“Daku Gid ang Iya Kaayo!”

1, 2. Sin-o ang makabenepisyo sa kaayo sang Dios, kag ano ang ginasiling sang Biblia parte sa sini nga kinaiya?

SAMTANG nagatunod ang adlaw, may mga mag-abyan nga nagakaon sa gua. Nagakadlawanay sila kag nagaistoryahanay samtang nagatan-aw sang manami nga kolor sang pagtunod sang adlaw. Sa iban nga lugar, may isa ka mangunguma nga nagayuhumyuhum samtang nagatan-aw sa iya katamnan. Nalipay gid sia kay nagadamol na ang gal-om kag nagatupa na ang ulan sa iya mga pananom. Sa lain pa gid nga lugar, nalipay ang mag-asawa sa pagtan-aw nga nagatakangtakang na ang ila bata.

² Nahibaluan man nila ukon wala, sila tanan nagabenepisyo sa kaayo ni Jehova nga Dios. Ang relihioso nga mga tawo masami nagasiling nga “maayo ang Dios.” Pero, mas manami pa gid ang ginasiling sang Biblia. Ini nagasiling: “Daku gid ang iya kaayo!” (Zacarias 9:17) Pero subong, pila na lang ang nakahibalo kon ano ang kahulugan sini. Ano gid ang buot silingon sang kaayo ni Jehova nga Dios, kag ano ang aton mabenepisyo sa sini nga kinaiya sang Dios?

Isa ka Importante nga Paagi nga Ginapakita sang Dios ang Iya Gugma

3, 4. Ano ang kaayo, kag ngaa ang kaayo ni Jehova isa ka paagi sang pagpakita sang iya gugma?

³ Sa madamo nga lenguahe subong, ang “kaayo” daw ordinaryo na lang nga tinaga. Pero ginapakita sang Biblia nga indi ordinaryo ini nga tinaga. Una sa tanan, nagapatuhoy ini sa pagkatadlong. Gani makasiling kita nga ang tanan nga parte kay Jehova, maayo. Ang tanan niya nga kinaiya lakip ang iya gahom, katarungan, kag kaalam, maayo gid. Pero, ang pinakaimportante, ang kaayo isa ka paagi sang pagpakita ni Jehova sang iya gugma. Ngaa?

⁴ Ang kaayo isa ka kinaiya nga ginapakita sa iban. Ginpakita ni Pablo nga mas nanamian kita sa tawo nga maayo sangsa tawo nga matarong. (Roma 5:7) Ang tawo nga matarong estrikto gid nga nagasunod sa kasuguan. Pero sobra pa sa sina ang ginahimo sang tawo nga maayo, kay sia mismo ang nagapangita sang paagi nga makabulig sa iban. Matun-an naton sa sini nga kapitulo nga amo gid sina si Jehova. Kay man, ang iya kaayo resulta sang iya daku nga gugma.

5-7. Ngaa wala nagsugot si Jesus nga tawgon sia nga “Maayo nga Manunudlo,” kag ano nga importante nga kamatuoran ang gintudlo niya?

⁵ Wala sing makatupong sa kaayo ni Jehova. Isa ka bes, may tawo nga nagpalapit kay Jesus kag gintawag sia nga “Maayo nga Manunudlo.” Si Jesus nagsiling sa iya: “Ngaa ginatawag mo ako nga maayo? Wala sing isa nga maayo, kundi ang Dios lamang.” (Marcos 10:17, 18) Mahimo matingala ka sa sabat ni Jesus. Ngaa ginsaway niya ang tawo? Indi bala matuod nga si Jesus isa ka “Maayo nga Manunudlo”?

⁶ Posible nga gingamit sang tawo ang mga tinaga nga “Maayo nga Manunudlo” para dayawon si Jesus. Pero mapainubuson nga ginhatag ni Jesus ang pagdayaw sa iya Amay sa langit, nga amo gid ang pinakamaayo. (Hulubaton 11:2) Gintudlo man ni Jesus ang isa ka importante nga kamatuoran. Si Jehova lang ang basihan sang kon ano ang maayo. Sia lang ang may kinamatarong sa pagsiling kon ano ang maayo kag malain. Gintinguhaan ni Adan kag ni Eva nga angkunon ini nga kinamatarong sang nagrebelde sila paagi sa pagkaon sang bunga sang kahoy sang pagkilala sang maayo kag malain. Indi pareho sa ila, si Jesus mapainubuson kag wala niya gin-agaw sa iya Amay ini nga kinamatarong.

