KAPITULO 4

Ngaa Dapat Naton Tahuron ang Awtoridad?

“Padunggi ninyo ang tanan nga sahi sang tawo.” —1 PEDRO 2:17.

1, 2. (a) Kon parte sa awtoridad, ano nga kabudlayan ang aton ginaatubang? (b) Ano nga mga pamangkot ang pagabinagbinagon naton?

NAKAKITA ka na bala sang bata nga ginasugo nga himuon ang isa ka butang nga indi niya gusto himuon? Ano ang iya reaksion? Mahimo nagakusmod sia. Nabatian niya ang sugo sang iya ginikanan kag nahibaluan niya nga dapat niya tahuron ang awtoridad sang iya ginikanan. Apang, indi lang niya gusto magtuman. Kon kaisa, amo man sini ang nagakatabo sa aton.

² Indi pirme mahapos sa aton nga tumanon ukon tahuron ang awtoridad. Nabatyagan mo man bala kon kaisa nga mabudlay tahuron ang mga may awtoridad sa aton? Kon amo indi lamang ikaw ang nagabatyag sina. Madamo karon ang wala nagatahod sa awtoridad. Apang, ang Biblia nagasiling nga dapat naton tahuron ang mga may awtoridad sa aton. (Hulubaton 24:21) Sa katunayan, amo gid sini ang dapat naton himuon kon luyag naton nga makapabilin sa gugma sang Dios. Kon amo, natural lang nga mamangkot kita: Ngaa mabudlay tahuron ang awtoridad? Ngaa ginsugo kita ni Jehova nga tahuron ang awtoridad, kag ano ang makabulig sa aton sa pagtuman sini? Kag paano naton mapakita ang pagtahod sa awtoridad?

KON NGAA MABUDLAY INI

3, 4. Paano nagsugod ang sala kag ngaa ang aton pagkadihimpit nagapabudlay sa aton nga tahuron ang awtoridad?

³ Binagbinagon naton sing makadali ang duha ka rason kon ngaa mabudlay tahuron ang awtoridad. Una, indi kita himpit; ikaduha, indi man himpit ang mga tawo nga may awtoridad. Ang sala kag pagkadihimpit sang tawo nagsugod pa sadto sa hardin sang Eden sang si Adan kag si Eva nagrebelde sa awtoridad sang Dios. Gani, ang sala nagsugod bangod sa pagrebelde. Amo nga tubtob karon may huyog kita nga magrebelde.—Genesis 2:15-17; 3:1-7; Salmo 51:5; Roma 5:12.

⁴ Bangod makasasala kita, mahapos lang mangibabaw sa aton ang bugal kag pagkamatinaastaason, samtang kinahanglan gid naton ang daku nga panikasog agod mapalambo kag mahuptan ang pagkamapainubuson. Bisan pa madugay na kita nga nagaalagad sa Dios sing matutom, mahimo kita magpadala sa bugal kag pagkabatinggilan. Binagbinaga ang halimbawa ni Kora. Sang yara sa mabudlay gid nga kahimtangan ang katawhan ni Jehova, gin-unungan niya sila. Apang sang ulihi, ginhandum niya ang dugang nga awtoridad kag matampalason nga nanguna sa pagrebelde batok kay Moises, ang labing mapainubuson nga tawo nga nagkabuhi sadtong tion. (Numeros 12:3; 16:1-3) Bugal man ang rason kon ngaa nagsulod sa templo ni Jehova si Hari Uzias kag naghimo sing sagrado nga buluhaton nga para lang kuntani sa mga saserdote. (2 Cronica 26:16-21) Ginsilutan ini nga mga lalaki bangod sang ila pagrebelde. Apang, ang ila indi maayo nga halimbawa mapuslanon gid nga mga pahanumdom sa aton tanan. Dapat naton batuan ang bugal nga nagapabudlay sa aton sa pagtahod sa awtoridad.

