“Padayon Kamo nga Maglakat sa Gugma”

1-3. Ano ang resulta kon ginailog naton ang halimbawa ni Jehova sa pagpakita sing gugma?

“MAS malipayon ang nagahatag sangsa nagabaton.” (Binuhatan 20:35) Ining ginsiling ni Jesus nagatudlo sining importante nga kamatuoran: Makabenepisyo gid kita kon magpakita kita sang matuod nga gugma sa iban. May daku nga kalipay sa pagbaton sing gugma pero may mas daku nga kalipay sa paghatag, ukon pagpakita, sing gugma sa iban.

² Wala sing mas may nakahibalo sini kundi ang aton Amay sa langit. Pareho sang natun-an naton sa nagligad nga mga kapitulo sini nga seksion, si Jehova amo ang pinakamaayo nga halimbawa sang gugma. Sia lang gid ang nakapakita sing gugma sa daku pa nga mga paagi ukon sa malawig nga tion. Gani, indi katingalahan nga gintawag sang Biblia si Jehova nga ang “malipayon nga Dios.”—1 Timoteo 1:11.

³ Gusto sang aton mahigugmaon nga Dios nga ilugon naton sia, ilabi na sa pagpakita sing gugma. Ang Efeso 5:1, 2 nagasiling sa aton: “Mangin manug-ilog kamo sa Dios, subong mga anak nga hinigugma, kag padayon kamo nga maglakat sa gugma.” Kon ginailog naton ang halimbawa ni Jehova sa pagpakita sing gugma, makaeksperiensia kita sing daku pa nga kalipay sa paghatag. Nalipay man kita nga mabal-an nga nalipay si Jehova sa aton, kay ang iya Pulong nagapalig-on sa aton nga “maghigugmaanay kamo.” (Roma 13:8) Pero may iban pa nga mga rason kon ngaa dapat kita ‘padayon nga maglakat sa gugma.’

Kon Ngaa Importante ang Gugma

4, 5. Ngaa importante nga magpakita kita sing gugma nga handa magsakripisyo sa aton mga kauturan?

⁴ Ngaa importante nga higugmaon naton ang aton mga kauturan? Sa simple nga hambal, ang gugma amo ang pinakaimportante nga kinaiya sang matuod nga mga Cristiano. Kon wala kita sing gugma, indi kita mahimo mangin suod sa aton mga kauturan, kag ilabi sa tanan, indi malipay si Jehova sa aton. Binagbinaga kon paano ginapadaku sang Pulong sang Dios ining mga kamatuoran.

⁵ Sa katapusan nga gab-i sang kabuhi ni Jesus sa duta, nagsiling sia sa iya mga sumulunod: “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo. Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:34, 35) Paagi sa pagsiling nga “subong nga ginhigugma ko kamo,” ginasugo kita ni Jesus nga ipakita ang amo man nga gugma nga ginpakita niya. Sa Kapitulo 29, natun-an naton nga ginpakita ni Jesus ang pinakamaayo nga halimbawa sang gugma nga handa magsakripisyo nga amo ang pag-una sa mga kinahanglanon kag kaayuhan sang iban sangsa iya kaugalingon. Dapat man kita magpakita sing gugma nga handa magsakripisyo, kag dapat makita ini bisan sang mga wala nagaalagad kay Jehova. Sa pagkamatuod, ang gugma nga handa magsakripisyo para sa aton kauturan amo ang tanda nga nagapakilala sa aton bilang matuod nga mga sumulunod sang Cristo.

6, 7. (a) Paano naton nahibaluan nga ginapabaloran gid sang Pulong ni Jehova ang pagpakita sing gugma? (b) Ano nga aspekto sang gugma ang ginapadaku sang mga pulong ni Pablo nga narekord sa 1 Corinto 13:4-8?

⁶ Ano abi kon wala kita sing gugma? “Kon wala ako sing gugma,” siling ni apostol Pablo, “kaangay ako sang saway nga magahod ukon simbal nga matagsing.” (1 Corinto 13:1) Indi gid manami pamatian ang simbal nga matagsing kag ang saway nga magahod. Insakto gid ini nga mga ilustrasyon! Kay man, ang tawo nga wala sing gugma daw pareho sa isa ka instrumento sa musika nga matunog, magalong, kag makaulugot pamatian. Puede bala mangin suod sa iban ang amo sini nga tawo? Si Pablo nagsiling man: “Bisan masaylo ko ang mga bukid bangod sang akon mabakod nga pagtuo, apang kon wala ako sing gugma, wala ako sing pulos.” (1 Corinto 13:2) Gani, ang tawo nga wala sing gugma “isa ka wala pulos nga tawo,” bisan ano man ang nahimuan niya. (The Amplified Bible) Maathag gid nga ginatudluan kita sang Biblia nga gusto ni Jehova nga magpakita kita sing gugma.