⁷ Dugang pa, nahibaluan ni Jesus nga si Jehova amo ang Ginhalinan sang tanan nga maayo nga butang. Sia ang Manughatag sang “tagsa ka maayo nga dulot kag tagsa ka himpit nga regalo.” (Santiago 1:17) Tun-an naton kon paano ang kaayo ni Jehova makita sa iya kaalwan.

Ebidensia sang Bugana nga Kaayo ni Jehova

8. Paano ginapakita ni Jehova ang kaayo sa tanan nga tawo?

⁸ Ang tanan nga nagkabuhi nakabenepisyo gid sa kaayo ni Jehova. Ang Salmo 145:9 nagasiling: “Si Jehova maayo sa tanan.” Ano ang pila ka halimbawa sang iya kaayo sa tanan? Ang Biblia nagasiling: “Paagi sa paghimo sing maayo ginpakita niya sa inyo kon sin-o sia, nga nagahatag sa inyo sing ulan halin sa langit kag sing bugana nga patubas sa nagakaigo nga tion, nga nagahatag sing bugana nga kalan-on kag nagapuno sang inyo tagipusuon sing kasadya.” (Binuhatan 14:17) Nalipay ka bala samtang nagakaon ka sing manamit nga pagkaon? Bangod sa kaayo ni Jehova, gindesinyo niya ining duta nga may suplay sang preska nga tubig nga wala nagakaubos kag “bugana nga patubas sa nagakaigo nga tion.” Gani, makapatubas ang duta sing bugana nga pagkaon para sa aton. Ginpakita ni Jehova ini nga kaayo indi lang sa mga nagahigugma sa iya kundi sa tanan. Si Jesus nagsiling: “Ginapabutlak niya ang iya adlaw sa mga malauton kag sa mga maayo. Ginahatagan niya sing ulan ang mga matarong kag mga indi matarong.”—Mateo 5:45.

9. Paano ginapakita sang mansanas ang kaayo ni Jehova?

⁹ Madamo nga tawo ang wala nagaapresyar sang kaalwan sang Dios paagi sa manami nga mga butang pareho sang adlaw, ulan, kag mabungahon nga mga kahoy. Halimbawa, binagbinaga ang mansanas. Nagatubo ini sa mabugnaw nga mga lugar. Matahom ini, manamit, maduga, kag masustansia. Kabalo ka bala nga sa bilog nga kalibutan may ara mga 7,500 ka klase sang mansanas? Lainlain ang kolor sini, pareho sang pula, yellow, ukon green. Sarisari man ang kadakuon sini. May ara nga dakudaku lang gamay sa sirale pero may ara man nga pareho kadaku sa kabugaw. Kon uyatan mo ang gamay nga liso sang mansanas, daw sa wala lang ini. Pero diri nagahalin ang espesyal kag matahom nga kahoy. (Ambahanon ni Solomon 2:3) Kon tigpamulak, ang mga bulak sini daw mga korona kon tan-awon kag nagapamunga ini kon tigragas. Ang kahoy sang mansanas mabuhi sing asta sa 75 ka tuig. Kag kada tuig, ang bunga sang isa ka kahoy makapuno sang mga 20 ka karton nga 19 kilos ang kabug-aton sang kada isa!

10, 11. Paano ginapakita sang aton mga igbalatyag ang kaayo sang Dios?

¹⁰ Si Jehova pirme nagapakita sing kaayo, gani ginhatagan niya kita sing lawas nga ‘ginhimo sing makatilingala.’ May mga igbalatyag kita nga gindesinyo para makatuon kita kag malipay sa mga ginhimo ni Jehova. (Salmo 139:14) Balikan naton ang ginsambit sa umpisa sini nga kapitulo. Kon ara ka didto, ano nga mga butang nga makita mo ang makapalipay sa imo? Ang mapulapula nga guya sang isa ka nagaudyak nga bata. Ang ulan nga nagatupa sa katamnan. Ang pula, yellow, kag violet nga mga kolor sang nagatunod nga adlaw. Ang mata sang tawo gindesinyo para makilala ang ginatos ka libo, ukon minilyon pa gani, ka sarisari nga kolor! Kag mabal-an sang aton palamatin-an ang pagbag-obag-o sang tono sang isa ka matahom nga tingog, ang huyop sang hangin sa kakahuyan, kag ang daw ginaitik nga pagkadlaw sang nagatakangtakang nga bata. Ngaa makakita kita kag makabati sang mga tunog? Ang Biblia nagasiling: “Si Jehova ang naghimo sang dulunggan nga makabati kag sang mata nga makakita.” (Hulubaton 20:12) Pero duha lang ini sa mga igbalatyag.

