Isa ka Dios nga “Handa sa Pagpatawad”

1-3. (a) Ano ang mabug-at nga lulan ang ginpas-an ni salmista David, kag paano naumpawan ang iya natublag nga tagipusuon? (b) Kon makasala kita, ano nga lulan ang mahimo ginapas-an naton bilang resulta sini, pero ano ang ginapasalig sa aton ni Jehova?

“ANG akon mga sala tagalumapaw,” sulat ni salmista David. “Kaangay sang mabug-at nga palas-anon, indi ko ini masarangan. Nagpalaminhod ako kag daw nadugmok.” (Salmo 38:4, 8) Sang ginakonsiensia si David, bangod sa iya nahimo nga sala pamatyag niya daw may ginapas-an sia nga mabug-at nga lulan. Pero naumpawan ang iya natublag nga tagipusuon. Naintiendihan niya nga bisan pa ginadumtan ni Jehova ang sala, wala Niya ginadumtan ang nakasala kon maghinulsol ini kag mag-untat sa iya mga ginahimo nga sala. Nagasalig gid si David nga handa si Jehova sa pagpatawad sa mga mahinulsulon, gani si David nagsiling: “Ikaw, O Jehova, . . . handa sa pagpatawad.”—Salmo 86:5.

² Kon ginakonsiensia kita bangod nakahimo kita sang sala, daw nagapas-an man kita sing mabug-at nga lulan. Ang pagbatyag sini indi malain, kay makapahulag ini sa aton nga tadlungon ang aton mga sala. Pero, indi maayo kon sobrasobra ang aton pagbatyag nga nakasala kag magpensar nga indi na kita pagpatawaron ni Jehova bisan pa maghinulsol kita. Kon ‘madaug kita sang tuman nga kasubo’, mahimo nga sulayon kita ni Satanas sa pag-untat kag sa pagbatyag nga wala kita sing pulos kay Jehova kag indi nagakabagay nga mag-alagad sa iya.—2 Corinto 2:5-11.

³ Amo bala sina ang pagtan-aw ni Jehova sa aton? Indi gid! Ang pagpatawad isa ka paagi nga ginapakita ni Jehova ang iya daku nga gugma. Sa iya Pulong, ginapasalig niya kita nga kon maghinulsol kita sing tinagipusuon, handa sia magpatawad. (Hulubaton 28:13) Para indi naton pagduhaduhaan ang pagpatawad ni Jehova, usisaon naton kon ngaa kag kon paano sia nagapatawad.

Kon Ngaa si Jehova “Handa sa Pagpatawad”

4. Ano ang nabal-an ni Jehova parte sa aton, kag paano ini nagaapektar sa iya pagtratar sa aton?

⁴ Nahibaluan ni Jehova ang aton mga limitasyon. “Nahibaluan gid niya kon paano kita ginhimo, ginadumdom niya nga kita yab-ok lamang,” siling sang Salmo 103:14. Wala niya ginakalimtan nga yab-ok kita, ukon may mga kaluyahon bangod indi kita perpekto. Ang ekspresyon nga nahibaluan niya “kon paano kita ginhimo” nagapahanumdom sa aton nga ginakumparar sang Biblia si Jehova sa isa ka maninihon kag kita naman sa daga nga mga suludlan nga iya ginadihon. (Jeremias 18:2-6) Bangod nabal-an ni Jehova nga may mga kaluyahon kita kay may napanubli kita nga sala, mainayuhon ang pagtratar niya sa aton depende kon bala nagasunod kita ukon nagasupak sa iya paggiya.

5. Paano ginalaragway sang libro sang Roma ang mabaskog nga pagkontrol sang sala?

⁵ Nabal-an ni Jehova kon daw ano ka gamhanan ang sala. Ginalaragway sang iya Pulong ang sala bilang isa ka mabaskog kag makamamatay nga puersa nga nagakontrol sa tawo. Daw ano gid bala kabaskog ang pagkontrol sang sala? Sa libro sang Roma, si apostol Pablo nagapaathag: Kita tanan ara “sa idalom sang gahom sang sala,” pareho sang mga soldado nga ara sa idalom sang awtoridad sang ila kumander (Roma 3:9); ang sala “naggahom” sa katawhan pareho sang isa ka hari (Roma 5:21); “yara” ini sa aton (Roma 7:17, 20); ang “kasuguan” sini nagapanghikot gihapon sa aton, nga daw nagakontrol sa aton dalanon. (Roma 7:23, 25) Mabaskog gid nga ginakontrol sang sala ang aton indi perpekto nga unod!—Roma 7:21, 24.

