kahoy nga usok kag ginpabay-an didto samtang ginapasipalahan sia sang mga tawo? Ano ang ginbatyag sang Amay sang ang iya hinigugma nga Anak nagpanawag sa iya nga nagaantos sa kasakit? Ano ang ginbatyag ni Jehova sang mabugtuan sang ginhawa si Jesus, kag sa una nga tion halin sa ginsuguran sang pagpanuga, ang Iya pinalangga nga Anak napatay?—Mateo 26:14-16, 46, 47, 56, 59, 67; 27:38-44, 46; Juan 19:1.

⁹ Indi gid naton mapaathag paagi sa tinaga ang kasakit nga ginabatyag ni Jehova samtang ginatan-aw niya ang iya Anak nga nagaantos kag mapatay. Ang maintiendihan lang naton amo ang motibo kon ngaa gintugutan ni Jehova nga matabo ini. Ngaa gintugutan sang Amay ang iya kaugalingon nga magbatyag sini? May ginasugid sa aton si Jehova sa Juan 3:16. Isa ini ka bersikulo sa Biblia nga importante gid gani gintawag ini nga gamay nga Ebanghelyo. Ini nagasiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” Gani ang motibo ni Jehova amo ang gugma. Ang regalo ni Jehova, ang pagpadala niya sang iya Anak para mag-antos kag mapatay para sa aton, amo ang pinakadaku nga pagpakita sang gugma.

Kon Ano ang Gugma sang Dios

10. Ano ang kinahanglanon sang tawo, kag ano ang natabo sa kahulugan sang tinaga nga “gugma”?

¹⁰ Ano ang kahulugan sining tinaga nga “gugma”? Ginasiling nga ang gugma amo ang pinakadaku nga kinahanglanon sang tawo. Halin sa pagkabun-ag asta sa kamatayon, ang mga tawo gusto gid nga higugmaon, nagakalipay kon may nagahigugma sa ila, nagaluya kag nagakapatay pa gani kon wala sang may nagapalangga sa ila. Pero, mabudlay ipaathag kon ano gid ini. Pirme ginaistoryahan sang mga tawo ang parte sa gugma. Madamo ang ginsulat nga mga libro, mga kanta, kag mga binalaybay parte sa sini. Pero wala gihapon ini nakabulig para maintiendihan kon ano gid ang kahulugan sang gugma. Nasobrahan na ang paggamit sa sini nga tinaga amo nga ang matuod nga kahulugan sini daw mas nagburon pa gid.

11, 12. (a) Paano kita ginatudluan sang Biblia parte sa kon ano ang gugma? (b) Ano nga mga klase sang gugma ang espesipiko nga ginsambit sa Griego nga lenguahe sang una, kag ano nga tinaga para sa “gugma” ang masami gid nga ginagamit sa Cristianong Griegong Kasulatan? (Tan-awa man ang footnote.) (c) Ano nga kahulugan sang tinaga nga a·gaʹpe ang pirme ginapakita sang Kasulatan?

¹¹ Pero, maathag nga ginatudlo sang Biblia kon ano ang gugma. Ang Vine’s Expository Dictionary of New Testament Words nagasiling: “Ang gugma makilala lang paagi sa iya mga binuhatan.” Ang rekord sang Biblia parte sa mga ginhimo ni Jehova madamo gid sang ginatudlo sa aton parte sa iya gugma kag sa iya kaayo sa iya mga tinuga. Halimbawa, hunahunaa ang pinakadaku nga pagpakita ni Jehova sang iya gugma, nga amo ang paghatag sang iya Anak para sa aton. Sigurado nga wala na sang mas maayo pa nga paagi nga matudluan kita parte sa gugma sangsa sina. Sa masunod nga mga kapitulo, makita naton ang madamo pa nga halimbawa sang gugma ni Jehova paagi sa iya mga ginhimo. Dugang pa, may matun-an kita halin sa orihinal nga mga tinaga nga gingamit para sa “gugma” nga ginagamit sa Biblia. Sa Griego nga lenguahe sang una, may apat ka tinaga para sa “gugma.”a Kag ang isa nga masami nga gingamit sa Cristianong Griegong Kasulatan amo ang a·gaʹpe. Ginatawag ini sang isa ka diksionaryo parte sa Biblia nga “pinakagamhanan nga tinaga nga maimadyin para sa gugma.” Ngaa?