¹¹ Ang igbalatyag sa pagpanimaho isa pa ka ebidensia sang kaayo ni Jehova. Mabal-an sang ilong sang tawo ang linibo asta sa isa ka trilyon ka sarisari nga baho. Halimbawa, ang imo paborito nga pagkaon nga ginaluto, ang mga bulak, ang baho sang nataktak nga mga dahon, kag ang nagausbong nga aso sang ginatutdan nga kahoy. Kag paagi sa igbalatyag sa pagtandog mabatyagan mo ang dapya sang hangin sa imo nawong, ang hakos sang isa ka hinigugma, kag ang nagahininghining nga prutas sa imo kamot. Kon mag-angkab ka, ginagamit mo ang imo igbalatyag sa pagpanabor. Nagadugang ang imo gana samtang ginasagamsam mo ang nagasalakot nga sabor sang isa ka prutas. Huo, may rason gid kita nga magsiling parte kay Jehova: “Daw ano kadaku ang imo kaayo! Gintigana mo ini sa mga nagakahadlok sa imo.” (Salmo 31:19) Pero, paano gintigana ni Jehova ang kaayo sa mga tawo nga nagakahadlok sa iya?

Kaayo nga Makahatag sing Wala Katapusan nga mga Benepisyo

12. Ano ang pinakaimportante nga ginhatag ni Jehova, kag ngaa?

¹² Si Jesus nagsiling: “Nasulat na: ‘Ang tawo indi sa tinapay lamang mabuhi kundi sa tagsa ka pulong nga nagagua sa baba ni Jehova.’” (Mateo 4:4) Ang matuod, mas madamo nga kaayuhan ang mahatag sa aton sang pulong ni Jehova nga ara sa Biblia sangsa pisikal nga mga butang, bangod magaresulta ini sa kabuhi nga wala sing katapusan. Sa Kapitulo 8 sini nga libro, natun-an naton nga sa sining katapusan nga mga adlaw, gingamit ni Jehova ang iya gahom sa pagpasag-uli para paluntaron ang nagauswag nga espirituwal nga paraiso. Ang importante nga bahin sini nga paraiso amo ang bugana nga espirituwal nga pagkaon.

13, 14. (a) Ano ang nakita ni manalagna Ezequiel sa palanan-awon, kag ano ang kahulugan sini para sa aton? (b) Ano ang ginhatag ni Jehova sa iya matutom nga mga alagad para mabuhi sila sing wala katapusan?

¹³ Sa isa ka importante nga tagna sa Biblia parte sa pagpasag-uli, ginpakita kay manalagna Ezequiel ang palanan-awon parte sa isa ka napasag-uli kag ginhimaya nga templo. Halin sa templo may tubig nga nagailig nga amat-amat nga nagalapad kag nagadalom asta nga nangin masulog ini. Ini nga suba nagadala sing mga pagpakamaayo sa bisan diin nga malab-utan sini. Ang mga kahoy sa mga pangpang sini nagahatag sing pagkaon kag bulong. Bangod sini nga suba, bisan ang Patay nga Dagat naulian kag nagdamo ang isda sa sini! (Ezequiel 47:1-12) Pero ano ang buot silingon sini tanan?

¹⁴ Ang palanan-awon parte sa templo nagakahulugan nga ipasag-uli ni Jehova ang putli nga pagsimba. Mangin matarong ini liwat base gid sa iya mga talaksan. Pareho sa suba sa palanan-awon, magabugana pa gid ang maayo nga mga butang nga ihatag ni Jehova sa iya mga alagad para mabuhi sila sing wala katapusan. Sugod sang 1919, napasag-uli ang putli nga pagsimba kag ginpakamaayo ni Jehova ang iya mga alagad. Paano? Paagi sa Biblia, base sa Biblia nga mga literatura, miting, kag paagi sa mga kombension, nakalab-ot ang importante nga mga kamatuoran sa minilyon. Paagi sa sini, ginatudlo ni Jehova sa mga tawo ang iya pinakaimportante nga aman para sa kabuhi nga amo ang halad-gawad sang Cristo. Bangod napatay si Jesus para sa aton, ang tanan nga nagahigugma kag nagakahadlok sa Dios makatigayon sing matinlo nga konsiensia kag may paglaum nga mabuhi sing wala katapusan.a Amo kon ngaa, sa sining katapusan nga mga adlaw, samtang ang kalibutan may espirituwal nga tiggulutom, ang katawhan ni Jehova may espirituwal nga sinalusalo.—Isaias 65:13.

