“Lakat Kamo kag Maghimo sing mga Disipulo”

1-3. (a) Ano ang ginahimo sang isa ka mangunguma kon ang patubas tuman ka dagaya kag indi niya masarangan nga anihon ini sing isahanon? (b) Ano ang problema ni Jesus sang tigpamulak sang 33 C.E., kag paano niya ini ginlubad?

HUNAHUNAA ang daku nga problema nga gin-atubang sang isa ka mangunguma sa masunod nga senaryo. Pila ka bulan antes, gin-arado niya ang iya uma kag nagsab-ug sing mga binhi. Mahalungon nga gin-atipan niya ini samtang nagaulhot ang una nga mga dahon, kag nalipay gid sia sang naglambo na ang mga tanom. Mapadyaan na karon ang iya lakas nga pagpangabudlay, kay nag-abot na ang tig-alani. Ang iya problema amo ini: Ang patubas tuman ka dagaya kag indi niya masarangan nga anihon ini sing isahanon. Agod malubad ini, maalamon sia nga namat-od sa pagkuha sing mga manugpangabudlay kag ginpadala niya sila sa iya uma. Ti, ang tion sa pag-ani sang iya hamili nga patubas limitado lamang.

² Sang tigpamulak sang 33 C.E., amo man ini ang problema sang ginbanhaw nga si Jesus. Sa iya ministeryo sa duta, nagsab-ug sia sing mga binhi sang kamatuoran. Tig-alani na karon, kag ang patubas tuman ka dagaya. Ang madamo nga nagpamati dapat tipunon subong mga disipulo niya. (Juan 4:35-38) Paano ini ginlubad ni Jesus? Sa bukid sa Galilea, antes sia nagkayab sa langit, ginsugo niya ang iya mga disipulo sa pagpangita sing dugang pa nga mga manugpangabudlay, nga nagasiling: “Busa lakat kamo kag maghimo sing mga disipulo sa mga tawo sang tanan nga pungsod, nga nagabawtismo sa ila . . . , nga nagapanudlo sa ila nga tumanon ang tanan nga butang nga ginsugo ko sa inyo.”​—Mateo 28:19, 20.

³ Ini nga sugo amo gid ang kahulugan sang mangin matuod nga sumulunod ni Cristo. Gani, binagbinagon naton ang tatlo ka pamangkot. Ngaa nagsugo si Jesus sa pagpangita sing dugang pa nga mga manugpangabudlay? Paano niya ginhanas ang iya mga disipulo sa pagpangita sa ila? Paano kita nadalahig sa sini nga sugo?

Kon Ngaa Kinahanglan ang Dugang Pa nga mga Manugpangabudlay

4, 5. Ngaa indi matapos ni Jesus ang hilikuton nga ginsugdan niya, kag sin-o ang magapadayon sang hilikuton kon magbalik na sia sa langit?

⁴ Sang ginsugdan ni Jesus ang iya ministeryo sang 29 C.E., nahibaluan niya nga indi niya matapos sing isahanon ang hilikuton nga ginsugdan niya. Sa malip-ot nga tion nga nabilin niya sa duta, ang lugar nga mabantalaan niya kag ang mga tawo nga mapalab-utan niya sing mensahe sang Ginharian limitado lamang. Matuod, nagbantala lamang sia sa mga Judiyo kag sa mga proselita, ang “nadula nga mga karnero sang panimalay sang Israel.” (Mateo 15:24) Apang, yadtong “nadula nga mga karnero” naalaplaag sa bug-os nga Israel, ang pungsod nga may kalaparon nga linibo ka kilometros kuadrados. Isa pa, ang iban pa mga bahin sang kalibutan kinahanglan man nga mapalab-utan sa ulihi sing maayong balita.​—Mateo 13:38; 24:14.