5. Paano ginagamit sang indi himpit nga mga tawo ang ila awtoridad sing indi nagakaigo?

⁵ Sa pihak nga bahin, daku man ang nahimo sang indi himpit nga mga tawo nga yara sa posisyon kon ngaa nadula ang pagtahod sa awtoridad. Madamo ang mapintas, nagapang-abuso, ukon nagapamigos. Ginapakita sang maragtas ang madamo nga pag-abuso sang mga yara sa awtoridad. (Basaha ang Manugwali 8:9.) Halimbawa, si Saul isa ka maayo kag mapainubuson nga tawo sang ginpili sia ni Jehova nga mangin hari. Apang, sang ulihi nangin bugalon sia kag mahisaon kag ginhingabot niya ang matutom nga si David. (1 Samuel 9:20, 21; 10:20-22; 18:7-11) Sang ulihi, si David nangin isa sa pinakamaayo nga mga hari sang Israel, apang gingamit niya ang iya gahom sing indi nagakaigo sang ginkuha niya ang asawa ni Urias nga Hethanon kag ginbutang ang inosente nga si Urias sa atubangan sang patag-awayan agod mapatay. (2 Samuel 11:1-17) Bangod sa pagkadihimpit nabudlayan gid ang mga tawo sa paggamit sang ila gahom sing nagakaigo. Kag kon ang may awtoridad wala sing pagtahod kay Jehova, mas malain pa gid ang ginahimo nila. Sa tapos malaragway ang lapnag nga paghingabot nga ginpangunahan sang pila ka Katoliko nga mga papa, ang isa ka Britaniko nga pulitiko nagsiling: “Ang gahom mahimo gamiton sa kalainan, kag ang walay latid nga gahom nagapalain pa gid.” Bangod sini, binagbinagon naton ang pamangkot: Ngaa dapat naton tahuron ang awtoridad?

NGAA DAPAT TAHURON ANG AWTORIDAD?

6, 7. (a) Bangod ginahigugma naton si Jehova, ano ang dapat naton himuon kag ngaa? (b) Ano ang nadalahig sa pagpasakop, kag paano naton ini ipakita?

⁶ Ang pinakamaayo nga mga rason kon ngaa dapat naton tahuron ang awtoridad amo ang aton gugma kay Jehova, sa aton isigkatawo, kag sa aton kaugalingon. Bangod ginahigugma gid naton si Jehova labaw sa tanan, luyag naton pasadyahon ang iya tagipusuon. (Basaha ang Hulubaton 27:11; Marcos 12:29, 30.) Nahibaluan naton nga ang iya soberanya ukon kinamatarong sa paggahom sa uniberso ginhangkat sa duta sugod pa sang pagrebelde sa Eden. Ang kalabanan nga tawo nagdampig kay Satanas kag ginsikway nila ang paggahom ni Jehova. Nalipay kita sa pagsakdag sa soberanya ni Jehova. Amo nga mapahulag gid kita kon ginabasa naton ang mga pinamulong sa Bugna 4:11. Maathag gid sa aton nga si Jehova ang may kinamatarong sa paggahom sa bug-os nga uniberso! Gani, ginasakdag naton ang pagkasoberano ni Jehova kag ginatuman sia sa adlaw-adlaw naton nga pagkabuhi.

⁷ Ang pagtahod sa awtoridad ni Jehova wala lamang nagakahulugan sing pagkamatinumanon. Ginatuman naton si Jehova bangod ginahigugma naton sia. Apang, may mga tion nga mabudlay gid ang pagtuman sa iya. Sa sini nga kahimtangan, kaangay sang bata nga ginsambit sa umpisa, kinahanglan naton tun-an nga magpasakop. Kon madumduman pa naton, nagpasakop si Jesus sa kabubut-on sang iya Amay bisan pa mabudlay gid ini himuon. Ginsilingan niya ang iya Amay: “Indi ang akon kabubut-on ang matuman kundi ang imo.”—Lucas 22:42.

8. (a) Ano ang nalakip sa pagpasakop sa awtoridad ni Jehova karon, kag ano ang ginabatyag niya kon magrebelde kita? (b) Ano ang makabulig sa aton nga pamatian ang laygay kag batunon ang disiplina? (Tan-awa ang kahon nga “Pamatii ang Laygay kag Batuna ang Disiplina.”)