⁷ Pero, paano naton mapakita ini nga kinaiya sa aton pagtratar sa iban? Para masabat ini, usisaon naton ang ginsiling ni Pablo nga mabasa sa 1 Corinto 13:4-8. Sa sini nga mga bersikulo, wala lang ginapatuhuyan ni Pablo ang gugma sang Dios sa aton ukon ang aton gugma sa Dios. Kundi, nagpokus sia kon paano naton dapat ipakita ang gugma sa isa kag isa. Ginlaragway niya kon ano ang gugma kag kon ano ang wala ginahimo sang gugma.

Kon Ano ang Gugma

8. Paano naton ginatratar ang iban kon mapinasensiahon kita?

⁸ “Ang gugma mapinasensiahon.” Gani bangod sa gugma, ginabatas mo ang iban. (Colosas 3:13) Kinahanglan gid naton nga mangin mapinasensiahon. Indi kita tanan perpekto, gani samtang ginaalagad naton si Jehova upod sa aton mga kauturan, mapaabot gid naton nga makahimo sila sang sala sa aton kag kita man sa ila. Pero kon mapinasensiahon kita kag nagapaumod, mabatas naton ang magagmay nga mga sala kag mapabilin ang paghidait sang kongregasyon.

9. Sa ano nga mga paagi mapakita naton ang kaayo sa iban?

⁹ “Ang gugma . . . mainayuhon.” Mapakita naton ang kaayo kon ginabuligan naton ang iban kag kon nagahambal kita nga may respeto. Bangod sa gugma, nagapangita kita sang mga paagi para mapakita ang kaayo, ilabi na sa mga nagakinahanglan sini. Halimbawa, ang isa ka utod nga may edad na mahimo nga nagapangasubo kag gusto niya nga bisitahan sia para palig-unon. Ang isa ka nagasolo nga iloy ukon ang isa ka utod nga babayi nga nagaisahanon nga Saksi sa ila pamilya mahimo nga nagakinahanglan sing bulig. Ang isa nga nagamasakit ukon may problema mahimo kinahanglan nga makabati sing pagpalig-on halin sa isa ka mainunungon nga abyan. (Hulubaton 12:25; 17:17) Kon nagapangita kita sang kahigayunan nga mapakita ang kaayo sa iban sa sini nga mga paagi, ginapakita naton nga matuod ang aton gugma sa ila.—2 Corinto 8:8.

10. Paano ang gugma nagabulig sa aton nga suportahan kag isugid ang kamatuoran, bisan pa indi ini mahapos himuon?

¹⁰ ‘Ang gugma nagakalipay sa kamatuoran.’ Ang isa pa ka translation nagasiling: “Ang gugma . . . malipayon nga nagadampig sa kamatuoran.” Bangod sa gugma, ginasuportahan gid naton ang kamatuoran kag ‘nagahambal sing matuod sa isa kag isa.’ (Zacarias 8:16) Halimbawa, kon ang isa ka hinigugma nakahimo sing mabug-at nga sala, ang gugma kay Jehova kag sa nakasala magabulig sa aton nga sundon ang mga talaksan sang Dios. Indi gid naton pagtaguon ang sala, ukon apinan ang nakasala, ukon magbinutig pa gani parte sa nahimo nga sala. Matuod, mahimo nga masakit batunon kon ano gid ang natabo. Pero kon gusto gid naton ang kaayuhan sang aton pinalangga, gusto naton nga batunon niya ang mahigugmaon nga pagdisiplina sang Dios. (Hulubaton 3:11, 12) Bilang mahigugmaon nga mga Cristiano, gusto man naton “magkabuhi sing bunayag sa tanan nga butang.”—Hebreo 13:18.

11. Bangod ‘ginaantos sang gugma ang tanan nga butang,’ ano ang dapat naton tinguhaan kon parte sa mga sala sang aton mga kauturan?

¹¹ ‘Ang gugma nagaantos sang tanan nga butang.’ Ini nga ekspresyon literal nga nagakahulugan nga “ginatabunan sini ang tanan nga butang.” (Kingdom Interlinear) Ang 1 Pedro 4:8 nagasiling: “Ang gugma nagatabon sang madamo nga sala.” Gani bangod sa gugma, indi gusto sang isa ka Cristiano nga ibuyagyag ang tanan nga sala kag kakulangan sang iya mga kauturan. Sa masami, magagmay lang man ang ila mga sala kag mapakita naton ang gugma kon palampason na lang naton ini.—Hulubaton 10:12; 17:9.