¹² Base sa paggamit sini sa Biblia, ang a·gaʹpe masami nga nagakahulugan sang gugma nga ginagiyahan sang prinsipio. Gani indi lang ini isa ka emosyonal nga reaksion sa isa ka tawo. Ginapakita naton ini nga gugma sa tanan bangod kabalo kita nga amo ini ang dapat naton himuon. Ang Cristianong gugma wala nagauna sang iya kaugalingon nga kaayuhan. Halimbawa, tan-awa liwat ang Juan 3:16. Ano “ang kalibutan” nga ginhigugma gid sang Dios amo nga ginhatag niya ang iya bugtong nga Anak? Amo ini ang tanan nga tawo nga mahimo makabenepisyo sa halad-gawad ni Jesus. Ang kalabanan sini nga mga tawo nagakabuhi sa paagi nga wala nagapahamuot sa Dios. Ginahigugma bala ni Jehova ang kada isa bilang personal nga abyan pareho sang paghigugma niya sa matutom nga si Abraham? (Santiago 2:23) Wala, pero mahigugmaon nga nagapakita si Jehova sing kaayo sa tanan, bisan pa isa ini ka daku nga sakripisyo para sa iya. Gusto niya nga maghinulsol ang tanan kag magbag-o sang ila mga dalanon. (2 Pedro 3:9) Madamo ang nagahimo sini. Malipayon nga ginabaton niya sila bilang mga abyan niya.

13, 14. Ano ang nagapakita nga ang Cristianong gugma masami nga nagalakip sing mainit nga pagpalangga?

¹³ Pero, sala ang ideya sang iban parte sa paggamit sang Biblia sa a·gaʹpe. Abi nila isa ini ka pakitakita lang nga klase sang gugma. Ang matuod, ang Cristianong gugma masami nga nagalakip sing mainit nga personal nga pagpalangga. Halimbawa, sang si Juan nagsulat, “Ginahigugma sang Amay ang Anak,” gingamit niya ang porma sang tinaga nga a·gaʹpe. Wala bala sing mainit nga pagpalangga ini nga gugma? Talupangda nga si Jesus nagsiling, “Palangga sang Amay ang Anak,” nga ginagamit ang isa ka porma sang tinaga nga phi·leʹo. (Juan 3:35; 5:20) Ang gugma ni Jehova pirme nagalakip sing mainit nga pagpalangga. Pero, ang iya gugma wala gid ginagiyahan sang emosyon lang. Pirme ini ginagiyahan sang iya maalamon kag matarong nga mga prinsipio.

¹⁴ Natun-an na naton nga ang tanan nga kinaiya ni Jehova perpekto kag nagapasuod sa aton sa iya. Pero ang gugma ang pinakamanami sa tanan. Ang gugma ni Jehova amo ang pinakamabakod nga rason kon ngaa gusto naton mangin malapit sa iya. Makalilipay nga ang gugma amo man ang iya pinakaimportante nga kinaiya. Paano naton nahibaluan ini?

“Ang Dios Gugma”

15. Ano ang ginasiling sang Biblia parte sa kinaiya ni Jehova nga gugma, kag ngaa pinasahi gid ini nga ekspresyon? (Tan-awa man ang footnote.)

¹⁵ May ginasiling ang Biblia parte sa gugma nga wala gid ginasiling sini sa iban nga panguna nga mga kinaiya ni Jehova. Wala nagasiling ang Kasulatan nga ang Dios gahom ukon ang Dios katarungan ukon ang Dios kaalam. May ara sia sini nga mga kinaiya, kay sia ang Ginhalinan sini, kag wala gid sang makatupong sa iya sa pagpakita sining tatlo ka kinaiya. Pero, parte sa ikap-at nga kinaiya, pinasahi ang ginasiling sini: “Ang Dios gugma.”b (1 Juan 4:8) Ano ang buot silingon sini?