⁸ Si Jehova wala na karon nagapakighambal sa aton sing direkta. Ginagamit niya ang iya Pulong kag tiglawas nga mga tawo sa duta. Gani, nagapasakop kita sa awtoridad ni Jehova kon ginatahod naton ang mga tawo nga ginbutang niya ukon ginatugutan pa niya nga magpabilin sa ila katungdanan. Kon magrebelde kita sa ila paagi sa pagsikway sang ila base-sa-Kasulatan nga laygay kag pagtadlong, mapaakig naton ang aton Dios. Sang nagreklamo ang mga Israelinhon kag nagrebelde batok kay Moises, ginkabig yadto ni Jehova nga pagrebelde batok sa Iya.—Numeros 14:26, 27.

9. Ngaa ang aton gugma sa aton isigkatawo magapahulag sa aton nga tahuron ang awtoridad? Iilustrar.

⁹ Ginatahod man naton ang awtoridad bangod ginahigugma naton ang aton isigkatawo. Paano? Ibutang ta nga isa ikaw ka soldado. Ang kadalag-an sang mga soldado kag ang kabuhi sang kada isa mahimo gid nga nagadepende sa pagkooperar, pagtuman, kag pagtahod sa mga opisyal. Kon ginapakadiutay mo ini nga kahimusan kag magrebelde ka, mabutang gid sa katalagman ang mga upod mo nga soldado. Sa karon, daku nga halit ang ginahimo sang mga soldado sa kalibutan. Apang, may mga soldado si Jehova nga ang ginahimo para gid sa kaayuhan sang mga tawo. Ginatos ka beses nga ginapatuhuyan sang Biblia ang Dios subong “Jehova sang mga kasuldadusan.” (1 Samuel 1:3) Sia ang Kumandante sang linaksa nga gamhanan nga espiritu nga mga tinuga. Kon kaisa, ginapaanggid ni Jehova ang iya dutan-on nga mga alagad sa hangaway ukon mga soldado. (Salmo 68:11; Ezequiel 37:1-10) Kon indi kita magpasakop sa mga tawo nga ginagamit ni Jehova sa pagdumala sa aton, indi ayhan nga ginabutang naton sa katalagman ang aton kaupod nga espirituwal nga mga soldado? Kon ang isa ka Cristiano magrebelde batok sa gintangdo nga mga gulang, ang iban sa kongregasyon maapektuhan man. (1 Corinto 12:14, 25, 26) Kon magrebelde ang bata, ang bilog nga pamilya maapektuhan man. Gani, mapakita naton ang gugma sa aton isigkatawo kon mangin matinahuron kag mapinasakupon kita sa awtoridad.

10, 11. Ngaa dapat naton tumanon ang awtoridad?

¹⁰ Ginatahod man naton ang awtoridad bangod para ini sa aton kaayuhan. Kon ginasugo kita ni Jehova nga tahuron ang awtoridad, sa masami ginasiling niya ang mga benepisyo nga matigayon naton. Halimbawa, ginasilingan niya ang mga kabataan nga tumanon nila ang ila mga ginikanan kay mangin malipayon sila kag magalawig ang ila kabuhi. (Deuteronomio 5:16; Efeso 6:2, 3) Ginasilingan niya kita nga tumanon naton ang mga gulang sa kongregasyon agod indi kita mahalitan sa espirituwal. (Hebreo 13:7, 17) Kag ginasugo man niya kita nga tumanon ang sekular nga mga awtoridad kay para ini sa aton kaayuhan.—Roma 13:4.

¹¹ Bangod nahibaluan na naton ang mga rason kon ngaa luyag ni Jehova nga mangin matinumanon kita, indi bala nga mas mahapos na karon para sa aton nga tahuron ang awtoridad? Binagbinagon naton kon paano naton mahimo ini sa tatlo ka bahin sang aton kabuhi.

