Makabugtaw Kita Gikan sa Kamatayon!

KON mapatay kita, luyag bala sang Dios nga banhawon kita, buot silingon, buhion kita liwat?⁠— Nagpati ang maayo nga tawo nga si Job nga luyag sang Dios nga himuon ini. Gani sang pagdumdom ni Job mapatay na sia, nagsiling sia sa Dios: “Magapanawag ka, kag ako magasabat sa imo.” Nagsiling si Job nga nalangkag ukon luyag gid ni Jehova nga Dios nga banhawon sia.​​—⁠Job 14:​14, 15.

Si Jesus kaangay gid ni Jehova nga Dios, nga iya Amay. Luyag ni Jesus nga buligan kita. Sang ang isa ka aruon nagsiling sa iya, “kon luyag mo lang, matinluan mo ako,” nagsabat si Jesus: “Luyag ko.” Kag gin-ayo niya ang aruon.​​—⁠Marcos 1:​40-​42.

Natun-an ni Jesus gikan sa iya Amay nga higugmaon ang mga bata. Sa duha ka okasyon sang una, gingamit ni Jehova ang iya mga alagad agod banhawon ang mga bata. Nakitluoy si Elias kay Jehova nga banhawon ang anak nga lalaki sang isa ka babayi nga nag-amuma kay Elias. Kag ginhimo ini ni Jehova. Gingamit man ni Jehova ang iya alagad nga si Eliseo nga banhawon ang isa ka bata nga lalaki.​​—⁠1 Hari 17:17-​24; 2 Hari 4:​32-​37.

Indi bala makalilipay nga mahibaluan nga ginahigugma gid kita ni Jehova?⁠— Wala niya kita ginadumdom kon buhi lamang kita. Dumdumon man niya kita kon mapatay kita. Nagsiling si Jesus nga ginakabig pa gani sang Amay nga buhi bisan ang mga patay nga iya ginahigugma! (Lucas 20:38) Ang Biblia nagasiling nga ‘bisan ang kamatayon bisan ang kabuhi bisan ang mga butang karon bisan ang mga butang nga magaabot indi makapahamulag sa aton sa gugma sang Dios.’​—⁠Roma 8:​38, 39.

Sang si Jesus yari sa duta, ginpakita niya nga nabalaka si Jehova sa mga kabataan. Madumduman mo nga naghinguyang si Jesus sing tion sa pagpakighambal sa mga kabataan tuhoy sa Dios. Apang nahibaluan mo bala nga ginhatagan sang Dios si Jesus sing gahom sa pagbanhaw sa mga kabataan?⁠— Hambalan naton ang tion nga ginbanhaw ni Jesus ang 12-anyos nga anak nga babayi ni Jairo.

Si Jairo kag ang iya asawa nagapuyo upod sa ila bugtong nga anak malapit sa Dagat sang Galilea. Isa ka adlaw nagmasakit sing grabe ang bata nga babayi, kag nakita ni Jairo nga malapit na sia mapatay. Nadumduman niya si Jesus, ang dalayawon gid nga tawo nga nabatian ni Jairo nga makapaayo sa mga tawo. Gani ginpangita sia ni Jairo. Nakita niya si Jesus sa higad sang Dagat sang Galilea, nga nagapanudlo sa madamo nga mga tawo.

Nanagil-ot si Jairo sa tunga sang kadam-an kag nagluhod sa tiilan ni Jesus. Nagsiling sia kay Jesus: ‘Grabe gid ang akon anak nga babayi. Mahimo mo bala sia kadtuan palihug kag buligan? Nagapakiluoy ako nga kadtuan mo sia.’ Sa gilayon, nag-upod si Jesus kay Jairo. Nagsunod man ang kadam-an nga nagkari agod makita ang Daku nga Manunudlo. Apang sang malayolayo na sila, nag-abot ang pila ka tawo gikan sa panimalay ni Jairo kag ginsugiran sia: “Ang imo anak nga babayi patay na! Ngaa pabudlayan mo pa ang manunudlo?”

Nabatian ni Jesus ang mga tawo nga nagsiling sini. Nahangpan niya kon daw ano kasubo si Jairo nga napatay ang iya bugtong nga anak. Gani ginsingganan Niya sia: ‘Dili ka mahadlok. Magtuo ka lamang sa Dios, kag indi maano ang imo anak nga babayi.’ Nagpadayon sila sa paglakbay tubtob nga nakalab-ot sila sa balay ni Jairo. Ang mga abyan sang pamilya nagahinibi. Masubo sila bangod napatay ang ila abyan nga bata. Apang ginsingganan sila ni Jesus: ‘Mag-untat kamo sa paghibi. Wala mapatay ang bata, kundi nagakatulog sia.’