16-18. (a) Ngaa nagasiling ang Biblia nga “ang Dios gugma”? (b) Sa tanan nga tinuga sa duta, ngaa ang tawo ang nagakaigo nga simbulo sang kinaiya ni Jehova nga gugma?

¹⁶ Ang ekspresyon nga “ang Dios gugma” wala nagakahulugan nga ang gugma kag ang Dios pareho. Indi naton ini mabaliskad kag magsiling nga “ang gugma Dios.” Kay si Jehova mas labaw sa bisan ano nga kinaiya. Isa sia ka Dios nga may panghunahuna, balatyagon, kag iban pa nga mga kinaiya wala labot sa gugma. Pero, ang gugma panguna nga kinaiya ni Jehova. Ang isa ka reperensia nagasiling parte sa sini nga bersikulo: “Natural gid sa Dios ang pagpakita sang gugma.” Ano ang buot silingon sini? Ang gahom ni Jehova nagabulig sa iya kon may himuon sia. Ang iya katarungan kag ang iya kaalam nagagiya sa iya kon may himuon sia. Pero ang gugma ni Jehova amo ang rason sang tanan niya nga ginahimo. Kag ginapakita niya pirme ang gugma upod sa iban pa niya nga mga kinaiya.

¹⁷ Masami ginasiling nga si Jehova amo gid ang personipikasyon sang gugma. Gani, kon gusto naton makatuon parte sa gugma, dapat naton kilalahon si Jehova. Ang matuod, makita man naton ining matahom nga kinaiya sa mga tawo. Ngaa? Talupangda ang ginsiling ni Jehova sa iya Anak sang gintuga niya ang tawo: “Mahimo kita sing tawo suno sa larawan naton kag kaangay naton.” (Genesis 1:26) Sa tanan nga tinuga sa duta, ang mga tawo lang ang makapakita sang gugma kag makasunod sa ila Amay sa langit. Dumduma nga gingamit ni Jehova ang sarisari nga mga tinuga bilang simbulo sang iya panguna nga mga kinaiya. Pero, ginpili ni Jehova ang iya pinakaimportante nga tinuga sa duta, ang tawo, nga amo ang simbulo sang Iya panguna nga kinaiya, ang gugma.—Ezequiel 1:10.

¹⁸ Kon ginapakita naton ang matuod nga gugma sa iban, ginasunod naton ang panguna nga kinaiya ni Jehova. Pareho gid ini sang ginsulat ni apostol Juan: “Nagahigugma kita, bangod sia ang una nga naghigugma sa aton.” (1 Juan 4:19) Pero sa ano nga mga paagi una kita nga ginhigugma ni Jehova?

Si Jehova ang Una nga Nagpakita sang Gugma

19. Ngaa masiling nga may importante nga papel ang gugma sa pagpanuga ni Jehova?

¹⁹ Halin sang una, may ara na sang gugma. Ngaa masiling naton ini? Pamensari ini. Indi bangod nagapangasubo sia kag nagakinahanglan sing kaupod. Indi kinahanglan ni Jehova ang bisan ano nga mahatag sang iban. Ang gugma isa ka kinaiya nga nagabulig sa tawo nga maghimo sing maayo sa iban. Gani bangod sang gugma ni Jehova gusto niya hatagan sang kabuhi ang mga anghel kag mga tawo para mangin malipayon sila. “Ang nahauna sa mga tinuga sang Dios” amo ang iya bugtong nga Anak. (Bugna 3:14) Gani gingamit ni Jehova ining Batid nga Manugpangabudlay sa pagtuga sa tanan nga iban pa nga butang, kag ang una amo ang mga anghel. (Job 38:4, 7; Colosas 1:16) Ginhatagan sila sang kahilwayan, kaalam, kag balatyagon. Gani may kahigayunan ining gamhanan nga mga espiritu nga makapakita sang gugma kag mangin abyan ang isa kag isa. Labaw sa tanan, puede nila mangin abyan si Jehova nga Dios. (2 Corinto 3:17) Gani, naghigugma sila bangod una sila nga ginhigugma.