⁵ Nahangpan ni Jesus nga madamo pa sing dapat himuon pagkatapos sang iya kamatayon. Nagsiling sia sa iya 11 ka matutom nga apostoles: “Sa pagkamatuod nagasiling ako sa inyo, Sia nga nagatuo sa akon, magahimo man sia sang mga buhat nga ginahimo ko; kag magahimo sia sang mga buhat nga daku pa sa sini, bangod magakadto ako sa Amay.” (Juan 14:12) Sanglit magabalik na ang Anak sa langit, dapat padayunon sang iya mga sumulunod​—indi lamang sang mga apostoles kundi sang tanan nga palaabuton nga mga disipulo—​ang pagbantala kag pagpanudlo nga hilikuton. (Juan 17:20) Mapainubuson nga ginbaton ni Jesus nga ang ila hilikuton “daku pa” sangsa iya. Paano? Sa tatlo ka paagi.

6, 7. (a) Sa ano nga mga paagi nga ang mga buhat nga himuon sang mga sumulunod ni Jesus daku pa sa ginhimo niya? (b) Paano naton mapakita nga wala magsala si Jesus sa pagsalig niya sa iya mga sumulunod?

⁶ Una, ang mga sumulunod ni Jesus magabantala sa mas malapad nga teritoryo. Ang ila pagpanaksi karon nakalab-ot na sa mga ukbong sang duta, lampas pa sa mga dulunan sang duta nga ginbantalaan ni Jesus. Ikaduha, magabantala sila sa mas madamo nga tawo. Ang diutay nga grupo sang mga disipulo nga ginbilin ni Jesus madasig nga nangin linibo. (Binuhatan 2:41; 4:4) Minilyon na sila karon, kag ginatos ka libo nga mga bag-uhan ang ginabawtismuhan kada tuig. Ikatlo, magabantala sila sa mas malawig nga tion​—tubtob sa karon nga adlaw, pagligad sang halos 2,000 ka tuig pagkatapos sang tatlo ka tuig kag tunga nga ministeryo ni Jesus.

⁷ Nagpabutyag si Jesus sing pagsalig sa iya mga sumulunod sang nagsiling sia nga magahimo sila sang “mga buhat nga daku pa sa sini.” Gintulin niya sa ila ang isa ka hilikuton nga labing importante gid sa iya, kag ini amo ang pagbantala kag pagtudlo sing “maayong balita sang ginharian sang Dios.” (Lucas 4:42) Kumbinsido sia nga himuon nila ini sing matutom. Ano ang buot silingon sini para sa aton karon? Kon makugi kag bug-os tagipusuon nga ginahimo naton ang ministeryo, ginapakita naton nga wala magsala si Jesus sa pagsalig niya sa iya mga sumulunod. Indi bala isa ini ka tumalagsahon nga pribilehiyo?​—Lucas 13:24.

Ginhanas sa Pagpanaksi

8, 9. Ano nga halimbawa sa ministeryo ang ginhatag ni Jesus, kag paano naton mailog ang iya halimbawa sa aton ministeryo?

⁸ Ginhatagan ni Jesus ang iya mga disipulo sing labing maayo nga paghanas para sa ministeryo. Labaw sa tanan, ginhatagan niya sila sing himpit nga halimbawa. (Lucas 6:40) Sa nagligad nga artikulo, ginbinagbinag naton ang pagtamod niya sa ministeryo. Binagbinaga sa makadali ang mga disipulo nga nag-upod kay Jesus sa iya mga paglakbay sa pagbantala. Nakita nila nga nagbantala sia bisan diin nga may tawo​—sa higad sang linaw kag bakulod, sa mga siudad kag mga tiendahan, kag sa pribado nga mga puluy-an. (Mateo 5:1, 2; Lucas 5:1-3; 8:1; 19:5, 6) Nakita nila nga mapisan sia, nga nagabugtaw sing temprano pa kag nagapangabudlay tubtob sa kagab-ihon. Ang ministeryo indi lamang dibersion para sa iya! (Lucas 21:37, 38; Juan 5:17) Walay duhaduha nga nakita nila nga ginhimo niya ini bangod sang iya daku gid nga gugma sa mga tawo. Ayhan nakita nila sa iya nawong ang iya daku nga pagkaluoy. (Marcos 6:34) Ano sa banta mo ang epekto sang halimbawa ni Jesus sa iya mga disipulo? Ano ang epekto sini sa imo?