15. Paano ipakita ni Jehova ang iya kaayo sa matutom nga mga tawo sa tion sang Isa ka Libo ka Tuig nga Paggahom sang Cristo?

¹⁵ Ang suba sa palanan-awon ni Ezequiel indi mag-untat sa pag-ilig kon malaglag ining daan nga sistema sang mga butang. Kundi, magailig ini sing bugana pa sa tion sang Isa ka Libo ka Tuig nga Paggahom sang Cristo. Gani, paagi sa Mesianikong Ginharian, gamiton ni Jehova ang gawad para buligan ang matutom nga mga tawo nga amat-amat nga mangin perpekto. Sa sina nga tion, magahugyaw kita sa kaayo ni Jehova!

Dugang Pa nga mga Paagi nga Ginapakita ni Jehova ang Kaayo

16. Ano ang iban pa nga mga kinaiya ni Jehova bangod sang iya kaayo?

¹⁶ Ang kaayo ni Jehova indi lang basta pagpakita sang kaalwan. Ginsugiran sang Dios si Moises: “Ipakita ko sa imo ang akon bug-os nga kaayo, kag ipakilala ko sa imo atubangan ang akon ngalan nga Jehova.” Dayon ang rekord nagsiling: “Naglabay si Jehova sa iya atubangan kag nagsiling: ‘Si Jehova, si Jehova, isa ka Dios nga maluluy-on kag mainayuhon, indi dali maakig kag bugana sa mainunungon nga gugma kag kamatuoran.’” (Exodo 33:19; 34:6, footnote) Gani ang kaayo ni Jehova nagalakip sing pila ka maayong kinaiya. Binagbinagon naton ang duha lang sa sini.

17. Paano ginpakita ni Jehova nga mainayuhon sia bisan sa indi perpekto nga mga tawo?

¹⁷ “Mainayuhon.” Ini nga tinaga gin-translate man nga “mainawaon.” Madamo kita sing matun-an sa sini parte sa kon paano ginatratar ni Jehova ang iya mga tinuga. Indi pareho sa mga tawo nga maparas, wala sing balatyagon, ukon nagapang-abuso kon may awtoridad sila, si Jehova malulo kag mainayuhon. Halimbawa, si Jehova nagsiling kay Abram: “Halin sa lugar nga imo nahamtangan, palihug magtan-aw ka sa aminhan, sa bagatnan, sa sidlangan, kag sa katundan.” (Genesis 13:14) Ginkuha sa madamo nga translation ang tinaga nga “palihug.” Pero nagsiling ang mga scholar sa Biblia nga sa orihinal nga Hebreo, may ginlakip nga tinaga nga nagahimo sang ginhambal nga isa ka pangabay imbes nga isa ka sugo. May iban pa nga halimbawa pareho sini. (Genesis 31:12; Ezequiel 8:5) Imadyina ang Soberano sang uniberso nga nagasiling sing “palihug” sa mga tawo! Sa isa ka kalibutan nga ordinaryo na lang ang mga tawo nga wala sing pasunaid, agresibo, kag wala respeto, makapaumpaw gid pensaron nga mainayuhon ang aton Dios nga si Jehova.

18. Ano ang buot silingon nga si Jehova “bugana sa . . . kamatuoran,” kag ngaa masaligan naton ini?

¹⁸ “Bugana sa . . . kamatuoran.” Kinaandan na lang sa mga tawo subong ang pagbinutig. Pero ang Biblia nagasiling: “Ang Dios indi isa ka tawo nga nagabinutig.” (Numeros 23:19) Ang matuod, ang Tito 1:2 nagasiling nga ang “Dios . . . indi makabutig.” Indi niya mahimo ini bangod sang iya kaayo. Gani, masaligan gid ang mga promisa ni Jehova. Ang iya mga ginasiling sigurado gid nga matuman. Ginatawag pa gani si Jehova nga “Dios sang kamatuoran.” (Salmo 31:5) Wala lang sia nagalikaw sa pagbinutig kundi nagahatag sia sing bugana nga kamatuoran. Wala niya ginadingot ang impormasyon ukon ginatago ini. Kundi, ginasugid niya ang iya wala sing limitasyon nga kaalam sa iya matutom nga mga alagad.b Ginatudluan pa gani niya sila kon paano iaplikar ang mga kamatuoran nga iya ginatudlo para ‘padayon sila nga maglakat sa kamatuoran.’ (3 Juan 3) Kon amo, ano dapat ang epekto sang kaayo ni Jehova sa kada isa sa aton?