SA PAMILYA

12. Ano nga katungdanan ang ginhatag ni Jehova sa mga bana kag amay sang pamilya, kag paano nila ini matungdan?

¹² Si Jehova ang naghimo sang kahimusan sa pamilya. Bangod Dios sia sang kahim-ong, gin-organisar niya ang pamilya agod mangin madinalag-on ini. (1 Corinto 14:33) Ginhatagan niya sing awtoridad ang bana kag amay nga mangin ulo sang pamilya. Mapakita sang bana ang pagtahod sa iya Ulo nga si Cristo Jesus kon ilugon niya ang paagi ni Jesus sa pagdumala sa kongregasyon. (Efeso 5:23) Gani, indi dapat pagpabay-an sang bana ang iya katungdanan kundi dapat tungdan niya ini. Dapat indi sia mapiguson kag matigdas kundi mahigugmaon, makatarunganon, kag mainayuhon. Dumdumon niya nga may limitasyon ang iya awtoridad kag indi ini labaw sa awtoridad ni Jehova.

Ginailog sang Cristiano nga amay kon paano ginatungdan sang Cristo ang iya pagkaulo

13. Paano mangin kalahamut-an kay Jehova ang pagtungod sang asawa ukon iloy sa iya katungdanan?

¹³ Gintangdo ni Jehova ang asawa ukon iloy nga mangin kabulig sang iya bana ukon kaupod nga bagay sa iya. Ginhatagan man sia sing awtoridad sa pamilya kay ang Biblia nagsambit tuhoy sa “pagtudlo sang imo iloy.” (Hulubaton 1:8) Apang, ang iya awtoridad kubos sangsa iya bana. Mapakita sang Cristianong asawa ang pagtahod sa awtoridad sang iya bana kon buligan niya sia nga matungdan ang iya katungdanan subong ulo sang pamilya. Indi niya dapat paghikayan, diktahan, ukon pangunahan ang iya bana. Sa baylo, dapat niya sia sakdagon kag buligan. Kon indi sia ugyon sa mga desisyon sang iya bana, mahimo sia magpanugda sing matinahuron, apang dapat sia gihapon magpasakop sa desisyon sang iya bana. Kon ang iya bana indi tumuluo, mahimo magaatubang sia sing mga kabudlayan. Apang, kon mapinasakupon sia, basi pa lang mapahulag ang iya bana nga kilalahon si Jehova.—Basaha ang 1 Pedro 3:1.

Mahigugmaon nga gintadlong sang amay ang iya anak nga nagdala sang lunang sa sulod sang balay

14. Paano mapahalipay sang mga kabataan si Jehova kag ang ila mga ginikanan?

¹⁴ Mapahalipay gid sang mga kabataan si Jehova kon ginatuman nila ang ila amay kag iloy. Mapadunggan man nila kag mapahalipay ang ila mga ginikanan. (Hulubaton 10:1) Dapat mangin matinumanon gid ang mga kabataan ilabi na kon nagasolo lang ang ila ginikanan kay nahibaluan nila nga mas kinahanglan sang ila ginikanan ang ila bulig kag kooperasyon. Mangin mahidaiton kag malipayon ang pamilya kon ang tagsa ka katapo sini nagatuman sang ila hatag-Dios nga katungdanan. Nagapadungog ini sa Tagtukod sang tanan nga pamilya, si Jehova nga Dios.—Efeso 3:14, 15.

SA KONGREGASYON

15. (a) Paano naton mapakita sa kongregasyon nga ginatahod naton ang awtoridad ni Jehova? (b) Ano nga mga prinsipio ang makabulig sa aton nga mangin matinumanon sa mga nagapanguna sa aton? (Tan-awa ang kahon nga “Mangin Matinumanon sa mga Nagapanguna sa Inyo.”)