⁹ Subong mga sumulunod ni Cristo, ginailog naton ang iya halimbawa sa aton ministeryo. Gani, ginahimo naton ang aton bug-os nga masarangan agod ‘makapanaksi sing maid-id.’ (Binuhatan 10:42) Kaangay ni Jesus, ginaduaw naton ang mga tawo sa ila puluy-an. (Binuhatan 5:42) Ginapasibu naton ang aton iskedyul, kon kinahanglanon, agod maduaw naton sila sa tion nga yara sila sa puluy-an. Ginapangita kag mainandamon man naton nga ginabantalaan ang mga tawo sa publiko nga mga lugar​—sa mga dalan, mga parke, mga balaligyaan, kag sa mga ulubrahan. Padayon nga “nagapangabudlay kita sing lakas kag nagapanikasog” sa ministeryo, kay ini nga hilikuton ginakabig naton nga importante. (1 Timoteo 4:10) Bangod sang aton madalom kag tinagipusuon nga gugma sa iban, padayon kita nga nagapangita sing mga kahigayunan agod mabantalaan ang mga tawo bisan diin ukon bisan san-o sila masalapuan.​—1 Tesalonica 2:8.

10-12. Ano nga importante nga mga leksion ang gintudlo ni Jesus sa iya mga disipulo antes sila ginpadala sa pagbantala?

¹⁰ Ang isa pa ka paagi nga ginhanas ni Jesus ang iya mga disipulo amo nga ginhatagan niya sila sing detalyado nga instruksion. Antes niya ginpadala una ang 12 ka apostoles kag sang ulihi ang 70 ka disipulo sa pagbantala, ginhanas sila ni Jesus sa sini nga hilikuton. (Mateo 10:1-15; Lucas 10:1-12) Ang paghanas may maayo nga mga resulta, kay ang Lucas 10:17 nagreport: “Ang kapituan nagbalik nga malipayon.” Binagbinagon naton ang duha sa importante nga mga leksion nga gintudlo ni Jesus, kag mahangpan naton ini kon binagbinagon naton ang Judiyo nga mga kinabatasan sang panahon sang Biblia.

¹¹ Gintudluan ni Jesus ang iya mga disipulo nga magsalig kay Jehova. Nagsiling sia sa ila: “Indi kamo magdala sing bulawan ukon pilak ukon saway sa inyo mga wagkus nga puyopuyo, ukon balunan sing pagkaon sa inyo pagpanglakaton, ukon dugang nga [pang-idalom nga mga] panapton, ukon sandalyas ukon sungkod; kay ang mamumugon takus sa iya kalan-on.” (Mateo 10:9, 10) Kinaandan na para sa mga manuglakbay nga magdala sing mga wagkus nga puyopuyo para sa kuarta, balunan para sa pagkaon, kag sing ekstra nga sandalyas.a Paagi sa pagsiling sa iya mga disipulo nga indi sila dapat magkahangawa sa sini nga mga butang, daw nagsiling si Jesus: “Magsalig kamo kay Jehova, kay ihatag niya ang inyo mga kinahanglanon.” Amanan sila ni Jehova paagi sa pagpahulag sa mga nagpamati sa maayong balita nga magpakita sing pagkamaabiabihon, nga amo ang kinabatasan sa Israel.​—Lucas 22:35.