‘Magkalipay Tungod sa Kaayo ni Jehova’

19, 20. (a) Paano ginpaluya ni Satanas ang pagsalig ni Eva sa kaayo ni Jehova, kag ano ang resulta? (b) Ano dapat ang mangin epekto sa aton sang kaayo ni Jehova, kag ngaa?

¹⁹ Sang ginsulay ni Satanas si Eva sa hardin sang Eden, gintinguhaan niya nga paluyahon ang pagsalig ni Eva sa kaayo ni Jehova. Ginsilingan ni Jehova si Adan: “Makapaayaw ka sa pagkaon sang bunga sang tanan nga kahoy sa hardin.” Sa linibo ka kahoy sa hardin, isa lang ang ginsugo ni Jehova nga indi nila pagkan-on. Pero, talupangda kon ano ang ginpamangkot ni Satanas kay Eva: “Matuod gid bala nga nagsiling ang Dios nga indi kamo magkaon sang bunga sang tanan nga kahoy sa hardin?” (Genesis 2:9, 16; 3:1) Ginpatiko ni Satanas ang ginsiling ni Jehova para magpensar si Eva nga may ginadingot si Jehova nga maayo sa ila. Makapasubo nga nagmadinalag-on ini nga taktika kay nagduhaduha na si Eva sa Dios bisan pa ginhatagan sia sang Dios sang tanan niya nga kinahanglanon. Pagkatapos sini, madamo man nga tawo ang nangin pareho kay Eva nga nagduhaduha sa kaayo sang Dios.

²⁰ Nahibaluan naton nga grabe gid ang kasubo kag pag-antos nga nangin resulta sini nga pagduhaduha. Gani dumdumon naton ang ginasiling sang Jeremias 31:12: “Magakalipay sila tungod sa kaayo ni Jehova.” Dapat gid kita magkalipay bangod sa kaayo ni Jehova. Indi gid naton pagduhaduhaan ang mga motibo sang aton Dios, nga puno gid sing kaayo. Masaligan naton sia sing bug-os, kay gusto niya ang maayo para sa mga nagahigugma sa iya.

21, 22. (a) Sa ano nga mga paagi nga gusto mo balusan ang kaayo ni Jehova? (b) Ano nga kinaiya ang binagbinagon naton sa masunod nga kapitulo, kag ngaa lain ini sangsa kaayo?

²¹ Dugang pa, nalipay kita kon may kahigayunan kita nga isugid sa iban ang kaayo sang Dios. Parte sa mga alagad ni Jehova, ang Salmo 145:7 nagasiling: “Malipayon sila nga magasugid samtang ginadumdom nila ang imo daku nga kaayo.” Kada adlaw, nagabenepisyo kita sa kaayo ni Jehova. Puede mo bala pasalamatan si Jehova kada adlaw bangod sa iya kaayo, nga ginahambal sing isaisa ang mga gusto mo pasalamatan sa iya? Kon ginadumdom naton ang kaayo ni Jehova, ginapasalamatan ini kada adlaw, kag ginasugid ini sa iban, ginasunod naton ang aton maayo nga Dios. Kag kon nagapangita kita sing mga paagi nga makahimo sing maayo pareho kay Jehova, mas mangin malapit kita sa iya. Si apostol Juan nagsulat: “Hinigugma nga utod, indi pag-iluga ang malain, apang iluga ang maayo. Ang isa nga nagahimo sang maayo naghalin sa Dios.”—3 Juan 11.

²² Ang kaayo ni Jehova may koneksion man sa iban pa nga mga kinaiya. Halimbawa, si Jehova “bugana sa mainunungon nga gugma.” (Exodo 34:6) Ini nga kinaiya espesyal gid kay ginapakita lang ini ni Jehova sa iya matutom nga mga alagad. Sa masunod nga kapitulo, matun-an naton kon paano niya ini ginahimo.