12. Paano ginpakita ni apostol Pablo nga ginpatihan niya ang pinakamaayo parte kay Filemon, kag ano ang matun-an naton sa halimbawa ni Pablo?

¹² ‘Ang gugma nagapati sang tanan nga butang.’ Ang translation ni Moffatt nagasiling nga ang gugma “nagapati gid kon ano ang pinakamaayo.” Gusto naton nga saligan ang aton mga kauturan, gani wala naton ginaduhaduhaan ang ila mga motibo. Ang gugma nagabulig sa aton nga ‘patihan kon ano ang pinakamaayo’ parte sa aton kauturan kag saligan sila.a Talupangda ang isa ka halimbawa sa sulat ni Pablo kay Filemon. Nagsulat si Pablo para palig-unon si Filemon nga batunon liwat ang naglayas nga ulipon nga si Onesimo, nga nangin isa ka Cristiano. Imbes nga piliton si Filemon, nakitluoy si Pablo base sa gugma. Kabalo sia nga himuon gid ni Filemon ang insakto, kay nagsiling sia: “Nagasalig ako sa imo pagtuman, gani nagasulat ako sa imo, kay nakahibalo ako nga himuon mo ang labaw pa sa ginasiling ko.” (Bersikulo 21) Bangod sa gugma, ginasaligan naton ang aton mga kauturan, gani mabuligan naton sila nga mapakita ang ila maayo nga mga kinaiya.

13. Paano naton mapakita nga ginalauman naton ang pinakamaayo para sa aton kauturan?

¹³ ‘Ang gugma nagalaum sang tanan nga butang.’ Bangod nagasalig ang gugma, nagalaum man ini. Gani, ginalauman naton ang pinakamaayo para sa aton mga kauturan. Halimbawa, kon ang isa ka utod makahimo “sang sayop nga tikang antes niya matalupangdan ini,” nagalaum kita nga batunon niya ang mahigugmaon nga mga panikasog nga tadlungon sia. (Galacia 6:1) Nagalaum man kita nga mangin aktibo liwat ang mga nagluya sa ila pagtuo. Mapinasensiahon kita kag ginabuligan naton sila nga magbakod liwat ang ila pagtuo. (Roma 15:1; 1 Tesalonica 5:14) Bisan pa napahilayo ang isa naton ka pinalangga, wala kita nagakadulaan sang paglaum nga sa ulihi makamarasmas sia kag magabalik kay Jehova, pareho sang rebelyuso nga anak sa ilustrasyon ni Jesus.—Lucas 15:17, 18.

14. Ano nga mga sitwasyon ang mahimo magtilaw sang aton pagbatas sa sulod sang kongregasyon, kag paano ang gugma makabulig sa aton nga makabatas?

¹⁴ ‘Ang gugma nagabatas sang tanan nga butang.’ Ang pagbatas nagabulig sa aton nga padayon nga mangin malig-on bisan pa sang mga kapaslawan ukon mga kabudlayan. Pero, indi tanan nga kabudlayan nga nagakinahanglan sang pagbatas nagahalin sa gua sang kongregasyon. Kon kaisa, mahimo nga matilawan kita sa sulod mismo sang kongregasyon. Bangod indi kita perpekto, mahimo nga mapaslaw kita kon kaisa sang aton mga utod paagi sa ila masakit nga mga komento. (Hulubaton 12:18) Posible man nga indi kita komporme sa paghusay sang kongregasyon sa isa ka butang. Ukon mahimo nga naugot kita sa batasan sang isa ka brother, kag nagapalibog kita, ‘Paano ina mahimo sang isa ka Cristiano?’ Kon matabo ini sa aton, magapalayo bala kita sa kongregasyon kag mag-untat sa pag-alagad kay Jehova? Indi gid kon may gugma kita. Huo, ang gugma makabulig sa aton nga indi magpokus sa mga sala sang isa ka utod amo nga daw wala na kita sing makita nga maayo sa iya ukon sa kongregasyon. Ang gugma nagabulig sa aton nga magpabilin nga matutom sa Dios kag suportahan ang kongregasyon bisan ano pa ang ihambal ukon himuon sang isa ka indi perpekto nga tawo.—Salmo 119:165.