¹⁵ Gintangdo ni Jehova ang iya Anak subong Manuggahom sa Cristianong kongregasyon. (Colosas 1:13) Dayon, gintangdo ni Jesus ang iya “matutom kag mainandamon nga ulipon” agod atipanon ang espirituwal nga mga kinahanglanon sang katawhan sang Dios sa duta. (Mateo 24:45-47) Ang Nagadumala nga Hubon sang mga Saksi ni Jehova amo ang “matutom kag mainandamon nga ulipon.” Kaangay sa unang siglo nga Cristianong mga kongregasyon, ang mga gulang karon nagabaton sing mga instruksion kag laygay gikan sa Nagadumala nga Hubon sing direkta ukon paagi sa mga tiglawas sini, subong sang mga nagalakbay nga manugtatap. Kon ginatahod naton ang awtoridad sang Cristianong mga gulang, ginatuman naton si Jehova.—Basaha ang 1 Tesalonica 5:12; Hebreo 13:17.

16. Paano nga ang mga gulang gintangdo sang balaan nga espiritu?

¹⁶ Indi himpit ang mga gulang kag mga ministeryal nga alagad. Nagasayop man sila kaangay sa aton. Apang, ang mga gulang “mga dulot nga mga lalaki” nga gin-aman agod buligan ang kongregasyon nga magpabilin nga mabakod sa espirituwal. (Efeso 4:8) Gintangdo sila sang balaan nga espiritu. (Binuhatan 20:28) Paano? Dapat nila anay lab-uton ang mga kalipikasyon nga yara sa Pulong sang Dios nga ang pagsulat gintuytuyan sang balaan nga espiritu. (1 Timoteo 3:1-7, 12; Tito 1:5-9) Nian, ang mga gulang nga nagabinagbinag sang kalipikasyon sini nga utod hanuot nga nagapangamuyo nga tuytuyan sila sang balaan nga espiritu ni Jehova.

17. Ngaa nagapandong ang Cristianong mga babayi sa pagdumala sang pila ka hilikuton sang kongregasyon?

¹⁷ May mga tion nga wala sing gulang ukon ministeryal nga alagad nga maghimo sang pila ka hilikuton sang kongregasyon nga sa masami ginadumalahan nila, kaangay sa miting para sa pag-alagad sa latagon. Kon amo, mahimo ini dumalahan sang iban nga bawtismado nga utod nga lalaki. Kon wala gid, mahimo ini dumalahan sang kalipikado nga Cristianong mga babayi. Apang, kon tungdan sang isa ka utod nga babayi ang hilikuton nga dapat tungdan sang bawtismado nga lalaki, dapat sia magpandong.a (1 Corinto 11:3-10) Ini nga kahimusan wala nagapakanubo sa mga babayi. Sa baylo, isa ini ka kahigayunan nga mapakita nila ang pagtahod sa kahimusan ni Jehova sa pagkaulo, sa pamilya kag sa kongregasyon.

SA SEKULAR NGA MGA AWTORIDAD

18, 19. (a) Paano mo mapaathag ang prinsipio nga narekord sa Roma 13:1-7? (b) Paano naton mapakita ang pagtahod sa sekular nga awtoridad?

¹⁸ Ginasunod gid sang matuod nga mga Cristiano ang prinsipio nga narekord sa Roma 13:1-7. (Basaha.) Samtang ginabasa mo ini nga teksto, makita mo nga ang “mataas nga mga awtoridad” nga ginsambit diri nagapatuhoy sa mga gobierno sang tawo. Tubtob ginatugutan pa sila ni Jehova nga magluntad, nagahatag sila sa aton sing importante nga mga serbisyo pareho sang pagpaluntad sing kahim-ong. Mapakita naton ang pagtahod sa sini nga mga awtoridad paagi sa pagtuman sa mga kasuguan. Ginapat-od gid naton nga ginabayaran naton ang aton buhis, bunayag kita sa pagsulat sang mga impormasyon sa mga dokumento nga ginapangayo sang gobierno, kag ginatuman naton ang mga kasuguan nga nadalahig kita, ang aton pamilya, negosyo, ukon mga propiedad. Apang, kon suguon nila kita nga indi magtuman sa Dios wala kita nagapasakop sa ila. Sa baylo, kaangay sang mga apostoles sang una, nagasiling kita: “Dapat namon tumanon ang Dios subong manuggahom sa baylo sang mga tawo.”—Binuhatan 5:28, 29; tan-awa ang kahon nga “Kay Sin-o Awtoridad ang Dapat Ko Tumanon?”