¹² Gintudluan man ni Jesus ang iya mga disipulo nga likawan ang di-kinahanglanon nga mga upang. Nagsiling sia: “Indi kamo magdulog sa pagtamyaw kay bisan sin-o sa dalan.” (Lucas 10:4) Ginsugo bala sila ni Jesus nga mangin di-mainabyanon ukon di-masinapakon? Indi gid. Sang panahon sang Biblia, ang pagtamyaw indi lamang pagpangamusta. Ang kinabatasan nga mga panamyaw nagalakip sang lainlain nga mga pormalidad kag malawig nga paghambalanay. Ang isa ka iskolar sa Biblia nagsiling: “Ang mga panamyaw sang mga taga-Sidlangan indi lamang, subong sang ginahimo naton, pagduko sang ulo, ukon pagdaho sang kamot, kundi madamo nga paghaksanay, kag pagduko tubtob sa hawak, kag paghapa pa gani sa duta. Ini tanan nagakinahanglan sing madamo nga tion.” Paagi sa pagsiling sa iya mga disipulo nga indi paghimuon ang kinabatasan nga mga panamyaw, daw nagsiling si Jesus: “Gamita sing mapuslanon ang inyo tion, kay ang inyo mensahe hilingagawon.”b

13. Sa ano nga mga paagi mapakita naton nga ginadumdom naton ang mga instruksion nga ginhatag ni Jesus sa iya unang-siglo nga mga disipulo?

¹³ Ginadumdom naton ang mga instruksion nga ginhatag ni Jesus sa iya unang-siglo nga mga disipulo. Sa paghimo sang aton ministeryo, nagasalig kita sing bug-os kay Jehova. (Hulubaton 3:5, 6) Nahibaluan naton nga indi kita makulangan sang mga kinahanglanon sa kabuhi kon ‘padayon nga pangitaon anay naton ang ginharian.’ (Mateo 6:33) Ang bug-os tion nga mga manugbantala sang Ginharian sa bug-os nga kalibutan makapamatuod nga bisan sa mabudlay nga mga tion, ang kamot ni Jehova indi malip-ot. (Salmo 37:25) Nahibaluan man naton nga dapat naton likawan ang mga upang. Kon indi kita maghalong, madali kita nga maupangan sining sistema sang mga butang. (Lucas 21:34-36) Apang, karon na ang tion nga indi kita dapat maupangan. Bangod ang kabuhi yara sa katalagman, ang aton mensahe hilingagawon. (Roma 10:13-15) Bangod pirme naton ginadumdom ang pagkahilingagawon sang tion, indi kita magtugot nga ubuson sang kalingawan sini nga kalibutan ang tion kag kusog nga mas maayo nga hinguyangon sa ministeryo. Dumduma nga ang tion nga nabilin malip-ot na lang kag ang alanyon bugana.​—Mateo 9:37, 38.

Ang Sugo nga Nagadalahig sa Aton

14. Ano ang nagapakita nga ang sugo nga ginrekord sa Mateo 28:18-20 nagadalahig sa tanan nga sumulunod ni Cristo? (Tan-awa ang footnote.)

¹⁴ Paagi sa pinamulong nga “Lakat kamo kag maghimo sing mga disipulo,” ang ginbanhaw nga si Jesus naghatag sing mabug-at nga responsibilidad sa iya mga sumulunod. Indi lamang ang mga disipulo nga didto anay sang adlaw sang tigpamulak sa bukid sang Galilea ang ginhunahuna niya.c Ang hilikuton nga ginsugo niya nagadalahig sa “mga tawo sang tanan nga pungsod,” kag nagapadayon ini “tubtob sa katapusan sang sistema sang mga butang.” Maathag gid nga ini nga sugo nagadalahig sa tanan nga sumulunod ni Cristo, lakip man sa aton karon. Binagbinagon naton sing maayo ang pinamulong ni Jesus nga narekord sa Mateo 28:18-20.