Kon Ano ang Wala Ginahimo sang Gugma

15. Ngaa makahalalit gid ang kahisa, kag paano ang gugma nagabulig sa aton nga mabatuan ini nga balatyagon?

¹⁵ “Ang gugma indi mahisaon.” Indi kita dapat mahisa kon ano ang ara sa iban pareho sang ila mga pagkabutang, pagpakamaayo, ukon mga ikasarang. Ang kahisa isa ka balatyagon nga nakapokus lang sa kaugalingon kag makahalalit gid ini. Kay kon indi ini pagpunggan, makaguba ini sang paghidait sa kongregasyon. Ano ang makabulig sa aton nga mabatuan ang kahisa? (Santiago 4:5) Ang sabat amo ang gugma. Kay kon may gugma kita, nalipay kita para sa iban bisan pa may ara sila sang mga butang nga wala sa aton. (Roma 12:15) Dugang pa, indi kita mahisa sa isa kon gindayaw sia bangod sang iya mga ikasarang ukon may nahimo sia nga maayo.

16. Kon matuod gid nga ginahigugma naton ang aton kauturan, ngaa dapat naton likawan ang pagpabugal parte sa aton ginahimo sa pag-alagad kay Jehova?

¹⁶ ‘Ang gugma wala nagapabugal, wala ini nagapahambog.’ Ang gugma nagapugong sa aton nga indi ipadayawdayaw ang aton mga ikasarang ukon mga hinimuan. Kon matuod gid nga ginahigugma naton ang aton kauturan, indi gid naton pag-ipabugal ang aton mga hinimuan sa ministeryo ukon ang aton mga pribilehiyo sa kongregasyon. Ini nga pagpahambog mahimo nga magpaluya lang sa buot sang iban, kay mahimo batyagon nila nga walawala sila. Kon may gugma kita, indi gid naton pag-ipabugal ang aton mga pribilehiyo sa pag-alagad sa Dios. (1 Corinto 3:5-9) Dugang pa, ang gugma ‘wala nagapahambog,’ ukon base sa The New Testament in Modern English, indi ini “maluyagon magpadaku sang iya importansia.” Kon may gugma kita, indi kita magbatyag nga mas mataas kita sangsa iban.—Roma 12:3.

17. Kon may gugma kita, paano naton mapakita nga may konsiderasyon kita sa iban, kag ano nga paggawi ang malikawan naton?

¹⁷ ‘Ang gugma wala nagagawi sing indi nagakaigo.’ Ang tawo nga nagagawi sing indi nagakaigo daw wala sing batasan. Ini nga paggawi indi mahigugmaon, kay wala ini sing konsiderasyon sa balatyagon kag kaayuhan sang iban. Pero kon may gugma kita, magapakita kita sang kaayo kag konsiderasyon sa iban. Ipakita man naton ang maayo nga mga pamatasan, ang paggawi nga nagapalipay sa Dios, kag respetuhon naton ang aton mga kauturan. Gani bangod sang gugma, indi kita maghimo sing “makahuluya nga paggawi” ukon sang bisan ano nga pamatasan nga makapaakig ukon makasakit sang buot sang aton Cristianong mga kauturan.—Efeso 5:3, 4.

18. Ngaa ang mahigugmaon nga tawo wala nagapamilit nga himuon ang tanan nga butang base sa iya gusto?

¹⁸ ‘Ang gugma wala nagapangita sang kaugalingon nga kaayuhan.’ Ang Revised Standard Version nagasiling diri: “Ang gugma wala nagapamilit sang iya kaugalingon nga paagi.” Ang tawo nga mahigugmaon wala nagapamilit nga himuon ang tanan base sa iya gusto, nga daw pareho bala nga ang iya mga opinyon husto pirme. Wala niya ginamaniobra ang iban, nga ginagamit ang iya ikasarang para engganyuhon sila nga sundon sia bisan indi nila ini gusto. Ini nga pagkabatinggilan nagapakita sing bugal, kag ang Biblia nagasiling: “Ang bugal nagauna sa pagkapukan.” (Hulubaton 16:18) Kon ginahigugma gid naton ang aton kauturan, respetuhon naton ang ila mga pagtamod, kag kon mahimo, magpaumod kita. Kon nagapaumod kita, ginahimo naton ang ginsiling ni Pablo: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”—1 Corinto 10:24.