Sang ginsiling ini ni Jesus, nagkinadlaw ang mga tawo, kay nahibaluan nila nga napatay ang bata. Ngaa, nian, sa banta mo nagsiling si Jesus nga nagakatulog sia?⁠— Ano nga leksion sa banta mo ang luyag niya itudlo sa mga tawo?⁠— Luyag niya nga mahibal-an nila nga ang kamatayon daw subong lamang sang isa ka mahamuok nga pagtulog. Luyag niya tudluan sila nga paagi sa gahom sang Dios, sarang niya mabanhaw ang isa ka patay nga tawo sing subong kahapos sa pagpukaw naton sa isa ka tawo nga nagakatulog.

Ginpaguwa ni Jesus sa balay ang tanan luwas ang iya mga apostoles nga sanday Pedro, Santiago, kag Juan kag ang amay kag iloy sang bata. Nian nagsulod sia sa nahamyangan sang bata. Gin-uyatan Niya sia sa kamot kag nagsiling: ‘Inday, bangon ka!’ Kag sa gilayon nagbangon sia kag naglakat! Nalipay gid ang iya amay kag iloy.​​—⁠Marcos 5:​21-​24, 35-​43; Lucas 8:​40-​42, 49-​56.

Karon hunahunaa ini. Sanglit nabanhaw ni Jesus yadto nga bata, mahimo man bala niya ini sa iban?⁠— Sa banta mo ayhan himuon gid niya ini?⁠— Huo, himuon niya ini. Si Jesus mismo nagsiling: “Ang oras magaabot nga ang tanan nga yara sa handumanan nga mga lulubngan makabati sang [akon] tingog kag magaguwa.”​​—⁠Juan 5:​28, 29.

Sa banta mo ayhan luyag ni Jesus nga banhawon ang mga tawo?⁠— Ang isa pa ka halimbawa sa Biblia magabulig sa pagsabat sini nga pamangkot. Ginapakita sang natabo sang isa ka adlaw malapit sa siudad sang Nain kon ano ang ginabatyag ni Jesus sa mga tawo nga nagapangalisod sa tion sang lubong.

Ang isa ka babayi nagakumpanyar sa lubong sang iya anak nga lalaki samtang ang kadam-an nagapaguwa sa Nain. Antes sini, napatay ang iya bana, kag karon naman, napatay ang iya bugtong nga anak. Masubo gid sia! Madamo nga mga tawo sa Nain ang nagakumpanyar samtang ang bangkay sang iya anak ginadala paguwa sa siudad. Nagahilibion ang babayi, apang wala sing mahimo ang mga tawo agod lipayon sia.

Sini nga adlaw, natabuan nga si Jesus kag ang iya mga disipulo nagapadulong sa siudad sang Nain. Malapit sa gawang sang siudad, nasugata nila ang kadam-an nga magalubong sa anak nga lalaki sang babayi. Sang makita ni Jesus ang nagahilibion nga babayi, napahulag Sia sang kaluoy sa iya. Natandog ang Iya tagipusuon sang iya daku nga kasubo. Luyag Niya nga buligan sia.

Gani sing malulo apang serioso agod mamati sia, Sia nagsiling: “Indi na maghibi.” Napukaw ang interes sang tanan sa ginhimo kag ginsiling ni Jesus, gani nanilag sila. Samtang nagapalapit si Jesus sa bangkay, pat-od nga nagapalibog ang tanan kon ano ang iya himuon. Naghambal si Jesus, nga nagasugo: “Pamatan-on, nagasiling ako sa imo, Bangon ka!” Sa gilayon, nagpungko sia! Kag naghambal sia.​​—⁠Lucas 7:​11-​17.

Handurawa kon daw ano gid ang ginbatyag sang babayi! Ano ang batyagon mo kon magbalik sa imo ang isa ka hinigugma nga napatay?⁠— Wala bala ini nagapakita nga ginahigugma gid ni Jesus ang katawhan kag luyag niya nga buligan sila?⁠— Hunahunaa lamang kon daw ano ka makalilipay nga abiabihon ang mga tawo nga banhawon sa bag-ong kalibutan sang Dios!​​—⁠2 Pedro 3:​13; Bugna 21:​3, 4.

Sa sina nga tion ang iban nga banhawon amo ang mga tawo nga kilala naton, lakip ang mga kabataan. Makilala naton sila subong nga nakilala ni Jairo ang iya anak nga babayi sang ginbanhaw sia ni Jesus. Ang iban nga banhawon ginatos ukon linibo ka tuig na nga napatay. Apang indi sila malipatan sang Dios bisan pa madugay na sila nga napatay.

Indi bala makalilipay gid nga mahibaluan ang daku gid nga gugma sa aton ni Jehova nga Dios kag sang iya Anak, nga si Jesus?⁠— Luyag nila nga mabuhi kita, indi lamang sing pila ka tuig, kundi sa walay katubtuban!