20, 21. Paano nabal-an ni Adan kag ni Eva nga palangga sila ni Jehova, pero ano ang ila ginbalos?

²⁰ Pareho man sini ang mga tawo. Halin sa ginsuguran, nabatyagan gid ni Adan kag ni Eva ang gugma sang Dios. Bisan diin man sila magtulok sa ila Paraiso nga puluy-an sa Eden, makita nila ang ebidensia sang gugma sang Amay sa ila. Talupangda ang ginasiling sang Biblia: “Naghimo man si Jehova nga Dios sing isa ka hardin sa Eden, sa sidlangan nayon; kag ginbutang niya didto ang tawo nga iya gintuga.” (Genesis 2:8) Nakakadto ka na bala sa isa ka matahom nga hardin ukon park? Ano gid ang nanamian mo? Ang silak bala sang adlaw nga nagalusot sa mga dahon sang mga kahoy? Ang sarisari bala nga mga kolor sang matahom nga mga bulak? Ang manami bala nga tunog sang nagailig nga sapa, nagahuni nga mga pispis, kag nagahagong nga mga insekto? Ukon ang humot sang mga kahoy, mga prutas, kag mga bulak? Huo, matahom gid ang mga hardin, pero wala gid sang makatupong sa katahom sang hardin sang Eden. Ngaa?

²¹ Ang hardin sang Eden ginhimo ni Jehova mismo! Sigurado nga matahom gid ato nga hardin. Ato didto ang tanan nga kahoy nga matahom ukon manamit sing bunga. Ang hardin bugana sa tubig, malapad, kag madamo sing makawiwili nga mga sapat. Ara na ang tanan kay Adan kag kay Eva para mangin malipayon kag kompleto ang ila pagkabuhi. May ara man sila mga ulubrahon nga nanamian nila kag malipayon sila sa ila pag-updanay. Si Jehova ang una nga nagpakita sang gugma, kag dapat palanggaon man nila sia. Pero, wala nila ini ginhimo. Imbes nga tumanon sing mahigugmaon ang ila Amay sa langit, gin-una nila ang ila kaugalingon kag nagrebelde sila sa iya.—Genesis, kapitulo 2.

22. Ngaa ang ginhimo ni Jehova sa pagrebelde sa Eden ebidensia nga may mainunungon sia nga gugma?

²² Masakit gid para kay Jehova ang ila ginhimo! Pero nag-untat na bala si Jehova sa pagpalangga sa mga tawo bangod sining pagrebelde? Wala! “Ang iya mainunungon nga gugma wala sing katapusan.” (Salmo 136:1) Naghimo sia dayon sing mahigugmaon nga paagi para magawad ang bisan sin-o sa mga anak ni Adan kag ni Eva nga nagapangita sang pagkamatarong. Base sa natun-an na naton, nalakip sa sini nga mga paagi ang halad-gawad sang iya hinigugma nga Anak, bisan pa nga daku ini nga sakripisyo para sa Amay.—1 Juan 4:10.

23. Ano ang isa sang mga rason nga si Jehova isa ka “malipayon nga Dios,” kag ano nga pamangkot ang binagbinagon sa masunod nga kapitulo?

²³ Halin sa ginsuguran, si Jehova ang una nga nagpakita sing gugma sa mga tawo. Sa indi maisip nga mga paagi, “sia ang una nga naghigugma sa aton.” Bangod sa gugma, may paghiusa kag kalipay. Gani maathag kon ngaa ang Biblia nagasiling nga si Jehova, “malipayon nga Dios.” (1 Timoteo 1:11) Pero, posible mamangkot ka, ‘Ginahigugma gid bala ako ni Jehova?’ Binagbinagon ini sa masunod nga kapitulo.