Gusto Gid ni Rebeca nga Malipay si Jehova

Si Rebeca isa ka babayi nga nagapalangga gid kay Jehova. Ang iya bana amo si Isaac kag palangga man niya si Jehova. Pero paano nakilala ni Rebeca si Isaac? Paano niya ginpakita nga gusto niya nga malipay si Jehova? Istoryahan ta anay ang parte sa bana ni Rebeca nga si Isaac.

Si Abraham kag si Sara ang nanay kag tatay ni Isaac. Sa Canaan sila nagaistar, kag ang mga tawo diri wala nagasimba kay Jehova. Pero gusto ni Abraham nga ang pangasaw-on ni Isaac nagasimba kay Jehova. Gani ginpadala niya ang iya alagad, nga mahimo Eliezer ang ngalan, para mangita sing palangasaw-on ni Isaac sa lugar sang Haran. Diri nagaistar ang mga paryente ni Abraham.

Naglakat si Eliezer kag ang iban pa nga suluguon ni Abraham. Malayo gid ang ila kadtuan. Nagdala sila sing pulo ka kamelyo nga ginkargahan nila sing pagkaon kag mga regalo. Paano mabal-an ni Eliezer kon sin-o ang iya pilion para kay Isaac? Sang nag-abot si Eliezer kag ang mga suluguon sa Haran, nagpahuway sila anay sa bubon kay kabalo sia nga dugaydugay magasag-ub na diri ang mga tawo. Nagpangamuyo sia kay Jehova, ‘Kon ang babayi nga pangayuan ko sing tubig magpainom sa akon kag sa akon mga kamelyo, buot silingon sia na ang ginpili mo.’

Dugaydugay, nag-abot si Rebeca. Ginasugid sang Biblia nga guapa gid sia. Nangayo sa iya si Eliezer sing tubig nga mainom, kag si Rebeca nagsiling: ‘Sige, kag sag-uban ko man pati ang imo mga kamelyo.’ Pero kabalo ka bala nga puerte kadamo mag-inom ang uhaw nga mga kamelyo? Gani, pila ka beses nga nagpakadto-pakari sa bubon si Rebeca. Nakita mo bala sa piktyur nga indi mahapos ang iya ginahimo?— Nagdayaw gid si Eliezer sa sabat ni Jehova sa iya pangamuyo.

Ginhatagan ni Eliezer si Rebeca sing manami nga mga regalo. Dayon, gin-agda niya si Eliezer kag ang iban pa nga suluguon sa ila balay. Ginpaathag ni Eliezer kon ngaa ginpakadto sia ni Abraham kag kon paano ginsabat ni Jehova ang iya pangamuyo. Nagpasugot ang pamilya ni Rebeca nga pangasaw-on sia ni Isaac.

Pero sa banta mo, gusto man bala ni Rebeca nga pamanahon si Isaac?— Kabalo si Rebeca nga si Jehova ang nagpadala kay Eliezer. Gani, sang ginpamangkot sia sang iya pamilya kon bala gusto niya mag-upod sa Canaan para pamanahon si Isaac, nagsabat sia: ‘Huo, maupod ’ko.’ Nag-upod sia dayon kay Eliezer kag pag-abot nila sa Canaan, ginpamana niya si Isaac.

Ginhimo ni Rebeca ang gusto ni Jehova, gani ginpakamaayo sia. Pagligad sang madamo nga tinuig, natawo sa ila pamilya si Jesus! Kon ilugon mo si Rebeca, malipay sa imo si Jehova kag pakamaayuhon ka man niya.