15. Ngaa maalamon nga tumanon naton ang sugo ni Jesus nga maghimo sing mga disipulo?

¹⁵ Antes ihatag ang sugo, si Jesus nagsiling: “Ginhatag sa akon ang bug-os nga awtoridad sa langit kag sa duta.” (Bersikulo 18) May amo gid bala ka daku nga awtoridad si Jesus? Huo! Sia ang arkanghel, nga nagamando sa linaksa nga mga anghel. (1 Tesalonica 4:16; Bugna 12:7) Subong “ulo sang kongregasyon,” may awtoridad sia sa iya mga sumulunod sa duta. (Efeso 5:23) Sugod sang 1914, naggahom sia subong Mesianiko nga Hari sa langit. (Bugna 11:15) Ang iya awtoridad tubtob pa gani sa lulubngan, kay may gahom sia sa pagbanhaw sa mga patay. (Juan 5:26-28) Paagi sa pagpahayag una sang iya daku nga awtoridad, ginpakita ni Jesus nga ang iya masunod nga pinamulong indi isa ka panugda kundi isa ka sugo. Maalamon nga magtuman kita, kay ang iya awtoridad indi iyaiya lamang kundi ginhatag sang Dios.​—1 Corinto 15:27.

16. Paagi sa pagsiling nga “lakat kamo,” ano ang ginasugo ni Jesus sa aton nga himuon naton, kag paano naton tumanon ini nga bahin sang sugo?

¹⁶ Ginsumaryo karon ni Jesus ang sugo, nga nagasugod sa duha ka tinaga: “Lakat kamo.” (Bersikulo 19) Gani ginasugo niya kita sa paghimo sing tikang nga mapalab-utan ang iban sing mensahe sang Ginharian. Sa pagtuman sini nga bahin sang sugo, lainlain nga mga paagi ang magamit naton. Ang pagbantala sa mga pamalay amo ang labing epektibo nga paagi agod personal nga masugilanon ang mga tawo. (Binuhatan 20:20) Nagapangita man kita sing mga kahigayunan nga makapanaksi sing di-pormal; nalangkag kita sa pag-una sa pagpakighambal tuhoy sa maayong balita bisan diin nga may higayon sa aton adlaw-adlaw nga pagkabuhi. Ang aton espesipiko nga mga paagi sa pagbantala mahimo nga nagkalainlain, kay ginapasibu ini sa lokal nga mga kinahanglanon kag mga sirkunstansia. Apang, isa ka butang ang pareho gihapon: ‘Nagalakat’ kita kag nagapangita sa mga takus.​—Mateo 10:11.

17. Paano kita ‘nagahimo sing mga disipulo’?

¹⁷ Masunod nga ginpaathag ni Jesus ang katuyuan sang sugo, nga amo, ang “maghimo sing mga disipulo sa mga tawo sang tanan nga pungsod.” (Bersikulo 19) Paano kita ‘makahimo sing mga disipulo’? Ang isa ka disipulo isa nga nagatuon, isa nga gintudluan. Apang, ang paghimo sing mga disipulo indi lamang pagpaambit sing ihibalo sa iban. Kon magtuon kita sa Biblia upod sa mga interesado, ang aton tulumuron amo ang buligan sila nga mangin sumulunod ni Cristo. Kon posible, ginapatalupangod naton ang halimbawa ni Jesus agod magatuon ang mga estudyante nga tamdon sia subong ang ila Manunudlo kag Huwaran, kag ilugon ang iya pagkabuhi kag himuon ang hilikuton nga ginhimo niya.​—Juan 13:15.