6, 7. (a) Ano ang pagtan-aw ni Jehova sa mga nagahinulsol kag nagapakitluoy sa iya? (b) Ngaa indi naton paghimuon nga balibad ang kaluoy sang Dios?

⁶ Nahibaluan ni Jehova nga indi gid naton sia matuman sing perpekto, bisan pa nga gusto gid naton nga himuon ini. Mahigugmaon nga ginapasalig niya kita nga kon maghinulsol gid kita kag magpakitluoy, patawaron niya kita. Ang Salmo 51:17 nagasiling: “Ang mga halad nga kalahamut-an sa Dios amo ang nalisdan nga espiritu; ang nagakalisod kag mahinulsulon nga tagipusuon, O Dios ko, indi mo pagsikwayon.” Indi gid pagsikwayon ni Jehova ang isa ka tawo nga ‘nagakalisod kag nagahinulsol’ sa iya nahimo nga sala.

⁷ Pero, nagakahulugan bala ini nga himuon na lang naton nga balibad nga indi kita perpekto dayon mahimo kita sang sala bangod maluluy-on man ang Dios? Indi gid! Wala ginapabulagbulagan ni Jehova ang sala. May limitasyon ang iya kaluoy. Indi gid niya pagpatawaron ang bisan sin-o nga sigesige nga nagapakasala, kag wala nagapakita sing bisan ano nga paghinulsol. (Hebreo 10:26) Pero, handa sia magpatawad sa mga nagahinulsol. Binagbinagon naton ang pila sang maathag nga mga pulong nga gingamit sa Biblia para ilaragway ining isa sa dalayawon nga paagi nga ginapakita ni Jehova ang iya gugma.

Daw Ano ka Bug-os ang Pagpatawad ni Jehova?

8. Kon ginapatawad ni Jehova ang aton mga sala daw pareho sa ano ang ginahimo niya, kag ano ang aton batyagon bangod sini?

⁸ Ang mahinulsulon nga si David nagsiling: “Sang ulihi gintu-ad ko sa imo ang akon sala; wala ko gintabunan ang akon kasaypanan. . . . Kag ginpatawad mo ang akon mga sala.” (Salmo 32:5) Ang termino nga “ginpatawad” gin-translate halin sa Hebreo nga tinaga nga nagakahulugan sing “hakwaton” ukon “dalhon.” Ang paggamit sini diri nagakahulugan sing pagkuha sa “sala, kalautan, kalapasan.” Gani, daw pareho lang nga ginhakwat ni Jehova ang mga sala ni David kag gindala ini palayo. Sigurado nga nagmag-an ang ginabatyag sang nakasala nga si David. (Salmo 32:3) Makasalig man kita nga hakwaton ni Jehova ang aton mga sala kon mangayo kita sing kapatawaran sa iya base sa aton pagtuo sa halad-gawad ni Jesus.—Mateo 20:28.

9. Daw ano kalayo halin sa aton ang ginadal-an ni Jehova sang aton mga sala?

⁹ Naggamit si David sing isa pa ka ilustrasyon para ipaathag ang pagpatawad ni Jehova: “Subong nga malayo ang sidlangan sa katundan, amo man sina kalayo ang pagpahilayo niya sa aton sang aton mga paglapas.” (Salmo 103:12) Daw ano kalayo ang sidlangan sa katundan? Ang sidlangan amo pirme ang pinakamalayo nga distansia halin sa katundan. Wala gid ini nagatabuay. Ang isa ka scholar nagsiling nga nagakahulugan ini sing “asta sa pinakamalayo; asta sa pinakamalayo nga maimadyin naton.” Gingiyahan ni Jehova si David nga isulat ini para mabal-an naton nga kon magpatawad Sia, ginadala niya palayo ang aton mga sala sa pinakamalayo nga maimadyin naton.

10. Kon ginapatawad ni Jehova ang aton mga sala, ngaa indi naton dapat pagbatyagon nga ang mantsa sini nga mga sala indi na makuha sa bilog naton nga kabuhi?