19. Paano ang gugma nagabulig sa aton kon ano ang dapat himuon kon masaklaw kita sang iban?

¹⁹ ‘Ang gugma indi maakigon. Wala ini nagaisip sang kahalitan.’ Ang gugma indi madali maakig sa ginahambal ukon ginahimo sang iban. Matuod, natural lang nga maakig kita kon masaklaw kita sang iban. Pero bisan pa may rason kita nga mangakig, kon may gugma kita, wala naton ginapasugtan nga magdugay ang aton kaakig. (Efeso 4:26, 27) Indi naton pag-isipon ang masakit nga mga tinaga ukon ang mga malain nga ginhimo sa aton, nga daw pareho bala nga ginalista naton ini para indi naton malimtan. Ginapahulag kita sang gugma nga sundon ang aton mahigugmaon nga Dios. Pareho sang natun-an naton sa Kapitulo 26, si Jehova nagapatawad kon may mabakod nga rason sa paghimo sini. Kon magpatawad sia, ginakalimtan niya ini. Buot silingon, wala niya ginagamit ining mga sala kontra sa aton sa ulihi. Indi bala nagapasalamat kita nga wala ginaisip ni Jehova ang kahalitan?

20. Ano ang dapat naton himuon kon ang isa ka utod nakahimo sang sala kag napahamak?

²⁰ ‘Ang gugma wala nagakalipay sa kalautan.’ Ang The New English Bible nagasiling: ‘Ang gugma wala nagakalipay sa mga sala sang iban nga mga tawo.’ Ang translation naman ni Moffatt nagasiling: “Ang gugma wala gid nagakalipay kon makahimo sang sala ang iban.” Kon may gugma kita wala kita nagakalipay sa kalainan, gani wala naton ginabalewala ang bisan ano nga klase sang imoralidad. Ano ang ginahimo naton kon ang isa ka utod nakahimo sang sala kag napahamak? Bangod may gugma kita, wala kita nagakalipay, nga daw pareho bala nga nagasiling kita ‘Nan! Bagay gid ’na sa iya!’ (Hulubaton 17:5) Pero, nagakalipay kita kon ang aton utod nga nakasala nagapanikasog para magpanumbalik ang iya relasyon kay Jehova.

“Ang Labaw Pa sa Sini”

21-23. (a) Ano ang buot silingon ni Pablo sang magsiling sia nga “ang gugma wala sing katapusan”? (b) Ano ang binagbinagon sa katapusan nga kapitulo?

²¹ “Ang gugma wala sing katapusan.” Ano ang buot silingon ni Pablo sa sini nga mga tinaga? Pareho sang makita sa konteksto, ginapaathag niya ang mga dulot sang espiritu nga nabaton sadto sang mga Cristiano sang unang siglo. Ang mga dulot sang espiritu nangin mga palatandaan nga ginagamit na ni Jehova ang bag-o matukod nga kongregasyon sang una. Pero indi tanan nga Cristiano sang una nagpang-ayo, nagpanagna, ukon naghambal sing iban nga mga lenguahe. Ang matuod, indi importante kon ang isa nakabaton sang dulot sang espiritu ukon wala, bangod madula man sa ulihi ini nga mga dulot. Pero, may isa ka butang nga magapabilin, butang nga mapalambo sang kada Cristiano. Mas talalupangdon ini kag nagapadayon, sangsa bisan ano nga dulot paagi sa milagro. Ginatawag ini ni Pablo nga “labaw pa.” (1 Corinto 12:31) Ano ining “labaw pa”? Amo ini ang gugma.

²² Ang Cristianong gugma nga ginlaragway ni Pablo “wala sing katapusan,” buot silingon, indi gid madula. Asta subong, ang matuod nga mga sumulunod ni Jesus makilala bangod sa gugma nga handa magsakripisyo. Makita naton ini nga gugma sa mga kongregasyon sang mga tawo nga nagasimba kay Jehova sa bilog nga duta. Ini nga gugma magapadayon asta san-o, kay nagapromisa si Jehova sing kabuhi nga wala sing katapusan sa iya matutom nga mga alagad. (Salmo 37:9-11, 29) Kabay nga himuon naton ang aton bug-os nga masarangan nga ‘padayon nga maglakat sa gugma.’ Kon himuon naton ini, maeksperiensiahan naton ang mas daku nga kalipay sa paghatag. Kag ang mas importante, padayon kita nga magakabuhi kag padayon nga magpakita sing gugma asta sa wala sing katapusan, bilang pag-ilog sa aton mahigugmaon nga Dios, si Jehova.

²³ Sa sining kapitulo nga magatapos sang seksion parte sa gugma, ginbinagbinag naton kon paano kita makapakita sing gugma sa isa kag isa. Nagabenepisyo kita sa gugma ni Jehova sa madamo nga paagi. Nagabenepisyo man kita sa iya gahom, katarungan, kag kaalam. Gani nagakaigo nga mamangkot kita, ‘Paano ko mapakita kay Jehova nga ginahigugma ko gid sia?’ Binagbinagon ini nga pamangkot sa katapusan nga kapitulo.