18. Ngaa ang bawtismo amo ang labing importante nga hitabo sa kabuhi sang isa ka disipulo?

¹⁸ Ang isa ka importante nga bahin sang sugo amo: “Nagabawtismo sa ila sa ngalan sang Amay kag sang Anak kag sang balaan nga espiritu.” (Bersikulo 19) Ang bawtismo amo ang labing importante nga hitabo sa kabuhi sang isa ka disipulo, kay amo ini ang nagakaigo nga simbulo sang iya bug-os tagipusuon nga dedikasyon sa Dios. Gani, kinahanglanon ini para sa kaluwasan. (1 Pedro 3:21) Huo, paagi sa padayon nga paghimo sang iya bug-os nga masarangan sa pag-alagad kay Jehova, mapaabot sang bawtismado nga disipulo ang walay katapusan nga mga pagpakamaayo sa bag-ong kalibutan nga magaabot. May nabuligan ka na bala nga mangin bawtismado nga disipulo ni Cristo? Sa Cristianong ministeryo, amo ini ang labing daku nga rason sa pagkalipay.​—3 Juan 4.

19. Ano ang ginatudlo naton sa mga bag-uhan, kag ngaa ang pagtudlo mahimo magpadayon pagkatapos sang ila bawtismo?

¹⁹ Ginpaathag ni Jesus ang masunod nga bahin sang sugo, nga nagasiling: “Nagapanudlo sa ila nga tumanon ang tanan nga butang nga ginsugo ko sa inyo.” (Bersikulo 20) Ginatudluan naton ang mga bag-uhan nga sundon ang mga sugo ni Jesus, lakip na ang sugo nga higugmaon ang Dios, higugmaon ang isigkatawo, kag mangin manughimo sing mga disipulo. (Mateo 22:37-39) Amat-amat nga ginatudluan naton sila nga ipaathag ang mga kamatuoran sang Biblia kag pangapinan ang ila nagalambo nga pagtuo. Kon kalipikado sila sa pagpakigbahin sa hilikuton nga pagbantala sa publiko, nagapangabudlay kita upod sa ila, kag ginatudluan sila paagi sa hambal kag halimbawa kon paano ini himuon sing mabungahon. Ang pagtudlo sa bag-ong mga disipulo nagapadayon bisan sa tapos nga mabawtismuhan na sila. Ang bag-ong mga bawtismado mahimo nagakinahanglan sing dugang pa nga instruksion agod buligan sila nga maatubang ang mga hangkat may kaangtanan sa pagsunod kay Cristo.​—Lucas 9:23, 24.

“Ako Kaupod Ninyo sa Tanan nga Adlaw”

20, 21. (a) Sa pagtuman sa sugo ni Jesus, ngaa wala kita sing rason sa pagkahadlok? (b) Ngaa indi karon ang tion sa paghinay, kag sa ano dapat kita mangin determinado?

²⁰ Ang katapusan nga pinamulong sa sugo ni Jesus nagapasalig gid: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:20) Nahibaluan ni Jesus nga ini nga sugo importante gid. Nahibaluan man niya nga ang pagtuman sa sini nagapaakig kon kaisa sa mga manugpamatok. (Lucas 21:12) Apang, wala sing rason sa pagkahadlok. Wala ginapaabot sang aton Lider nga himuon naton ini nga wala sing bulig ukon sing isahanon. Indi bala makalulugpay nga mahibaluan nga ang Isa nga may “bug-os nga awtoridad . . . sa langit kag sa duta” kaupod naton agod buligan kita sa pagtuman sini nga sugo?

²¹ Ginpasalig ni Jesus ang iya mga disipulo nga mangin kaupod nila sia sa ila ministeryo sa bug-os nga siglo tubtob “sa katapusan sang sistema sang mga butang.” Sa wala pa mag-abot ang katapusan, dapat naton padayon nga himuon ang sugo ni Jesus. Indi karon ang tion sa paghinay. Ang bugana nga espirituwal nga pag-ani ginahimo na karon! Ginatipon ang madamo nga nagapamati. Subong mga sumulunod ni Cristo, determinado kita nga tumanon ang importante nga sugo nga ginhatag sa aton. Mamat-od kita nga gamiton ang aton tion, enerhiya, kag pagkabutang sa pagtuman sa sugo ni Cristo: “Lakat kamo kag maghimo sing mga disipulo.”