Malapit Na Madula ang Tanan nga Pag-antos!

Sa isa ka tion sa imo kabuhi, mahimo nga namangkot ka, ‘Ngaa may daku gid nga pag-antos?’ Sa sulod sang linibo ka tuig, nag-antos gid ang katawhan bangod sang mga inaway, kaimulon, mga kalamidad, krimen, inhustisya, balatian, kag kamatayon. Mas daku gid ang pag-antos sang katawhan sang nagligad nga isa ka gatos ka tuig. Madula pa ayhan ining tanan nga pag-antos?

Makapalugpay nga huo ang sabat kag malapit na gid ini! Ang Pulong sang Dios, ang Biblia, nagasiling: “Ang malauton wala na . . . Apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” Tubtob san-o? “Ang mga matarong magapanag-iya sang duta, kag magapuyo sila sing dayon sa sini.”​—⁠Salmo 37:​10, 11, 29.

Sa tapos dulaon sang Dios ang kalautan kag pag-antos, mangin paraiso ang duta. Nian magakabuhi ang katawhan sing dayon nga may himpit nga kapagros kag kalipay. Ang Pulong sang Dios nagatagna: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.”​—⁠Bugna 21:4.

Sa sinang bag-ong kalibutan, bisan ang mga patay pagabanhawon agod makaambit man sa sini: “May pagkabanhaw sang mga matarong kag mga di-matarong.” (Binuhatan 24:15) Amo kon ngaa nakasiling si Jesus sa isa ka mahinulsulon nga kriminal nga nagpabutyag sing pagtuo sa iya: “Mangin kaupod ko ikaw sa Paraiso.”​—⁠Lucas 23:43.

Ngaa Nagsugod ang Pag-antos?

Kon matahom nga palaabuton ang gintuyo sang Dios para sa mga tawo, ngaa gintugutan pa niya nga magsugod ang pag-antos? Ngaa gintugutan niya ini nga magdugay kaayo?

Sang gintuga sang Dios si Adan kag si Eva, gintuga Niya sila nga may himpit nga lawas kag hunahuna. Ginpapuyo niya sila sa isa ka paraiso nga hardin kag ginhatagan sila sing makalilipay nga hilikuton. Ang Biblia nagasiling: “Nakita sang Dios ang tanan nga butang nga ginhimo niya kag, yari karon! tama gid ini kaayo.” (Genesis 1:31) Kon gintuman nila ang Dios, himpit kuntani ang nangin mga anak nila, kag nangin paraiso kuntani ang bug-os nga kalibutan, diin ang katawhan magakabuhi sing dayon sa kalinong kag kalipay.

Gintuga sang Dios si Adan kag si Eva nga may kahilwayan sa pagbuot​—⁠isa ka matahom gid nga regalo subong bahin sang ila tawhanon nga kinaugali. Indi sila mangin subong sang mga robot nga nagasunodsunod lamang. Apang, magapabilin sila nga malipayon kon gamiton nila ang ila kahilwayan sa pagbuot sing husto​—⁠sa pagtuman sa kasuguan sang Dios. Subong sang ginsiling sang Dios: “Ako, si Jehova, amo ang imo Dios, ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan.” (Isaias 48:17) Ang sayop nga paggamit sa kahilwayan sa pagbuot magaresulta sa kapahamakan, kay wala gintuga ang tawo nga magmadinalag-on kon magbulag sia sa Dios. Ang Biblia nagasiling: “Ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.”​—⁠Jeremias 10:23.

Makapasubo nga nagpati ang aton unang mga ginikanan nga bisan pa magbulag sila sa Dios, magamadinalag-on gihapon sila. Apang wala magtugot ang Dios nga magpabilin sila nga himpit sang ginsikway nila ang iya paggahom. Gani nagsugod sila sa pagluya tubtob sang ulihi nagtigulang sila kag napatay. Bangod naghalin kita sa ila, napanubli naton ang pagkadihimpit kag kamatayon.​—⁠Roma 5:12.

Ang Panguna nga Hulusayon​—⁠Ang Pagkasoberano

Ngaa wala ginlaglag sang Dios si Adan kag si Eva kag pagkatapos magtuga liwat sing bag-o nga pares? Bangod ginhangkat ang bug-os uniberso nga pagkasoberano sang Dios, buot silingon, ang iya kinamatarong sa paggahom. Ang pamangkot amo, Sin-o ang may kinamatarong sa paggahom, kag kay sin-o paggahom ang husto? Dugang pa, Mas mangin maayo bala ang kahimtangan sang mga tawo kon indi ang Dios ang nagagahom sa ila? Sa paghatag sa ila sing bastante nga tion nga gamiton ang ila bug-os nga kahilwayan, mapamatud-an gid sang Dios kon bala mangin maayo ang ila kahimtangan sa idalom sang iya paggahom ukon sang ila paggahom. Kinahanglan bastante nga tion ang ihatag agod matilawan sang tawo ang tanan nga sahi sang politikal, sosyal, ekonomiko, kag relihioso nga mga sistema nga wala sing pagtuytoy sang Dios.