¹⁰ Natestingan mo na bala nga kuhaon ang mantsa sa puti nga bayo? Posible nga bisan ano pa ang imo pagtinguha, bal-anon gihapon ang mantsa. Talupangda kon paano ginalaragway ni Jehova ang iya ikasarang sa pagpatawad: “Bisan pa ang inyo mga sala mapula, papution ini kaangay sang niebe; bisan pa kaangay ini sang mapula nga tela, mangin kaangay ini sang balahibo sang karnero.” (Isaias 1:18) Bisan ano pa ang himuon naton, indi gid naton makuha ang mantsa sang sala. Pero ang mga sala nga pareho sang mapula nga tela puede mapaputi ni Jehova pareho sang niebe ukon wala malugom nga balahibo sang karnero. Kon ginapatawad ni Jehova ang aton mga sala, indi naton dapat pagbatyagon nga ang mantsa sini nga mga sala indi na makuha sa bilog naton nga kabuhi.

11. Ano ang buot silingon nga ginahaboy ni Jehova ang aton mga sala sa iya likuran?

¹¹ Sa isa ka makatalandog nga ambahanon sang pagpasalamat nga ginkomposo ni Ezequias sa tapos sia ginluwas halin sa isa ka makamamatay nga balatian, nagsiling sia kay Jehova: “Ginhaboy mo ang tanan ko nga sala sa imo likuran.” (Isaias 38:17) Ginalaragway diri si Jehova nga nagakuha sang mga sala sang isa ka tawo nga nagahinulsol kag ginahaboy ini sa likod Niya para indi na Niya ini makita ukon matalupangdan. Ang isa ka diksionaryo sa Biblia nagsiling nga mahimo amo ini ang ideya: “Ginhimo mo [ang akon mga sala] nga daw wala ini matabo.” Makapaumpaw gid ini sa aton!

12. Paano ginapakita ni manalagna Miqueas nga kon magpatawad si Jehova, permanente Niya nga ginakuha ang aton mga sala?

¹² Sa promisa parte sa pagpasag-uli, ginhambal ni manalagna Miqueas ang iya pagsalig nga patawaron ni Jehova ang iya mahinulsulon nga katawhan: “Sin-o nga Dios ang kaangay sa imo, nga . . . nagapasaylo sang paglapas sang mga nabilin sa imo palanublion?  . . . Ihaboy mo sa kadadalman sang dagat ang tanan namon nga sala.” (Miqueas 7:18, 19) Imadyina kon ano ang buot silingon sini sa mga nagakabuhi sang panahon sang Biblia. Posible pa bala nga makuha liwat ang butang nga gintagbong “sa kadadalman sang dagat”? Gani, ginapakita sang mga ginsiling ni Miqueas nga kon magpatawad si Jehova, permanente niya nga ginakuha ang aton mga sala.

13. Ano ang kahulugan sang ginsiling ni Jesus nga “patawara kami sang amon mga utang”?

¹³ Gingamit ni Jesus ang kaangtanan sang nagapahulam kag sang nagautang para iilustrar ang pagpatawad ni Jehova. Ginpalig-on kita ni Jesus nga mangamuyo: “Patawara kami sang amon mga utang.” (Mateo 6:12, footnote) Gani, ginkumparar ni Jesus ang mga sala sa utang. (Lucas 11:4, footnote) Kon makasala kita, “nakautang” kita kay Jehova. Parte sa kahulugan sang Griego nga verb nga gin-translate “patawara,” ang isa ka reperensia nagasiling: “Pagdula, pagpanas, sa isa ka utang, paagi sa indi pagsukot sini.” Gani, kon magpatawad si Jehova, ginapanas niya ang utang nga kuntani sukton sa aton. Makapaumpaw gid ini sa mga makasasala nga nagahinulsol. Indi na pagsukton ni Jehova ang utang nga ginpanas niya!—Salmo 32:1, 2.

14. Base sa orihinal nga lenguahe, ang mga tinaga nga “mapatawad ang inyo mga sala” makumparar sa ano?

¹⁴ Ang pagpatawad ni Jehova ginalaragway pa gid sa Binuhatan 3:19: “Gani, maghinulsol kamo kag magbag-o agod mapatawad ang inyo mga sala.” Base sa orihinal nga lenguahe, ang tinaga nga “mapatawad” nagakahulugan sing “paglaglag, . . . pagkansela ukon pagguba.” Base sa pila ka scholar, makumparar ini sa pagpanas sa isa ka sinulatan. Paano? Ang tinta nga kinaandan nga ginagamit sang una halin sa ginsamo nga mga materyal nga nagalakip sang carbon, gum, kag tubig. Sa tapos makasulat ang isa ka tawo gamit ini nga tinta, puede niya ini panason paagi sa basa nga espongha ukon sponge. Matahom gid ini nga paglaragway sang kaluoy ni Jehova. Kon magpatawad sia sang aton mga sala, daw pareho nga nagakuha sia sing espongha kag ginapanas ini.