¹⁹ Mapakita man naton ang pagtahod sa sekular nga awtoridad paagi sa aton pagpakig-angot sa ila. Kon kaisa, kinahanglan kita makig-istorya sing personal sa mga opisyal sang gobierno. Nasugilanon ni apostol Pablo si Hari Herodes Agripa kag si Gobernador Festo. Bisan pa grabe ang sala sining mga tawo, gintahod sila ni Pablo. (Binuhatan 26:2, 25) Ginailog naton ang halimbawa ni Pablo kon nagapakig-angot kita sa mataas nga mga opisyal ukon sa mga pulis sa aton lugar. Sa eskwelahan naman, ginatinguhaan gid sang Cristianong mga kabataan nga mangin matinahuron sa ila mga manunudlo, kag sa mga opisyal kag empleyado sang eskwelahan. Siempre pa, dapat naton tahuron indi lamang ang mga tawo nga nagapamati sa aton kundi ang mga nagapamatok man sa mga Saksi ni Jehova. Dapat makita sang mga di-tumuluo nga matinahuron kita.—Basaha ang Roma 12:17, 18; 1 Pedro 3:15.

20, 21. Ano ang pila ka pagpakamaayo nga aton matigayon kon nagapakita kita sing nagakaigo nga pagtahod sa awtoridad?

²⁰ Indi kita dapat mangalag-ag sa pagpakita sing pagtahod. Si apostol Pedro nagsulat: “Padunggi ninyo ang tanan nga sahi sang tawo.” (1 Pedro 2:17) Kon makita sang mga tawo nga matinahuron kita sa ila, mahimo nga magdayaw gid sila. Dumduma nga talagsahon na lang ini nga kinaiya. Kon ipakita naton ini, ginatuman naton ang sugo ni Jesus: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.”—Mateo 5:16.

²¹ Sa sining madulom nga kalibutan, ang bunayag sing tagipusuon nga mga tawo nagakaganyat sa espirituwal nga kapawa. Gani, kon matinahuron kita sa sulod sang pamilya, sa sulod sang kongregasyon, kag sa sekular nga awtoridad mahimo maganyat kag mapahulag ang iban nga maglakat upod sa aton sa kapawa. Makalilipay gid ini! Apang kon indi gid man ini matabo, isa ka butang ang mapat-od naton. Ang aton pagtahod sa mga tawo magapahamuot kay Jehova nga Dios kag magabulig sa aton nga makapabilin sa iya gugma. May mas maayo pa bala nga padya sa sini?

a Ginabinagbinag sang artikulo sa Apendise nga “Pagpandong—San-o kag Ngaa?” ang pila ka praktikal nga paagi sa pag-aplikar sini nga prinsipio.

“PAMATII ANG LAYGAY KAG BATUNA ANG DISIPLINA”

Ang kalibutan karon puno sang espiritu ni Satanas—ang iya rebelyuso kag palabato nga panimuot. Amo kon ngaa ginatawag sang Biblia si Satanas nga “manugdumala sang awtoridad sang hangin,” kag ginhinambitan sini ang resulta nga “espiritu nga nagapanghikot na karon sa mga anak sang pagkadimatinumanon.” (Efeso 2:2) Madamo karon ang indi gid luyag nga magpasakop sa awtoridad sang iban. Makapasubo nga may pila pa gani sa Cristianong kongregasyon nga nalatnan sini nga panimuot. Halimbawa, mahimo maglaygay ang gulang tuhoy sa katalagman sang imoral ukon masingki nga mga kalingawan, pero ang iban mahimo nga indi mamati ukon maakig pa gani. Dapat iaplikar sang kada isa sa aton ang ginasiling sang Hulubaton 19:20: “Pamatii ang laygay kag batuna ang disiplina, agod sa ulihi mangin maalamon ka.”