Ano ang nangin resulta? Ang linibo ka tuig nga maragtas sang tawo nagahatag sing ebidensia nga nagdugang pa ang pag-antos. Sang nagligad nga siglo, naeksperiensiahan sang tawo ang pinakagrabe nga pag-antos. Minilyon ang ginpatay sa tion sang Bug-os Kalibutan nga Inaway II. Kapin sa 100 milyones ang napatay sa mga inaway. Lapnag ang mga krimen kag kasingki. Nangin kinaandan na ang pag-abuso sa droga sa bug-os nga kalibutan. Ang mga balatian nga ginaliton sang seksuwal nga paghuliray padayon nga nagalaton sa madamo pa. Minilyon ang nagakapatay kada tuig sa gutom kag balatian. Naguba ang mga pamilya kag nagnubo ang mga prinsipio sang tawo bisan diin. Wala sing gobierno sang tawo ang makalubad sini nga mga problema. Wala madula sang bisan sin-o sa ila ang pagtigulang, balatian, kag kamatayon.

Ang kahimtangan sang tawo subong gid sang gintagna sang Biblia para sa aton tion. Ginatawag sang Pulong sang Dios ang aton dag-on subong “ang katapusan nga mga adlaw” sining sistema sang mga butang nga sa amo nga tion “magaabot ang makahalanguyos nga mga tion nga mabudlay pakigbagayan.” Kag subong gid sang ginsiling sang Biblia, ‘ang malaut nga mga tawo kag ang mga impostor naglain kag naglain pa.’​—⁠2 Timoteo 3:1-5, 13.

Malapit Na Madula ang Pag-antos

Ginapakita sang tanan nga ebidensia nga malapit na matapos ang makapasubo nga pag-eksperimento sang tawo sa paggahom sa kaugalingon nga wala ginahilabtan sang Dios. Maathag nga napamatud-an nga indi mahimo magmadinalag-on ang paggahom sang tawo kon wala ang Dios. Ang paggahom lamang sang Dios ang makahatag sing paghidait, kalipay, himpit nga kapagros, kag kabuhi nga walay katapusan. Gani malapit na matapos ang pagtugot ni Jehova sa kalautan kag pag-antos. Sa indi madugay magapasilabot ang Dios sa kahimtangan sang mga tawo paagi sa paglaglag sa bug-os kag indi makaalayaw nga sistema sang mga butang karon.

Ang tagna sang Biblia nagasiling: “Sa mga adlaw sadto nga mga hari [mga paggahom sang tawo nga nagaluntad karon] ang Dios sang langit magapatindog sing ginharian [sa langit] nga indi gid malaglag. . . . Dugmukon sini kag papason ini tanan nga ginharian [mga pagginahom karon], kag magapadayon ini tubtob sa walay katubtuban.” (Daniel 2:44) Ang panguna nga panudlo sang Biblia amo ang pagbindikar sa pagkasoberano ni Jehova, ang iya kinamatarong sa paggahom, paagi sa iya langitnon nga Ginharian. Sang gintagna ni Jesus ang isa ka importante nga bahin sang tanda sang “katapusan nga mga adlaw,” nagsiling sia: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”​—⁠Mateo 24:14.

Kon mag-abot na ang katapusan, sin-o ang makalampuwas? Ang Biblia nagasabat: “Ang mga matadlong amo ang magapuyo sa duta, kag ang mga wala sing kasawayan amo ang magapabilin sa sini. Kon tuhoy sa mga malauton, utdon sila gikan sa duta.” (Hulubaton 2:​21, 22) Ang mga matadlong amo ang mga nagatuon sang kabubut-on ni Jehova kag nagahimo sini. Nagsiling si Jesucristo: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Huo, “ang kalibutan nagataliwan . . . , apang sia nga nagahimo sang kabubut-on sang Dios nagapabilin sing dayon.”​—⁠1 Juan 2:17.

Luwas kon tuhay ang ginapakita, ang mga kinutlo sa Kasulatan ginbadbad halin sa modernong-hambal nga New World Translation of the Holy Scriptures​​—⁠With References.