15. Ano ang gusto ni Jehova nga mabal-an naton parte sa iya?

¹⁵ Kon binagbinagon naton ining sarisari nga mga ilustrasyon, maathag gid nga gusto ni Jehova nga mabal-an ta nga handa gid sia magpatawad sa aton mga sala kon nagahinulsol kita sing sinsero. Indi na kita mahadlok nga basi sukton niya kita sang aton mga sala sa ulihi. Ginapakita ini sang dugang pa nga ginasiling sang Biblia parte sa daku nga kaluoy ni Jehova: Kon nagapatawad sia, wala na niya ini ginadumdom.

“Indi Ko Na Pagdumdumon ang Ila Sala”

16, 17. Kon ang Biblia nagasiling nga wala ginadumdom ni Jehova ang aton mga sala, ano ang buot silingon sini, kag ngaa amo sina ang imo sabat?

¹⁶ Nagpromisa si Jehova sa mga miembro sang bag-ong katipan: “Patawaron ko ang ila kasaypanan, kag indi ko na pagdumdumon ang ila sala.” (Jeremias 31:34) Nagakahulugan bala ini nga kon nagapatawad si Jehova indi na niya madumduman ang mga sala? Imposible ini. Ginasugiran kita sang Biblia parte sa mga sala sang madamo nga indibiduwal nga ginpatawad ni Jehova, lakip kay David. (2 Samuel 11:1-17; 12:13) Maathag nga nahibaluan gihapon ni Jehova ang mga sala nga nahimo nila. Ang rekord parte sa ila mga sala, pati man ang ila paghinulsol kag ang pagpatawad sang Dios, ginsulat para makabenepisyo kita. (Roma 15:4) Gani, ano ang buot silingon sang Biblia sang nagsiling ini nga indi na “pagdumdumon” ni Jehova ang mga sala sang iya ginapatawad?

¹⁷ Ang Hebreo nga verb nga gin-translate “indi ko na pagdumdumon” wala lang nagakahulugan sang pagdumdom sang nagligad. Ang Theological Wordbook of the Old Testament nagasiling nga nagakahulugan man ini sang “paghimo sang aksion.” Base sa sini, ang ‘pagdumdom’ sa sala nagadalahig sing paghimo sing aksion kontra sa mga makasasala. (Oseas 9:9) Pero kon ang Dios magsiling nga “indi ko na pagdumdumon ang ila sala,” ginapasalig niya kita nga kon ginapatawad na niya ang mga makasasala nga naghinulsol, wala sia sang himuon sa ila sa ulihi bangod sini nga mga sala. (Ezequiel 18:21, 22) Gani, wala ginadumdom ni Jehova ang aton mga sala kag wala na niya ini ginaungkat sing sulitsulit para akusaran kita ukon silutan liwat. Makapaumpaw gid nga mahibaluan nga ang aton Dios nagapatawad kag wala na niya ginadumdom ang aton mga sala.

Ang mga Resulta sang Sala

18. Ngaa ang pagpatawad sa makasasala nga nagahinulsol wala nagakahulugan nga madula na ang tanan nga resulta sang iya sala?

¹⁸ Handa si Jehova nga patawaron ang makasasala nga nagahinulsol. Pero, nagakahulugan bala ini nga madula na ang tanan nga resulta sang iya sala? Indi. Kay may salabton gid kita sa ginhimo ta nga sala. Si Pablo nagsulat: “Kon ano ang ginasab-ug sang tawo, ini man ang iya anihon.” (Galacia 6:7) Mahimo atubangon naton ang pila ka resulta sang aton mga ginhimo. Wala ini nagakahulugan nga ginapaantos kita ni Jehova sa tapos niya kita patawaron. Kon may mag-abot nga problema, ang isa ka Cristiano indi dapat magsiling, ‘Basi ginasilutan ako ni Jehova bangod sa mga sala ko sang una.’ (Santiago 1:13) Pero, wala kita ginaproteksionan ni Jehova sa tanan nga epekto sang aton ginhimo nga sala. Indi naton malikawan ang resulta sang sala pareho sang pagdiborsio, wala ginplano nga pagbusong, makalalaton nga mga balatian paagi sa pag-sex, kag pagkadula sing pagsalig ukon pagtahod. Dumduma nga bisan pa ginpatawad na si David sa iya mga sala may kaangtanan kay Bat-seba kag kay Urias, wala sia ginproteksionan ni Jehova sa malain nga mga resulta sang iya sala.—2 Samuel 12:9-12.