Ano ang makabulig sa aton agod maaplikar ini? Binagbinaga ang tatlo ka kinaandan nga rason kon ngaa indi magbaton ang mga tawo sing laygay ukon disiplina, kag talupangda ang ginasiling sang Biblia tuhoy sini.

“Sa banta ko ang laygay indi bagay sa akon.” Ayhan magbatyag kita nga ang laygay indi bagay sa aton kahimtangan ukon wala nahangpan sang manuglaygay ang bug-os nga hitabo. Mahimo nga pakadiutayon naton gilayon ang laygay. (Hebreo 12:5) Bangod tanan kita indi himpit, indi ayhan nga ang dapat naton tadlungon amo ang aton pagtamod? (Hulubaton 19:3) Indi ayhan nga may rason gid man nga laygayan kita? Kon amo, ini ang dapat naton hatagan sing igtalupangod. Ginalaygayan kita sang Pulong sang Dios: “Panguyapot ka sa disiplina; indi ini pagbuy-i. Amligi ini, kay nagakahulugan ini sang imo kabuhi.”—Hulubaton 4:13.
“Wala ko naluyagan ang paagi sang paglaygay.” Matuod, ang Pulong sang Dios naghatag sing mataas nga talaksan kon paano dapat ihatag ang laygay. (Galacia 6:1) Apang ang Biblia nagsiling man: “Ang tanan nakasala kag wala makalab-ot sa himaya sang Dios.” (Roma 3:23) Ang makahatag lamang sing himpit nga laygay sa nagakaigo gid nga paagi amo ang himpit nga tawo. (Santiago 3:2) Ginagamit ni Jehova ang indi himpit nga mga tawo sa paglaygay sa aton, gani maalamon gid nga likawan naton nga magpokus sa paagi sang paglaygay. Sa baylo, pabaloran naton ang laygay mismo, dayon ipangamuyo naton ini kag binagbinagon kon paano ini maaplikar.
“Wala sia sing kinamatarong nga laygayan ako!” Kon nagahunahuna kita nga indi kalipikado ang isa sa paglaygay sa aton bangod sang iya mga kaluyahon, dapat naton binagbinagon liwat ang mga punto nga ginsambit na. Kag kon nagabatyag kita nga indi naton kinahanglan ang laygay bangod sang aton edad, eksperiensia, ukon mga katungdanan sa kongregasyon, dapat naton tadlungon ang aton panghunahuna. Sa dumaan nga Israel, ang hari madamo gid sing katungdanan, apang kinahanglan niya batunon ang laygay sang mga manalagna, mga saserdote, kag sang pila niya ka sakop. (2 Samuel 12:1-13; 2 Cronica 26:16-20) Sa karon, gintangdo sang organisasyon ni Jehova ang indi himpit nga mga lalaki sa paghatag sing laygay, kag ang hamtong nga mga Cristiano nalipay sa pagbaton kag pag-aplikar sini. Kon mas madamo kita sing katungdanan ukon eksperiensia sangsa iban, labi na nga dapat naton hunahunaon nga mangin halimbawa sa pagkamakatarunganon kag pagkamapainubuson paagi sa pagbaton kag pag-aplikar sing laygay.—1 Timoteo 3:2, 3; Tito 3:2.

Tanan kita nagakinahanglan sing laygay. Gani, dapat handa gid kita sa pagbaton kag pag-aplikar sing laygay, kag pasalamatan sing tinagipusuon si Jehova sa sining nagaluwas-kabuhi nga dulot. Ang laygay isa gid ka pagpahayag sang gugma ni Jehova sa aton kag luyag naton nga magpabilin sa gugma sang Dios.—Hebreo 12:6-11.

“MANGIN MATINUMANON SA MGA NAGAPANGUNA SA INYO”

Kinahanglan gid ang pag-organisar sa dumaan nga Israel. Indi matatapan ni Moises ang minilyon ka tawo samtang nagalakbay sila sa makatalagam nga kamingawan. Ano ang iya ginhimo? “Nagpili si Moises sing sangkol nga mga lalaki sa bug-os nga Israel kag ginhatagan sila sing katungdanan nga manguna sa katawhan, bilang pangulo sang kada 1,000, pangulo sang kada 100, pangulo sang kada 50, kag pangulo sang kada 10.”—Exodo 18:25.