19-21. (a) Paano ang kasuguan sa Levitico 6:1-7 nakabulig sa biktima kag sa nakasala? (b) Kon nahalitan ang iban sang aton mga sala, ano ang gusto ni Jehova nga himuon naton?

¹⁹ Ang aton mga sala mahimo nga may iban pa nga resulta, ilabi na kon nahalitan ang iban sang aton ginhimo. Halimbawa, binagbinaga ang Levitico kapitulo 6. Mabasa diri ang ginasugo sang Mosaikong Kasuguan kon may isa ka tawo nga nakahimo sing daku nga sala bangod ginkuha niya ang mga pagkabutang sang pareho niya nga Israelinhon paagi sa pagpangawat, pangilkil, ukon pagdaya. Wala mag-ako ang nakasala, kag nagpanumpa sia sing binutig. Wala sang ebidensia kag wala man sang nakasaksi amo nga indi sia masilutan. Pero sang ulihi, ginkonsiensia ang nakasala kag nag-ako sang iya sala. Para patawaron sia sang Dios, may tatlo sia ka butang nga dapat himuon: iuli ang iya ginkuha, bayaran ang biktima sing multa nga 20 porsiento sang balor sang iya ginkawat, kag maghalad sing lalaki nga karnero bangod sang iya sala. Dayon, ang kasuguan nagasiling: “Ang saserdote maghimo sang pagtumbas para sa iya sala sa atubangan ni Jehova, kag patawaron sia.”—Levitico 6:1-7.

²⁰ Ginapakita sini nga kasuguan nga maluluy-on gid ang Dios. Nakabulig ini sa biktima, kay gin-uli ang ginkawat sa iya kag sigurado nga naumpawan gid sia kay gin-ako sang kawatan ang iya sala. Nakabulig man ini sa nakasala nga sang ulihi nakonsiensia, nag-ako, kag gintadlong ang iya sala. Kay kon indi niya ini paghimuon, indi sia mapatawad sang Dios.

²¹ Wala na ginapatuman subong ang Mosaikong Kasuguan. Pero ini nga Kasuguan nagabulig sa aton nga mas maintiendihan ang panghunahuna ni Jehova parte sa pagpatawad. (Colosas 2:13, 14) Kon nahalitan ang iban bangod sang aton mga sala, gusto sang Dios nga himuon naton ang aton masarangan nga tadlungon ang aton sala. (Mateo 5:23, 24) Mahimo nga nalakip sa sini ang pag-ako kag pagbaton nga nakasala kita kag pagpangayo sing pasaylo sa biktima. Dayon mangayo kita sang patawad kay Jehova base sa halad ni Jesus. Kon himuon naton ini, makasalig kita nga napatawad na kita sang Dios.—Hebreo 10:21, 22.

22. Ano ang mahimo nga nalakip sa pagpatawad ni Jehova?

²² Pareho sang isa ka mahigugmaon nga ginikanan, kon ginapatawad kita ni Jehova mahimo nga may nalakip ini nga disiplina. (Hulubaton 3:11, 12) Mahimo nga biyaan anay sang isa ka mahinulsulon nga Cristiano ang iya pribilehiyo bilang isa ka gulang, ministeryal nga alagad, ukon bug-os tion nga ebanghelisador. Masakit gid nga madulaan sang mga pribilehiyo nga importante para sa iya. Pero, ini nga disiplina wala nagakahulugan nga wala sia ginpatawad ni Jehova. Dapat naton dumdumon nga ang pagdisiplina ni Jehova ebidensia nga palangga gid niya kita. Para gid sa aton kaayuhan kon batunon kag sundon naton ini.—Hebreo 12:5-11.

23. Ngaa indi gid kita magpensar nga indi maluoy si Jehova sa aton, kag ngaa dapat naton ilugon ang iya pagpatawad?

²³ Makapaumpaw gid mahibaluan nga ang aton Dios “handa sa pagpatawad”! Bisan pa sang aton mga sala, indi gid kita magpensar nga indi maluoy si Jehova sa aton. Kon maghinulsol kita, tadlungon ang aton mga sala, kag sinsero nga mangamuyo nga patawaron kita base sa ginpaagay nga dugo ni Jesus, makasalig gid kita nga patawaron kita ni Jehova. (1 Juan 1:9) Ilugon naton si Jehova paagi sa pagpatawad man sa iban. Dumduma nga si Jehova wala nagasala, pero nagapatawad sia. Gani, mas labi pa gid nga magpinatawaray kita kay makasasala kita.