Sa karon, kinahanglan man ang pag-organisar sa Cristianong kongregasyon. Amo kon ngaa ang grupo sa pag-alagad sa latagon may manugtatap, ang kongregasyon may mga gulang, ang grupo sang mga kongregasyon may mga manugtatap sang sirkito, kag ang isa ka pungsod may Komite sang Pungsod ukon Komite sang Sanga. Paagi sini nga pag-organisar, matatapan sing maayo sang manugbantay ang mga karnero ni Jehova nga ginapaatipan sa ila. May salabton ining mga manugbantay kay Jehova kag sa Cristo.—Binuhatan 20:28.

Gani ang kada isa sa aton dapat magtuman kag magpasakop sa sini nga kahimusan. Indi naton luyag nga mangin kaangay ni Diotrefes, nga wala sing pagtahod sa mga nagapanguna. (3 Juan 9, 10) Sa baylo, luyag naton sundon ang ginsiling ni apostol Pablo: “Mangin matinumanon sa mga nagapanguna sa inyo kag mangin mapinasakupon, kay ginabantayan nila kamo subong nga sila ang manabat, agod himuon nila ini nga may kalipay kag wala nagapanghayhay, kay makahalit ini sa inyo.” (Hebreo 13:17) Ang iban nagatuman lamang kon ugyon sila sa ginasiling sang nagadumala sa ila, apang kon indi sila ugyon ukon kon indi nila mahangpan ang rason sa sini, wala sila nagapasakop. Apang, dumdumon naton nga ang pagpasakop nagakahulugan man nga dapat kita magtuman bisan pa indi kita ugyon sa mga kahimusan. Gani, dapat naton pamangkuton ang aton kaugalingon, ‘Matinumanon bala ako kag nagapasakop sa mga nagapanguna?’

Siempre pa, wala ginadetalye sang Pulong sang Dios ang tanan nga instruksion ukon kahimusan sa sulod sang kongregasyon. Apang, ang Biblia nagasiling: “Himua ninyo ang tanan sing nagakaigo kag suno sa kahimusan.” (1 Corinto 14:40) Ginasunod sang Nagadumala nga Hubon ini nga panuytoy paagi sa paghatag sing mapuslanon nga mga instruksion kag panuytoy agod mangin mahim-ong kag organisado ang kongregasyon. Nagapakita sing maayo nga halimbawa ang mga gulang kag mga ministeryal nga alagad sa pagkamatinumanon paagi sa pagsunod sining mga kahimusan. Ginapakita man nila nga sila “makatarunganon, handa sa pagtuman” sa mga nagadumala sa ila. (Santiago 3:17) Gani ang mga tumuluo sa kada grupo, kongregasyon, sirkito, kag pungsod mangin mahim-ong kag nahiusa nga nagadayaw sa aton malipayon nga Dios.—1 Corinto 14:33; 1 Timoteo 1:11.

Sa pihak nga bahin, ginpadaku man sang pinamulong ni Pablo sa Hebreo 13:17 kon ngaa makahalalit ang indi matinumanon nga panimuot. Mahimo ini bangdan sang ‘pagpanghayhay’ sang mga nagapanguna samtang ginahimo nila ang ila katungdanan. Ang pribilehiyo sa sagrado nga pag-alagad mahimo nga mangin kabug-atan kon ang isa sa panong wala nagakooperar kag rebelyuso. Subong resulta, makahalit ini sa “inyo” kag sa bug-os nga kongregasyon. Apang, may isa pa ka makahalalit nga resulta kon ang isa indi magpasakop sa teokratikong kahimusan. Mahalitan ang iya kaangtanan sa iya langitnon nga Amay kon indi sia magpasakop bangod sa pagkabugalon. (Salmo 138:6) Gani, dapat determinado kita nga magpabilin nga matinumanon kag mapinasakupon.